Nyob rau tej lub sijhawm uas muaj kev txomnyem lossis kev sim siab, peb pheej yws thiab cim civ nug tias: “Tus Tswv, Koj nyob qhov twg?” Thaum peb tsau tsawv hauv txoj kev txomnyem lossis nyob ib leeg, peb hnov cuag li Vajtswv tsis nyob ntawd, yam li Vajtswv tsis hnov peb tej lus thov Vajtswv. Ua li qhov tseeb puas yog li ntawd tiag? Lossis peb ho yog tus neeg nyob deb Vajtswv?

Hnub no, yog hnub 12/01/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dan Betzer dhau ntawm Zaj kawm TUS TSWV, KOJ NYOB QHOV TWG?

“Tus Tswv yuav mus ua koj ntej thiab nrog nraim koj. Nws yuav tsis ncaim koj lossis tso koj tseg; koj tsis txhob pooh siab lossis ntshai” (2 Kevcai 31:8).

“Tus Tswv, Koj nyob qhov twg?” Tsis paub kuv twb nug lo lus nug no pes tsawg zaus lawm? Tiamsis zaum no txawv, rau qhov kuv txais tau lo lus teb lawm tiag.
Tsis ntev los no, kuv yuav raug phais kuv txoj leeg hauv caug. Thaum hnov kws tshuaj hais tias kuv yuav raug phais thiab poob 6 hli nws mam rov qab zoo mam khiav taus, ncaws lo pob, tuam tsheb nce roob, kuv hnov cuag li kuv txais tau ib lub txim muab kaw mus txog hnub tuag.

Kuv yog ib tug neeg nyiam ua txhua yam. Yog li thaum kuv paub tias kuv yuav tsis tau ua tej uas kuv nyiam ib lub sijhawm ntev loo, ua rau kuv xav tsis thoob. Tomqab poob kua muag, kuv thov Vajtswv thiab tau tsev neeg txhawb zog, kuv pom tias txhua yam cuag li yeej tsis luaj twg. Ntawm no nws tsis yog mob ung thư, kuj tsis yog lub txim raug tua pov tseg; tsuas yog muab phais xwb tej no yeej ib txwm muaj ntau. Yog li kuv thiaj txiav txim tsis ua kom nyhav tuaj.

Kuv txoj leeg hauv caug tu thaum uas peb ncaws pob ua si rau hnub so yav tsaus ntuj. thaum kuv mus txeeb lub pob, kuv tsuj raug lub qhov av, lossis kuv txhais taw nres tsis yog cai. Tamsim ntawd thiaj lis tshwm sim tuaj, kuv ntsia ntsoov ntawm qhov muag thiab saib pom txhua yam tshwmsim txaus ntshai heev. Tseeb tiag tej uas kuv pom ntawd yeej tsis yooj yim kiag li, yog li kuv yuav tsis muab tham kom txhij txhua rau ntawm no.

Cov kws tshuaj muab phais yeej tsis muaj dabtsi. Thaum tsim rov qab los, kuv txhais ko taw sab xis lawv twb muab rub rov rau ntawm lub hauv caug lawm, txhua yam cuag li vij puas ncig. Yeej tsis yooj yim li, tiamsis kuv paub tias qhov no nws cheem tsum.

Kuv pojniam nyob ib sab txhawb kuv zog thaum kuv cov tshuaj loog tas. Tomqab ntawd, nws tsav tsheb thauj kuv rov los tsev. Kuv pw twj ywm thiab siv zog tswj kom tsis npau taws vim kuv lub hauv caug qhwv nrees thiab yuav tau muab pob zeb txias los luam. Kom koj xam tau tias, kuv yog ib tug neeg nyob tsis tau ib qhov dhau ntawm noj thiab pw. Tshuav cov sijhawm ntawd ces thaum twg kuv yuav nrhiav ib txoj haujlwm twg los ua. Kuv yog hom neej nquag ua haujlwm? Tej zaug nws yog.

Kuv pojniam niaj hnub nrhiav kev kom thaum twg kuv twb tsis muaj sijhawm khoom. Kuv tau noj haus txaus, mus ua si kom txaus, tau saib xyuas zoo. Hnov cuag li yus yog ib nyuag tsiaj puas yog? Thov txim, tiamsis kuv pojniam nws yeej ua zoo nws lub nra, thiab kuv hmoov zoo thaum muaj pojniam nyob ib sab.

Hnub ob los txog kuv pojniam yuav tau mus ua haujlwm. Kuv nyob ib leeg hauv tsev, ke ua kom ko taw zoo ke nyob hauv tsev ua haujlwm vim mus tsis tau rau tom chaw ua haujlwm. Kuv yuav tau nrig pas thiab looj txhais ko taw cuav, nws ntev puag nra taw txog ntua pem puab tais, ua rau kuv lub hauv caug ua tsis tau haujlwm. Mus kev yeej tsis yooj yim tiamsis kuj tsis txog qib uas nyuaj heev.

Sawv ntxov hnub ntawd, kuv pojniam thiab kuv tus tub lawv mus ua haujlwm thiab kawm ntawv, tshuav kuv ib leeg ua neej nrog hnub tshiab hauv tsev. Tomqab ob peb zaug npaj pluas tshais, kuv pib hnov ua tsis taus pa vim npau taws, thiab tsis paub yuav ua li cas ua tau siab ntev los daws qhov teeb meem no. Hais tiag mas ntev heev lawm thiaj muaj qhov teeb meem ua rau kuv tswj tsis tau tus kheej, vim kuv yog ib tug neeg tsis hais ntau txawm yog pom tej teeb meem kub tshwm tuaj. Yog li, ntawm no yog ib qhov kev sim siab loj tshwm tuaj rau kuv. Tsis yog mus los nyuaj xwb hauv chaw ua mov xwb, kuv tseem dawm taw rau qeeb yam thiab mob heev rau kuv lub hauv caug ua rau kuv ntsej muag caws tas.

Thaum uas tab tiv mob thiab siv zog tswj kom tsis npau taws, kuv nco dheev txog thiab qw nrov nrov: “Tus Tswv, Koj nyob qhov twg?” thiab tomqab ntawd, kuv hnov cuag li tau tshoov siab hauv siab, cuag li Vajtswv lub suab tab tom teb kuv: “Koj hais dabtsi? Kuv ib txwm nyob ntawm no, tshuav koj, koj tab tom nyob qhov twg?”

Txoj kev tshoov siab ntawd zoo li muaj neeg ib xib npuag teg kuv ntsej muag. Tamsim ntawd, kuv cim civ nug: “Yus tab tom nyob qhov twg?” Kuv tsis muaj sijhawm khoom cia lwm tus tu kuv xwb, thiab pheej xav txog tias yuav ua li cas thaum uas khiav tsis taus thiab tsis tau ncaws pob lawm. kuv txhawj txog kuv lub neej tom ntej thaum kuv ob txhais ko taw luag ceg ob peb hlis yuav los tom ntej. Thaum uas kuv raug yuam kom yuav tau maj mam, kuv puas tseg sijhawm rau Vajtswv? Ntawm no yog lub sijhawm zoo rau kuv thov Vajtswv thiab nrog Vajtswv sib tham kom ntau, tiamsis kuv puas ua li ntawd?

Tsis! Kuv maj nroos rau tej kev txhawj thiab kuv tus kheej lub homphiaj. Koj puas pom qhov no ib txwm swm?

Qhov uas zoo luag ntawm no yog kuv twb ntseeg Vajtswv cuag li tag kuv tiam neej. Vajtswv twb coj kuv tiv dhau ntau txoj kev sim siab. Tiamsis txhua zaug mus dhau zoo li ib txoj kev txomnyem twg ntawd, kuv rov qab luag vim kuv tsis paub dabtsi: rau qhov kuv rov qab ua xyem xyav rau Vajtswv. Ib zaug ntxiv, kuv rov qab cia kuv lub homphiaj tav Vajtswv kev, tav Vajtswv ua tus coj kuv kev thiab tej koob hmoov uas Vajtswv npaj tseg rau. Kuv puas tawv ncauj? Ntseeg tias tawv!

Vajluskub muaj ntau lo lus teb rau tej lus nug uas kuv tau nug: “Tus Tswv, Koj nyob qhov twg?” Hauv qab no yog ob lus teb nyob hauv 2 Kevcai:

“Tus Tswv yuav mus ua koj ntej thiab nrog nraim koj. Nws yuav tsis ncaim koj lossis tso koj tseg; koj tsis txhob pooh siab lossis ntshai” (2 Kevcai 31:8).

“Nej yuav tsum ua siab tawv thiab nyob khov kho tsis txhob ntshai cov neeg ntawd. Tus Tswv uas yog nej tus Vajtswv yuav nrog nraim nej, nws yuav tsis ncaim nej lossis tso nej tseg li.” (2 Kevcai 31:6).

Puas tseem tshuav lo lus teb twg meej dua lawm thiab? Kuv kawm tau tias, thaum xav hais txog ib yam dabtsi, tus sau yuav hais mus hais los qhov ntawd. Thiab kuv paub tias ntawm no yog yam uas Vajtswv xav kom peb tau ceev faj txog. Kuv nrhiav tau kev txhawb zog nyob hauv qhov tseeb ntawd ntau zaug, thiab cia siab tias koj kuj yuav zoo ib yam li ntawd.

Thov caw nrog kuv peb thov Vajtswv ua ke:
Kuv tus Vajtswv uas kuv hlub, kuv ua koj tsaug rau koj txoj kev hlub thiab kev tshwm ntsej muag. Kuv ua koj tsaug vim koj tsis muaj ib zaum twg tso kuv tseg, txawm yog nyob hauv tej lub sijhawm txomnyem lossis thaum kuv hnov cuag li koj nyob deb kuv. Thov pab kom kuv paub tias koj nrog nraim kuv nyob, coj kuv kev thiab tiv thaiv kuv, txawm yog thaum kuv txais tsis tau dabtsi. Thov pub kom kuv muaj lub siab ntshaw nrhiav Vajtswv tsis yog tsuas thaum ntsib kev txomnyem xwb tiamsis yog txhua feeb hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, lub caijnyoog dhau los, tej zaug muaj ntau zaug peb nug Vajtswv tias “Koj tab tom nyob qhov twg? Dhau ntawm zaj kev thov Vajtswv hnub no, peb txhua tus thaum ntsib tej lub sijhawm txomnyem, nyob ib leeg, nyob deb Vajtswv, ces ua ntej peb yuav tau nug peb tus kheej tias: “Tus Tswv, kuv tab tom nyob qhov twg tiag?” Nco ntsoov tias Vajtswv niaj hnub nrog nraim peb nyob, zoo siab hlo coj peb tiv dhau txhua lub caijnyoog txomnyem, txhua lub caij tsaus ntuj, tag kev cia siab. Lo lus nug tseem ceeb ntawm no yog: Tsis paub peb nyob qhov twg hauv txoj kev sib raug zoo ua ke nrog Nws? thiab tsis paub peb puas zoo siab hlo tso tej kev xav ntawm tus kheej tseg los xav txog Vajtswv lawm tau? Cia Vajtswv txojlus hnub no txhawb peb txhua tus txog Vajtswv kev tshwm ntsej muag hauv peb tus ntsujplig, nrhiav Vajtswv lub siab nyiam ua ntej, mloog Vajtswv lo lus hais ua ntej pib ib hnub tshiab, kom peb yuav saj tau Vajtswv tiag nyob hauv peb lub neej mog phooj ywg!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.