19.01 Bơta Hòi Dan Kòp Ngai: GÙNG DÀ NÀNG GƠLIK GƠS SÀNG GOH

Ồng mo oh mi neh tŭ lơi gọ he găm gơkòl di gul woal vong ò tŭ lơi lồi, tiah bơta pơnnhừ să, kơlồi rcăng mơ rngòt rngơt kừ găm ơm gùt dar nùs nhờm he? Gơs tŭ lơi ông mo oh mi kờp kơñ jơh ală bơta rơp tơm gơl dô bă nisơna, mơya Yàng òbăt dòp jơnau rac dan ồng mo oh mi sơl? Gèn ông mò oh mi rơp dòp git lah ală bơta tòm gơl ngăn ò tùs dô bă mhăr, mơ ladô nơm gùng jŏ jòng, tŭ Yàng bơt mòn mơ lơh sàng goh bol he kòp ngai.

Ngai do ngai 19/01/2025, tơnggu hòi dan kòp ngai dan ja ồng mo oh mi kơlồi sơnờng bal jơnau Yang kơnòm bơta dong kòl Anthony Cox găn tơnggu me GÙNG DÀ NÀNG GƠLIK GƠS SÀNG GOH

“Oh mi la cau geh sac rwah, jat be bơta git lài Yàng Tom Trô dê la Bèp, mơ geh gơlik gơs làng bol sang goh bơh Yàng Hwềng Goh, tồ dòn bơr Yàng Jesu Krist.” (1Pier 1:2)

Kòp gơn bơta dŏng tă Yàng di sùm la dô bơta gơlòng gơwèt mơ añ. Ồng mo oh mi git lah, añ ò di la cau jak chài rlau jơh, mơya añ tơl ngac ngar nàng dòp git lah dilah ò git kơrhia, ò sên kơlồi kờp cơnđoà he lòt, gèn bơta pơnhừ să rgời buôn gơmùt mơ lơh hăt hăl nùs añ.

Tòm tŭ bơtê trung hoc, añ la săp đơs cau klau gơ guh tòm dô bơta rơndăp đơs chò geh tiang pơnrò. Săp đơs añ jê lơh hiu nhă mơ gơp bơyô añ jê ai lơh krơi. Ò băt tơnơ̆ hơ̆, añ geh ntào hơđăng blàng rơng, lơh oă jơnau đơs chò hêk, mơ bơh hơ̆, bơta pơnhừ să neh ăt bồ cau mơ Yàng kòp kờñ añ gơlik gơs.

Hơ̆ la tŭ mơ añ sơntòm kơlồi he ngăn krơi is. Tŭ gơp bơyô añ jòng rơ añ jak chài tơnơ̆ mơ dô bơta lơh chò hềk, añ dòp geh jơh bơta gơklŏ să tòm he ĭn ala bơh cèng bơta gơklŏ Yàng ĭn. Tŭ hơ̆ añ ò dòp git lah Yàng la Bơtau dipal geh jòng rơ, bơh Kơnràñ neh ai añ ĭn bơta nđàc krơi is do.

Tơnơ̆ hơ̆, añ lòt găn ală kơnhài sơnăm bềng bơta bol glăr kalkê. Ưn ngai Yàng, bơh găn bơta gơlòng hơ̆, Kơnràñ tòm gơl añ. Mơ bulah ngăn kalkê, añ neh geh bơtê lah Yàng gơs ală tơnggu rơndăp ndai añ ĭn. Lồi dùt, añ mpàng tê gòi mơ lik bơh bòn dơng tòm trồ măng, hào rơndeh mơ ri hơ bòn dềt kis băl mơ mè.

Jơl tùs di tŭ do, Yàng găm tòm gơl añ drĕ drĕ. Añ dòp git lah he găm tòm pơrlòng oă ngăn.. Bpwta pơnhừ să, rngòt rngơt, kơlồi rcăng kừ găm jòi gùng tơm pìt hwềng nùs añ. Tòm bơta roh gơn kơnòm, añ ràc dăn mơ Yàng, kơp kơñ Kơnràñ dŏng tă añ mơ tŭ hơ̆, ƀăñ lơh òbăt dô êt lơi.

Tòm 1Pier 1: 1-2, cau gơnoăr bơtô Pier đơs lah: Bol he la “ală cau geh sac rwah, jat be bơta git lài Yàng Tom Trô dê la Bèp, mơ geh gơlik gơs làng bol sang goh bơh Yàng Hwềng Goh, tồ dòn bơr Yàng Jesu Krist mơ geh lơh goh bơh mhàm Kơnràñ dê.”

La kòn lang Yàng dê, bol he kờp kơñ jơh ală bơta geh lơh dô bă mhăr. Bol he kòp kơñ Yàng dong tă he lik bơh bơta pơnhừ să, gơjrăñ măñ, ham kờñ poac să dê, rngòt rngơt mơ ală bơta ò niam ndai tai. Mơya gơlơh be Yàng ò tŭ lơi lơh broă dô bă gơjal; Kơnràñ kơñ lơh sang goh bol he drĕ drĕ, jat gùng “ miu oă ù lơm bề”
Bơta gơlik gơs sàng goh la dô bơta lơh lòt jŏ jòng jơh rài kis, tŭ Yàng rao goh nùs nhờm mơ bồ dơngoh bol he dê. Dờng mang rlau jơh, bol he càng dờp git lah bơta tih dờng đah hwềng ò di bol he ăt bồ, mơ wil tơl gơ ơm tòm gơnoăr tê ăt bồ Bơtau Gơnap Gơnoăr Hơđăng rlau jơh dê.

Behơ̆ tàng, bol he kừbpơnjat kờp gơn Yàng. Bol he kòp gơn lơgăr Bèp gơs tùs, mơ nùs kơñ Bèp gơs di, tòm ù be teồ. Bol he kừ kòp gơn mơ pơnjat cơnđoà lòt. Bulah gơs dơ̆ gơtùp pừ, bol he gam pơnjat cơnđòa lòt; bulah neh ñă, bol he pơnjat cơnđòa lòt; găn bơta gơlòng, bol he kừ kơ̆ nùs cơnđòa lòt: gan bơta tòmlơh, bol he gam ò dơh wơl.

“Jòng rơ Yàng Tom Trồ, Bèp Yàng Jesu Krist la Yàng bol he dê! Bơh bơta kờñ nđàc tơngkah tơngkañ Kơnràñ dê mơ bol he geh deh wơl pa, tồ gơs bơta gơn kơnòm kis, konòm dê bơta kis wơl bơh bơta chờt Yàng Jesu Krist dê.” (1Pier 1:3)

Dan jà bol he dô nùs bal tòm bơta hòi dan:
Khoai Yàng kơñ gơboh kòn dê! Ơ Yàng, gan kờp pah rai tòm rài kis kòn dê, dan Kơnràñ dŏng kòn kừ kơ̆ nùs kòp gơn bơta dŏng tă Kơnràñ dê. Dan ai kòn in git lah tŭ jơ kp gơn hơ̆ kŭng la tŭ kòn geh Kơnràñ lơh sàng goh rlau tai. Dan ngui Jơnau Kơnràñ dê nàng sơm bời mơ tề lăm kòn tòm bơta dòn, nàng kòn sùm dòp git jơnau sŏng mơ gơnăp gơnoăr Kơnràñ dê tòm kòp ală bơta gơlik gơs. Kòn jơh nùs hòi dan, tòm sơnđăn Yàng Jesu Krist, Amen.

Ơ ală ồng mo oh mi kờñ gơboh, bulah gùng dà nàng geh gơlik gơs sàng goh tòm Yàng gơs bơta bòl glăr , bol he kùng kừ găm dòn kơ̆ mơ pơnjat cơnđòa lòt. Yàng ò hơ rơp lơh jơh ală bơta bol he ĭn mơ, mơya Kơnràñ sùm ơm bal mơ bol he, tề lăm mơ lơh sàng goh bol he găn kờp ngai. Tòm Kơnràñ, bol he jòi ban bơta kis, jơnau song mơ gơnăp gơnoăr nàng pơnjat kis dô bă kơ̆ wền, sùm tơnggờr tùs hơ bơta gơlik gơs sàng goh wìl tơl mơ Kơnràñ òs rcăng sìr bol he ĭn.

Gơs bơta lơi tòm rài kis ồng mò oh mi dê Yàng găm tiar bơtê sơl? Ồng mo oh mi rcăng sìr nùs nhờm nàng geh Yàng bơtô sôr, bơt mòn mơ tờm gơl nàng geh gơlik gơs sàng goh, geh ndrờm be Kơnràñ rlau tai sơl? Ơn tĕ tŭ jơ ơm mơ Yàng tòm ngai do, ồng mo oh mi yơ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.