Tòm dô nơm bơta cahrña, cau Kwăng Cahrña sơmbat prăp gơnoăr pràn jong jơnhoa nàng dơp dô bơta lơh nền lồi dut. Ai tòm làm plài ù dô, Cau Kwăng Cahrña dơng rlau jơh la să tơm Yàng Tòm Trồ – Bơtau Song Ring mơ Gơnap Gơnoăr ò lồi, sơmbat gơnap gơnoăr cahrña jong hơđăng ala phan. Kơnràñ la Bơtau cahrña ală bơta tòm ù dô, mơ bơta sang goh mơ song ngan wil tơl Lơgar Trồ dê. Tòm bơta gơs mat Kơnràñ dê, jơh tơl nă bol he pal ntao nàng cun să mơ nùs duh rngòt ai Kwăng Cahrña dơng ryŭ in.

Ngai do, ngai 24/01/2025, Bơta Hòi Dan Kòp Ngai dan jà ală ồng mò oh mi bơtê bal jơnau Yàng kơnòm dê bơta dong kơl ồng Missey Butler dê bơh tơnggumê DIĐĂP BƠTAU RYŬ RYƠM

“Ơ Yàng Jehôwa, bơta dờng màng, gơnap gơnoar, gơklŏ, bơta pha lin mơ bơta ryŭ ryơm, Kơnràñ dê, bơh jơh ală bơta hơđang trồ mơ tòm ù gơrê bal mơ Kơnràñ. Ơ Yàng Jehôwa, lơgar gơrê bal mơ Kơnràñ; Kơnràñ geh yò tơngguh gơs bơtau at bồ hơđang rlau jơh” (I Yal Yau 29:11)

Tŭ sơntơm bơta cahrña, cau oh bơta cahrña rơp ntao mơ yal dơng jơnau: “ Dan jà ală cau tòm ơdŭ cahrña ñă ntao!” Tŭ kơnọ ală jơnau do, ntas ală jơng dê tòm tŭ ală cau sơrbac sơrbang ñă ntao, mơ jơh ơdŭ sơntơm ơm mŏ ngit ngơt. Bơta cahrña sơntơm. Kơp nă cau ñă ntao nàng ràng tơlik bơta duh rngòt gơwet mơ Cau Kwăng Cahrña jong hơđăng, tŭ ồng lọt nggui tòm tiah cahrña.

Tŭ jơ gơlơh ngit ngơt tòm ơ dŭ cahrña digơlăn kir rngòt ngăn, tian gơs kir rngòt krơi is gơwet mơ cau găm ntao di ơnìh kol cahrña. Mơ ya, bol he rơp gơs bơta lơngai mơ hưh nùs dilah kis tòm dô nơm dunnia gơs boh lăm gam lơh lòt niam nàng sền gar bơta kwơ dipal kòn mơnùs dê.

Bol he dòn lah kơp gơnap gơnoăr la tus bơh Yàng Tòm Trồ mơ Kơnràñ rơndap ală gơnă ăt bồ nàng gar nền bơta song geh lơh jat. Tŭ joi wơng Sră Goh, bol he sền gŏ gùng dà mơ ală cau gơnoăr at bồ bọn lơgar mơ kung be ală boh lăm dunnia geh rơndap be la dô nơm máy lơh lòt dô bă niam. Yàng Tòm Trồ neh bơtao ală cau prăp gơnoăr broă dơng mang nàng tì lăm bọn lơgar, mơ bol he geh bơtọ pal duh rngòt ală gơnoăr broă mơ bol khai prăp ăt. Hơ̆ la bơta rơndap mơ Yàng Tơm Trồ neh lơh nền nàng lơh sir boh lăm bọn lơgar.

Mơ ya lai ngăn, bol he pal đal git lah Yàng Tòm Trồ la Bơtau Cahrña Dơng Ryŭ hơđăng rlau jơh. Gơnoăr broă sơnrơp bol he dê la dơp git gơnăp gơnoăr dơng rlau jơh Yàng Tòm Trồ dê hơđăng rài kis he. Kơnràñ bềng gơnoăr ăt bồ hơđăng kơp nă cau tòm kơp ală bơta gơlik gơs. Kung gơs oă sèng Sră Goh tơngkah bol he dơp git Yàng Tòm Trồ la Bơtau Jong Jơnhoa, tiă rlau ală gơnoăr pràn, gơnap gơnoăr mơ lơgar. Bol he pal duh khoai mơ duh rngòt Kơnràñ – Yàng Tòm Trồ Dơng Ryŭ bol he dê.

Jơnau yal ntas dơng Sră Goh dê gam pơnjat rang tơlik bơta bơtọ sôr jơl tus ngai do:
“Dan Yàng Tom Trồ guh, lơh nrah nring ală cau sò tơm di Kơnràñ, Mơ lơh ală cau gơjrañ kơuềng di Yàng pal dô bơh di đap Kơnràñ.

“Tòm nam bơtau Ôsia sang rài, añ gŏ Yàng Jehôwa nggui hơđang dô nơm sơbàn jơnhoa ngan, tiang ào jrùh Kơnràñ dê bềng hìu duh khoai. Ală seraphim ơm ntào gùt dar Kơnràñ, kòp nơm gơs prau nơm pơnđar: bàr nơm jơm mat, bàr nơm jơm jơng mơ bàr nơm ngui nàng par. Ală seraphim đơs tòmho bal lah: “Sàng goh, sàng goh, sàng goh la Yàng Jehôwa Gơnap Gơnoar Dờng; Làm jơh plai ù bềng lìu bơta gơklŏ Kơnràñ dê.” Ală jrong di mpồng mut gơlơnggơr bơh sap đơs bol khai dê, mơ hìu duh khoai gơs bềng ñhŭ.” (Êsai 6:1-4).

Neh tus dê tŭ jơh tơl nă bol he ñă ntao bal tòm bơta duh rngòt đah hwềng, mơ nùs nhơm duh khoai, jong rơ Bơtau Cahrña Dơng Ryŭ jơh dunnia dê! Bol he pơndềt cun să he tŭ Kơnràñ guh hơđăng sơnban, ăt bơta lơh nền bơta cahrña dê tòm tê, mơ yal nùs kòñ wil tơl Kơnràñ dê.

“Ơ Yàng Jehôwa, bơta dờng màng, gơnap gơnoar, gơklŏ, bơta pha lin mơ bơta ryŭ ryơm, Kơnràñ dê, bơh jơh ală bơta hơđang trồ mơ tòm ù gơrê bal mơ Kơnràñ. Ơ Yàng Jehôwa, lơgar gơrê bal mơ Kơnràñ; Kơnràñ geh yò tơngguh gơs bơtau at bồ hơđang rlau jơh;” (I Yal Yau 29:11)

Dan jà bol he dô nùs bal tòm bơta hòi dan:
Khoai Yàng Tòm Trồ hơđăng jong, kòn tus diđap Kơnràñ tòm bơta don duh mơ nùs git ưnngai jrô ndơp. Kơnràñ là Bơtau song ring, gơnap gơnoăr mơ sang goh, tòm Kơnràñ gơs bơta song ngăn wil tơl. Dan dong kòn sùm git duh rngòt Kơnràñ. Dan tề lăm kòn tơm kơp ală bơta lơh nền, nàng rai kis kòn sùm yờ tơngguh sơnđăn Kơnràñ. Kòn ai sơnđăn Yàng Jêsus Krist hòi dăn mơ Yàng Bèp, Amen.

Ơ ală ồng mò oh mi kòñ gơboh, Yàng Tòm Trồ ò di ming ăt bồ plai ù mơ Kơnràñ kung wơng git ală bơta jrô ndơp tòm nùs nhơm kơp nă bol he. Kơp bơta lơh nền cahrña Yàng dê kung ràng tơlik bơta song rưng wil tơl mơ bơta kòñ gơboh ò lồi. Kơp kòñ jơnau song dô rơp chôl bơtrồt oh mi sùm dòn kơnòm Yàng, mơ bulah i dô oh mi gơs găm sền gŏ oă bơta ò song rưng gơs mat, gen oh mi kung bañ dơrcul nùs bơh git lah dô ngai ò ngai nê, bơta song wil tơl rơp geh lơh sir hơđơm bơta ăt bồ Yàng dê, Bơtau Cahrña hơđăng jong.

Mơ nùs dơp git gơnap gơnoăr dơng rlau jơh Yàng dê, bol he gơs gam kis dô rài kis mơ bơta dơp git Yàng la Yàng Tơm Trồ jong jơnhoa, dơng ryŭ, la Bơtau bềng gơnoăr hơđăng jơh làm plai ù, mơ hơđăng să tòm rài kis kơp nă bol he hala ò? Gơs bơta lơi tòm rài kis bol he ò hềt ngăn dòn duh gơnap gơnoăr hơđăng rlau jơh Yàng dê hala ò? Gơs bơta lơi Yàng kòñ bol he lơh, mơ ya bol he găm ơm gơn mơ kư ai oă sèng lùp “ñchi bơh tai?” mơ Yàng, ala bơh dòn bơr Kơnràñ hala ò? Kis tĕ dô rai kis yờ tơngguh Yàng ngai dô mơ, ồng mò oh mi yơ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.