Peb txhua tus tau yug los ib leeg nyias muaj nyias ib tug cwjpwm txawv, twb yog qhov sib txawv ntawd ua rau peb thiaj muaj ntau yam tsis sib haum thaum los nyob ua ib pab. Tiamsis, peb yog cov ntseeg Yexus Khetos peb yuav tsum coj txawv li sawv daws. Nyob rau hauv lub ntiajteb puv npo tej kev sib faib thiab ua plaub ua ntug no, cov ntseeg Vajtswv yog cov tau nqua hu kom dhau los ua tus qauv zoo txog ntawm kev koom siab thiab kev sib hlub.

Hnub no, yog hnub 07/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm KOOM UA IB HAUV YEXUS KHETOS.

“Nej yuav tsum txo hwjchim, ua siao dawb siab zoo thiab ua siab ntev. Nej ib tug yuav tsum pab ib tug, sawvdaws thiaj paub hais tias nej sib hlub tiag. Vajtswv tus Ntsujplig twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm. Yog li ntawd, nej tsis txhob cia ib yam dabtsi ua rau nej nyob tsis taus ua ke. Peb sawvdaws puavleej koom ib lub cev thiab peb koom Vajtswv tib tug Ntsujplig. Vajtswv twb hu nej los ua nws haivneeg lawm, nej thiaj muaj chaw cia siab ib yam li peb” (Efexaus 4:2-4).

Kuv tsis yog ib tug loj hlob hauv Pawg Ntseeg, vim thaum kuv muaj 20 xyoo, kuv thiaj paub Vajtswv. Lub sijhawm ntawd, txhua zaj nkauj hauv Pawg Ntseeg puav leej yog nkauj tshiab rau kuv. Txawm li los, kuv nrhiav pom kev zoo siab hauv tej zaj nkauj qhuas Vajtswv. Tshwj xeeb yog cov nkauj muaj lub ntsiab lus hais txog Vajtswv tsev neeg, rau qhov lub sijhawm ntawd kuv pheej ntshaw kom tau los ua ib feem hauv Vajtswv tsev neeg.

Thaum kuv paub tias kuv koom nrog Yexus Khetos lub cev thiab tau suav tias yog Vajtswv tus menyuam, kuv paub kuv lub neej no muaj nqis. Qhov tseeb no qhia rau kuv paub tias kuv yog ib feem hauv Yexus Khetos lub cev, thiab koom ua ib ua ke nrog lwm feem tseem ceeb, vim li no thiaj yuav pab rau kev qhia Txojmoo Zoo thiab coj txoj kev cia siab no mus qhia rau lub ntiajteb puas tsuaj no.

Nyob hauv tsab ntawv Efexaus 4, Paulus qhia rau peb paub tias yuav ua li cas kom thiaj yuav koom tau ua ib lub siab nyob hauv Yexus Khetos lub cev, ntawd yog:

“Nej yuav tsum txo hwjchim, ua siao dawb siab zoo thiab ua siab ntev. Nej ib tug yuav tsum pab ib tug, sawvdaws thiaj paub hais tias nej sib hlub tiag. Vajtswv tus Ntsujplig twb ua rau nej sib raug zoo lawm, thiab qhov uas nej sib raug zoo ntawd, twb rub nej los nyob ua ke sib haum lawm. Yog li ntawd, nej tsis txhob cia ib yam dabtsi ua rau nej nyob tsis taus ua ke. Peb sawvdaws puavleej koom ib lub cev thiab peb koom Vajtswv tib tug Ntsujplig. Vajtswv twb hu nej los ua nws haivneeg lawm, nej thiaj muaj chaw cia siab ib yam li peb” (Efexaus 4:2-4).

Hauv lub ntiajteb uas peb nyob niaj hnub nim no, kev koom ua ib lub siab yog yam uas txhua tus puav leej xav tau. Yog ib tug ntseeg Vajtswv, peb tau Vajtswv xaiv los ua qauv rau lub ntiajteb txog kev ua lub neej koom siab ua ke. Vajtswv tshwj peb tawm kom dhau los ua qhov kaj rau lub ntiajteb, zoo li lub nroog muab ua rau saum pob zeb tsis muaj dabtsi ntis tau (Mathais 5:14-16). Peb tau nqua hu los koom ua ib lub cev, koom ib tug ntsujplig, koom ib tug Cawm Seej, coj lwm tus los rau lub hauv paus cia siab tsuas nrhiav pom nyob hauv Tswv Yexus xwb. Thaum Yexus Khetos lub cev koom ua ib lub siab lawm, Vajtswv yuav ua ntau yam tshiab nyob hauv peb Pawg Ntseeg thiab peb zej zog.

Peb ib leeg Vaj Ntsujplig yeej pub nyias muaj nyias koob hmoov sib txawv los ua txoj haujlwm koom ua ib lub siab. Yog li, yeej tsis muaj ib tug ntseeg twg yuav zoo txaus. Tag nrho txhua tus yeej muaj qhov yuam kev. Txawm yog zoo tsis txaus, tiamsis peb tau nqua hu los ua haujlwm ua ke, koom ua lub neej nyob sib haum xeeb, sib hlub ib yam li Vajtswv tau hlub peb lawm.

Yeej tsis yooj yim los hlub cov neeg uas tsis tsimnyog hlub, tiamsis peb tau Vajtswv nqua hu kom peb txo hwjchim thiab xyaum ua lub neej sib hlub. Vim tom qab txhua yam, Tswv Yexus tau txo hwjchim thiab zoo siab hlo tuag saum ntoo khaub lig li ib tug nqi yuav tau them, kom peb rov qab tau sib haum xeeb thiab tau suav tias ncaj ncees ntawm Vajtswv lub xub ntiag. Vajtswv xaiv thiab hlub peb txawm yog peb zoo tsis txaus thiab muaj kev txhaum. Yog li, cia li vam khom Vajtswv lub zog, kom peb muaj cuab kav xaiv thiab hlub lwm tus zoo ib yam li ntawd.

Thov caw nrog kuv peb thov Vajtswv ua ke:
Ua Vajtswv tsaug kuv tau txais kev cawmdim thiab dhau los ua ib feem nyob hauv koj lub cev. Thov pab kom kuv yuav nthuav tawm txoj kev ua neej muaj kev hlub thiab koom ua ib lub siab, siv Vajtswv koj tej koob hmoov uas Vajtswv pub los ua kom muaj nqis rau Vajtswv lub tebchaws. Kuv thov hauv Tswv Yexus Khetos lub npe. Amees.

Cov kwv tij txhua tus, paub tias yus tau txais kev cawmdim nyob hauv Yexus Khetos ib yam li ntau tus kwv tij koom txoj kev ntseeg, koj puas tab tom tuav txoj kev koom ua ib lub siab hauv zej zog, pawg me, lossis hauv koj Pawg Ntseeg? Cia li siv tej peev xwm, Vaj Ntsujplig tej koob hmoov uas tau muab pub rau koj los ntawm txoj kev txo hwjchim thiab sib hlub. Yog koj tab tom ntsib teeb meem hauv txoj kev hais kom sib haum thiab zam txim rau lwm tus, hnub no kiag, cia li los cuag Vajtswv cia Vajtswv pab koj ua yam uas yog.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.