Gơs tú lơi oh mi gơ lơh sền ală broă he lơh Yàng in dệt ngan sơl? Ò tơl dơng màng, ò gơs cau lơi bàn, ò gơs cau lơi sền sớp ală broă he neh lơh! Gen tàng, oh mi lụp is : “ ală broă dệt rhền do lơh Yàng in chờ hơp sơl?” Dunia he găm kis kờn ală bơta dơng màng, tiang pơn rơ mơ sền gơ lơh be kwơ ngan. Mơya Yàng ò be hớ be kon mơnus sền. Yàng bàn ală bơta mơ cau ò rgơi bàn, mơ Yàng sền kwơ màng ală nus nhờm kờn gơboh Yang.

Ngai do, ngai 26/05/2025, rơndap bơta hòi dan kòp ngai hòi jà ồng mọ oh mi kơlôi sơnơng Jơnau Yàng bal kơnơm dê bơta dong kơl Ken Barnes bơh tơnggume: YÀNG BÀN ALĂ NUS NHỜM DƠP DƠR

Sră Goh:”Ơ oh mi, sền sơwì tĕ bơta hòi sac oh mi dê, ò gơs oă cau tòm oh mi la jak chài jat sơnoa rnoas kòn mơnus dê, ò gơs oă cau gơs gơnoar pràn, ò gơs oă cau dờng màng.”( I Kôrintô 1:26)

Cau lơi tơm bol he kung kơp kờn tơng gơs dô nă cau geh gơtha, geh kwơ ngan. Mơ ngan la, tơm mat Bơtau Crơng Gơs, jơh tơl nă bol he găm kwơ ngan di đap Yang. Mơya plai soh ngan la oă tú, bol he joi bơta kwơ màng is he di bơh mat sền kon mơnus di – ò di la là bơta kwơ ngan tơm mat Yang Tơm Trồ.

Yang ò di be hớ. Yang sum ngùi ală cau be ơs, ming là bol khai gơs nus gơrê mơ Yang.

Gơs tú ne, ăn geh hòi ja tus bơto tơm tiah Hiu Jum dệt rềp hiu ăn di. Pa tus di tiah hớ, gơs dô na ồng pợ mpồng, kup tê mơ chọp să, gen tề ăn mút dơ lam. Ală Hiu Jum Goh dệt sùm mờng os be hớ – dô nă cau lơh oă broă. Ăn joi dô bă tiah ngệt ngơt đah ngkời nàng sền wơl bơta bơto ăn di.

Tú hớ, ăn neh bàn khai ntoat kiau ma: pha kaphe, ơn dô ết ban mơ plai, gen at kơn peh nàng lơh sàng gơh ală gùng lot dìgul ală cơnong gùi.

Ăn gùi sền mơ lup is Yang tom nus : “ Khoai Yang, ngai do ncau lơi la cau lơh broă kwơ rlau tơm ngai pơjum do – kon, hala khai?

Mơ Yang tơngkah ăn bơta do : Ò gơs cau do rlau mơ cau ne. Jơh tơl nă bol he gơs bơta kwơ màng drờm băl, ming pha is tơm gơnoar broă.

Ăn neh lup tai : “gen ncau la cau niam nus Yang rlau?”

Tú do, ăn neh git nền sèng yăl wơl tú tơnớ: “ la cau lơh broă he di bơh nus kờn gơboh Yang rlau jơh.”

Oă dớ, ăn gơ lơh ò đăl git bơta kwơ màng mơ bơta broă lơh. Ăn ò rgơi git broă lơh ăn di lik gơs bơta lơi, mơ bơta tơlik mat băl mơ nus nhờm ăn di cèng bơta kwơ màng tơm broă lơh. Cau lơi kung gơs bơta kwơ màng pha is tơm mat Yang.

Ngan la, gơs ală cau lơh oă broă dờng màng hìu Yang in – bol khai gơs gơnoar broă dơng rlau tơm Să Jan Bơtau Krist di. Mơya bơta hớ ò drờm băl mơ bơta Yang kờn bol khai rlau ò. Kung be tú Yang Jesu ơn Piêr, Jakơ mơ Jang lot jat Yang tơm tú dờng màng ngan – ò di bơh Yang kờn bol khai rlau, mơ la tài bơh bol khai gơs gơnoar broă ndai. Gen bơt kờn gơboh Yang ai kợp nă in la drờm băl.

Gơs dô bơta tis mơ oă cau tơm bol he buơn lơh jat, hớ la bol he kơlôi sơ nơng la dilah bol he geh cau jong rơ, gen Yang kung niam nus. Mơya ngan la, lơh niam nus kon mơnus ò drờm băl lơh mơ niam nus Yang. Dilah kứ bơtơl kis nàng geh bơta niam nus cau ndai, gen bol he gơlơh bol glar mơ roh bơta kơp gơn rlau.

Gen bơta lơi lơh Yang in chơ hợp?

Ò di la bol he lơh gơs dợ, hala bol he gơs oă cau jong rơ ngan, mơ la bơta sôr bơtrut tom nus nhờm bol he – bol he lơh jơh ală broă tài bơh kờn Yang hala ò. Bơh nus nhờm kờn gơboh tú he duh broă mơ la bơta Yang sền gó.

Gơs oă cau duh broă dơp dơr tom Hiu Jum Goh – be jut cơnơng gùi, jut hìu, rào pơ ngàn….ò gơs cau lơi bàn, ò gơs cau tạp tê jong rơ bol khai. Mơya tơm mat Yang Tơm trồ, bol khai la ală cau jak chài dơp dơr.

Be sèng Sră Goh neh tơng kah:

“Ơ oh mi, sền sơwì tĕ bơta hòi sac oh mi dê, ò gơs oă cau tòm oh mi la jak chài jat sơnoa rnoas kòn mơnus dê, ò gơs oă cau gơs gơnoar pràn, ò gơs oă cau dờng màng.”(I Kôrintô 1:26)

Gen tú tơnớ, dilah oh mi bàn cau lơi găm rơn dap cơnong, jut hiu jum – lơh ală broă ò gơs cau lời sền dơng màng – gen oh mi rgơi tip cau duh broă Yang geh Yang hoi swak.

Gen bơta pơjum ngai hớ – bulah ăn la cau ntao bơto – mơya cau lơh niam nus Yang rlau gơ lơh be cau at kơn peh nàng peh di ngkời.

Dan jà bol he dô nùs bal tòm bơta hòi dan:
Ơ Yang, kon ưn ngai Yang bơh Yang sùm sền bàn kon, tơm jơh ală tú ò gơs cau lơi bàn kon. Ưn ngai Yang neh hoi ja kon, ò do bơh kon jak chài hala kon dơng màng, mơ la bơh Yang kơng kon, mơ Yang neh lời dô bă tiah kon in tơm bơta rơn dap Yang di. Dăn Yang bơto kon in git duh broă Yang, ò di bơh bơta gơklo is kon di, mơ la bơh bơta gơklo Yang di. Dăn Yang dong kon git lơh ală broă bơh dờng tus dệt bơh nus kờn gơboh Yang, nàng kơp broă kon lơh sùm la phăn ơn niam nus Yang di. Kon jơh nus hoi dan tơm Sơnđăn Yang Jesu Krist, A-men

Ơ ală ồng mò oh mi kòñ gơboh, ò gơs tú lơi oh mi rơp ntao nhắ hơ đăng nàng bơto Yăl Jơnau Yang, hala đơs chờ jong rơ Yang di đap Hiu Jum Goh. Oh mi la cau jut hiu jum, rơn dap cơnơng, hala sền rcăng ală kơnom dệt tơm jơ pơjum. Mơ ò di ming la ală broă tơm Hiu Jum Goh, mpôl lam bồ, mơ ya là gơnoar broă kơp ngai gơwet mơ kơp nă bol he, dô nă cau lơh broă hìu, nhân viên, cau dợp phan, cau bơtê, cau tak phan…..bol he lik gơs la ală cau jơh nus tơm jơh ală bơta Yang neh jao. Bulah ò gơs cau lơi bàn hala jong rơ he, mơya yang la Bơtau sùm bàn jơh ală broă dơp dơr oh mi di – ò siau dô pơnah lơi. Dilah oh mi duh broă bơh nus kờn gơboh Yang don song ngan, gen tơm mat Yang, oh mi găm lơh dô nơm broă dơng mang rlau jơh gơwet mơ lơgar yang Tơm Trồ

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.