Đei dôm kơplah, tơdrong pơdrơ̆ng hơdai ưh kơ pơtơm blŭng a hăm minh tơdrong yoch tih, na lăp hăm tơdrong hơpơi wă “ ‘nĕ kơ phara kơ bơngai nai”, “ ‘nĕ kơ pơm kơ bơngai nai ưh kơ lăp đon”. Mă lei trŏ đơ̆ng dôm kơ tơdrong pơdrơ̆ng hơdai iĕ noh, jơhngơ̆m kon bơngai rai ‘net ‘net ataih đơ̆ng tơdrong tơpă. Păng mưh lăp, tơdrong anat hloh đơ̆ng bơngai kiơ̆ Kră Yang ưh kơ trŏ jơ̆ yak năm mĭnh drô̆, mă jơ̆ tơdrong pơ̆n nuih ưh kơ dơ̆ng hơdai hăm tơdrong glăi ưh kơ trŏ, mă khan tơdrong pơdrơ̆ng ‘noh đei minh drô̆ hĭ.

Năr ‘nâu, ‘năr 08/07/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm kơ̆l ‘bai ARIH HUAY KƠ HƠDAI TƠDRONG YOCH.

“Pŭn dêh kơ bơngai bu, ưh kơ kiơ̆ trong lu bơngai kơnê̆, kư̆m ưh kơ oei lăm trong lu bơngai yoch, kư̆m ưh kơ ngôi hơdai hăm lu pơjăm đe; Mă-lei chơt hiôk lăm tơdrong juăt Kră Yang, păng tơchĕng tơdrong juăt ei măng năr.” (Hơriso 1:1-2)

Pơih lăng trong roi tơbăt lăm hla ar ‘bao tơ kơpal gơ’bang, Hla ar ‘Bao tơ anih pơlei oei pơm kơ inh đei wă kơ băt tơpă chĕp iŏk hla ar ‘bao. ‘Bai chih kơđeh gah tơdrong arih đơ̆ng minh ‘nu bơngai drŏnglo Viêt Nam, ‘bĕnh kơ dôm yoch glăi păng ưh kơ trŏ, oei adrin hơmet ming kơ dôm khei năr oei tơ Hoping Center, minh khŭl pơjing đơ̆ng Khŭl Lui Tơdrong ‘Nao ‘Lơ̆ng tơgŭm kơ dôm lu bơngai ‘maih hơmet ming chăl arih. Tơmang ‘bôh yă akăn ‘bok bơtho yak hlôi, mơn lăm jơhngơ̆m inh chro ăn kơ sư lăng rup bơngai drŏnglo phĭn hơdai hăm khŭl reh brŏ, “Bơngai Viêt bơ̆n âu duch, ih băt kơ bơngai ‘nâu ưh?”. Hăm muh măt đei hlĭch hlăch sư lăng tơ rup na lăng inh, pơma pơ’lơ̆ng tơl tơwih: “Klo kơ mŏ Hoa khŭl bơngai lui bơ̆n ‘noh duch.”

‘Nao hơdai hăm khŭl bơgai lui bơngai Viêt ‘bơ̆t anih oei dôm giĕng ‘nâu, mă lei inh đei ‘blŏk hloi mŏ Hoa hăm muh măt hiĕk rơhŏu, jơhngơ̆m hiôk hăm inh hloi đơ̆ng dôm năr blŭng a oei ưh kơ băt kiơ. Inh hrĕnh tĕnh “Ôh, lei inh bơwei hla ar ‘bao ‘nâu ăn kơ mŏ Hoa đŏk, tơpă mŏ gô hiôk chơt dêh”. Ưh tim mă pơma đĭ, inh thar thĕng hreh kơplah lăng ‘bôh yă akăn ‘bok bơtho tơtreh kơ̆l, “Rŏ lăng jơ năr ‘nâu mŏ Hoa kăl kơ đei hrĕp hreh. Anat dêh kơ sư wă yak hlôi kơ tôm tơdrong păng gơh hơđơ̆ng thoi dang ei”.

Lăng ‘bôh muh măt hlĭch tơpă đơ̆ng inh, yă akăn ‘bok bơtho tơjruh nơ̆r pơma pơtrơp: “Pơđăm wơ̆t tơpơh wơ̆t lăm lơ sơnăm, mŏ noh ưh kơ hơđơ̆ng lăm tơdrong ơh sơ’ngon păng chang hơmĕng, mă khan hơya tŏ sĕt đĕch. Kơplah tuch luch kơplah ‘nhŏng noh đei iŏk đĭ jên đơ̆ng teh đak tơgŭm kơ tơdrong hŏk thân hŏk, achăng hnam trưng, achăng hnam weh năm ưh kơ đei mĭnh nơ̆r, ưh kơ băt dĭng dang ei. ‘Bar ‘nu mĕ kon sư ‘nao wă grăng hơđơ̆ng ‘nao ‘nâu đĕch!”

Lăng dơ̆ng rup “ ‘nhŏng”- bơngai lăm ‘bai hla ar ‘bao, inh kŭp kơ̆l ‘blŏk đơ̆ng Nơ̆r Kră Yang tơ’blŏk hơđăl, păng tơtơ̆ tơchĕng truh kơ hơ’mon Sepir.

Sơ̆p hla ar Tơdrong Jang chih tơdrong Yang Bơhngol ‘Lơ̆ng jur ‘bĕnh blai tơdrong mơsêh mơyang. Lăm kơplah Yang Yêsu iung arih đei tơdrŏ pơpơ̆ đĭ dêh char păng tơiung tơdrong lui ngeh kơ lu bơngai pơhrăm lui kiơ̆ Sư….Na, nơ̆r pơkă ăn adrol gah tơdrong Kră Yang Yêsu tŏk tơplĕnh đei tơ’blŏk dơ̆ng hơnơ̆ng kơ lu bơngai pơhrăm păng Sư. Truh Năr Giĕng Pangtơkôt, đĭ kơ pơlei Jêrusalem tơdrŏ yua kơ tơdrong đơ̆ng Yang ‘Bok Kei-Dei jur ‘bĕnh tơdrong mơsêh mơyang.

Khŭl bơngai lui blŭng a pơjing lăm tơdrong ‘bôh băt sơng iŏk păng chu yom tơdrong pơgơ̆r đơ̆ng Yang Bơhngol ‘Lơ̆ng.

“Đĭ-đăng bơngai tơring ei hli, yua kơ lu jơ̆ng ‘bang pơm lơ tơdrong mơsêh chrơp. Lu bơngai lui pơgơ̆p băl, dôm lu mŭk tơmam sư jing hơdai. Lu sư tĕch mŭk tơmam, chŭn mir sư, asong băl jên kơ rim ‘nu lu sư kiơ̆ kơ kăl yua.” (Tơdrong Jang 2:43-45)

Lăm anih pŭn hiôk noh, hơ’mon đơ̆ng klo akăn Anania păng Sepir đei chih: “Đei minh ‘nu bơngai nai dơ̆ng, anăn sư Anania, akăn sư Sepir; bre sư tĕch mir đei jên na klo sư iŏk lê̆ minh pah, minh pah klo sư ăn kơ lu jơ̆ng ‘bang Yêsu. Akăn sư kư̆m băt mơ̆n klo sư ‘măn lê̆ minh pah ei.” (Tơdrong Jang 5:1-2)

Đei đơ̆ng tơdrong hơlĕnh ‘nâu jơ̆ tơdrong đơ̆ng Anania, păng đơ̆ng rŏng kơ ‘noh jơ̆ Sepir. Tơdrong mơsêh đơ̆ng Yang Bơhngol ‘Lơ̆ng lăm Pêtrôs đei tơ’bôh ‘Bok Kei-Dei mă kon pơlei oei kơkuh jơ̆ Tơ’ngla areh kơ tơdrong hơlĕnh thoi lăm Tơdrong Pơđơ̆k 12:22 đei chih: “’Kră Yang areh kơ lu bơngai pơma hơlĕnh pơdăr; Mă-lei Sư lăp đon kơ lu bơngai pơma tơpăt”.

‘Bok Kei-Dei lăng ưh kơ gĭt kơ dôm yơ tơmam pơyơ̆r. Sư lăng gĭt kơ đĭ jơhngơ̆m ‘măn ăn kơ Sư. “‘Bok Kei-Dei ưh kơ lăng kiơ̆ thoi kon bơngai lăng, kon bơngai lăng gah ‘nguaih; mă-lei Kră Yang lăng ‘bôh lăm jơhngơ̆m.” Anania păng Sepir đei pơdrơ̆ng hơdai lăng ưh kơ gĭt kơ Yang Bơhngol ‘Lơ̆ng Kră Yang, ‘bok yă đei rơih tơdrong gĭt mă kon bơngai lăng gĭt, mĭnh jơhngơ̆m chă đon hơdai pơma hơlĕnh, hơlĕnh lu bơngai pơhrăm wă kơ gơh đei đe pơ-ư păng tơdrong pơyom đơ̆ng kon bơngai.

Dang ei, đei dôm tơdrong Bơngai Lui ‘bônh dêh kơ pơdrơ̆ng hơdai yua kơ tơchĕng khan ‘noh lăp jơ̆ “tơdrong iĕ”. Lu bơ̆n gơh pơdrơ̆ng hơdai lăm tơdrong tơpăt tơpă wă bơwei tơdrong đei yua kơdih kâu; pơdrơ̆ng hơdai lăm tơdrong yua jơ năr, dan tơdrong jang, pơchơt dah dôm lu tơdrong pơgơ̆p ăn tơ kơpal kơ tơdrong kơkuh kơ Kră Yang; pơdrơ̆ng hơdai hăm dôm tơdrong ưh kơ đei rơgoh ‘lơ̆ng mă bơ̆n lăng rim năr; dah pơdrơ̆ng hơdai hăm trong thĕng hreh ‘bơ̆t anăp tơdrong ưh kơ trŏ lăp yua kơ hli kơ bơngai nai ưh kơ lăp đon. Đei kơplah lu bơ̆n oei năm hơkŭm hơnơ̆ng, oei bơ̆jang, mă lei jơhngơ̆m rai ngach păng arih kiơ̆ tơdrong hơgăt đơ̆ng teh đak lơ hloh kiơ̆ Nơ̆r Kră Yang. Teh đak dang ei linh lang tap ti kơ tơdrong “hơbĕch hơbal”, “ ‘bônh kơ hơdai” dah “ưh kơ pơm hloh hnang”, mă lei lơ tơdrong ‘noh jơ̆ trŏ kơ gleh hrat pơm kơ bơngai lui kơ Kră Yang tơhiong hơlam bơhngol bơ̆n. ‘Bok Kei-Dei ưh kơ chơ chă dôm lu bơngai ‘lơ̆ng tôm, mă lei Sư krao dôm jơhngơ̆m tơpăt tơpă, pơ̆n arih tơpăt păng ưh kơ pơdrơ̆ng hơdai hăm tơdrong yoch, mă athei yak năm minh drô̆ tŏk bŏk tơpôl bơngai.

Tơdrong tơpăt ‘lơ̆ng rơgoh đơ̆ng Kră Yang kơ bre klo kăn Anania păng Sepir đei tơ’bôh hơdah tơdrong ‘mêm păng gơh găt đơ̆ng Sư lăm hơ’mon đơ̆ng hnam dơnŏ mŏ Hoa. Lơ khei đơ̆ng rŏng kơ noh, mơ̆ng roi tơbăt ‘nhŏng đei lôch đơ̆ng rŏng kơ pơ̆k lăm kơplah oei pơhrăm pơjuăt hăm khŭl kơkuh Hoping Center, inh mơn băt tơdrong gơh găt đơ̆ng Kră Yang kơplah đei dui ‘nhŏng wih brŏk hơdai Sư lăm dôm khei năr tuch luch.

Yang Bơhngol ‘Lơ̆ng mơsêh mơyang ưh kơ sĭ lăp tơ’bôh kơ lu bơ̆n đei ‘bơm jrŭ dêh đơ̆ng tơdrong pơm tơ’bôh pơdrơ̆ng hơdai lăm tơdrong glăi thoi Sepir, mă lei hloh dơ̆ng, Sư năm wă tơgŭm. Sư đei druh kiơ̆ bơwei bre mĕ kon mŏ Hoa đơ̆ng Khŭl Bơngai Lui kơ Sư păng ăn jơhngơ̆m pran arih tơpăt hăm nơ̆r ‘Bok Kei-Dei kơplah mŏ ưh kơ pơdrơ̆ng hơdai hăm klo lăm tơdrong ưh kơ trŏ.

Nơ̆r Kră Yang lăm Hơriso 1:1-2 đei chih: “Pŭn dêh kơ bơngai bu, ưh kơ kiơ̆ trong lu bơngai kơnê̆, kư̆m ưh kơ oei lăm trong lu bơngai yoch, kư̆m ưh kơ ngôi hơdai hăm lu pơjăm đe; Mă-lei chơt hiôk lăm tơdrong juăt Kră Yang, păng tơchĕng tơdrong juăt ei măng năr.” (Hơriso 1:1-2)

Păng Kră Yang kŭm ưh kơ ăn lu bơ̆n athei adrin kơdih, kơdih adrin arih tơpăt, ưh kơ pơdrơ̆ng hơdai hăm dôm tơdrong ưh kơ trŏ. Sư đei hơmet păng ăn Yang Bơhngol ‘Lơ̆ng oei hơdai rim ‘nu lu bơ̆n, wă ăn jơhngơ̆m pran, păng chông anhăk lu bơ̆n thoi Yêsu đei khan: “’Bok Dŏng iĕm ei, anăn Sư Yang Bơhngol ‘Lơ̆ng, Sư ‘noh ‘Bă Inh wă wơh Sư jur oei păng iĕm jang tang Inh. Sư gô bơtho iĕm tôm tơdrong păng Sư gô tơ’blŏk ăn kơ iĕm tôm tơdrong mă Inh bơtho iĕm boih.” (Yôhan 14:16)

Apĭnh đĭ đăng krao khan hơdai: Kơkuh kơ Kră Yang mă ‘mêm, jơ̆ ‘Bă ‘mêm dêh kơ kon, kon bơnê kơ Kră Yang yua kơ Ih đei ăn kơ kon Nơ̆r Ih lăm Sơ̆p Hla Bơar Nơ̆r ‘Bok Kei-Dei. Bơnê kơ Kră Yang yua kơ Ih ưh kơ ăn lu nhôn “mơ ti”, mă lei ăn Yang Bơhngol ‘Lơ̆ng ling lang oei hăm kon. Bơnê kơ Yang Bơhngol ‘Lơ̆ng, Tơ’ngla lăng ‘bôh anih jrŭ đơ̆ng bơhngol kon. Apinh ăn kơ kon jơhngơ̆m pran, păng jơhngơ̆m pơ̆n nuih rơih ưh kơ pơdrơ̆ng hơdai lăm tơdrong ưh kơ trŏ, mă lei yak năm lăm hơdah tơdrong tơpă đơ̆ng Nơ̆r Kră Yang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, trong iĕ kiơ̆ Kră Yang kŭm đei kơplah yua kơ ưh kơ pơdrơ̆ng hơdai, lu bơ̆n đei yak năm minh drô̆, rơih iŏk arih hăm dôm tơdrong kiơ ‘Bok Kei-Dei lăng gĭt. Dôm tơdrong nhen thoi ưh kơ đei ba ăn tơdrong gĭt mŭk tơmam dah jơhngơ̆m rơhŏu hiôk thoi: bơwei năr pơdơh wă kơkuh kơ Kră Yang, pơyơ̆r jơ năr, jên tơmam thoi nơ̆r Kră Yang bơtho, arih tơpăt, pơ’lơ̆ng rim kơ yak hăm tơdrong oei hơdai đơ̆ng Yang Bơhngol ‘Lơ̆ng lăm rim kơ nơ̆r pơma păng pơm tơ’bôh, hăm tơdrong hlôh băt khan ‘Bok Kei-Dei jơ̆ Tơ’ngla lăng ‘bôh lăm jơhngơ̆m. Athei pran kơtang păng pơ̆n nuih, adrol hloh lăng hơmet jơhngơ̆m kơdih, na jing mĭnh jơhngơ̆m hơdai lăm tơdrong gơh hơgei, kral kơchăng, krao khan tơgŭm dih băl, yua kơ băt khan năr Kră Yang wă jê̆ bơih, thoi Sư đei khan:

“Yêsu khan thoi âu: “Inh jê̆ jur boih. Inh chĕp tơmam apah lu sư, rim ‘nu kiơ̆ kơ lu sư đei pơm.” ( Tơdrong Tơ‘bôh 22:12)

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.