Tòm gùng lòt jat Yàng, cau sòtơm đah hwềng sùm kơp gơn brồ lơh bol he tòm kơp pơnah, bơh broă lơh, hiu nhă, tus ală bơta gơtơmklĕ is. Dilah ò wet tus mơ ò git kơrhia, bol he rơp kol cau sò tơm lơh alah. Hơ̆ ls tơnggu mơ Yàng hoi bol he pal sùm rdăp rcăng sir, soh tĕ jơh ală phăn tơmlơh Kơnràñ dê nàng rgơi ntao jai mơ pha lin tòm ală bơta gơlong bol glar.

Ngai do, ngai 17/01/2025, Bơta Hoi Dan Kơp Ngai dan jà ală ồng mò oh mi bơtê bal Jơnau Yàng kơnơm dê bơta dong kơl ồng Jeff Calhoun dê bơh tơnggumê RCĂNG SIR TĔ NÀNG TƠM LƠH.

“Gen tàng ai tĕ jơh ală phan tòmlơh Yàng Tom Trồ dê, tồ tòm ngai rung rài oh mi rgơi tòmdră jai, mơ tơnơ̆ mơ tŭ neh lơh sir jơh ală bơta gen gam ntào kơ̆ sơl.” (Êphêsô 6:12-13)

Jơnau Yàng gơs cih tòm Êphêsô 6:12-13 “Bơh bol he ò di tòmlơh mơ poac mơ mhàm ò, mơya tòmlơh mơ ală gơnoar at bồ, mơ ală gơnoar, mơ ală bơtau at bồ rài klam jơngo do, mơ mpồl cà jàñ bơsak ơm tòm pah gòi. Gen tàng ai tĕ jơh ală phan tòmlơh Yàng Tom Trồ dê, tồ tòm ngai rung rài oh mi rgơi tòmdră jai, mơ tơnơ̆ mơ tŭ neh lơh sir jơh ală bơta gen gam ntào kơ̆ sơl.” Dô la dô bơta ngăn loh lang: bol he gam tơmlơh dô bơta tơmlơh dơng.

Sră Goh oă dơ̆ pơnyơu rài kis dô nă cau dòn be là dô bơta tơmlơh, hala ngui rùp sơnio cau ling nàng sơnio. Tòm rai yau, kòn lang Yàng ò siơ̆u pal rcăng sir bơh să jăn tus đah hwềng nang nato diđap măt ală bơta tơmlơh. Tòm tŭ bol he ơn bơta dòn dê Yàng Dong Jêsus mơ dơp lềng bơta dong klàs Kơnràñ dê, bol he kung mut tòm “mpôl ling” Yàng Tòm Trồ dê.

Rlau jơh, să tơm tòm rai dô, loh lang Sa-tan gam ai jơh ală bơta khai rgơi brồ lơh kòn lang Yàng. Mơ bol he, la ală cau ling Yàng Tòm Trồ Hơđăng Jong dê, pal sùm rcăng sir nàng tơmlơh mơ cau sò tơm. Mơ ya ưnngai Yàng bơh Kơnràñ nàng rcăng ală bơta bol he cang nàng phalin tòm bơta tơm lơh dô.

Tòm Êphêsô 6 – sèng Sră Goh mơng mơ ală cau dòn, cau gơnoăr bơtọ Pol đơs bơh bơta tơmlơh đah hwềng mơ bol he pal ntao diđap măt. Ông hoi jà bol he “rcăng sir ală phăn tơmlơh Yàng Tom Trồ dê”. Ông chôl he he đal git loh lang bơh jơnau hoi jà mut tòm bơta tơmlơh, mơ rcăng sir dơp rò ală gơnoăr broă dơng mang jơnau hôi jà hơ̆.

Oă cau ơs ngui sèng Sră Goh dô be là dô nơm ryas pơndơm pơniang, mơ ngăn la ală jơnau dô ceng wơl bơta chôl bơtrôt dơng ngăn. Mơ ya gơs dơ̆, gùng bol he wơng bơh ală phan tơmlơh Yàng Tòm Trồ dê gen dô ía lúi, be là ming cang soh gợi nàng sền gar he klàs bơh ală bơta brồ lơh. Digơlăn bol he kơlôi lah bol he găm ntao ting hơ̆, đơs mơ cau sò tơm lah: “Mê ò rgơi lơh iơh dê añ, añ neh soh jơh ală phăn tơmlơh!” Bulah wơng gùng dô ò tis, mơ ya gơ òhềt ràng tơlik jơh gơtha pràn kơldăng mơ pràn sèng Sră Goh dô dê.

Găn dê cau gơnoăr Bơtọ Pol, loh lang Yàng Tom Trồ hôi jà bol he sơh ao lòs ò di ming sền gar să tơm mơ dô pleh bơh dê cau sò tơm. Ala mơ hơ̆, sèng Sră Goh dô ndrơm be dô nă cau Ling at bồ chôl bơtrôt ală cau ling – dô jơnau hôi cơnum hôi jà ală cau dòn Krist rcăng sir mut tòm bơta tơmlơh đah hwềng. Dô la tơnggu tơm mơ cau gơnoăr bơtọ Pol wet tus.

Ñchi bơh tai bol he pal cang soh ao lòs, dilah ò tơmlơh? Be ală bài cih lơh cau in gơboh, ông đơs pràn bơta dipal bơta kơlôi sơnưng dê mơ bol he sền gar, bơta dơng mang bơta dòn dê tòm Bơtau mơ bol he duh broă, mơ dô bơta ngăn bềng bơta gơn kơnòm: cau sò tơm rgơi pràn kơldăng, mơya nền cê ò di là ò rgơi lơh alah. Dô la dô jơnau hôi jrô ndơp, dô bơta rcăng ndăp nàng bol he dơp git loh lang bơh gơnoăr broă mơ gơnă kơp cau dòn Krist dê tòm mpôl ling Yàng Tòm Trồ dê.
Pha is mơ jơh ală bài đơs bơh bơta tơm lơh tòm rai yau, Jơnau Yàng tơngkah bol he ò di lơh roh bơta git kơrhia, bơh bơta tơmlơh dô rơp ò tŭ lơi dơh. Be cau gơnoăr bơtọ Pol tơngkah bol he: “Jơh nùs tĕ hòi dan mơ rac dan; tŭ lơi kung hòi dan tĕ kơnòm di Yàng Hwềng.” (sèng 18). Ồng kung tơngkah bol he lah cau sò tơm bol he dê ò di là kòn mơnùs mơ la gơnoăr pràn đah hwềng. Khai ò lơh be kòn mơnùs, ò càng bic, rlô hala ngui sa be bol he nàng gơs pràn. Bol he sùm rcăng sir mơ rgơi tơmlơh kơp ngai mơ măng. Bol he ò di la dô mpôl ling ò rgơi alah, mơ la dô mpôl ling kong lơh mơ kong jai.

Bơta git lam tòm gung lòt jat Yàng ai bol he in sền gŏ lah gơs tŭ tơmlơh kung gơs tŭ ring lơngai – tŭ bol he dơp git geh bơta ring lơngai dơng, hơ̆ la tŭ Yàng ai bol he in bơta rlô bol, sơmbơi, phăn sa, bơta pràn, bơta dô bă bal, pràn kơldăng mơ oă bơta nđàc ndai tai. Ală tŭ lơmpah dô ndơm be tŭ lơh “gơnoăr sôr bơdơh cuh” ing tòm rai tơmlơh đah hwềng.

Rìp dô, añ kung neh lòt găn dô tŭ lơmpah behơ̆. Hơ̆ ò di ming la tŭ lơmpah nàng bơtao wơl mơ kung la tŭ lơmpah nàng geh bơtọ mơ mơ rcăng sir ală bơta tơmlơh mor tus in. Yàng kòñ ală tŭ lơmpah ring lơngai do gơlik gơs tŭ lơmpah nàng bol he têh dơng, geh bơtao wơl, geh bơtê mơ geh sơmbơi nàng rgơi rcăng sir ntao diđap măt mơ ală bơta gơlong pơnjat.

Dô nơm pơnyơu rgơi gŏ tòm sră Jôsuê dap 5, tòm tŭ lang bol Israel lơh sal rlô rêp dơrñăng bọn Jêricô, dùl tòm ală dơrñăng bòn kơryăn bol khai mut tòm tiah Hơ Ai. Tŭ do, bol khai dòn lah Yàng Tom Trồ rơp ai gơnoăr sôr bol khai mut mơ tơmpit bọn. Mơ ya, Yàng đơs wơl mơ Jôsuê sôr lang bol lơh bơta siat gơltau. Behơ̆, Jôsuê mơ lang bol palư ơm gơn nang pràn wơl tơnơ̆ mơ neh siat gơltau.

Dô la bơta mơ Yàng Tòm Trồ kòñ tòm tŭ Kơnràñ ai bol he in rai lơngap lơngai. Kơnràñ lơh broă “siat gơltau” tòm đah hwềng bol he, lơh wil tơl bol he bơh dơlăm nàng bơtê ai bol he in rcăng sir ntao diđap măt mơ bơta tơmlơh mor tus. Bulah digơlăn lơh jê sồt, mơ ya bol he pal cang don duh “bơta tiar mòn đah hwềng” dô, dơp lềng broă Yàng Hwềng Goh dê tòm nùs nhơm mơ đah hwềng bol he, ơm rlô tòm bơta ring lơngai Yàng ai bol he in jơl tus dê tŭ Kơnràñ hôi bol he ñă mơ tơmlơh. Bơta do digơlăn kalkê. Mơ ya, dilah bol he kơ̆ win dòn duh Yàng tòm pah rai ring lơngai, bol he rơp gơlik gơs ală cau ling “ò rgơi alah’’ tòm bơta tơmlơh đah hwềng tòm bơta tề lăm Kơnràñ dê. Bol he rơp git lam geh he đềt mêr mơ Yàng rlau jơhkơnòm dê bơta lơh broă jrô ndơp bềng gơnap gơoăr mơ Kơnràñ gam lơh tòm rài kis bol he dê.

Rìp dô, añ neh git lam ngăn bơta dô, mơ añ gŏ sèng Sră Goh dô ngăn kwơ mang, dipal nàng kơlôi sơnưng jrô ndơp. Añ dơp git lah ò di tŭ lơi he kung soh ală phăn tơmlơh Yàng Tòm Trồ dê kơp tŭ kơp jơ. Añ kung dơp git lah he òhềt tơryăng tơryông ngăn tòm bơta hôi dan mơ joi jat Yàng tòm pah rai ring lơngai, be broă dipal la añ pal lơh. Tom tŭ săng lơi bơta hôi dan mơ jôi jat Yàng kơp ngai, bol he buôn lúi ò git kơrhia mơ digơlăn kol brồ lơh nisơna, be dô bơta brồ lơh đah hwềng. Behơ̆, broă bol he dê la pal sùm git kơrhia mơ soh ală phan tơmlơh Yàng Tòm Trồ dê.

Dan jà bol he dô nùs bal tòm bơta hòi dan:
Kòn khoai Yàng là Bơtau at bồ rài kis kòn! Ơ Yàng, kòn git lah he găm ơm digùl bơta tơmlơh bềng kălkê dô. Ưnngai Kơnràñ neh ai kòn in ală phăn tơmlơh nàng rgơi ntao kơ̆ mơ tơmlơh. Tòm ală pah rai ring lơngai, dan Yàng dong kòn ò hŭi hôi dan mơ jôi jat Kơnràñ, nàng tus dê bơta gơlong tus, kòn rgơi ntao kơ̆ tòm gơnoăr pràn Kơnràñ ai. Dăn Kơnràñ ai kòn in jakchai, gơnoăr pràn mơ bơta ring lơngai, nàng gơlik gơs cau ling don song tòm mpôl ling Yàng Tòm Trồ dê. Kòn jơh nùs hôi dan ai sơnđăn Yàng Jêsus Krist hôi dăn mơ Yàng Bèp, Amen.

Ơ ală ồng mò oh mi kòñ gơboh, ồng mò oh mi găm ơm tòm ală ngai ring lơngai, ală broă buôn soh sơl? Ưnngai tĕ Yàng, hôi dăn, ơm rlô mơ jôi jat muh măt Yàng sùm sùm. Kùng prăp tĕ nùs nhơm rcăng sir diđap ală bơta brồ lơh nisơna bơh cau sò tơm bơta dòn bol he dê. Dilah oh mi găm ơm tòm dô nơm bơta tơmlơh đah hwềng, lơh jat tĕ Jơnau Yàng bơtọ, soh tĕ jơh ală phan tơmlơh đah hwềng. Bol he pal cang sùm rcăng sir, ò di ming tòm ală tŭ tơmlơh mơ kung tòm tŭ tơngai ring lơngai mơ Yàng ai. Sùm drơng kơp tĕ mơ ntao kơ̆, bơh tơm bơta tơmlơh dô, Yàng neh rcăng jơh ală bơta bol he cang nang phalin lơgar Kơnràñ in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.