Nyob rau tiam uas txhua yam cuag li tshwmsim sai heev, ces txoj kev tos cuag li dhau los ua ib qhov nyob deb, thiab tos tsis taus. Peb twb ib txwm swm rau qhov uas muaj txhua yam tamsim. Tiamsis hauv txoj kev nrog tus Tswv mus, yuav muaj tej ntu uas Vajtswv nqua hu kom peb tos. Tsis yog Vajtswv pheej ncua lub homphiaj tseg rau peb, tiamsis muaj ntau zaug, muaj tej yam zoo tsuas tshwm los thaum uas muaj txoj kev ua siab ntev tos thiab ntseeg siab xwb.

Hnub no, yog hnub 05/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Susan Norris dhau ntawm Zaj kawm UA SIAB NTEV TOS NYOB RAU TIAM UAS MAJ NROOS

Vajluskub: “Tus Tswv tos ntev loo yuav foom koob hmoov rau nej; yog li ntawd, nws thiaj los hlub nej. Rau qhov tus Tswv yog Vajtswv tus uas ncaj ncees; cov neeg uas tos nws yuav tau txais koob hmoov” (Yaxayas 30:18).

Koj puas yog ib leej niam leej txiv? Yog tsis yog, tej zaug koj kuj paub cov neeg uas lawv muaj menyuam mos. Kuv yeej tseem nco ntsoov thawj hnub uas kuv zaum hauv chaw kho mob, hnov kws tshuaj hais tias: “Nrog koj zoo siab, koj xeeb tub lawm.” kuv zoo siab heev! Wb ob niam txiv twb tos kom muaj menyuam tau ib lub sijhawm ntev loo, yog li thaum hnov xov li ntawd, hnov zoo siab heev tsis muaj dabtsi yuav piv tau.

Tiamsis, ib ntu kev tshiab tau pib tuaj, yog lub sijhawm tos. Cuaj lub hli ntev heev, hnub twb kuj maj mam suav ntsoov, tsuas tos kom txog hnub tau puag menyuam rau ntawm tes. Hais tiag mas, kuv tsis tau muaj ib zaum twg uas ua tsis tau siab ntev li zaum no. tsuas xav kom txhua yam tshwmsim los sai sai.

Muaj tej nkawm niam txiv lawv npaj yuav puag menyuam los tu thaum lawv tos ntau npaug ntxiv, ntau zaug tseem ntev tshaj, kom txog hnub tau puag menyuam hauv siab. Txawm yug thiab mus puag los tu los, tus twg twb yuav muaj ib lub sijhawm tos thiab npaj kom txhij.

Hais tseeb tiag mas, wb ob niam txiv thaum twg twb xam txog qhov uas yuav tau ua ntau txoj haujlwm los txais tos wb tus menyuam. Xws li mus kawm tu menyuam, mus kuaj tom kws tshuaj, npaj chaw pw, npaj tej khoom tseg rau tus menyuam… thiab tseem ceeb tshaj yog npaj siab txais yuav qhov tseeb: Yus lub neej yuav hloov mus rau ib nplooj ntawv tshiab.

Vajtswv txojlus nyob hauv Ntawv Nkauj 27:14 sau tias:
“Cia siab rau tus Tswv! Cia li ntseeg, tsis txhob poob siab. Cia siab rau tus Tswv nkaus xwb”

Lo lus “tos” nyob hauv lub hauv paus lus yog qavah, muaj lub ntsiab tias “tos, cia siab”. Txhais tias, txoj kev cia siab tos ntawd nws muaj kev cia siab nyob hauv.
Thoob plaws Vajluskub, Vajtswv coj ntau tus los nyob rau ib lub sijhawm kom yuav tau tos ua ntej uas lawv yuav txais tau yam Vajtswv cog lus yuav pub rau lawv. Anplahas yuav tau tos ntau xyoo thiaj pom Ixaj tau yug los (Chivkeeb 15:5-21:3).

Yakhauj tos 14 xyoos thiaj tau yuav Laxees (Chivkeeb 29:18-27). Cov neeg Yixalayees yuav tau tos ntau xyoo thiaj tau tso dim tebchaws Iziv (Khiavdim 10:7). Cov thwjtim yuav tau tos peb hnub thiaj ntsia pom Vajtswv sawv rov qab los (Yauhas 19:30-20:20).

Tshuav niaj hnub nim no, peb tab tom ua neej nyob rau hauv ib txoj kev coj noj coj ua uas nws yuam kom peb yuav tau txhawm kom tau tamsim. Noj haus yuav tau noj tej khoom uas tau noj sai, sib tham los tham tamsim, koob thaij duab los thaij kom tau tamsim, thiab xov tooj los yuav tau nkag kom tau fuab cua tsis muaj dabtsi khwv. Muab ua lwm lo lus hais, peb yog tiam uas zoo li lub “lò vi sóng” – vim ib txwm swm tej kev ua neej sai sai tamsim. Tshuav, tej haujlwm Vajtswv ua ho zoo li “ib lub laujkaub tsaws”. Vajtswv tsis maj. Nws paub thaum twg yog sijhawm thiab yog tus xibhwb zoo los qhia kom peb loj hlob.

Vajtswv paub tias nyob rau lub sijhawm tos ntawd, peb tau cob kom dhau los loj hlob dua hauv txojkev coj, paub saib taus yam yus muaj, kom ntsia pom txhua txoj haujlwm rau qhov tob thiab ntxiv kev txawj ntse rau.

Vajtswv txojlus sau nyob hauv I Petus 5:10:
“Tiamsis thaum nej raug kev tsimtxom ib nyuag ntu dhau lawm, tom qab ntawd Vajtswv tus uas muaj koob hmoov nplua mias yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv. Nws yuav txhawb nej lub zog kom nej nyob ruaj nrees. Nws yog tus uas muaj lub siab hlub nej kawg nkaus li. Nws yuav pub nws lub tshwjchim ci ntsa iab uas nyob mus ibtxhis rau nej cov uas twb nrog Yexus Khetos koom ib txojsia lawm”

Vajtswv paub zoo yam muaj nqis ntawm txoj kev tos. Thiab yog peb ua zoo tig rov qab mus saib, peb yuav tau pom tias yam Vajtswv ua yuav ua rau kom peb ua lub neej tsimnyog rau peb lub sijhawm uas peb tos.

Hnub no, koj tab tom tos dabtsi? Pauv qhov uas kub siab lug lossis taij thov Vajtswv kom “sai sai” sim qhib siab txais yuav lub sijhawm tos ntawd saib. Cia li thov Vajtswv nthuav tawm tej yam yus cheem tsum kawm, cheem tsum hloov pauv, cheem tsum tau npaj, kom thaum yam Vajtswv cog lus tshwm tuaj, koj yuav zoo siab txais yuav.

Thiab yog yam koj cheem tsum los ntawm Leej Txiv los, ces koj ntseeg tau tias: qhov ntawd nws tsimnyog rau txhua lub sijhawm uas koj tau ua siab ntev tos.

Thov caw nrog kuv peb thov Vajtswv ua ke
Tus Tswv, nyob rau lub ntiajteb no thaum twg twb maj nroos, thov qhia kom kuv paub ua siab ntev tos thiab ntseeg siab rau Vajtswv. Txawm yog kuv tsis tau pom yam dabtsi tshwmsim tuaj los, thov ntuas kom kuv nco ntsoov txog Vajtswv txhais tes ncaj ncees tab tom tos peb. Thov siv lub sijhawm tos ntawd los npaj kuv lub siab, cob qhia kuv, thiab ua rau kom kuv dhau los zoo li koj. Kuv ntseeg tias yam zoo uas koj pub yuav yog lub sijhawm, thiab tsimnyog rau kuv txoj kev tos. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug koj tab tom daig rau lub sijhawm tos, hnov cuag li ntev heev. Thiab nyhav heev thiab koj yeej tseem tsis tau pom kev tawm. Tiamsis nco ntsoov tias Vajtswv tsis tau muaj ib zaum twg yuav tsis txuag koj lub sijhawm. Thaum koj tab tom tos, Vajtswv tab tom npaj yam uas zoo tshaj rau koj. Thiab thaum lub sijhawm los txog, koj yuav pom tias: Vajtswv koob hmoov nws tsimnyog rau koj txoj kev tos. Tsis muaj ib lub sijhawm twg uas yuav tsis muaj nqis rau koj, yog koj tag siab ntseeg, ua siab ntev thiab muab txhua yam fij rau Vajtswv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.