Gơs cau pơnyơu bơta dòn he dê bè dô nơm krơh rgơi sên gó tus tòm tiah ngai, dong he sên gó lơgar đăng trồ gam sum sum tòm Yàng. Mơya, gơs dô nơm thul rai kis kòp ngai dê rung tòm hớ, gen bơta sên gó hớ roh thit, mơya ală bơta he sên gó la bơta rngòt rngơt hơđap he lơm. Gơs nđò dớ ồng mò oh mi mơ ẵn lòi “thul” bơta bol glar kal ke dê lơh he in ò rgơi sên gó bơta nđàc Yàng dê neh rcang he in taih?

Ngai do, ngai 06/07/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume BƠTA SỀN LIAH KON MƠNÙS DÊ

“Bơh ală bơta kơlôi sơnơng Añ jê ò di la ală bơta kơlôi sơnơng bol mê dê, hala ală gùng dà bol mê dê kung ò di la ală gùng dà Añ jê.” (Esai 55:8)

“Bơh ală bơta kơlôi sơnơng Añ jê ò di la ală bơta kơlôi sơnơng bol mê dê, hala ală gùng dà bol mê dê kung ò di la ală gùng dà Añ jê.” Yàng Jehôwa đơs behơ̆. “Bơh be ală tap trồ la jơnhoa rlau mơ plai ù kàr lơi, gen ală gùng dà Añ jê la jơnhoa rlau mơ ală gùng dà bol mê dê, mơ ală bơta kơlôi sơnơng Añ jê kung jơnhoa rlau mơ ală bơta kơlôi sơnơng bol mê dê kàr hơ̆ sơl.” (Êsai 55:8-9)

Ală bơta rung rài mơ Yàng Tòm Trồ duh hơđang lơgar E-jip-tơ nàng sôr bơtau Pharaôn “Lòi té lang bol Ẵn jê lòt” neh lòi wơl tòm lang bol E-jip-tơ mơ lang bol Israel in dô bơta rngòt rngơt ò tú lơi roh. Tú lang bol E-jip-tơ pal kong bơta jê sồt bol glar bơh gơnap gơnoar Yàng dê, gen lang bol Israel geh jơm gom tòm bơta lơngai lơngò, ò gơs bơta rung rai lơi tus mơ bol khai. Cau lơi sên gó bơta hớ kung dơrcul lơnggơr lơm, tơnliah să he di đap gơnap gơnoar dơng Kơnràn dê.

Têl krơi pơnjat têl krơi, Kơnràn pò gung digul dà lêng nàng lòi lang bol Kơnràn in lòt mơ gah ngkòi la mpôl ling E-jip-tơ jãn bơsak ting jat. Mơya, gung lòt ro rãn pò lang bol Yàng dê in lòt be hơđang ù rãn rơsơh, dà cah bàr gah bè dơrnang kớ cê. Mơ lồi dut, bol khai, mat bol khai dê sên gó dà gơrê wơl bè òs mơ tơn kram ală cau sò tơm hơđơm.

Kơi is ngan! Cau lơi neh sền gó ală têl krơi behớ, digơlan jơh rai kis ò tú lơi pin wil wơl bơh gơnap gơnoar mơ bơta rong siam sên gar Yàng dê gơwèt mơ lang bol Kơnràn dê. Mơya… lang bol Yàng dê neh gơplớ gơhùc.

Ming dô êt ngai lòt tòm blang bràs ro rãn, bơta tơhir dà neh lơh roh bơta dòn bol khai dê mơ Yàng. Bol khai đơs iơh ồng Môi-se, bol khai đơs lơh dí tòm lơgar Ejiptơ niam rlau mơ kong bơta long tòm bơta rơndap tap seng Yàng dê (Lik Ejiptơ 14:11-12).

Nchi bơh tài nùs nhơm kon mơnùs dê buôn ngan tòm gơl taih? Nchi bơh tài bol khai jơngo mat di đap nùs nđàc sơngit Yàng Tòm Trồ dê – Bơtau sum at bồ mơ ntào di gah bol khai taih? Kơnràn neh dơrká yô dí gơnai bol khai in. Kơnràn neh lơh dà lêng in gơlik gơs dô nơm gung rô nàng bol khai in lòt. Kơnràn lơh jơh ală bơta tài bơh bol khai. Mơya, bơh tơhir dà, jơh ală broă Yàng lơh bol khai ò gam kah tai.

Ală bơta bol glar kal ke ing tòm dunnia do buôn ngan lơh he in roh bơta sên gó đah hwềng, lơh he in húi hwơr bơta nđàc dơng ơnang Kơnràn dê tòm ală ngai neh rlau. Poac să lơbơn lơno sum ơm kơp nàng chôl bol he pin wil wơl bơh nùs nđàc sơngit Yàng dê.

Ngan la gơs tú ẵn mơ ồng mò oh mi gam cơnđoà lotf jat gùng tis lang bol Israel dê sơl?

Nđò dớ bol he kơp kỡn gơs dô bơta dòn kớnền, ò dơr cul lơnggơr, sum sền wơl bơta kỡn gơboh Yàng dê tòm kòp tú. Mơya rai kis he sum la dô nơm gung lòt gơs oă bơta gơlik gơs, bà tú chò hòp bà tú moat jrum, bà tú lơngai, bà tú kal ke. Bol he sum gơs ală bơta moat jrum, jê sồt tus bơh cau he kỡn gơboh. Tú he ơn bơta dòn he dê dê tòm kòn mơnùs, gen bơta dòn tòm Yàng Tòm Trồ he dê sơntòm lơnggơr.

Bol he hòi dan ală pơnah pal ceng jền priă in, mơya lôi dut gen he roh hiu ơm. Bol he jơh nùs hòi dan bơta sơm bòi Yàng dê, mơya cau he kỡn gơboh sang rài. Tú bơta git wă he dê ò tơl, gen bol he sơntòm roh bơta dòn mơ duh tòm t’rồm bơta pin wil wơl dê.

Tòm sră Yal Wơl 6:5, Jơnau Yàng đơs: “Oh mi pal jơh nùs, jơh hwềng soàn, jơh pràn, mơ kòñ gơboh di Jehôwa la Yàng Tom Trồ oh mi dê.”

Yàng Jesus kung neh tơngkah wơl bơta do la bơta boh lam dơng rlau jơh (Mak 12:29-30). Bơta kỡn gơboh Yàng jơh nùs, jơh hwềng soàn, jơh pràn la kai mpồng mơ mah nàng he in phalin mơ bơta pin wil wơl. Bơta kỡn gơboh wil tơl hớ at kớ bơta dòn he dê tòm pơnai lú kớ cê, wàs goh ală bơta rngòt rngơt mơ pin wil wơl.
Tòm Êsai 55:8 “Bơh ală bơta kơlôi sơnơng Añ jê ò di la ală bơta kơlôi sơnơng bol mê dê, hala ală gùng dà bol mê dê kung ò di la ală gùng dà Añ jê.”

Pơnđơl pràn ngui bơta git wă ò wil tơl kon mơnùs de nàng long sên mơ git wă gung dà Yàng Tòm Trồ dê ming lơh he in gi ga mơ roh tiah gơn kơnòm. Hớ ò di la bơta bơtào bơta dòn. Tú mơ ngai do bol he git lam têl krơi lòt gan dà lêng dô bă krơi is, gen ngai hing he rơp pin wil wơl bơh nùs nđàc sơngit Yàng dê, bơta hớ ai he in gó bơta dòn he dê ò kớ, lơggơr jat rai kis he dê kòp ngai. Kah té lah: rai kis he sum tòm gơl, mơya Yàng Tòm Trồ ò tú lơi tòm gơl!

Gơ pơrlớ wơl, dilah he gơs bơta dòn kớ cê, dilah ò gam hiu nàng rê tai gen bol he kung kừ duh rngòt di Yàng. Tú gơs cau tòm hiu nhă he dê sang rài, he kung kừ jong rơ Yàng. Bol he bơta dòn bơr Yàng tòm ală jơnau hòi dan, mơ jơh nùs, jơh hwêng soan, jơh pràn nàng kỡn gơboh Kơnràn – rlau jơh la tòm tú he ò rngơi git bơta rơndap tap seng Kơnràn dê.

Ẵn mơ ồng mò oh mi pal cih kah lah: he ò kis rài do in. Pơndròm mơ rai kis gam sum sum, gen tú jơ bol he dê tòm ù do ming la liah lơm mơ gơ lòt gan bè nhơm tă.

Tòm sră Luka 17:33, Yàng Jesus đơs lah: “Cau lơi jòi bơta nàng gàr bơta kis he gen rơp roh, ai cau lơi roh bơta kis he gen rơp geh wơl”

Dan jà bol he dô nùs bal tòm bơta hòi dan: Khoai Bèp kỡn gơboh, kon ưnngai Yàng bơh ală jơnau ho dòn song Kơnràn dê. Ưnngai Yàng bơh kon geh kis ngai or, ngai do mơ hing nau gam sum sum ring lơngai mơ Kơnràn. Ưnngai Yàng Dong Jesus neh sum kỡn gơboh kon, bulah kon sum tòm gơl mơ bêng bơta lơbơn lơno. Dan bơto kon git duh rngòt Kơnràn mơ bơta dòn dềt rhên bè kon dềt, git dòn kơnòm Kơnràn tòm ală bơta mơ jao phi rai kis kon dê tòm tê Kơnràn dê at bồ. Kon jơh nùs hòi dan. Tòm sơnđan Yàng Jesus Krist, Amen.

Ơ ală ồng mò oh mi kỡn gơboh, digul rai kis bêng bơta kơlôi rcang gen ồng mò oh mi gơn kơnòm tòm bơta lơi taih? Gơs jền pría tơl ngui, cau gơboh gơbài hala he lơh cau tơm tòm rai kis he dê taih? Ồng mò oh mi rơp ơn bơta dòn he dê wil tơl tòm Yàng, pò nùs mơ lòi jơh ală bơta hớ hơđơm chi pơng sơl? Bẵn pơnđơl pràn lơh is dô nă, jao phi té Yàng in ală bơta pal cang Bèp he in la Bơtau Dòn Song. Blang bràs rai kis dê bol glar ngan, mơya Yàng Jesus rơp lòt bal mơ ồng mò oh mi, sền gar cơnđoà lòt ồng mò oh mi dê jơl tus dê tú mut tòm lơgar gam sum sum.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.