Nyob rau hauv lub ntiajteb puv npo tej kev kub ntxhov, tej kev sib cav tsis muaj hnub xaus yog yam uas yuav zam tsis dhau, tshwj xeeb yog thaum hais txog kev ntseeg lossis qhov tseeb. Tiamsis kuj yuav txog lub sijhawm uas peb yuav tsis daig twj ywm rau ib qhov kev sib cav twg ntxiv, tiamsis yuav tau mus rau qhov xaus meej meej tias: Vajtswv yog tus tseeb, yog tib tug uas peb yuav pehawm thiab ua Nws haujlwm. Nyob rau lub ntiajteb puv npo tej kev xav sib txawv, peb yuav tau sawv los, tsis yog los sib cav kom zoo mloog, tiamsis hais txog qhov tseeb txog Vajtswv. Tus uas ntiajteb ib txwm tsis tau paub Nws dua.

Hnub no, yog hnub 04/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Sharon Norris Elliott dhau ntawm Zaj kawm TXOJ KEV SIB CAV TSIS MUAJ HNUB XAUS

Vajluskub: “Thaum neeg tseem tsis tau paub Vajtswv, Vajtswv tsis suav neeg lub txim. Tiamsis nimno Vajtswv twb qhia rau txhua haivneeg uas nyob thoob plaws hauv lub qab ntuj no hais tias, lawv yuav tsum tso lawv tej kev txhaum tseg.” (Tes Haujlwm 17:30).

Sib cav thiab sib tham yeej ib txwm tsis tau yog qhov phem, ntau zaug nws tseem zoo thiab. Tiamsis kuj yuav tsum muaj lub sijhawm xaus txoj kev sib tham, xaus txoj kev sib cav. Txawm yog nyob hauv tej kev sib cav txog kev kawm, thaum kawg yeej yuav muaj tus yeej tus swb.

Cov tib neeg uas lawv txawj txoj kev sib cav muaj txaus lub peev xwm los hais daws lawv zaj ua li cas kom tus mloog nws yuav tsum hwm. Los ntawm lo lus pib mus txog rau qhov xaus, lawv paub muab qhov tseeb coj los tov sib xyaw ntxaws nrog tej yam uas nyiam mloog kom nqus tau cov mloog los mloog thiab ua rau lawv caum yus txoj kev sib tham.

Nyob hauv Tes Haujlwm tshooj 17, muaj ib ntu hais tias thaum Paulus tab tom nyob rau hauv Athees, yawg chim heev thaum pom lub nroog no puv npo tej mlom. Muaj ib hnub thaum yawg nyob tom khw, muaj ob peb tug tub txawg los nrog yawg sib tham thiab xav mloog saib yawg qhia dabtsi. Qhov no yeej tsis muaj dabtsi yuav xav tsis thoob, vim cov pej xeem Athees, thiab lwm haiv neeg uas nyob hauv lub nroog ntawd, txhua hnub lawv nyiam tuaj sib cav tuaj mloog tej xwm tshiab tshiab (Tes Haujlwm 17:21).

Qhov xwm txheej no yeej txawv tsis deb txoj kev sib cav tim ntsej tim muag rau sawv daws pom. Paulus qhia Txojmoo Zoo txog qhov tseeb zoo heev, muaj tswv yim thiab nqus tau sawv daws los mloog.

Feem qhib thawj xwb yawg twb pib, yog kab yog kev, ua rau kom sawv daws xav mloog:
“Ces Paulus txawm sawv ntsug tabmeeg cov nomtswv thiab qhia lawv hais tias,
“Cov neeg Athees, kuv porn nej muab siab rau teev nej tej mlom heev. Thaum kuv mus ncig saib nej lub nroog thiab mus saib tej chaw uas nej pe mlom, kuv porn muaj lus sau rau ntawm ib lub thaj hais tias, ‘Muab rau tus Vajtswv uas peb tsis paub.’ Tus uas nej pehawm tiamsis nej tsis paub ntawd twb yog tus uas nimno kuv qhia rau nej ntag.” (Tes Haujlwm 17:22-23).

Yawg tau “daws” lawv tus cwjpwm pheej sib cav tsis muaj hnub xaus txog lawv txoj kev xav paub ntawd, los ntawm txoj kev qhia meej meej tias Vajtswv lub npe tib lub xwb thiaj yog tseeb. Thaum uas paub Vajtswv yog tus tsim ib puas tsav yam lawm kuj tsis tas yuav mus nrhiav lossis sib cav ntxiv ua tus dabtsi lawm.
“Tus Vajtswv uas tsim lub ntiajteb thiab ib puas tsav yam uas nyob hauv ntiajteb no, tus ntawd yog tus Tswv uas kav lub ntuj thiab lub ntiajteb. Nws yeej tsis nyob hauv tej tsev uas neeg ua. Vajtswv tsis pluag ib yam dabtsi li, nws yeej tsis kom leejtwg ua ib yam dabtsi rau nws. Rau qhov Vajtswv yog tus uas rau siav rau pa rau neeg thiab pub ib puas tsav yam rau sawvdaws. Vajtswv tsim txhua haivneeg tawm hauv tib tug neeg li roj ntsha los xwb…Yog lawv kub siab lug xav paub Vajtswv, lawv yeej yuav paub nws, rau qhov Vajtswv yeej nyob tsis deb ntawm peb txhua tug” (Tes Haujlwm 17:24-27).

Thaum kawg yawg xaus los ntawm rov qab hais txog tej ntsiab lus tseem ceeb, tiamsis hais meej dua. Tib txhij ntawd, yawg kuj qhia rau lawv paub txog tib neeg qhov teeb meem tiag:

“Thaum neeg tseem tsis tau paub Vajtswv, Vajtswv tsis suav neeg lub txim. Tiamsis nimno Vajtswv twb qhia rau txhua haivneeg uas nyob thoob plaws hauv lub qab ntuj no hais tias, lawv yuav tsum tso lawv tej kev txhaum tseg. Rau qhov Vajtswv twb teem ib hnub cia lawm, hnub ntawd Vajtswv yuav txiav txim rau txhua haivneeg hauv qab ntuj no. Tus uas Vajtswv tsa los ua tus txiav txim, nws yuav txiav txim ncaj ncees. Thiab qhov uas Vajtswv tsa tus ntawd sawv hauv qhov tuag rov qab los, qhov ntawd qhia rau sawvdaws paub hais tias, tus ntawd yog tus uas Vajtswv tsa tiag.” (Tes Haujlwm 17:30-31).

Nyob rau lub ntiajteb niaj hnub nim no, peb lub nra kuj zoo ib yam li Paulus lub tau ua nyob rau hauv lub nroog Athees. Peb yog cov neeg qhia qhov tseeb thiab tiv thaiv txoj kev ntseeg. Yog li, peb kuj muaj lub nra yuav tsum tau hais kom meej meej rau “lub caijnyoog ruam” tamsim, thiab xaus los ntawm tej kev sib cav txog tus Vajtswv tseeb. Cia li xaus los ntawm txoj kev ua neej nrog tej kev coj noj coj ua nyob ib ncig yus. Pib los ntawm tej uas lawv ib txwm swm, tas mam qhia txog tus uas lawv tsis tau paub txog: Vajtswv tua nthuav tawm meej meej nyob rau hauv Tswv Yexus Khetos.

Thov caw nrog kuv peb thov Vajtswv ua ke
Vajtswv tus uas yog Vajtswv muaj hwjchim, tus tau tsim muaj lub ntiajteb no, thiab tsim kuv los. Kuv ua Vajtswv tsaug vim qhov tseeb thiab Vajtswv txoj kev cawm dim tau nthuav tawm meej meej dhau ntawm Tswv Yexus. Hnub no, nyob ntawm ntau txoj kev ntseeg hauv lub ntiajteb no, thov Vajtswv ntxiv lub zog rau kuv thiab ntxiv kev txawj ntse, kom kuv qhia Koj lub npe, Koj tib leeg thiaj yog tus Cawm Seej, yog tus tseeb cia rau tib neeg pehawm Koj… thov pub kom kuv muaj lub siab tawv thiab muaj kev hlub tus neeg txhaum, ua lub neej pub rau txoj kev tshaj tawm Txojmoo Zoo txog hnub uas koj rov qab los. Kuv thov hauv Tswv Yexus Khetos lub npe. Amees.

Cov kwv tij, niaj hnub nim no peb kuj tab tom ua neej nyob rau hauv ib lub nroog “Athees tshiab”, lub ntiajteb uas tib neeg rau siab ntso mus khwv nyiaj, khuab xeeb, sib cav txog txoj kev ntseeg, txog lub ntsiab lus ntawm txoj kev ua neej, txog kev ntseeg, tiamsis lawv ho hnov qab tus Vajtswv uas tsim ib puas tsav yam. Yog ib tug ntseeg Vajtswv, peb yuav nres ntsia tsis tau, tiamsis yuav tau “npaj kom txhij” teb txhua tus tej lus nug txog txoj kev cia siab ntawd” los ntawm lub siab mos muag thiab hwm Vajtswv ib yam li Vajtswv tej lus qhia nyob hauv 1 Petus 3:15. Peb cheem tsum muaj lub siab tawv qhia Vajtswv lub npe, tus uas ntiajteb tsis tau paub, Nws yog tus Vajtswv tseeb. Tej kev sib cav thaum kawg yuav xaus, tiamsis qhov tseeb yuav tau muab qhia tawm mus txog hnub kawg.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.