Buăl hăm đei layơ mơn ‘bôh dôm lu tơdrong kơdih bơ̆jang kơ Kră Yang nhen thoi iĕ ioch dêh? Ưh kơ tôm gĭt kăl, ưh kơ đei bu lăng ‘bôh, ưh kơ đei bu pơdrơ̆ng! Păng thoi noh, buăl jĕt kơdih: “Lei dôm lu tơdrong jang iĕ ioch ‘nâu hăm đei pơm kơ jơhngơ̆m Kră Yang hiôk ưh?” Teh đak mă lu bơ̆n oei arih lăp đon kơ dôm tơdrong tih rŏ, hloh kơ dôm tơdrong păng lăng rŏ kơ tih dêh. Mă lei Kră Yang ưh kơ lăng kiơ̆ thoi tơdrong kon bơngai lăng. Sư ‘bôh tơdrong mă bơngai nai ưh kơ ‘bôh, păng Sư gĭt kăl kơ dôm lu jơhngơ̆m tơpă ‘mêm kơ Sư.

Năr ‘nâu, ‘năr 26/05/2025 tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Ken Barnes kơ̆l ‘bai KRĂ YANG ‘BÔH DÔM LU JƠHNGƠ̆M HUAY PƠ-ANG AKÂU.

Sơ̆p Hla Bơar ‘Bok Kei-Dei: “Ơ ‘nhŏng oh, iĕm chă lăng lu bơngai mă ‘Bok Kei-Dei rơih iŏk đơ̆ng lu khŭl iĕm sơ̆, sư thoi yơ? Lăm lu iĕm kư̆m hui kơ đei hŏk hơgei, hui bơngai pơm tih, hui bơngai đơ̆ng adrĕch yŏng mơng.” (I Kôrintô 1:26)

Bu lăm lu bơ̆n kŭm ‘maih wă jing mĭnh ‘nu bơngai đei kăl yua, đei gĭt kăl. Păng tơpă, lăm măt Tơ‘ngla Pơjing, đĭ đăng lu bơ̆n đei gĭt kăl ngăl. Mă lei hmach dêh ‘noh bơih lơ wơ̆t, lu bơ̆n tă kơ chă tơdrong gĭt kăl kơ kơdih đơ̆ng măt lăng đơ̆ng kon bơngai- ưh kơ trŏ gĭt kăl tơpă lăm măt ‘Bok Kei-Dei.

Kră Yang lei pha. Sư ngăl yua dôm lu bơngai tă kơ hmă đĕch, kư̆ kơ jơhngơ̆m lu sư lăng tơ gah Kră Yang.

Đei mĭnh wơ̆t ‘nei, inh đei krao wơ̆n năm bơtho tơ mĭnh Khŭl Bơngai Lui iĕ jê̆ hnam. ‘Nao truh tơ anih, đei mĭnh ‘nu bơngai drŏnglo lĕch pơih ‘măng, rôp ti kơkuh manuh, đơ̆ng noh chông inh mơ̆t tơlăm. Lu Khŭl Bơngai Lui tŏ sĕt ngăl thoi noh- mĭnh ‘nu bơngai jang hloi tôm tơdrong jang. Inh chă anih hơoei hơđơ̆ng tơ gah rŏng wă lăng hơmet dơ̆ng ‘bai pơtho.

Kơplah ‘noh, inh đei lăng ‘bôh ‘nhŏng ‘noh kơ dâu wih wơ̆t rŏng anăp: pơm kaphê, hơmet tŏ sĕt ‘bĕng tơmam sa, đơ̆ng noh chĕp hla puih hơpuih hơmet trong yak năm tŏk bŏk lu tang dŏ hơoei.

Inh hơoei lăng mă lei lăm jơhngơ̆m thar jet Kră Yang: “Kơkuh kơ Kră Yang, năr ‘nâu bu bơ̆jang gĭt kăl hloh lăm jơ akŭm ‘nâu- kon, dah mă anhŏng ‘noh?”

Păng Kră Yang tơ ‘blŏk kơ inh tơdrong ‘nâu: Ưh kơ đei bu hloh kơ bu ôh. Lu nhôn đei gĭt kăl lơ lăi băl, lăp pha ra lăm tơdrong bơ̆jang đĕch.
Inh đei jet thim dơ̆ng: “Thoi noh bu jơ̆ bơngai mă jơ̆ jơhngơ̆m Kră Yang lăp đon hloh?”

Jơ ‘nâu, inh mơn đei kơ nơ̆r tơl hloi: “Jơ̆ bơngai bơ̆jang tơdrong jang sư hăm jơhngơ̆m ‘mêm kơ Kră Yang hloh kơ đĭ đăng.”

Lơ wơ̆t, inh ngăl hơ wơ̆l kơ tơdrong gĭt păng tơdrong jang. Inh ưh kơ gơh hơgăt yua kơ tơdrong jang bơ̆n jang, na kơdih tơdrong oei hơdai păng jơhngơ̆m đơ̆ng inh bơih tơdrong chĕp tơdrong gĭt lăm tơdrong jang ‘noh. Rim ‘nu bơngai đei ngăl tơgĭt kăl lăm măt Kră Yang.

Trŏ bơih, đei dôm bơngai bơ̆jang dôm tơdrong jang tih dêh kơ hnam Kră Yang- lu sư đei tơdrong jang tih hloh lăm Akâu Jăn ‘Bok Krist. Mă lei tơdrong ‘noh ưh kơ đei khan Kră Yang ‘mêm kơ lu sư lơ hloh ôh. Nhen thoi kơplah Yang Yêsu ăn hơdrô̆ kơ ‘bok Pêtrôs, Yakơ păng Yôhan kiơ̆ Sư lăm kơplah jơ gĭt kăl- ưh kơ trŏ yua kơ Sư ‘mêm kơ lu sư hloh, mă ‘noh yua kơ lu sư đei tơdrong jang pha. Na tơdrong ‘mêm mơnat lei Kră Yang ‘măn ăn kơ đĭ đăng lơ lăi băl.

Đei mĭnh tơdrong glăi mă lơ bơngai lăm lu bơ̆n đei ‘bơm, ‘noh bơih lu bơ̆n tơchĕng khan tơdah bơ̆n đei bơngai nai pơ-ư, lei Kră Yang kŭm gô lăp đon. Mă lei tơpă ‘noh, pơm kơ jơhngơ̆m kon bơngai lăp đon ưh kơ lơ lăi hăm pơm kơ Kră Yang lăp đon. Tơdah nŏng kơ adrin arih wă kơ đei tơdrong lăp đon đơ̆ng bơngai nai, ưh kơ đunh kơnh lu bơ̆n kŭm gô gleh lap păng đĭ jơhngơ̆m đĕch.

Thoi noh tơdrong kiơ ‘nei pơm kơ Kră Yang lăp đon?

Ưh kơ trŏ lu bơ̆n bơ̆jang đei dôm yơ, dah lu bơ̆n hăm hloh kơ bơngai nai ưh, mă ‘noh bơih tơdrong pơtrŭt lăm jơhngơ̆m lu bơ̆n- lu bơ̆n hăm đei bơ̆jang dôm tơdrong yua kơ ‘mêm kơ Kră Yang dah ưh. Kơdih jơhngơ̆m ‘mêm mơnat kơplah bơ̆jang bơih tơdrong Kră Yang kơnhăm truh.

Lơ bơngai bơ̆jang thĕng hreh lăm Khŭl Bơngai Lui- thoi kơ proh hơmet tang dŏ, chhŭt hơnă hnam, ôp hơmet li… Ưh kơ đei bơngai bu băt, ưh kơ đei bu tap ti pơ-ư kơ lu sư hloi. Mă lei lăm măt ‘Bok Kei-Dei, lu sư ‘noh bơih dôm lu bơngai tơnăp thĕng hreh.

Yua kơ thoi Sơ̆p Hla Bơar ‘Bok Kei-Dei đei tơ ‘blŏk:

“Ơ ‘nhŏng oh, iĕm chă lăng lu bơngai mă ‘Bok Kei-Dei rơih iŏk đơ̆ng lu khŭl iĕm sơ̆, sư thoi yơ? Lăm lu iĕm kư̆m hui kơ đei hŏk hơgei, hui bơngai pơm tih, hui bơngai đơ̆ng adrĕch yŏng mơng.” (I Kôrintô 1:26)

Na đơ̆ng rŏng, tơdah buăl ‘bôh bu ‘noh oei proh hơmet tang dŏ, hơpuih hơmet hnam hơkŭm- dôm lu tơdrong jang mă ưh kơ đei bu kơnhăm truh- lei trŏ kơ buăl oei tơ ‘bơ̆p mĭnh ‘nu bơngai bơ̆jang kơ Kră Yang đei kơdih Sư rơih iŏk.

Păng jơ akŭm năr ‘noh- mă khan inh bơih bơngai dơ̆ng pơtho- mă lei bơngai pơm kơ Kră Yang lăp đon hloh hơbŏ lăng tă kơ ‘noh bơih kră hnam yang oei chĕp hla puih hơ puih cham tơgah rŏng.

Apĭnh đĭ đăng krao khan hơdai:
Kră Yang ơi, kon bơnê kơ Kră Yang yua kơ Ih ling lang lăng ‘bôh kon, mă khan kơplah ưh kơ đei bơngai bu nai lăng ‘bôh. Bơnê kơ Ih yua kơ đei krao kon, ưh kơ trŏ yua kơ kon gơh hơgei dah hloh kơ bơngai nai, mă ‘noh yua kơ Ih ‘mêm kơ kon, păng Ih ‘măn ăn mĭnh anih gĭt kăl ăn kơ kon lăm tơdrong tơdă đơ̆ng Ih. Apĭnh Kră Yang pơtho kon băt bơ̆jang kơ Ih, ưh kơ yua kơ tơdrong ư-ang đơ̆ng akâu jăn kon, mă yua kơ tơdrong mơsêh mơyang Ih. Apĭnh Kră Yang tơgŭm kon ling lang bơ̆jang dôm tơdrong jang đơ̆ng tih truh tơ iĕ hăm đĭ jơhngơ̆m ‘mêm kơ Ih, wă kơ rim tơdrong jang ti kon jang ‘noh bơih tơmam soi ‘lơ̆ng Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, hơbŏ buăl gô ưh kơ đei layơ dơ̆ng tơ kơpal anih pơtho wă pơtho Nơ̆r Kră Yang, dah pơdah hăm ‘bơ̆r hơri ư-ang ‘bơ̆t anăp đĭ đăng Khŭl Bơngai Lui. Hơbŏ buăl lăp jơ̆ bơngai hơpuih hơmet hnam hơkŭm, proh hơmet tang dŏ, dah lăng khŭl hơ‘lơ̆p kơplah jơ akŭm. Păng ưh kơ trŏ jơ̆ dôm lu tơdrong jang tơ anih Khŭl Bơngai Lui, tơdrong jang, dah tơ anih dôm lu tơdrong bơ̆jang rim năr đơ̆ng rim ‘nu lu bơ̆n, mĭnh ‘nu bơngai pai gŏ, mĭnh ‘nu bơngai jang kơ gơ̆p, mĭnh ‘nu bơngai jao tơmam, mĭnh bơngai pơtho, mĭnh ‘nu bơngai tĕch tơmam….lu bơ̆n athei jơ̆ dôm lu bơngai đĭ jơhngơ̆m lăm tôm tơdrong Kră Yang pơjao. Mă ưh kơ đei bơngai bu lăng ‘bôh dah ‘blŏk răk, mă lei Kră Yang bơih Tơ‘ngla ling lang lăng ‘bôh tôm tơdrong jang thĕng hreh đơ̆ng buăl- ưh kơ hlơp mĭnh tơdrong kiơ. Tơdah buăl bơ̆jang hăm mĭnh jơhngơ̆m ‘mêm kơ Kră Yang tơpăt, lei lăm măt Sư, buăl oei bơ̆jang mĭnh tơdrong jang tih dêh ăn kơ tơdrong pơgơ̆r ‘Bok Kei-Dei.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.