Đei bơngai đơ̆ng đei pơtih tơdrong lui đơ̆ng lu bơ̆n lĕi lăi thoi minh pôm kơmil lăng tơ ataih dĭng jê̆, tơgŭm lu bơ̆n lăng gah plei ‘lơ̆ng ling lang hơdai hăm Kră Yang. Mă lei, lăp kăl kơ minh ‘mui teh đơ̆ng tơdrong arih huŏng lăm noh, tơdrong lăng ‘noh thar đei pĕng lê̆, păng đĭ đăng dôm tơdrong kiơ lu bơ̆n ‘bôh lăp pă jơ̆ tơdrong hli tơrơ ‘bơ̆t anăp măt. Đei hơdôm wơ̆t ih păng inh ăn kơ dôm “ ‘mui teh” đơ̆ng tơdrong pơmat tat đei pĕng lê̆ đĭ plĕnh tơdrong mơnat ăn mă Kră Yang đei ‘măn ăn?

Năr ‘nâu, ‘năr 06/07/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Beth Patch kơ̆l ‘bai TƠDRONG TƠCHĔNG KON BƠNGAI ƯH KƠ ĐEI HLÔH TÔM

“Kră Yang khan: “Đon tơchĕng Inh phara kơ đon tơchĕng lu iĕm, trong lu iĕm phara kơ trong Inh.” “Êsai 55:8”

“Kră Yang khan: “Đon tơchĕng Inh phara kơ đon tơchĕng lu iĕm, trong lu iĕm phara kơ trong Inh.” Plĕnh kơjung hloh kơ teh dang yơ, na trong Inh kơjung hloh kơ trong lu iĕm păng. Đon tơchĕng Inh kơjung hloh kơ đon tơchĕng lu iĕm kư̆m dang noh.” (Êsai 55:8-9)

Tơdrong truh kơnê̆ krưp mă Kră Yang tơjur wă athei Pharaôn “Athei ăn kơ kon pơlei Inh năm” đei ăn tơdrong hli krưp ưh kơ hiơt kơ đĭ đăng bơngai Êyiptơ hăm kon pơlei Isơrael. Kơplah bơngai Êyiptơ đei ơh sơ’ngon pŭ iŏk tơdrong hĭl mĭl đơ̆ng ti mơsêh mơyang đơ̆ng Kră Yang, lei kon pơlei Sư đei krôp gom lăm tơdrong pơgơ̆r hiôk hian, tơpă ưh kơ đei hơtŭt ‘bơm ‘bơ̆t anăp dôm tơdrong truh krưp ‘noh. Bu bu kŭm ‘bôh tơdrong truh ‘noh đei hli tơrơ, tơjur akâu hli yom ‘bơ̆t tơdrong mơsêh mơyang đơ̆ng Sư.

Tơdrong mơsêh pơtrơp tơdrong mơsêh, Sư pơih trong tŏk bŏk đak dơsĭ lăm kơplah trong năm đơ̆ng kon pơlei Sư huŏng lăm tơdrong ơh sơ’ngon. ‘Bơ̆t anăp jơ̆ đak dơsĭ glơch, đơ̆ng rŏng jơ̆ khŭl linh Êyiptơ pran kơtang druh. Na to, minh trong năm hrĕng ‘lơ̆ng đei pơih, kon pơlei Isơrael thoi noh yak năm tŏk bŏk đak dơsĭ thoi kơpal teh hrĕng, ‘bar pah đak dơ̆ng tơ kơpal nhen thoi dur kơjung kơjăp. Na truh tuch luch, kơdih măt lu sư lăng ‘bôh đak ro tih krưp ro tơjruh tơ ala, lơ̆p lê̆ đĭ khŭl ayăt tơ ala đak jrŭ.

Ô, hlĭch chrơp tơpă! Mă khan bu đơ̆ng hlôi tơ’bơ̆p dôm tơdrong mơsêh krưp thoi noh, rŏ lăng đĭ chăl arih ưh kơ đei layơ pơ̆n ngĭl ngŭl kơ tơdrong mơsêh mơyang dah tơdrong dŏng tơgŭm đơ̆ng Kră Yang ‘măn ăn kơ kon pơlei Sư. Mă lei ră…kơdih kon pơlei Sư rơih ‘noh đei ưh kơ lui ngeh.

Lăp dôm năr đơ̆ng rŏng trong năm hlôi kơ char glă hrĕng kro, tơdrong rơhing sĕch akar đei ket kơtĭt đon lui bơhngol lu sư hloi. Lu sư wơ̆t jŏk hil kơ Môis, jah drơ̆ng iŏk pơm đĭch pơmat tơ Êyiptơ đĕch hiôk hloh kơ đei pŭ iŏk tơdrong pơlong lăng lăm trong yak năm tơdrong tơdă kơpal plĕnh ti đơ̆ng Sư (Lĕch Đơ̆ng Êyiptơ 14:11-12).

Yua kơ liơ jơhngơ̆m kon bơngai đei ‘bônh kơ tơplih thoi noh? Pơm thoi yơ lu sư gơh măt tol ‘bơ̆t jơhngơ̆m ‘mêm mơnat đơ̆ng ‘Bok Kei-Dei- Tơ’ngla ling lang pơgơ̆r păng dơ̆ng gah lu sư? Sư ‘nao hrĕch kơtĕch tơlei glang pơm đĭch kơ lu sư đang. Sư ‘nao pơm đak dơsĭ jrŭ jing trong năm hrĕng ‘lơ̆ng ‘bơ̆t anăp măt lu sư. Sư đei pơm dôm tơdrong anat hloh yua kơ lu sư. Mă lei ră, lăp yua kơ minh tơdrong rơhing dang ei, đĭ đăng nhen thoi hiong đĭ jing hơmơ̆l ‘nhui.

Dôm tơdrong pơmat tat dang ei ‘bơ̆t anăp măt ‘bônh kơ pơm kơ lu bơ̆n tơhiong lê̆ tơdrong hlôh băt bơhngol, pơm kơ lu bơ̆n hiơt kơ dôm tơdrong pŭn hiôk tih hloh Sư đei tuh ăn lăm tơdrong so. Sĕch akar rơdu jơ̆ thoi noh ling lang chang gô pơtrŭt lu bơ̆n ngĭl ngul jơhngơ̆m ‘mêm mơnat đơ̆ng Sư.

Hăm trŏ mưh lăp ih păng inh kŭm oei yak năm lăm trŏ trong gre găk ‘noh ưh?
Đei lơ wơ̆t lu bơ̆n hơpơi kơdih đei minh đon lui kơjăp, ưh kơ đei ngĭl ngŭl, ling lang lui ngeh tơpă anih tơdrong ‘mêm Kră Yang mă tơdrong arih thoi yơ. Mă lei tơdrong arih trŏ jơ̆ pơpôi kơdôm tơdrong hlôi tơ’bơ̆p tơplih ưh kơ hơđơ̆ng đơ̆ng tơdrong arih. Lu bơ̆n tơ’bơ̆p hăm tơdrong ơh sơ’ngon, ơh klai yua kơ đơ̆ng kơdih dôm lu bơngai bơ̆n ‘mêm mơnat. Tơdah tơdrong lui hmă thoi bơngai hơ‘lơ̆p lăm kon bơngai pơchah, đon lui đơ̆ng lu bơ̆n anih ‘Bok Kei-Dei kŭm pơtơm ngĭl ngŭl.
Lu bơ̆n krao khan kơ tơdrong kơ’bah gah jên tơmam, mă lei tuch luch đei hiong lê̆ hnam oei. Lu bơ̆n krao apinh tơdrong pơklaih, mă lei bơngai mă ‘mêm lăm hnam dơnŏ đei lôch. Kơplah đon tơchĕng ưh kơ gơh hlôh băt, lu bơ̆n pơtơm hiong đon lui păng huŏng lăm hơlŭng jrŭ đơ̆ng tơdrong ngĭl ngŭl.

Lăm Bơtho Khôi Juăt 6:5, Nơ̆r Kră Yang khan: “Na lu iĕm athei đĭ jơhngơ̆m klơm klak, đĭ đon tơchĕng đĭ jơhngơ̆m pran ‘mêm kơ Kră Yang ‘Bok Kei-Dei iĕm.”
Yang Yêsu đei khan ‘nâu jơ̆ tơdrong juăt âu kăl hloh (Markôs 12:29-30). Tơdrong ‘mêm kơ ‘Bok Kei-Dei Kră Yang bơ̆n hăm đĭ jơhngơ̆m klơm klak bơ̆n păng đĭ dôm tơdrong đon bơ̆n tơchĕng trŏ jơ̆ khoă maih ăn kĕ jei tơdrong ngĭl ngŭl. Tơdrong ‘mêm mơnat tôm ‘noh rôp kơjăp đon lui đơ̆ng lu bơ̆n lăm tơmo kŭk kơjăp, sŭt rơgoh đĭ đăng tơdrong ngĭl ngŭl.

Lăm Êsai 55:8, Kră Yang khan: “Đon tơchĕng Inh phara kơ đon tơchĕng lu iĕm, trong lu iĕm phara kơ trong Inh.”

Adrin yua đon tơchĕng ưh kơ đei hlôh tôm đơ̆ng kon bơngai wă pơtŏ păng hlôh băt trong yak ưh kơ tôch đơ̆ng ‘Bok Kei-Dei lăp pơm kơ lu bơ̆n gleh lap păng ơh sơ’ngon. ‘Noh tơpă ưh kơ trŏ jơ̆ trong pơjing tơiung đon lui. Tơdah năr ‘nâu lu bơ̆n ‘nao hlôi mơn đei tơdrong mơsêh hlĭch yak năm lăm tŏk bŏk đak dơsĭ hrơ̆, mă lei dơning đei hloi ngĭl ngŭl jơhngơ̆m ‘mêm mơnat đơ̆ng Kră Yang, tơdrong ‘noh tơ’bôh đon lui đơ̆ng lu bơ̆n oei đei pơhlŭ yua kơ đơ̆ng tơdrong arih. Athei ‘blŏk khan: tơdrong arih ling lang tơplih, mă lei ‘Bok Kei-Dei lei ling lang ưh kơ đei tơplih!

Hơlơ̆k dơ̆ng, dah đon lui kơjăp, lei mă khan kơplah ưh pă đei hnam wă wih brŏk, lu bơ̆n oei rơih iŏk ‘mêm kơ Kră Yang. Kơplah bơngai ‘mêm lăm hnam dơnŏ lôch, lu bơ̆n oei kơ kuh kơ Sư. Lu bơ̆n pơhrăm iŏk tơdrong chu yom tơl tơwih đơ̆ng Kră Yang kơ dôm nơ̆r krao khan, păng đĭ jơhngơ̆m, đĭ bơhngol, đĭ jơhngơ̆m pran wă ‘mêm yom kơ Sư- gĭt hloh jơ̆ kơplah lu bơ̆n ưh kơ gơh hlôh tơdrong tơdă đơ̆ng Sư.

Ih păng inh đei ‘blŏk răk lăm jơhngơ̆m khan: lu bơ̆n ưh kơ arih yua kơ chăl ‘nâu. Pơting hăm chăl arih ling lang ưh kơ layơ tôch, lăm khei sơnăm đơ̆ng lu bơ̆n lăm teh đak ‘nâu lăp kơđeh păng ‘bônh kơ hlôi thoi dui jơhngơ̆m.

Lăm Luka 17:33, Yang Yêsu khan: “Bơngai bu ưh kơ chu lôch yua kơ tơdrong Inh, bơngai noh lôch hoh hoh đĕch. Bơngai bu chu lôch yua kơ tơdrong Inh, sư ‘noh gô arih ling-lang.”

Apĭnh đĭ đăng krao khan hơdai: Kơkuh kơ Kră Yang mă ‘mêm, kon bơnê kơ Kră Yang yua kơ dôm lu nơ̆r pơkă tơpăt đơ̆ng Ih. Bơnê kơ Ih yua kơ kon gơh arih lăm năr brei, năr ‘nâu, năr dơning păng đĭ chăl arih ling lang ưh kơ layơ tôch pŭn hiôk hăm Ih. Bơnê kơ ‘Bok Dŏng Pơklaih Yang Yêsu đei ling lang ‘mêm mơnat kơ kon, mă jơhngơ̆m kon ‘bônh kơ tơplih păng ‘bĕnh tơdrong rơdu. Apinh Kră Yang bơtho kon băt ‘mêm kơ Ih hăm đon lui hmă thoi bơngai hơ’lơ̆p, băt lui gơnang kơ Ih lăm tôm tơdrong păng pơjao rim kơ jơnăr chăl arih kon lăm tơpang ti Ih pơgơ̆r.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, năr ‘nâu, lăm dôm tơdrong hrăt hrot păng hiơ̆k bơngơ̆t đơ̆ng tơdrong arih, ih oei adrin gơnang lăm tơdrong kiơ? Jơ̆ tŏ sĕt hơđơ̆ng jên tơmam, jơ̆ tơdrong sơng iŏk đơ̆ng kon bơngai, dah jơ̆ rơhing gơh pơgơ̆r chăl arih kiơ̆ kơ kơdih kâu? Lei ih hăm wă dan đĭ đon lui anih Kră Yang, pơih jơhngơ̆m păng achăng đĭ đăng dôm tơdrong noh ‘bơ̆t jơ̆ng ‘long pơglang ưh? ‘Nĕ kơ adrin pŭ iŏk mĭnh drô̆ bơih, athei pơjao tôm tơdrong pơmat kơ ‘Bă ‘lơ̆ng tơpăt. Char glă chăl arih đei pơmat tat dêh, mă lei Yang Yêsu pơkă gô yak hơdai hăm ih, bơwei jơ̆ng ih kơjăp dĭng truh năr mơ̆t lăm chăl arih ling lang.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.