Gơs ala tềl bơ̆ hơ đang ào soh, bulah neh geh pìh oă ngăn, mơya găm gơ tềl gŏ. Pơnah đah hwềng, tồi glài kung bè tềl bơ̆ hơ̆. Kư̆ kah sùm, gen bol he gơs bơta ba sìl ba so ngăn. Oă ngăn cau, kư̆ “lơh kloh” tồi glài he bơh bơta lơh wơl, lơh broă niam, hala sền sơwì wơl să tòm he, mờ ya bơta tìs glài kư̆ găm sùm. Gen gơs bơta toh glài lơi là wil tơl, rgơi lơh goh bơta tìs glài tòm hwềng soàn bol he sơl ơ?

Ngai do, ngai 09/07/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Ginny Dix bơh tơnggume BƠTA TOH GLÀI/WIL TƠL

“Dilah bol he yal glài he dê, gen Kơnràñ la Bơtau lơh jat jơnau ho Kơnràñ dê mơ la Bơtau song ring rơp toh glài bol he in, mơ rào bol he in goh jơh ală bơta ò song ring.” (‭‭I Jang‬ ‭1‬:‭9‬)

Hòn chò ngăn bơh bol he geh um dà nàng lơh goh să jan. Bulah gơs bơta bơ̆ bơl, gơ krăm ù bè lơi, hala neh jŏ rao ò um dà, mìng bơh dồ êt sơ bong nàng rơ cau sŏ, sơ bong să jăn in, mờ bơh dà hòr, să jăn bol he gơlik gơs gŏ mờ bô bơkah bè lài.

Tŭ neh um dà sir rau, bol he ò cang kơlôi bol he neh gơs bơta bơ̆ bơl bè lơi, kung ò càng sền tòm krơh oă dơ̆ nàng sền sơwì he neh kloh ò. Gen mìng git lah bol he neh geh lơh kloh rau.

Kung bè hơ̆ sơl, rài kis đah hwềng bol he kung pal càng geh lơh goh. Jơnau Yàng ai bol he in dồ jơnau hơ loh làng tòm I Jang 1: 9 “Dilah bol he yal glài he dê, gen Kơnràñ la Bơtau lơh jat jơnau ho Kơnràñ dê mơ la Bơtau song ring rơp toh glài bol he in, mơ rào bol he in goh jơh ală bơta ò song ring.”

Jơnau Sră Goh ràng tơlik pe bơta păl càng. Sơnrờp, bơta “yal glài”. Ò dì mìng là jơnau đơs dăn să, mờ là đăl git tồi glài he dê gơwèt mờ Yàng, gơ jrăñ sang glài mờ rêwơl mờ Kơnràñ. Dơ̆ pàr, cơng tàng bơta toh glài hơ̆ là tòm pơnah Yàng Tòm Trồ dê, là Bơtau “lơh jat jơnau hơ” mờ “song ring”. Lơh jat jơnau hơ là prap jơnau hơ, song ring geh ràng tơlik tŭ Yàng Tòm Trồ toh glài bol he in bơh bơta phi să tơ wài glài Kòn Dùl Kơnràñ dê. Dơ̆ pe, cồng nha bol he geh dòp bơta toh glài mờ geh rào goh “jơh ala bơta ò song ring” hơ̆ là bơta toh glài wil tơl.

Mờ ya, gen ò di kòp tŭ bol he sùm sền gŏ bơta hơ̆ ò. Oă dơ̆ bol he sùm kơlôi tus bơta tìs glài neh lòt găn, rài kis rềs àr bơr nàn oă ngăn. Ala bơta kơlôi sơnơng hơ̆ lơh bol he in ò git tồi glài he dê neh geh Yàng toh glài hala ò.

Tòm rài kis kòp ngai, gơs ala tềl bơ̆ rgơi lơh kloh, mờ ya kung gơs ala tềl bơ̆ păl lòt găn oă pơnah sồng chài lơh goh. Nàng rgơi lơh goh ala tềl bơ̆ hơ̆, bol he păl ngui ala phan lơh kloh. Mơya kung gơs ala tềl bơ̆ mờ kòn mơnus kung ò chài lơh roh jơh. Gen bơh hơ̆ dong kòp bol he in git lah kòn mơnus ò rgơi lơh, gen Yàng Tòm Trồ chài rgơi lơh wil tơl. Gơs ala tồi glài mờ bol he kơlôi lah ò chài rgơi toh, gen Yàng chài rgơi toh. Esai 1: 18 neh cih: “Bulah tồi glài bol mê dê be dà phồng, rơp gơlik bò be piar, bulah pơrhê be mhàm, rơp gơlik be sơnò belàt kò.”

Bol hè mòng òs kơlôi păl lơh dồ nơm broă lơi nàng dòp geh bơta toh glài. Mơya tòm I Jang 1:19 neh ai gŏ dồ nơm broă bol he păl càng lơh là yal glài, mờ bơta toh glài là gơ rê mờ Yàng Tòm Trồ. Bơta toh glài ò ơm tòm bơta pơn đơl nàng lơh dồ nơm broă lơi bol he dê, mờ ya hơ̆ là broă lơh wil tơl Yàng Je-su Krist dê hơ đăng chi pơng.

Tŭ Jơnau Yàng đơs lah Kơnrañ rơp rào goh bol he lik bơh “jơh ala bơta ò song ring”, gen hơ̆ ò di lah bơta toh glài dồ pơnah, ò di là dồ nơm glài, mơya là jơh tơl glài. Bulah bol he ò hềt toh glài dê să tòm he in, hala păl tòm toh mờ cồng nha ò niam bơh ala broă mờ bol he neh lơh, gen bơta toh glài Yàng dê sùm găm wil tơl.
Gen tàng, pơr lơ mờ kis gơ krăm tòm bơta ba sìl mờ wi wơ, kòp nă bol he geh hòi jà nàng gơn kơnòm dê jơnau hơ Yàng Tòm Trồ dê. Tŭ neh yal glài mờ gơ jrăñ sang glài, bol he rơp ntào kơ̆ tòm jơnau song là bol he neh geh Yàng toh glài mờ geh rào goh.

Dan jà bol he dô nùs bal tòm bơta hòi dan: Khoai Yàng koñ gơboh, kòn tus dê đap măt Kơnràñ tòm jơ do bơh nùs pìn pơn dêt gơ jrăñ sang glài dê đap Yàng. Dăn Yàng toh glài kòn in bơh oă tŭ dơ̆, bơh oă broă kòn neh lơh tìs mờ Kơnràñ. Ơ Yàng! Kòn ưn ngài Yàng bơh bơta toh glài mờ nđàc sơngit dờng ò nàng Kơnràñ dê hơđang rài kis kòn. Kòn dòn Kơnràñ là Bơtau lơh jat jơnau hơ mờ song ring nàng toh glài kòn in lik bơh jơh ala bơta iơh. Dăn Yàng lơh pa wơl hwềng nùs kòn mờ bồ tơng ngoh kòn in, dăn ai kòn in ting jat rài kis sàng goh niam nùs Kơnràñ. Kòn jơh nùs hòi dăn tòm sơnđăn Yàng Je-su Krist, A-men.

Ơ ồng mọ, oh mi koñ gơboh, tŭ yal glài mờ Yàng, bol he ngăn gơs bơta gơ jrăñ sang glài mờ hơ nền rê wơl mờ Kơnràñ sơl, hala mìng ơm di bơta kơlôi gơ jrañ sang glài? Bol he gơs bơta wi wơl bơh bơta toh glài Kơnràñ sơl ơ, hala găm ơm kis tòm bơta kơlôi sơnơng bơh tồi g;lài? Ngai do, cih kah tĕ tòm nùs lah Yàng lơh goh jơh bơta iơh bơ sak. Sak rhoa cơn đoà lòt tòm bơta gơn kơnơm mò geh khat gơboh Yàng pà ai. Sùm dòn nền lah Kơnràñ là Bơtau Lơh Wơh Pa, rgơi tòm gơl rài kis bol he dê. Dăn Kơnràñ bơtơl pràn nàng bol he ờ prap bơta tồi glài, mơya sùm ting jat dồ rài kis sàng goh niam nùs Kơnràñ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.