Thoi noh na năr phĕt Halloween truh boih. Tơ teh đak gah bơmơ̆t, lu kon hơ’lơ̆p juăt kơ hrŭk ao pơm rup brêm, na năm đơ̆ng hnam âu truh tơ hnam nai apĭnh ‘bĕng kĕo. Lu sư tơdŭ ‘măng hnam, hăm krao ‘bơ̆r re khan: “asong ‘bĕng kĕo dah wă tôt bơhle!” Kiơ̆ thoi tơdrong juăt lăm năr noh, hnam ayơ đei ŭnh kơđeng pơchrang hơdah ‘bơ̆t anăp ‘măng, noh tơbăt kơ ‘bok tơ’ngla hnam đei đon nuih sơng iŏk lu kon hơ’lơ̆p năm apinh ‘bĕng kĕo. Mă gah hnam ayơ ưh kơ tơ̆k ŭnh kơđeng, noh tơbăt kơ lu sư ưh kơ đei pơm hơdai lăm năr noh. Lăm minh măng mă lu bơngai juăt kơ pơm rup yang kơnê̆, dôm lu tơdrong hli krưp păng tơdrong măng mu, lu bơ̆n bơngai lui kơ Kră Yang hăm kăl kơ hli, dah wer weh đơ̆ng lu tơdrong noh ưh? Thoi noh, lu bơ̆n athei lăng pơwao păng pơm thoi yơ, kơplah tơ’bơ̆p jơ năr thoi âu?

Năr ‘nâu, năr 30/10/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Cathy Irvin kơ̆l ‘bai ‘NĔ HLI KƠ MĂNG MU

“Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.” (Mathiơ 5:16)

Đơ̆ng rŏng kơ tơdrong hiôk chơt lăm năr phĕt Halloween, oei đei lơ tơdrong mă lu bơ̆n athei tơchĕng. Tơdah lu kon hơ’lơ̆p oei hưch hanh chang gô jơ năr măng ‘nâu, mă-lei năr phĕt âu hăm trŏ kơ hơđơ̆ng dah ưh? Păng lu bơ̆n bơngai lui kơ Kră Yang Yêsu hăm gơh năm pơchơt hơdai lăm năr âu dah ưh?

Gah inh kơdih, inh tơchĕng khan lu Hnam Akŭm athei pơjing minh tơdrong pơchơt kơ lu kon hơ’lơ̆p, wă tơplih kơ dôm tơdrong phĕt tơ gah ‘ngoaih. Tơ Hnam Akŭm, lu kon hơ’lơ̆p oei gơh pơchơt, hrŭk ao pơm rup, iŏk ‘bĕng kĕo, nhă đak plei ‘long păng pơchơt hơdai dih băl lăm minh anih hiôk chơt ‘lơ̆ng păng trŏ kơ lu sư hloh.

Thoi noh, lu bơngai mă ưh kơ đei kon hơ’lơ̆p athei pơm thoi yơ lăm jơ năr âu? Lu bơ̆n lăng tơdrong âu jing jơ năr wă tơgŭm lu kon hơ’lơ̆p tơ Hnam Akŭm, dah chă minh trong trŏ wă tơbăt tơdrong ‘mêm mơnat Kră Yang, păng jing tơdrong hơdah đơ̆ng Sư lăm tôm tơdrong jum dăr kơ bơ̆n?

Kră Yang Yêsu krao lu bơ̆n athei pơchrang tơdrong hơdah đơ̆ng Sư ‘bơ̆t anăp đĭ-đăng bơngai, wă kơ lu sư ‘bôh dôm tơdrong ‘lơ̆ng lu bơ̆n pơm. Rim ‘nu kăl kơ ‘bôh tơdrong ‘mêm mơnat đơ̆ng Kră Yang đơ̆ng tơdrong arih lu bơ̆n. Lu kon hơ’lơ̆p, tam mă băt hlôh tôm tơdrong mă lu sư ‘bôh păng tơ’bơ̆p, thoi noh lu sư rai kăl kơ đei lu bơngai kră ‘mêm mơnat, ba trong păng wei-lăng lu sư.

Sơ̆ inh đei hrŭk ao pơm rup, năm tơ hnam pơgang ăn kơ lu kon hơ’lơ̆p ‘bĕng kĕo trŏ kơ tơdrong jĭ lu sư. Inh kư̆m đei năm tơ Hnam Akŭm wă tơgŭm tơdrong tơdă pơjing ăn kơ lu kon hơ’lơ̆p mơ̆n. Mă-lei đei dôm sơnăm inh pĭt lê̆ ŭnh kơđeng, oei hrĕp lăm hnam. Rŏ lăng inh đei pơlong dôm lu tơdrong noh boih.

Sơnăm sơ̆, kon drŏ-kăn inh păng kon sâu inh pơtơm inh năm hơdai lu sư, năm hơdai lu kon hơ’lơ̆p lăm jơ năr măng Halloween. Lăm kơ măng noh, lu nhôn lăng lu kon sâu, lăng pơnhen dôm lu bĕng kĕo lu sư đei iŏk, păng pơkă kơ lu sư ưh gơh năm mơ̆t tơ lăm hnam tơmoi ôh.

Đei minh wơ̆t, minh ‘nu ‘bok kră pơih ‘măng hnam păng krao lu kon hơ’lơ̆p năm mơ̆t tơ lăm hnam wă iŏk ‘bĕng kĕo. Inh hơloh khan: “Ơ ‘bok, apinh ‘bok mơnat, nhôn pơkă lu kon hơ’lơ̆p ưh kơ gơh mơ̆t tơ lăm hnam tơmoi ôh. Thoi noh, apinh ‘bok ăn kơ lu sư tơ ‘ngoaih âu đĕch.”

‘Bok kră noh mơ̆ng, na drơ̆ng, păng lĕch tơ gah ‘ngoaih asong bĕng kĕo kơ lu kon sâu. Kơplah lu nhôn brŏk, inh oei chang hơmĕng kơ ‘bok gô hlôh yua kơ kiơ lu nhôn kăl kơ pơkă kơ hơ’lơ̆p thoi noh.

Inh kư̆m pơkă lu kon sâu khan, lăm pơlei oei đei lơ hnam nai asong ‘bĕng kĕo, thoi noh ưh kơ kăl wă iŏk pơthim ‘bĕng kĕo dơ̆ng ôh.

Ưh kơ đunh klaih kơ noh, inh jet akâu inh kơdih: “Inh lĕch tơ gah ‘ngoaih lăm jơ kơ măng ‘nâu wă pơm kiơ?” Đơ̆ng noh inh ‘bôh băt kơ inh đei yua jơ năr noh wă yak năm hăm tơdrong krao khan apinh Kră Yang tơgŭm lu kon hơ’lơ̆p mă oei pơchơt tơ rok trong. Inh krao khan apinh Kră Yang wei-lăng lu sư, krao khan kơ lu hnam dơnŏ lăm pơlei păng lu bơngai mă oei pơih ‘măng hnam wă sơng iŏk lu kon hơ’lơ̆p.

Lăm jơ năr lu nhôn yak năm, inh kư̆m tơ’bôh minh ‘bar hnam dơnŏ mă lui kơ Kră Yang kư̆m thoi inh mơ̆n. Lu sư oei tơ̆k ŭnh kơđeng ‘bơ̆t anăp ‘măng hnam, wă asong ’bĕng kĕo kơ lu kon hơ’lơ̆p. Mă-lei lu sư ưh kơ pơm dôm lu rup yang kơnê̆, dah pơm kơ anih noh jing anih hli krưp ôh. Inh ‘bôh lu sư pơma hăm nơ̆r iơ̆m dim hăm lu kon hơ’lơ̆p: “Kră Yang ăn pŭn hiôk kơ ih!” Păng lu sư pơkă kơ lu kon hơ’lơ̆p athei kơchăng, yak pơlơ̆ng păng rôp ti dih băl.

Lu nhôn ưh kơ layơ ăn kơ lu kon sâu hrŭk ao pơm rup dôm lu bơngai mă đei pơgơ̆p hăm yang kơnê̆ ôh. Lu kon sâu kư̆m ưh kơ lăp đon năm jê̆ dôm lu hnam đei pơm rup hli krưp mơ̆n. Tơdrong pơm ăn kơ lu sư hưch wă noh lăng lu hơbĕn ao phara dih băl, iŏk bĕng kĕo, na klaih kơ noh wih tơ hnam hăm jơhngơ̆m hiôk chơt.

Thoi noh, inh đei chu wă pơ-ư pơ-ang năr phĕt Halloween, dah kiơ̆ dôm tơdrong pơgơ̆p hăm tơdrong măng mu păng tơdrong kơnê̆ dah ưh? Ưh ôh. Mă-lei inh wă yua jơ năr âu jing minh jơ năr gơh roi tơbăt tơdrong ‘mêm mơnat đơ̆ng Kră Yang Yêsu kơ lu bơngai jum dăr kơ inh dah ưh? Trŏ tơpă, inh wă pơm thoi noh.

Inh wă pơm tơdrong ‘lơ̆ng lăm teh đak oei đei lơ tơdrong măng mu, păng rơih iŏk năm tơ gah ‘ngoaih wă kơ tơdrong hơdah đơ̆ng Kră Yang Yêsu gơh pơchrang lăm tơdrong arih inh. Inh kư̆m ăn kơ lu kon hơ’lơ̆p tơmam iĕ đơ̆ng hnam mơdro hla bơar khŭl bơngai lui, hla bơar bơtho Tơdrong ‘Nao ‘Lơ̆ng gah tơdrong Kră Yang ‘mêm mơnat, wă kơ lu sư băt rai hloh gah năr Halloween, hăm tŏ sĕt bĕng kĕo tah ‘bơ̆t anăp ‘măng hnam inh. Mă-lei tơdah inh rơih iŏk trong ayơ hĭ, inh ưh kơ wă tang ‘măng hnam, oei adrô̆ păng dơ̆ng tơ ‘ngoaih kơ tơdrong noh ôh.

Yua kơ Kră Yang Yêsu đei krao lu bơ̆n athei arih thoi yơ, wă kơ lu bơngai nai gơh ‘bôh tơdrong hơdah đơ̆ng Sư đơ̆ng dôm tơdrong ‘lơ̆ng lu bơ̆n pơm. Sư khan lăm Sơ̆p Hla Bơar Mathiơ 5:16 thoi âu:

“Lu iĕm athei pơchrang hơdah kơ đe tơdrong hơdah lu iĕm thoi noh mơ̆n, na đe băt kơ tơdrong iĕm pơm ‘lơ̆ng, na đe bơnê hăm ư-ang kơ ‘Bă bơ̆n tơ plĕnh ti.” (Mathiơ 5:16)

Sơ̆p Hla Bơar Yôhan 3:21 kư̆m tơ’blŏk kơ bơ̆n băt kơ bơngai bu pơm kiơ̆ tơdrong tơpăt, bơngai noh gô “năm tơ tơdrong hơdah”. Thoi noh, tơplih kơ ăn kơ tơdrong hli krưp pơm ăn kơ lu bơ̆n ôn akâu, inh wă rơih iŏk oei arih lăm tơdrong hơdah, păng ăn kơ tơdrong hơdah noh pơchrang tơ lăm teh đak oei đei lơ tơdrong măng mu.

Apĭnh đĭ đăng krao khan hơdai: Kơkuh kơ Kră Yang Yêsu, kon bơnê kơ Ih yua kơ tơdrong ‘mêm mơnat păng tơdrong Ih ling-lang wei-lăng tơdrong arih kon rim năr. Apinh Ih ăn kơ kon tơdrong gơh hơgei, wă kơ kon băt rơih iŏk dôm tơdrong pơm trŏ thoi Ih wă, lăm dôm tơdrong mă kon oei sơleng kơ đon păng tam mă băt trŏ athei pơm thoi yơ. Mă khan kon oei arih lăm teh đak đei lơ tơdrong măng mu, apinh Ih tơgŭm kon huay kơ hiơt kơ kon jơ̆ bơngai gah tơdrong hơdah đơ̆ng Ih. Apinh Ih yua dôm nơ̆r kon pơma, dôm tơdrong kon pơm, păng tơdrong kon pơm hăm lu bơngai jum dăr kơ kon, wă tơbăt tơdrong ‘mêm mơnat đơ̆ng Ih, wă kơ tơdrong hơdah Ih oei pơchrang ling-lang đơ̆ng lăm tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rim hnam dơnŏ đei rơih iŏk trong phara dih băl lăm jơ năr măng ‘nâu: oei tơ hnam, ba lu kon hơ’lơ̆p năm tơ gah ‘ngoaih, dah năm kiơ̆ tơdrong pơchơt tơ Hnam Akŭm. Tơdrong kăl hloh noh lu bơ̆n athei krao khan apinh Kră Yang, pơ’lơ̆ng pơm dôm tơdrong hăm jơhngơ̆m ‘lơ̆ng tơpăt ‘bơ̆t anăp Kră Yang. Rŏ lăng sơnăm âu ih rơih iŏk pơm thoi âu, mă truh sơnăm tơ anăp ih ‘bôh trong nai trŏ hloh dơ̆ng. Mă khan ih rơih iŏk trong ayơ kư̆m bưh, athei ăn kơ tơdrong ‘mêm mơnat, tơdrong gơh hơgei păng tơdrong hơdah đơ̆ng Kră Yang đei tơbăt đơ̆ng tơdrong arih ih. Thoi noh, wă kơ lăm kơmăng măng mu, tơdrong hơdah đơ̆ng Kră Yang pơchrang lăm tơdrong arih lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.