Đei trôk ‘mê̆ ‘bơm tơ hơbăn ao, mă đei pih a-lơ̆k a-le lơ wơ̆t, mălei ưh kơ đei rơgoh thoi đêl. Gah bơhngol lu bơ̆n, tơdrong yoch thoi lĕ kơ lu trôk ‘mê̆ noh. Rai ‘blŏk ming, lu bơ̆n rai mơn mơlâu kơdih. Lơ lu mơ’nah adrin “pơm rơgoh” tơdrong yoch kơdih hăm tơdrong tơplih, pơm tơdrong ‘lơ̆ng tơdah mă pơhaih kơdih akâu, mălei tơdrong mơn kơ yoch oei ling lang ‘bơ̆t doh đĕch. Lei hăm đei tơdrong huay kơ jô̆ yo a-yơ, gơh sŭt rơgoh dôm tơdrong ‘mê̆ ‘mach lăm bơhngol lu bơ̆n ưh?

Năr âu, ‘năr 09/07/2026, tơdrong tơdă Amăn Jơ Krao Khan Rim Năr apĭnh wơ̆n đĭ đăng lu bơ̆n wang pơwao Nơ̆r Kră Yang hăm bơngai chih Ginny Dix hăm kơ̆l ‘bai HUAY KƠ JÔ̆ YO TÔM TƠDRONG

“‘Bok Kei-Dei pơm trŏ thoi Sư pơkă, Sư pơm tơpăt ling-lang. Kơlih kơ thoi noh na bơ̆n dah roi tơdrong yoch bơ̆n kơ Sư, na Sư gô pơklaih bơ̆n đơ̆ng tơdrong yoch tơpă păng ‘nhao jơhngơ̆m bơ̆n đơ̆ng dôm tơdrong kơnê̆.” (I Yôhan 1:9)

Hiôk tơpă yua kơ lu bơ̆n gơh ‘nhao hơrao hum wă kơ akâu rơgoh. Mă khan trôk ‘mê̆ dang yơ, mơgrĭ thoi yơ, tơdah mă đunh bơih ưh kơ hum, lăp mĭnh ‘bar tơdrong ‘bônh ‘bŏ đĕch: tŏ sĕt hăm ‘bŏng hum kơ̆l, hăm ‘bŏng hum akâu, păng đei chơnglang đak, akâu jăn lu bơ̆n jing rơgoh păng ‘bâu phu thoi đêl.

Đang kơ hum bơih, lu bơ̆n ưh pă hiơ̆k ôh đêl lu bơ̆n trôk ‘mê̆ thoi yơ, kư̆m dai ưh kơ nŏng kơ trĕng kơmĭl wă lăng lăng bơ̆n kơdih hăm tam mă rơgoh ưh. Noh yua kơ lu bơ̆n băt kơdih bơ̆n rơgoh bơih.

Lei lăi thoi noh, tơdrong arih gah bơhngol lu bơ̆n kư̆m kăl kơ ‘nhao hơrao rơgoh. Nơ̆r Kră Yang pơkă rơđah ăn kơ bơ̆n lăm I Yôhan 1:9: “’Bok Kei-Dei pơm trŏ thoi Sư pơkă, Sư pơm tơpăt ling-lang. Kơlih kơ thoi noh na bơ̆n dah roi tơdrong yoch bơ̆n kơ Sư, na Sư gô pơklaih bơ̆n đơ̆ng tơdrong yoch tơpă păng ‘nhao jơhngơ̆m bơ̆n đơ̆ng dôm tơdrong kơnê̆.”

Nơ̆r Kră Yang âu pơdah pêng tơdrong tơm. Mă mônh, tơdrong kăl noh “tơbral”. Ưh kơ sĭ jơ̆ mĭnh nơ̆r apinh tơdrong mơnat, mă drơ̆ng hăm Kră Yang gah tơdrong yoch bơ̆n, pơhaih păng wih brŏk tơ Kră Yang. Mă ‘bar, tơm tơdrong mơnat noh đơ̆ng jơhngơ̆m ‘Bok Kei-Dei, jơ̆ Tơ’ngla “ ‘lơ̆ng tơpăt”. Răk nơ̆r jơ̆ khan pơm trŏ nơ̆r pơkă, tơpăt đei tơ’bôh kơplah ‘Bok Kei-Dei mơnat ăn tơdrong yoch lu bơ̆n hăm tơdrong lôch tang Kon Pôm Sư. Mă tơpêng, tơdrong lu bơ̆n đei sơng iŏk noh jơ̆ tơdrong huay kơ jô̆ yo păng sŭt rơgoh đơ̆ng “dôm tơdrong kơnê̆”, noh jơ̆ tơdrong huay kơ jô̆ yo tôm tơdrong.

Mălei, ưh kơ sĭ layơ lu bơ̆n kư̆m dai đei mơn tơdrong noh ôh. Lơ ‘măng lu bơ̆n ling lang kơ chĕp ba tơdrong kơnê̆ so, khan lu bơ̆n đêl arih kơnê̆ thoi yơ. Dôm lu tơdrong tơchĕng noh pơm kơ lu bơ̆n ưh kơ băt tơdrong yoch lu bơ̆n Kră Yang mơnat đĭ bơih dah ưh.

Lăm tơdrong arih rim năr, đei lơ lu trôk ‘mê̆ ‘bônh kơ pơm rơgoh, mălei đei lơ mơ’nah kăl kơ pơm lơ tơdrong ‘mơ̆i na gơh rơgoh. Wă sŭt lê̆ lu trôk noh, lu bơ̆n khŏm mă yua lu pơgang, đak ôp rơgoh. Đơ̆ng tơdrong noh pơm kơ lu bơ̆n kơnăl tơdrong mă kon bơngai ưh kơ kĕ pơm, mălei ‘Bok Kei-Dei gơh pơm tôm tơdrong. Đei lu tơdrong yoch mă lu bơ̆n tơchĕng gô ưh kơ kĕ đei tơdrong mơnat, tă kơ Kră Yang oei gơh mơnat ‘mơ̆i. Êsai 1: 18 chih: “Mă đơ̆ng tơdrong yoch lu iĕm ‘brê nhen thoi đak thêt gô jing kok thoi đak prĕl. Mă ‘brê gơhieo gô jing kok thoi sŏk triu.”

Lu bơ̆n juăt kơ tơchĕng khan bơ̆n kăl kơ pơm kiơ kiơ wă kơ đei tơdrong mơnat. Mălei I Yôhan 1:9 đei tơ’bôh lăp mĭnh tơdrong đĕch lu bơ̆n kăl kơ pơm noh jơ̆ tơbral, na tơdrong mơnat ăn noh gah ‘Bok Kei-Dei. Tơdrong mơnat ưh kơ đei yua kơ lu bơ̆n adrin, mălei jơ̆ đơ̆ng tơdrong jang keh tôm đơ̆ng Kră Yang Yêsu Krist tơ kơpal ‘long pơglang.

Kơplah Nơ̆r Kră Yang khan Sư gô sŭt rơgoh lu bơ̆n đơ̆ng “dôm tơdrong kơnê̆”, noh ưh kơ sĭ mơnat mĭnh puăt đĕch, ưh kơ sĭ mĭnh ‘bar tơdrong yoch đĕch, mălei đĭ đăng dôm lu tơdrong yoch hloi. Mă kơplah kơdih bơ̆n huay kơ jô̆ yo kơ kơdih bơ̆n, dah oei tơ’bơ̆p dôm lu tơdrong đêl lu bơ̆n pơm glăi, na Kră Yang oei mơnat ăn đĕch.

Thoi noh, tơplih kơ arih lăm tơdrong mơlâu păng ngĭl ngŭl, lu bơ̆n đei krao wơ̆n wă kơ lui kơ nơ̆r pơkă đơ̆ng ‘Bok Kei-Dei. Kơplah đei tơdrong pơhaih păng tơbral, lu bơ̆n gô dơ̆ng kơjăp lăm tơdrong ‘lơ̆ng tơpăt păng lu bơ̆n huay kơ đei jô̆ yo păng sŭt rơgoh đĭ bơih đơ̆ng Kră Yang.

Apĭnh đĭ đăng krao khan hơdai: Ơ Kră Yang mă ‘mêm, kon năm ‘bơ̆t anăp Ih jơ âu hăm iŏk đon ala kon tơbral ‘bơ̆t anăp Ih. Apinh Ih mơnat ăn kơ kon yua kơ lơ wơ̆t, lơ trong kon đei pơm yoch hăm Ih. Ơ Kră Yang! Kon bơnê kơ Ih yua kơ tơdrong ‘mêm păng mơnat Ih lăm chăl arih kon. Kon lui kơ Ih jơ̆ Tơ’ngla ‘Lơ̆ng Tơpăt wă mơnat ăn kơ kon đơ̆ng dôm lu tơdrong kơnê̆. Apinh Ih tơplih ming jơhngơ̆m păng đon tơchĕng kon, păng tơgŭm kon pơm kiơ̆ tơdrong arih ‘lơ̆ng kiơ̆ thoi Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah tơbral tơdrong yoch hăm Kră Yang, ih hăm pơhaih tơpă păng drơ̆ng wă wih brŏk tơ Sư ưh, dah dơ̆ng ‘bơ̆t hmach đĕch? Ih hăm oei tơchĕng ngĭl ngŭl gah tơdrong huay kơ jô̆ yo Sư ưh, tơdah mă oei arih lăm tơdrong mơlâu kơ tơdrong yoch? Năr ‘nâu, athei chih răk bĕ lăm jơhngơ̆m ih Kră Yang sŭt rơgoh ih đơ̆ng tôm tơdrong yoch kơnê̆ bơih. Athei rơih iŏk trong năm lăm tơdrong lui gơnang păng rơngei đơ̆ng Kră Yang ăn. Ling lang lui kơ Sư jơ̆ Tơ’ngla Pơklaih Ming, gơh pơm tơplih tơdrong arih ih. Apinh Sư tuh ăn kơ ih jơhngơ̆m pran wă kơ ih huay kơ tôi iŏk tơdrong yoch, mă ling lang druh kiơ̆ kơ tơdrong arih rơgoh mă Sư lăp đon.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.