Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab

Ib teev kua mem nrog rau ntawm lub tsho dawb, txawm yog me xwb los yuav ua rau lub tsho qias tas. Kev txhaum los kuj zoo ib yam li ntawd, nws yuav nrhuav tshem peb txhua hnub. Tiamsis los ntawm Tswv Yexus cov ntshav ntws saum Ntoo Khaub Lig los, txhua qhov dub hauv peb lub neej yuav tau ntxuav huv, thiab dhau los dawb paug li thaum tshiab. Tib yam uas peb yuav tau ua yog tag siab lees tawm, tso peb tej kev txhaum tseg thiab txais yuav Vajtswv txoj kev zam txim. 

Hnub no, yog hnub 13/11/2022, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joanna Eccles dhau ntawm Zaj kawm TXOJ NTSHAV NTXUAV KOM HUV

“Nws theej txhoj tib zaug xwb ua rau cov neeg uas nws xub ntxuav lawm ua tau neeg zoo kawg nkaus mus ibtxhis li.”  (Henplais 10:14).

Thaum tseem yau kuv pheej siv tus mem xim liab coj los kos tej kab ntev ntev rau saum kuv daim pam pua txaj. Kuv kub siab lug xav qhia rau niam paub txog kuv lub peev xwm txawj kos duab, kuv yeej tsis paub tias kuv niam yuav chim. Niam saib tej uas kuv kos ntawd zoo li ib qhov qias tsuas puas lawm yuav tau muab tshem tawm. Hnub ntawd lub máy ntxhua ris tsho ua haujlwm tas zog. Niam siv tshuaj ntau heev los txhuam mus txhuam los ntau zaug txog rau thaum daim pam pua txaj no rov qab zoo li qub. Kuv yeej tsis muaj ib hnub tau ua si nrog tus mem liab ntawd ntxiv lawm. 

Tswv Yexus cov ntshav uas nrog saum Ntoo Khaub Lig kuj zoo ib yam li cov tshuaj ntxhua tej yam qias rau peb tej kev txhaum. Nyob hauv Vajluskub Qub, tag nrho txhua tus, cov pov thawj hlob tib si, lawv yuav tau fij khoom theej txhoj yog nyuj, tshis, kom txhiv lawv tej kev txhaum ntawm Vajtswv xub nitag. Thaum no peb ua raws li txoj kevcai ntawm Vajtswv xub ntiag. Henplais 10:14 sau: 

“Nws theej txhoj tib zaug xwb ua rau cov neeg uas nws xub ntxuav lawm ua tau neeg zoo kawg nkaus mus ibtxhis li.” 

Tswv Yexus fij Nws tus kheej ib zaug xwb txaus lawm, ua rau peb dhau los ua tus tsis muaj qhov txhab mus ib txhis. 

Thaum Tswv Yexus tuag saum Ntoo Khaub Lig, Tswv Yexus cov ntshav ntws los npog tag nrho peb tib neeg ntiajteb tej kev txhaum. Loos 3:24-26a sau: 

“Vajtswv txojkev hlub uas nws muab pub dawb rau neeg yog nws txib Yexus Khetos los tuag txhiv neeg kom dim txim, Vajtswv thiaj suav hais tias neeg ncaj ncees tabmeeg Vajtswv. Vajtswv txib Yexus Khetos los tuag theej neeg lub txhoj thiab nws cov ntshav ntxuav neeg tej kev txhaum, Vajtswv thiaj zam tau neeg lub txhim, vim neeg ntseeg Yexus Khetos. Vajtswv ua li ntawd qhia hais tias Vajtswv yog tus ncaj ncees. Yav tas los Vajtswv ua siab ntev thiab tsis rau txim rau cov neeg uas ua txhaum.  Qhov uas Vajtswv ua li no qhia hais tias Vajtswv yog tus ncaj ncees…” 

Vajtswv paub hais tias Vajtswv tus tub yuav mloog leej txiv lus thiab haus lub khob uas peb tsimnyog raug. Ntawd yog cov khoom theej txhoj uas fij ib zaug xwb txaus rau Leej Txiv saum ntuj zam txim rau tag nrho tib neeg ntiajteb txhua tus. Tswv Yexus los pab kom txhua tus uas tau ua neej nyob rau hauv ntiajteb no puav leej muaj caij tau mus saum ntuj ceebtsheej. Tag nrho txoj kev cawmdim puav leej ua dhau los ntawm tes haujlwm saum Ntoo Khaub Lig, thaj chaw uas txhua txoj kev txhaum raug ntxuav huv si. 

Tswv Yexus tsis yog tsuas them nqi rau tib neeg tej kev txhaum yav dhau los xwb, tiamsis tseem yuav cawm peb txij no mus txog rau ib txhis. Peb cia li muaj lub siab tawv mus cuag Tswv Yexus thiab thov kom Nws zam txim. 1 Yauhas 1:9 sau: 

“Tiamsis yog peb lees peb tej kev txhaum rau Vajtswv, Vajtswv yog tus ncaj ncees, nws yuav ua raws li nws tau coglus tseg lawm, nws yuav zam peb tej kev txhaum thiab nws yuav ntxhuav peb tej kev txhaum huv tibsi mus”

Peb lub neej yuav rov zoo dua tshiab dhau los ntawm tus menyuam yaj cov ntshav thaum peb tag siab tso peb tej kev txhaum tseg ntawm Vajtswv xub ntiag. Peb lees hais tias peb qhov haujlwm tau ua txhaum Vajtswv txoj kev cai. Tom qab ntawd peb ua Vajtswv tsaug vim Vajtswv tau zam txim rau peb dhau los ntawm tes haujlwm Tswv Yexus tau ua rau saum Ntoo Khaub Lig. Peb muab peb txoj sia tuav nyob rau hauv Yexus Khetos kom tau Leej Txiv ntsia pom Yexus Khetos txoj kev ncaj ncees nyob hauv peb. 

Txawm yog koj yeej ib txwm tsis tau muab ntshav coj los ntxua ris tsho los, Tswv Yexus cov ntshav yog cov “tshuaj txhuam” uas peb yuav txhuam tau peb tus ntsujplig. Henplais 10:19-22 sau: 

“Cov kwvtij, twb yog vim Yexus tuag theej peb lub txhoj, peb thiaj muaj cuabkav mus rau hauv Chav uas Dawbhuv Kawg Nkaus. Nws qhia txojkev tshiab uas cawm neeg txojsia rau peb taug; nws qhib daim ntaub kom peb tau kev mus rau sab hauv, daim ntaub ntawd yog nws lub cev. Peb muaj ib tug Povthawj Hlob uas saib xyuas Vajtswv tsevneeg.  Yog li ntawd, peb cia li muaj nplooj siab dawb paug los cuag Vajtswv thiab cia siab ntsoov rau nws rau qhov peb paub hais tias Yexus cov ntshav twb ntxuav peb lub siab thiab dej twb ntxuav peb lub cev huv tibsi lawm” 

Kev txhaum thiab kev txajmuag, tej yam uas ua rau muaj kev qias mus ib txhis, thaum no twb tau ntxuav los ntawm Tswv Yexus cov ntshav. Peb tau txais kev ywj pheej nyob rau hauv Tswv Yexus.

Thov caw nrog kuv peb thov Vajtswv ua

Tswv Yexus ua Koj tsaug vim Koj tau tuag saum Ntoo Khaub Lig vim kuv, kom kuv tej kev txhaum tau zam thiab ntxuav kom huv, kom kuv lub siab no dawbhuv thiab kuv lub neej tau hloov pauv. Los ntawm cov ntshav ntawd, kuv tau suav tias ncaj ncees ntawm Vaj Leej Txiv xub ntiag thiab txais tau txojsia ib txhis. Kuv tsis paub yuav hais li cas txog lub siab nco tshav ntuj thaum tau tsau tsawv rau hauv Tswv Yexus cov ntshav tau ntxuav kuv no. Kuv thov hauv Tswv Yexus Khetos lub npe. Amees.

Cov kwv tij uas hlub! Yexus Khetos cov ntshav uas muaj hwjchim ntxuav kom huv no tseg rau txhua tus. Yav dhau los thiab tamsim no, mus txog rau ib txhis. Tswv Yexus muab qhov khoom tsis muaj nqi pub rau peb, pab ntxuav peb lub hlwb phem thiab coj peb rov qab los rau hauv txoj kev dawbhuv zoo kawg nkaus. Yog li, cia li ua Tswv Yexus tsaug vim Tswv Yexus cov ntshav uas muaj hwjchim ntawd, thiab ua lub neej kom tsimnyog rau cov ntshav ntawd dhau ntawm ib lub neej tau hloov pauv.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.