Puas muaj zaum twg koj pom tias tej haujlwm yus ua rau Vajtswv cuag li me dhau? Tseem ceeb tsis txaus, tsis muaj leej twg ntsia pom, tsis muaj neeg lees yuav! Tas, koj cim civ nug: “Tsis paub tej haujlwm me no puas ua rau Vajtswv txaus siab?” Lub ntiajteb uas peb tab tom nyob nyiam tej yam uas loj, nrov npe thiab saib cuag li yog haujlwm loj. Tiamsis Vajtswv tsis saib li tib neeg saib. Nws pom yam uas tib neeg tsis pom, thiab Vajtswv saib taus tej tus tib neeg uas muaj lub siab ntsiag to hlub Vajtswv.

Hnub no, yog hnub 26/05/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ken Barnes dhau ntawm Zaj kawm VAJTSWV POM COV NEEG UAS UA HAUJLWM NTSIAG TO

Vajluskub: “Cov kwvtij, nej ua tib zoo xav thaum Vajtswv hu nej los ntseeg, nej yog neeg zoo li cas: Raws li neeg xav, nej cov tsis muaj pestsawg leej txawj ntse, tsis muaj pestsawg leej muaj hwjchim thiab tsis muaj pestsawg leej ua nom ua tswv” (I Kauleethaus 1:26)

Peb txhua tus nyias yeej xav kom nyias dhau los ua ib tug neeg muaj qab hau, muaj nqis. Thiab tseeb tiag, nyob hauv Vajtswv, tag nrho peb txhua tus puav leej tseem ceeb. Tiamsis yam uas khuv xim yog muaj ntau zaug, peb ho mus nrhiav saib peb muaj nqis li cas dhau ntawm tib neeg txoj kev ntsia – ho tsis yog qhov muaj nqis tiag rau ntawm Vajtswv.

Ntawm Vajtswv nws txawv. Nws siv tej tus tib neeg tsis muaj koob npe, tsuav yog lawv muaj lub siab tig mus rau ntawm Vajtswv xwb.

Muaj ib zaug, kuv raug caw mus qhia rau ntawm ib lub Pawg Ntseeg me uas nyob ze ze tsev. Nyuam qhuav mus txog chaw, muaj ib tug txiv neej tuaj qhib qhov rooj, pib sib nug noj qab nyob zoo tas nws coj kuv nkag mus rau hauv. Txhua lub Pawg Ntseeg me ces yeej muaj ntsis zoo li ntawd – ib tug tibneeg ua tag txhua txoj haujlwm. Kuv nrhiav chaw zaum twj ywm ntsiag to rau tom qab saib kuv zaj lus qhuab qhia. Thaum ntawd, kuv pom muaj ob peb tug txiv neej khiav mus khiav los, tov café, muab thaj tej tso saum rooj, tas nqa khaub ruab mus cheb tej kem mus los hauv txhua haj rooj.

Kuv zaum ntsia thiab hauv lub siab cim civ nug Vajtswv: “Tus Tswv, hnub no leej twg ua haujlwm tseem ceeb dua nyob rau hauv lub tuam tsev no – kuv, lossis tus txiv neej ntawd?”

Vajluskub: “Cov kwvtij, nej ua tib zoo xav thaum Vajtswv hu nej los ntseeg, nej yog neeg zoo li cas: Raws li neeg xav, nej cov tsis muaj pestsawg leej txawj ntse, tsis muaj pestsawg leej muaj hwjchim thiab tsis muaj pestsawg leej ua nom ua tswv” (I Kauleethaus 1:26)Tas Vajtswv ntuas kuv txog qhov no: Tsis muaj leej twg tseem ceeb dua leej twg li. Peb muaj nqis zoo thooj tib yam, tsuasyog txawv qhov haujlwm xwb.

Kuv rov nug ntxiv: “Yog li leej twg thiaj yog tus ua haum Vajtswv siab dua?”

Zaum no, kuv hnov cuag li kuv txais tau kiag lo lus teb: “Yog tus neeg uas nws ua nws feem haujlwm los ntawm lub siab hlub Vajtswv dua.”

Ntau zaug, peb pheej nkag siab yuam kev txog nuj nqis thiab teg haujlwm. Tsis yog vim tej haujlwm uas peb ua ntawd ua rau peb muaj nqis, tiamsis vim peb ua rau teg haujlwm ntawm muaj nqis. Rau qhov Peb txhua tus puav leej muaj nqis tshwj xeeb nyob hauv Vajtswv.

Thiab tseeb tiag yeej muaj qee tus neeg lawv ua tej haujlwm loj heev rau Vajtswv – lawv tuav lub meej mom loj dua nyob hauv Yexus Khetos lub cev. Tiamsis qhov ntawd tsis tau txhais tias Vajtswv hlub lawv dua. Zoo li thaum Tswv Yexus coj Petus, Yakaunpaus thiab Yauhas lawv nrog Nws mus ua ke rau qee lub sijhawm tshwj xeeb – tsis yog vim Tswv Yexus hlub lawv dua, tiamsis yog vim lawv muaj dua lwm feem haujlwm txawv. Hos txoj kev hlub tus Tswv pub sawv daws sib npaug zos.

Muaj ib qhov yuam kev uas peb muaj coob tug puav leej raug ntawd yog peb xav tias yog yus tau lwm tus qhuas, ces Vajtswv yuav txaus siab. Tiamsis tseeb tiag, ua haum tib neeg siab tsis tau txhais tias yuav haum Vajtswv siab. Yog siv zog kom tau lwm tus lees paub, ntxov lig ces peb yuav qaug zog thiab tsis xav ua ntxiv.
Yog li yam dabtsi thiaj ua rau Vajtswv zoo siab?

Tsis yog peb ua tau ntau pes tsawg, lossis peb nto npe npaum cas, tiamsis yog yam uas tshoov peb lub siab ua – peb ua txhua yam puas yog vim hlub Vajtswv. Twb yog vim lub siab hlub thaum ua haujlwm thiaj yog yam uas Vajtswv pom txog.

Muaj coob tug ua haujlwm ntsiag to nyob hauv Pawg Ntseeg – xws li tu rooj tog, so tsev, ntxuav khob haus dej… tsis muaj neeg paub, tsis muaj leej twg npuaj teg qhuas lawv. Tiamsis hauv Vajtswv lub qhov muag, lawv yog cov neeg muaj koob nto npe ntsiag to.

Vim Vajluskub ntuas tias:
“Cov kwvtij, nej ua tib zoo xav thaum Vajtswv hu nej los ntseeg, nej yog neeg zoo li cas: Raws li neeg xav, nej cov tsis muaj pestsawg leej txawj ntse, tsis muaj pestsawg leej muaj hwjchim thiab tsis muaj pestsawg leej ua nom ua tswv” (I Kauleethaus 1:26).

Yog li, lwm zaug yog koj pom leej twg teeb rooj tog, cheb vaj cheb tsev – tej haujlwm uas tsis muaj leej twg ceev faj txog – ces tej zaug koj tab tom ntsib ib tug neeg uas Vajtswv xaiv ua Vajtswv haujlwm.

Thiab txoj kev pehawm hnub ntawd – txawm tias kuv yog tus sawv qhuab qhia los – tej zaum tus ua haum Vajtswv siab tshaj ho yog cov neeg uas tuav khaub ruab cheb tsev tom qab.

Thov caw nrog kuv peb thov Vajtswv ua ke
Tus Tswv, kuv ua Koj tsaug vim Koj ntsia pom kuv, txawm yog tsis muaj leej twg ntsia pom. Ua Vajtswv tsaug vim koj tau hu kuv, tsis yog kuv txawj dua, nto npe dua, tiamsis vim yog koj hlub kuv, thiab tseg ib qhov chaw tseem ceeb rau kuv nyob hauv koj lub homphiaj. Thov qhia kuv paub ua haujlwm pab koj, tsis yog vim kuv lub koob npe, tiamsis vim koj lub koob meej. Thov pab kom kuv ua txhua txoj haujlwm loj me los ntawm lub siab hlub koj, kom txhua teg haujlwm uas kuv txhais teg ua puav leej yog yam khoom fij uas koj txaus siab. Kuv thov hauv Tswv Yexus Khetos lub npe. Amees.

Cov kwv tij tej zaug koj yuav tsis sawv saum rooj qhuab qhia, qhia Vajtswv tej lus, lossis nto npe lug los ntawm lub suab hu nkauj zoo qhuas Vajtswv hauv Pawg Ntseeg. Tej zaug koj tsuas yog ib tug neeg cheb tuam tsev, kho rooj tog, lossis saib xyuas tej menyuam yaus thaum pehawm. Thiab tsis yog tsuas yog tej haujlwm hauv Pawg Ntseeg, tej pab pawg xwb, nyob kiag ntawm peb tej haujlwm txhua hnub, yog ib tug pab tes taw, ib tug ua haujlwm, ib tug xa khoom, ib tug qhia ntawv, ib tug muag khoom xwb los…. tag peb lub siab ua txoj haujlwm uas Vajtswv cob. Txawm tsis muaj leej twg ntsia pom thiab lees yuav, los Vajtswv yog tus ntsia pom tej haujlwm ntsiag to uas koj ua – tsis tshuav ib yam uas Vajtswv tsis pom. Yog koj ua haujlwm los ntawm lub siab hlub Vajtswv tiag, ces nyob hauv Vajtswv, koj tab tom ua ib txoj haujlwm loj rau Vajtswv lub tebchaws.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.