07.07 Amăn Jơ Krao Khan Rim Năr: NHƠ̆M HMOI YUA KƠ TƠDRONG YOCH KƠDIH PƠM

Kơplah dơ̆ng ‘bơ̆t dôm lu tơdrong pơchah răm đơ̆ng kơdih pơm ưh kơ trŏ, ih tam đei layơ jet kơdih: “Kră Yang hăm oei ‘mêm mơnat bơngai thoi inh ưh?” kơplah tơ’bơ̆p tơdrong kơnê̆ truh, mơlâu kơ tơdrong yoch wăr tăp dăr, pơm kơ lu bơ̆n ‘maih wă kơdâu ôn tơ ataih đơ̆ng Kră Yang. Mălei nơ̆r Kră Yang đei tơ’blŏk thoi âu, mă kơplah dôm tơdrong pơchah răm đĭ bơih, Sư oei dônh iŏk đơ̆ng rim kơcheh lăm chăl arih lu bơ̆n, krôp gom lu bơ̆n hăm tơdrong ‘mêm mơnat păng ăn kơ bơ̆n hơmet dơ̆ng đơ̆ng blŭng a.

Năr ‘nâu, ‘năr 07/07/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Jordan Buntgen hăm kơ̆l ‘bai NHƠ̆M HMOI YUA KƠ TƠDRONG YOCH KƠDIH PƠM.

“Kră Yang oei jê̆ lu bơngai đei chhŭr nuih, Păng dŏng pơklaih lu bơhngol mă sơ’ngon kơ tơdrong yoch.” (Hơriso 34:18)

“Đawit khan kơ Nathan: “Inh pơm yoch boih hăm Kră Yang.” Nathan tơl: “Mă-lei Kră Yang sŭt boih tơdrong yoch ih, ih huay kơ lôch ôh. Mă-lei yua kơ tơdrong ih pơjăm ưh kơ lăng boih Kră Yang lăm tơdrong ‘nâu, na kon drŏ-nglo mă akăn ih ‘nao tơpŭ kơ ih noh gô lôch.” Lăp Nathan wih brŏk tơ hnam sư, Kră Yang pơm kơ kon nge mă akăn Uri ‘nao rơneh ăn kơ Đawit noh jĭ dêh hloi. Đawit krao khan apinh Kră Yang ‘Bok Kei-Dei pơklaih nge noh, păng sư ơ̆t kơ sŏng sa; sư mơ̆t tơ lăm anih ‘bĭch tơ teh prăt măng. Lu kră bơngai bơ̆jang đunh lăm hnam pơtao dơ̆ng tăp dăr tơiung sư đơ̆ng teh; mă-lei sư ưh kơ wă iung păng ưh kơ wă sŏng sa hơdai lu đe noh. (II Samuel 12:13-17)

Tơdrong hơ’mon kơ pơtao Đawit hơtŭt ‘bơm lăm jơhngơ̆m inh lăm trong yak năm kiơ̆ Kră Yang. Sư đei tơdrong arih adrin, pơdah dôm tơdrong hlơp ‘bơ̆t anăp bơngai lăm teh đak ‘nâu. Na đơ̆ng tơdrong noh, Yang Bơhngol ‘Lơ̆ng yua đơ̆ng jơ năr noh ‘bơ̆ hơmet, tưk tơ iung bơhngol lu bơ̆n hrei ‘nâu. Mălei, tơdrong pơm kơ inh mơn ‘bôh păng lăp đon dêh kơ pơtao ‘nâu mă ưh kơ đơ̆ng tơdrong bơ̆jang tih ‘lơ̆ng, mă đơ̆ng tơdrong pơ̆k huŏng lăm tơdrong yoch sư.

Trong yak năm chă trong brŏk tơ ‘Bok Kei-Dei kơdih inh pơtơm đơ̆ng lăm trôk hlŭt tơdrong yoch, thoi kơ pơtao Đawit sơnăm noh sơ̆. Hăm sư, tơdrong gô pŭ iŏk noh jơ̆ tơdrong arih kon nge sư. Păng hăm inh, tơdrong pŭ iŏk noh pơchah răm lăm ŭnh om. Ưh kơ đei tơdrong chhŭr nuih ayơ mă dơ̆ng adrô̆, ưh pă băt pơm thoi yơ, lăng đak măt lĕch ro tơ lăm tôm tơdrong đơ̆ng kơdih rơih iŏk ưh kơ trŏ, đơ̆ng kơdih pơm pơrăm.

Na lăng tơ jum dăr, inh ưh kơ đei ‘bôh kiơ ‘nguaih kơ rơka jrŭ lăm măt lu bơngai đĭ jơhngơ̆m ‘mêm mơnat păng juăt hăm inh. Dôm kơ pă hiôk đei lăm inh kơplah băt kơ tơdrong tơpă noh: gô ưh pă đei sŏng sa hơdai hiôk chơt dơ̆ng bơih, ưh pă đei krao pơma dơnuh hăm điê̆n thoăi, păng inh kư̆m ưh pă đei anăn lăm ŭnh hnam ‘nâu dơ̆ng bơih.

Đơ̆ng rŏng kơ pơchah răm, inh đei dôm năr ơh sơ’ngon, chĕp ba chhŭr nuih đơ̆ng kơdih inh pơm. Inh ơh yua kơ dôm tơdrong pơdrơ̆ng iŏk ưh kơ trŏ, ưh kơ hiôk kơ dôm lu tơdrong blĕk noh, păng ơh kơ dôm tơdrong hiong răm mă kơdih pŭ iŏk. Inh đei hlôi mơn kơ dôm lu măng mu gah bơhngol đei lơ tơdrong truh pă kĕ jô̆. Tŏk bŏk khei sơnăm măng mu noh, inh ưh kơ đei mơn tơdrong ‘mêm Kră Yang ăn kơ inh. Inh ưh kơ băt Tơ’ngla dŏng pơklaih oei gô inh ‘bơ̆t doh, gô inh dônh dôm lu kơcheh pơchah noh năm ‘bơ̆t jơ̆ng Sư, wă kơ Sư chô̆ hơmet dôm kơ jĭ rơka.

Tơdrong mơlâu đơ̆ng kơdih akâu wăr tăp dăr pơm kơ lu bơ̆n ‘maih kơdâu weh đơ̆ng Kră Yang. Na inh ưh kơ băt, kơ tơdrong mơlâu, tơdrong yoch păng hmach đơ̆ng inh gô tơplih hăm dôm tơdrong ‘lơ̆ng hloh đơ̆ng ‘Bă oei kơdâu hrĕnh lĕch tơ trong wă sơng iŏk kon brŏk tơ hnam. Inh ưh kơ băt tơpă kơ tơdrong pơklaih oei chang gô inh tơ anih thŭng thong ơh sơ’ngon.

“Đawit pơlung Batsêba, akăn sư, Đawit năm tep hơdai hăm akăn sư; akăn sư tơpŭ kơ minh ‘nu kon drŏ-nglo krao anăn sư Sôlômôn, Kră Yang ‘mêm kơ sư dêh. Yua kơ Kră Yang ‘mêm kơ nge noh dêh, na Sư wơh Nathan bơngai pơtruh nơ̆r sư krao anăn nge noh Jêđiđia.” (II Samuel 12:24-25)

Mă khan đơ̆ng tơdrong yoch oei đei tơnoh, ‘Bok Kei-Dei ưh kơ đei pơtôch tơdrong tơdă Sư lăm chăl arih Đawit. Sư oei bơ̆jang hăm tơdrong ‘mêm păng hăm tơdrong pơklaih. Chăl arih Sôlômôn noh jơ̆ pơsĭt tơdrong pơklaih mơsêh mơyang đơ̆ng Kră Yang lăm chăl arih Đawit. Păng Kră Yang kư̆m bơ̆jang tih hloh dơ̆ng lăm chăl pơgơ̆r Sôlômôn.

Jơ ‘nâu, chăl arih inh huay pă chô̆ pơkơ̆ng hăm tơdrong arih đei hlôi hloh bơih. Kră Yang huay kơ achăng lê̆ inh lăm ơh sơ‘ngon dah mơlâu. Sư pơgơ̆r păng pơklaih lăm tơdrong chang hơmĕng đơ̆ng tơdrong arih ‘nao, thoi sư đei bơ̆jang hăm Đawit noh sơ̆. Mă khan dôm kơ tơdrong đĭ hiong răm ưh kơ đei gơh iŏk ming dơ̆ng, mălei Kră Yang ăn kơ inh đei chang hơmĕng păng tơdrong ‘nao wă yak năm tơ anăp. Jơ ‘nâu anih pai gŏ iĕ hiôk chơt hăm dôm lu bơngai plơ̆ng, tơ oei jum dăr kơ kơ’bang sŏng sa, nơ̆r hiĕk, hiôk chơt păng hơdai dih băl hăm tơmam mă inh rơngei klah song. Điê̆n thoăi inh ‘bĕnh kơ kơthơ, đei krao păng đei rup – dôm lu tơdrong đei tơ’blŏk kơ inh athei băt kơ bơwei, băt kơ hlôh wao păng đei jơhngơ̆m ‘mêm mơnat. Hơdrol hloh, inh băt kơ inh đei chông ba lăm ŭnh hnam Kră Yang, đei ăn jing bơngai ‘nao jơ̆ kon ‘Bok Kei-Dei, hăm tơdrong jang, mŭk tơmam kơjăp khŏm khŏm.

Apĭnh đĭ đăng krao khan hơdai: Kơkuh kơ Kră Yang Tơ’ngla ‘mêm mơnat. Kon bơnê kơ Kră Yang yua kơ Ih lôch tơ ‘long pơglang yua kơ tơdrong yoch kon. Kră Yang ơi! Kon lui gơnang kơ Ih! Kon sơng iŏk tơdrong huay kơ jô̆ yo, ‘mêm mơnat đơ̆ng Ih đei răt iŏk kon. Kon ưh kơ ăn tơdrong yoch pơgơ̆r kon dơ̆ng bơih, mă rơih iŏk kiơ̆ Ih đĭ jơhngơ̆m. Kơkuh kơ Yang Bơhngol ‘Lơ̆ng, apinh ih bơwei chăl arih kon, pơlung bơhngol kon păng tơgŭm kon lăng ‘bôh Ih đơ̆ng lăm tơdrong iĕ rim năr. Kon hơpơi kơ chăl arih kon gô jing pơchrang hơdah kơ anih măng mu, pơjao dôm tơdrong ư-ang kơ ‘Bă kơpal plĕnh ti! Bơnê kơ Ih đei dŏng iŏk tơdrong arih kon păng chih ming tơdrong hơ’mon lăm chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, dôm lu tơdrong đơ̆ng tơdrong yoch, đơ̆ng dôm tơdrong rơih iŏk ưh kơtrŏ, ưh kơ chu nơ̆r Kră Yang. Dôm lu nôt brŏ re sơ’ngon dah dôm lu chăl arih pơchah răm noh ưh kơ đei layơ đei yâ̆u châ̆m pơtôch, kơplah chăl arih lu bơ̆n dan lăm tơpang ti Kră Yang. Sư huay kơ achăng lê̆ ih huŏng lăm măng mu lăm tơdrong mơlâu. Na ăn tơdrong mơlâu pơm kơ ih weh ataih đơ̆ng Kră Yang pă minh ‘măng dơ̆ng, athei yak năm hăm Kră Yang đơ̆ng jơ phŭt ‘nâu hăm dôm lu tơdrong rơdu tơrăn kơdih. Hơpơi kơ đơ̆ng rŏng kơ ‘măn jơ krao khan ‘nâu, ih gô đei jơhngơ̆m pơ̆n nuih achăng tŭk lê̆ tơdrong trăp trĭn đơ̆ng tơdrong yoch, păng pơih jơhngơ̆m sơng iŏk pham dŏng pơklaih đơ̆ng Yang Yêsu.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.