Ib hnub tshiab rov qab los txog, thiab kuj yog lub sijhawm uas peb tseg los nyob hauv Vajtswv txojlus. Tus phoojywg, koj puas paub tias Vajtswv twb npaj tos yuav hais qhia rau peb hnub no. Vajtswv xav coj koj thiab pub kev txawj ntse rau koj. Vajtswv xav hliv txoj kev hlub tshiab kom puv npo rau koj. Thiab thaum no, Vajtswv kuj xav rub kom koj los nyob ze Vajtswv dhau ntawm Vajtswv tej lus.

Hnub no, yog hnub 02/10/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Iliamari Mendoza-Gomez dhau ntawm Zaj kawm NTSEEG SIAB RAU VAJTSWV.

“Tus Tswv yog tus tsom kwm kuv, kuv muaj txhua yam txaus.” (Ntawv Nkauj 23:1)

Muaj ib feem Vajluskub uas kuv nyiam tshaj plaws yog Ntawv Nkauj 23. Ua ntej uas kuv paub Vajtswv, kuv twb paub tshooj Ntawv Nkauj no lawm. Thiab thaum uas kuv nyeem tshooj no ntau zaug txog qib uas kuv nco rau hauv siab ua ntej ntseeg Vajtswv. Txhua zaug uas kuv nyeem, kuv saj tau txoj kev kaj siab, tso siab thiab zoo siab. Tsuas yog thawj nqe xwb twb ua rau kuv hnov tso siab thiab tau saib xyuas: “Tus Tswv yog tus tsom kwm kuv, kuv muaj txhua yam txaus (Ntawv Nkauj 23:1).

Thaum txais yuav Tswv Yexus ua kuv tus Tswv Cawm Seej, kuv yeej tsis tau paub ntseeg Vajtswv tamsim. Thiab thaum kuv pib mus hauv tuam tsev, nyeem Vajluskub, kuv paub tias kuv yuav tau ntseeg Vajtswv. Thiab thaum kuv cia Vajtswv ua haujlwm hauv kuv lub neej rau tej lub sijhawm uas txomnyem, kuv nkag siab zoo dua txog Vajtswv tej lus.

Xyoo 2012, kuv ua haujlwm rau ib qhov chaw muag khoom. Kuv tus phooj ywg poob haujlwm thiab nws xav txav chaw mus nyob rau Miami. Thaum ntawd, kuv nyuam qhuav yog ib tug ntseeg Vajtswv tshiab thiab kuv tsis paub dabtsi txog qhov tseem ceeb ntawm txoj kev mloog Vajtswv lub suab lossis txoj kev thov Vajtswv ua tus coj kev. Tiamsis, kuv yeej hnov hauv lub siab tias tsis txhob txav chaw mus lub sijhawm no. Vim kuv tus phooj ywg yog ib tug twb ntseeg Vajtswv ntau xyoo lawm, kuv thiaj txiav txim hais qhia rau nws paub txog tej uas kuv pom nyob hauv kuv lub siab rau nws. Nws tsis mloog kuv hais; tag nrho tej uas nws xav puav leej yog txoj kev cheem tsum ib txoj haujlwm ua, thiab qhov uas nws txav chaw mus ces yog ib txoj hau kev rau nws. Thaum kawg, kuv ua tus swb thiab nws txav chaw mus rau Miami. Thawj xyoo yeej tsis muaj dabtsi, tiamsis txog xyoo ob, kuv ntsib kev txomnyem nyob hauv txoj kev them tej nyiaj se, kuv tus phooj ywg ua haujlwm ib ntus ces rov qab poob haujlwm, thiab thaum no lub nra nrhiav nyiaj cia kuv ua tus ris. Txawm yog kuv khwv tau nyiaj ntau los, ntau zaug yeej ntsib kev khwv thaum siv nyiaj hauv lub neej. Kuv tseem ntsib ib qho kev sim siab ntxiv, kuv poob ib qib haujlwm yam tsis ncaj ncees. Txawm yog nyiaj hli tsis ua cas los kuv tsis xav nyob rau hauv qhov chaw tshiab no. Thaum xav txog lub caijnyoog no, kuv nco txog tej lus uas kuv tus xibhwb tau hais rau kuv thaum pehawm yav dhau los, thiab kuv txiav txim siab ua raws li tej lus ntawd, txhua tag kis sawv ntxov, pauv qhov uas nyob hauv chaw ua haujlwm nyeem Vajluskub ua ntej pib ua haujlwm, kuv xaiv nyob hauv tsheb tseg sijhawm rau Vajtswv thiab nyeem Vajtswv tej lus.

Tom qab ob peb thiv, kuv pom tias Vajtswv tab tom tshoov kuv siab kom kuv hloov haujlwm, tiamsis qhov haujlwm tshiab no them nyiaj hli tsawg dua tej nyiaj uas kuv nrhiav tau lub sijhawm ntawd. Kuv xav txog qhov no ntau thiv thiab kuv tsis paub yuav ua li cas. Muaj ib tag kis sawv ntxov, thaum xav txog Vajtswv tej lus thiab xav txog kuv lub neej, kuv hais rau Vajtswv tias: “Tus Tswv, yog koj kom kuv hloov txoj haujlwm tshiab no, kuv yuav ua raws li tej uas koj tab tom hais. Kuv ntseeg tias koj paub yam twg zoo tshaj plaws!”

Kuv txais qhov haujlwm tshiab no los ua nyiaj hli tsawg lawm ntau, tiamsis kuv paub tias Vajtswv ncaj ncees thaum peb ntseeg Vajtswv. Kuv tej kev cheem tsum puav leej tau Vajtswv pab. Kuv ntsia pom Vajtswv txhais tes ua haujlwm nyob hauv kuv tej nyiaj txiag. Kuv mus yuav khoom noj, thiab txhua yam uas peb cheem tsum yeej muaj txaus. Kuv ntsia pom kuv tej nyiaj tsis ua cas, thiab kuv tseem muaj nyiaj pabb ib tug niam tsev tsis muaj tsev nyob!

Ntawv Nkauj 25:2 sau tias: “kuv tus Vajtswv, kuv cia siab ntsoov rau koj. Thov cawm kom kuv dim tsis txhob pub kuv raug kev txajmuag rau cov neeg uas yeej kuv, thov tsis txhob cia kuv cov yeebncuab saib tsis taus kuv.” Twb tau cuaj lub xyoo dhau los txij thaum uas kuv xaiv ntseeg siab rau Vajtswv. Tsis tau muaj ib hnub twg uas kuv yuav tsis ntsia pom Vajtswv txoj kev ncaj ncees nyob rau hauv kuv lub neej. Muaj tej hnub puv npo tej kev sim siab, tiamsis Vajtswv yeej tseem saib ntsoov kuv thiab coj kuv tawm hauv tej kev txomnyem ntawd. Kuv qhia tawm Vajtswv txoj kev zoo thiab Vajtswv txoj kev hlub tsis yog tsuas tseg rau kuv xwb tiamsis tseem tseg rau peb txhua tus thiab.

Kuv tsis paub koj lub caijnyoog lossis yam uas koj tab tom ntsib yog dabtsi, tiamsis Vajtswv paub. Vajtswv xav ua tus saib xyuas rau koj thiab txhua yam uas yog koj li. Yog li, qhib koj lub siab thiab caw koj los ntseeg siab tias Vajtswv yuav ua yam zoo tshaj plaws rau koj.

“Kuv tib leeg thiaj paub tej uas kuv npaj yuav ua rau nej, kuv yuav pab kom nej vammeej tsis yog ua kom nej puastsuaj, nej thiaj muaj kev cia siab rau yav tom ntej” (Yelemis 29:11)

Thov caw nrog kuv peb thov Vajtswv ua ke:
Tus Tswv, Kuv ua Koj tsaug rau qhov Koj yog Leej txiv muaj kev hlub zoo thiab ncaj ncees. Kuv ua Koj tsaug vim Koj yog tus saib xyuas kuv lub neej. Ua Vajtswv tsaug vim Koj paub zoo kuv lub neej, thiab ua tus pub rau kuv tej yam kuv cheem tsum. Tus Tswv, kuv thov muab kuv lub neej fij rau koj txhais tes. Thov pab kom kuv ntseeg siab Koj, txawm yog kuv lub neej yuav zoo li cas los kuv taij thov koj lub npe thiab tos ntsoov Koj. Kuv thov hauv Tswv Yexus Khetos lub npe. Amees.

Cov kwv tij txhua tus, cia siab tias Vajtswv txojlus yuav txhawb kom peb ruaj siab thiab ntseeg siab rau Vajtswv. Vim Vajtswv yog tus saib xyuas peb, yog li peb thiaj muaj txaus txhua yam. Vim Vajtswv yog Leej Txiv muaj kev hlub, koj yuav tau Vajtswv saib xyuas. Vajtswv txojlus hnub no txhawb kom peb thov Vajtswv thiab txhob qaug zog, ntseeg siab thiab tos Vajtswv, qhuas Vajtswv thiab hais txog Vajtswv txoj kev zoo, ua lub neej pub rau Vajtswv thiab paub tias txhua yam Vajtswv yuav ua tus txhawj rau peb.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.