Koj puas tau muaj ib zaug twg hnov yus sab ntsujplig qhuav qhawv thiab koj lub siab ntshaw kom tau puv npo kev txhawb zog? Zoo li ib tug neeg yuam kev nyob tom moj sab qhua thiab nqhis dej heev, peb kuj cheem tsum ib lub hauv paus dej muaj sia- tsuas yog Vajtswv xwb thiaj yuav pab tau xwb.

Hnub no, yog hnub 24/09/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kathy Schultz dhau ntawm Zaj kawm TXAUS SIAB HAUV VAJTSWV.

“Vajtswv koj yog kuv tus Vajtswv kuv tos ntsoov koj. Kuv lub siab xav tau koj ib yam li thaj av qhuav uas tsis muaj dej. Kuv tus ntsujplig nqhis koj qhuav siab qhawv.” (Ntawv Nkauj 63:1)

Sim xav txog tias koj tab tom yuam kev rau tom roob moj sab qhua, yeej tsis muaj ib teev dej nyob qhov twg. Koj lub qhov muag qi zuj zus, saib lub hnub ci tuaj, koj siv zog nrhiav seb puas muaj dej cawm siav nyob qhov twg – piv txwv li ib tauv fuab dub tab tom yuav los nag. Tiamsis ntawm koj qhov muag tsuas yog lub hnub ci liab ploog xwb, ua rau koj tsis muaj kev cia siab rau tej moov xuab zeb hauv ko taw li. Twb ob peb hnub dhau mus lawm, koj tsis muaj ib teev dej nyob qhov twg los haus, thaum no koj lub cev tas zog zuj zug.

Nyob rau lub sijhawm no, nrhiav dej haus tsis yog ib qhov haujlwm me tiamsis yog ib qhov haujlwm tseem ceeb uas yuav tsum tau ua kom pab tau koj txojsia. Txhua txoj kev xav, txhua yam uas koj uas puav leej yog nrhiav kom tau dej. Dej yog txojsia, thiab yog nrhiav tsis tau, koj txojsia ntawd yuav tuag zuj zus. Koj lub hlwb pib dag koj, tsim muaj tej lub pov roob laj ntxiag ntawm tej av qhuav qhawv, tsis muaj dabtsi ntawm koj xub ntiag. Tiamsis tsuas yog duab xwb; qhov tseeb tiag yeej tsis muaj dej.

“Vajtswv koj yog kuv tus Vajtswv kuv tos ntsoov koj. Kuv lub siab xav tau koj ib yam li thaj av qhuav uas tsis muaj dej. Kuv tus ntsujplig nqhis koj qhuav siab qhawv.” (Ntawv Nkauj 63:1)

Daviv cov lus ua rau peb pom tias peb cheem tsum Vajtswv zoo li tus neeg taug kev tom roob moj sab qhua cheem tsum dej. Yog tsis muaj dej, txojsia yuav tuag mus. Thaum Daviv sau cov lus no, nws tab tom nyob tom roob moj sab qhua, thiab khiav nkaum Xa-ules tab tom caum nws tua. Yav dhau los, Daviv ua neej nyob hauv txoj kev nplua nuj thiab tau lub neej zoo hauv vajntxwv lub loog, tiamsis thaum no, Daviv ntsib txoj kev txomnyem. Thiab tsuas pheeb rau Vajtswv uas yog txojsia xwb. Peb cheem tsum Vajtswv zoo li ib tug neeg tab tom nqhis dej cheem tsum dej. Tiamsis yam txawv ntawm no yog, txawm lub cev no tseem muaj nyob los peb tsis pom peb sab ntsujplig tabtom tuag zuj zug mus vim tsis muaj Vaj Ntsujplig cov dej uas cawm siav. Peb tsis pom tias peb cheem tsum Vajtswv npaum cas. Thiab txawm yog thaum peb twb pom los, ntau zaug peb tseem tso dhau qhov tseeb uas Daviv tau hais tseg no, Daviv tsis yog tsuas cheem tsum Vajtswv xwb; nws tseem cheem tsum txoj kev txaus siab nyob hauv Nws.

Tseeb tiag, Vajtswv tsis yog tsuas zoo li ib teev dej rau tus neeg taug kev uas tab tom nqhis; Vajtswv tseem zoo li ib rooj noj rooj haus loj nyob hauv cov tsev muag zaub mov noj uas ua rau ib tug menyuam ntsuag txomnyem hnov tshaib thiab nqhis. Daviv hais: “Kuv tus ntsujplig yuav tau noj thiab txaus siab kawg li, thiab kuv yuav zoo siab luag ntxhi hu nkauj qhuas koj. (Ntawv Nkauj 63:5). Tsis yog tsuas nrhiav Vajtswv xwb, Daviv tus ntsujplig tab tom tshaib nqhis tseem nrhiav tau txoj kev tsau npo hauv Vajtswv. Vajtswv tsis yog tsuas tpub rau peb noj xwb; Vajtswv tseem yog lub hauv paus muab pub rau peb tsis tu. Peb txhua txoj kev nshaw, thaum kawg puav leej yuav tau Vajtswv muab pub. Khuv xim ib qhov uas yog peb tus ntsujplig pheej hnov qab tej ntawd. Tiamsis Daviv twb qhia kom peb paub tawm tsam txojkev hnov qab ntawd.

Daviv hais tias nws tus ntsujplig tau tsau npo: “Thaum kuv pw saurn txaj, kuv yeej nco ntsoov txog koj, kuv lub siab xav ntsoov rau koj ib hmos kaj ntug plaws, rau qhov koj ibtxwm pab kuv los lawm. Kuv zoo siab hu nkauj hauv koj ob sab qab tis uas ua duab ntxoo roos kuv (Ntawv Nkauj 63:6-7). Nyob rau lub sijhawm uas tus ntsujplig tshaib nqhis, Daviv tig nws lub hlwb mus rau ntawm Vajtswv. Xav txog txhua zaug uas muaj Vajtswv, tau cawm nws, ua haujlwm hauv nws lub neej. Peb muaj cuab kav ua tej ntawd- nco txog lub sijhawm uas Vajtswv ua haujlwm thiab cawm peb, saj tau Vajtswv txoj kev ncaj ncees. Peb muaj cuab kav “Saj kom paub tias tus Tswv zoo kawg nkaus!” thiab nrog rau Daviv, peb yuav lees yuav Vajtswv tej lus cog tseg, ntuas kom peb tus ntsujplig nco txog tej kev hlub uas peb muaj nyob hauv Vajtswv, kom peb txoj kev ntseeg tau ntxiv los ntawm Vajtswv txojlus. Koom ua ke “saj” kom tau Vajtswv txoj kev qab zib hnub no!

Thov caw nrog kuv peb thov Vajtswv ua ke:
Tus Tswv, kuv los ntawm koj xub ntiag nrog lub siab nco koj tshav ntuj vim koj txoj kev hlub thiab kev tshwm ntsej muag puv npo koj lub hwjchim. Thov pab kom kuv nco ntsoov tias Koj yog lub hauv paus ciaj sia. Yog qhov chaw kuv tus ntsujplig muaj kev txaus siab. Thov pub kom kuv muaj kev kaj siab thiab zoo siab hauv Vajtswv kev tshwm ntsej muag, kom kuv tau ua lub neej txaus siab hauv Koj txoj kev hlub. Kuv thov hauv Tswv Yexus Khetos lub npe. Amees.

Cov kwv tij, zaj kawm hnub no tig koj lub siab mus rau ntawm Vajtswv tej lub sijhawm uas peb ntshaw kom nrhiav pom yus qhov kev cheem tsum tsis yog tsuas tau txais xwb tiamsis tseem tau txaus siab hauv Vajtswv txoj kev ncaj ncees. Vajtswv tsis yog tsuas yog lub hauv paus siav xwb tiamsis tseem yog lub hauv paus txhawb zog thiab txojsia puv ntoob tsis muaj hnub xaus. Koom siab ua ke saj Vajtswv tus dej laj siab uas Vajtswv pub, kom peb tus ntsujplig tau tsau npo hauv Vajtswv txoj kev tshwm ntsej muag.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.