Thaum uas ua ib qhov txhaum dabtsi, yam uas tib neeg ib txwm coj yog nrhiav kev khiav nkaum tej kev txhaum lossis liam txim, siv zog npog peb qhov yuam kev. Thaum kawg qhov yuam kev no txuas mus qhov yuam kev tod ua rau ncig mus ncig los hauv txoj kev txhaum nrhiav tsis tau kev tawm. Ntawm no tsis yog ib txoj kev yog cai rau cov ntseeg Yexus coj thaum tawm tsam kev txhaum. Yog li Vajtswv xav kom peb ua haujlwm zoo li cas thaum peb muaj tej kev txhaum txaj muag nyob hauv yus lub neej?

Hnub no, yog hnub 26/07/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kellin Gibson dhau ntawm Zaj kawm KHIAV DIM NTAWM TXOJ KEV TXHAUM.

“koj yuav tsis fee plhu rau tus uas txo hwjchim thiab lees nws tej kev txhaum ib zaug li.” (Ntawv Nkauj 51:17).

Yuav zoo li cas yog koj qhov yuam kev ho dhau los ua qhov pib mus ntawm ntau yam teeb meem loj tshwm tuaj? Zaj xwm txheej hais txog Daviv nyob hauv Vajluskub yog qhov pov thawj tseg rau qhov no.

Thaum Daviv pom Npexenpas thawj zaug, yawg tswj tsis tau yawg tus kheej txog pog txoj kev zoo nkauj. Ib txoj kev ntsia ntshaw ua txhaum tau qhib lub qhov rooj rau tej kev txhaum txuas ntxiv. Kev txhaum tsis yog tsuas rhuav tshem Daviv tus kheej xwb tiamsis tseem ua rau lwm tus muaj kev quaj ntsuag, zoo li cov dej ntas saum nplaim dej. Thaum Npexenpas xeeb tub, Daviv npog nws qhov kev txhaum los ntawm hu Ulis uas tabtom nyob tom tshav rog los tsev, kom yawg nrog yawg tus pojniam pw. Tiamsis, Ulis tsis mus tsev yog li Daviv lub tswv yim no thiaj tsis tiav. Thaum kawg, tsis tshuav dua lwm txoj hau kev, Daviv thiaj thawb Ulis mus rau ntawm qhov uas phomsij tshaj plaws nyob tom tshav rog, thaum kawg yawg thiaj tau tuag lawm (2 Xamuyees 11). Thaum hluas Daviv yog ib tug menyuam tub yug yaj muaj lub siab dawbhuv, Daviv dhau los ua ib tug neeg txawv tom qab uas ua txhaum kev nkauj kev nraug thiab tua neeg.

Yog koj pom tias yus kuj poob mus rau qhov teeb meem ib yam li ntawd, ces txhob tag kev cia siab, vim peb muaj Txojmoo Zoo! Thaum peb ua txhaum, Vajtswv tsis khiav deb ntawm peb, Vajtswv nrhiav peb tsis tseg thiab coj peb rov qab los. Vajtswv txib tus cev lus Nathas mus cuag Daviv, pab kom yawg pom yawg qhov kev txhaum uas yawg tau ua. Txawm yog Daviv ua kev txhaum loj los, yawg yeej ntseeg tias Vajtswv yuav zam txim thiab yuav pab yawg ib yam li yawg tau hais: “Vajtswv, tej uas kuv coj tuaj fij rau koj ces yog kuv lub siab mos siab muag xwb, koj yuav tsis fee plhu rau tus uas txo hwjchim thiab lees nws tej kev txhaum ib zaug li.” (Ntawv Nkauj 51:17).

Ua Vajtswv tsaug rau qhov kuv tus kheej kuj saj tau qhov no. Thaum kuv ua txhaum, Vajtswv kuj qhib kuv qhov muag kom kuv ntsia pom tej uas kuv yuav ntsib. Kuv pom tias kev txhaum tsuas coj txoj kev txaj muag los xwb tsis yog kev zoo siab. Nyob rau lub sijhawm uas muaj kev txomnyem thiab qaug zog ntawd, kuv rov qab ntsia pom txoj kev sib raug zoo ua ke nrog Vajtswv yim zoo thiab tob tshaj. Vim Leej Txiv saum ntuj twb paub peb tej kev txhaum ua ntej uas peb pom. Thiab Vajtswv xav kom peb muab cob rau Vajtswv, cia Vajtswv pab peb kho zoo tej qhov txhab ntawd.

Tshuav koj ne yuav ua li cas? Koj puas xav tso koj tej kev txhaum tseg? yog xav, qhib siab rau Vajtswv, lees txim ntawm Vajtswv xub ntiag thiab cia tej lus qhuas Vajtswv nyob hauv Ntawv Nkauj ua kev txhawb zog rau koj lub siab uas tab tom mob ntawd.

Thov caw nrog kuv peb thov Vajtswv ua ke:
Tus Tswv, txawm yog kuv yuav ua kev txhaum loj luaj twg los, kuv paub tias yeej tsis muaj ib yam dabtsi loj dua txoj kev hlub uas koj tseg rau kuv. Thov Vajtswv qhib kuv siab kom kuv pom txog koj txoj kev hlub loj ntawd. Kuv paub kuv sab nqaij tawv qaug zog, tiamsis Vaj Ntsujplig muaj zog. Thov Vajtswv pub lub zog rau kuv kom kov yeej tej kev sim siab, txais yuav kev zam txim dhau los ntawm Tswv Yexus cov ntshav. Kuv ua koj tsaug vim koj txoj kev ncaj ncees nyob mus ib txhis tau pub rau kuv, txawm yog kuv tsis tsimnyog. Kuv thov hauv Tswv Yexus Khetos lub npe. Amees.

Cov kwv tij txhua tus, tej uas peb yuav tau ris thaum peb ua txhaum ces yog tag nrho tej uas peb ua yuam kev ntawd. Tiamsis tsimnyog zoo siab hauv Vajtswv, peb muaj kev cia siab txog txoj kev zam txim thiab rov qab muaj zog. Vajtswv yeej tsis thuam tus uas muaj lub siab quaj ntsuag thiab tso kev txhaum tseg. Tsuas yog peb paub lees txim thiab tso kev txhaum tseg xwb, Vajtswv yeej zoo siab hlo qhib nws txhais tes. Koj puas npaj txhij ntseeg thiab muab koj lub neej fij pub rau Vajtswv hnub no?

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.