Ƀing ta hlăk hơmư̆ Tơlơi Lir Hơbĭt Khua Yang Rĭm Hrơi amăng Oneway Radio hăng lu tơlơi hrăm mơ̆ng Boh Pơhiăp Ơi Adai găn tơlơi mưn amăng tơlơi hơdip rĭm hrơi kơ lu čô mơnuih, tui sŏp hră CBN Devotional Daily. Čang rơmang tơlơi hơdip ƀing ta či phrâo nanao amăng jơlan đuaĭ tui Khua Yang rĭm hrơi

Abih bang ƀing ta leng hmâo tơlơi kơƀah kơ ƀing ta pô. Leng hmâo tơlơi mlâo yua tơlơi ƀu klă tum ƀing ta. Samơ̆ ƀing ih thâo mơ̆, Khua Yang ƀu lăng nao ôh amăng tơlơi kơƀah aka ƀu klă tum ƀing ta. Ñu khăp ƀing ta tơl kơnơ̆ng ƀuh tơlơi hiam rŏ amăng rĭm čô ƀing ta – ană bă Ñu khăp hơeng. Laih anŭn Ñu kiăng kơ ƀing ta pơđing tơngia hmư̆ asăp tơlơi khăp rơun tơdu Ñu tơngoa đĭ amăng pran jua ƀing ta.

Hrơi anai, lơ 07/03/2024, Tơlơi Lir Hơbĭt Khua Yang Rĭm Hrơi iâu pơthưr ƀing ta hrăm hrŏm hơbĭt Boh Pơhiăp Ơi Adai hăng Martha Noebel tui hăng akŏ tơlơi hrăm ANĂ HIAM BIĂ MĂ.

“Yêhôwa Ơi Adai dŏ tơ̆ng krah ih, Ñu jing Pô Dưi Kơtang či pơklaih ih; Ñu či mơak mơai hơ̆k kơdơ̆k yua kơ ih, yua kơ tơlơi khăp, Ñu či dŏ rơiăt hĭ, laih anŭn yua kơ ih, Ñu či adoh hơ̆k mơak.” (Sôphôni 3:17)

Tăp năng amăng mông iâu laĭ, ƀing ta nanao tơña kơ ƀing ta pô: “Khua Yang hmâo hmư̆ asăp kâo mơ̆?” Lu wơ̆t ƀing ta tơña Khua Yang hmâo bơngơ̆t kơ kâo mơ̆. Ƀing ta čang rơmang Ñu pơsĭt hăng ƀing ta hmâo mơ̆n. Tơlơi anai rŏ dah phara biă mă, djơ̆ mơ̆? Ƀing ta thâo krăn Khua Yang hlăk gĭt gai amăng tơlơi hơdip ƀing ta. Yua kơ anŭn, hnŭn ƀu djơ̆ ôh bruă ƀing ta khŏm ƀlơ̆ng bơngơ̆t.

Hrơi anai kâo hmư̆ sa tơlơi adoh, laĭ nao “Ană hiam biă mă”. Tơdang hmư̆ boh tơlơi adoh tơngoa đĭ, kâo blĭp hơdơr nao lu mơta tơlơi. Tơlơi adoh laĭ nao kơ sa čô ama čơkă ană tơčoa ñu. Nai ia jrao laĭ hmâo sa tơlơi pơthâo ƀu hiam sĭt yơh či ngă kơ ñu ƀu bơmơak ôh. Ană ñu phrâo tơkeng suih pral, samơ̆ ƀu hiam klă tum. Čơđai anŭn hmâo sa “tơlơi ƀu klă tum” kơ rup gah drơi jăn. Tơlơi adoh ƀu laĭ nao klă rơđah tơlơi ƀu klă tum anŭn jing hơgĕt, samơ̆ tơlơi ră ruai tŏ tui anŭn hmâo ngă kơ kâo ƀlĕ hĭ ia mơta.

Pô ama nao dŏ jĕ giăm pơ ană đah kơmơi anĕt aneo ñu hăng răng pi ană ñu amăng pran jua. Ñu djă pi ană ñu kơjăp laih anŭn pơhiăp pheč phoč: “Ană hiam biă mă”. Tơ̆ng krah lŏn tơnah nanao hơngah lui khul tơlơi ƀu klă tum, bruă kơ ama ñu ngă hmâo ngă kơ kâo hling hlang biă mă. Ñu ƀu bơngơ̆t lăng nao ôh khul tơlơi ƀu klă tum kơ ană ñu, ñu kơnơ̆ng bơrơđah tơlơi ñu khăp kơ ană ñu prŏng biă mă. Hloh kơ anŭn dơ̆ng, ană đah kơmơi anĕt aneo ñu jing hiam hloh amăng tơlơi hơdip hăng ñu. Ñu lăi wơ̆t dah khŏm lui abih bang lŏn tơnah anai kiăng kơ pơblih hăng ană đah kơmơi ñu, sĭt biă mă ñu ăt ruah mă ană ñu. Hmư̆ dơ̆ anŭn, kâo ƀu thâo khă kơ̆ng ôh kơ ia mơta kâo. Tơlơi adoh anŭn hmâo tơlơi yom biă mă.

Tơlơi adoh dŏ tŏ tui pơhơdơr kơ kâo Khua Yang Yêsu. Ñu hmâo lui hĭ grê pơtao guh kơang kiăng djai pơala brơi kơ ƀing mơnuih ƀu năng lăp kar hăng ƀing ta. Ñu rơun tơdu laĭ hăng ƀing ta kar hăng ama laĭ hăng ană ñu khăp hơeng: ană hiam biă mă. Tơlơi hiam rŏ jing abih bang khul hơgĕt Ñu ƀuh tơdang lăng amăng ƀing ta. Ñu ƀu bơngơ̆t nao ôh kơ khul bruă aka ƀu klă tum, Ñu kơnơ̆ng lăng ƀuh tơlơi hiam rŏ amăng ană bă Ñu. Ñu ƀu lăng ƀing ta kar hăng ană mơnuih tañ răm rai, samơ̆ Ñu kơsem lăng ƀing ta kar hăng ană bă tơlơi bơngač Ñu tơdang glaĭ pơ Dêh Čar Pơtao Ơi Adai: Klă hiam amăng abih bang bruă.

Amăng tơlơi adoh kâo hlăk ră ruai hmâo črăn:
Ană hiam biă mă. Hiam amăng abih bang.
Ană hiam biă mă.
Ama nanao čang tơguan amăng hrơi anai
Wơ̆t dah pơplih hăng abih lŏn tơnah
Ama ăt ƀu pơplih ôh
Yua kơ ană hiam biă mă.

Ƀing ta ƀuh ƀing ta hiam rŏ mơ̆? Ƀing ta thâo krăn mơ̆ Khua Yang Yêsu khăp kơ ƀing ta lu biă mă? Tăp năng ƀing ta tơña kơ ƀing ta pô: “Khua Yang ƀuh mơ̆ kâo hiam biă mă?” Tơlơi khăp Ñu hmâo pioh brơi kơ abih bang ƀing ta prŏng prin biă mă. Khua Yang Yêsu hmâo pơsăn tơlơi hơdip Ñu kiăng kơ ƀing ta yah thâo tơlơi khăp anŭn. Hmâo lu wơ̆t laih Ñu laĭ hăng ƀing ta: “Ană hiam biă mă. Ană hmâo hmư̆ asăp Ama mơ̆?”

Ñu ăt dŏ lơ̆k nao rai tơlơi pơhiăp anŭn brơi kơ rĭm čô ƀing ta amăng hrơi anai. Ƀing ta hmâo hmư̆ mơ̆ khul boh tơlơi adoh kơ tơlơi khăp Ñu hmâo mơit nao kơ ƀing ta hăng tơlơi rơun tơdu? “Ană hiam biă mă. Ană hmâo hmư̆ mơ̆ asăp kơ Ama?”

“Yêhôwa Ơi Adai dŏ tơ̆ng krah ih, Ñu jing Pô Dưi Kơtang či pơklaih ih; Ñu či mơak mơai hơ̆k kơdơ̆k yua kơ ih, yua kơ tơlơi khăp, Ñu či dŏ rơiăt hĭ, laih anŭn yua kơ ih, Ñu či adoh hơ̆k mơak.” (Sôphôni 3:17)

Rơkâo ƀing ta pioh mông iâu laĭ hrŏm hơbĭt
Bơni kơ Ama yua kơ Ih nanao khăp kơ kâo wơ̆t dah kâo ƀu hiam klă tum ôh. Rơkâo kơ Ih pŏk pran jua, pŏk tơlơi pơmĭn kiăng kâo pơđing tơngia hmư̆ khul boh pơhiăp tơlơi Ih khap. Brơi abih tơlơi hơdip kâo bơrơđah tơlơi hiam rŏ hăng tơlơi khăp Ih brơi kơ abih bang lŏn tơnah leng kơsem lăng. Kâo iâu laĭ hăng anăn Khua Yang Yêsu Krist, A-men.

Ơ abih bang ayŏng amai adơi khăp hơeng, wơ̆t ƀing ta jing ană mơnuih ƀu hiam klă tum samơ̆ Ama ƀing ta jing Ơi Adai Dưi Kơtang. Tơlơi Ñu khăp dưi tuh bă blai amăng tơlơi dŏ kơƀah kơ ƀing ta, ngă kơ ƀing ta dưi jing hĭ klă tum hăng hiam rŏ ƀơi anăp Ñu. Čang rơmang ƀing ta nanao hơdip amăng tơlơi sĭt anai laih anŭn khĭn anăp nao pơ anih Plei Hiam, amăng tơngan Ama tơlơi khăp wai lăng ƀing ta.

Kơkuh kơ abih bang ayŏng amai adơi, hơơc̆ mưi kơ abih bang ƀing ih hơmâo sa hrơi phrâo bă hăng tơlơi mơyun hiam laih anŭn c̆i dưi bưp glăi ƀing ih amăng hrơi pơgi!

Ơ abih bang ayŏng amai adơi khăp hơeng, tơdah ƀing ih kiăng hơduah hluh hloh dơ̆ng kơ Khua Yang ƀôdah ƀing ih hơmâo tơlơi hơgĕt kĭ kơ̆ kiăng tơña kơ ƀing gơmơi, c̆ih bĕ boh hră gah yŭ anai, anih mơit ƀơi fanpage amăng facebook, ƀôdah mơit email kơ: [email protected]. Khua Yang Yêsu khăp kơ ƀing ih. Ƀing gơmơi čang rơmang biă mă dưi pơlir hơbĭt hăng ƀing ih.