Tus Tswv rooj mov – yog ib txoj kevcai tseem ceeb thiab swm heev rau txhua tus ntseeg Vajtswv. Tiamsis twb yog tej uas ib txwm swm ntawd, ntau zaug peb ho ua poob lub ntsiab tiag ntawm tus Tswv rooj mov. Peb tab tom nkag siab li cas txog lub ncuav thiab lub khob? Thaum peb cev tes mus txais lub ncuav thiab lub khob, koj lub siab tab tom tig mus rau yam twg? Thiab txhua zaug uas koom tus Tswv rooj mov, peb puas tau tshoov siab kom hloov pauv yus lub neej?

Hnub no, yog hnub 06/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Daphne Delay dhau ntawm Zaj kawm TXOJ KEV NCO TXOG UAS MUAJ NQIS TSHAJ

Vajluskub: “Rau qhov txhua zaus uas nej noj lub ncuav no thiab haus lub khob no, yog nej qhia tus Tswv txojkev tuag mus txog hnub uas tus Tswv rov qab los (I Kauleethaus 11:26)

Hnub no, nyob rau lub sijhawm xav txog Vajtswv tej lus, kuv pib ntsib lo lus “nco txog”. Thaum mus tshawb nrhiav phau txhais Vajluskub, kuv xav tsis thoob thaum uas nyeem feem txhais ntsiab txog lo lus no. Nyob rau hauv phau ntawv sau tias: “Nco txog vim tus neeg uas muaj ntsis hnov qab Vajtswv.” Kuv tau nres los xav txog tej no thiab maj mam nkag siab. Kuj zoo ib yam li tej hnub nco txog uas peb muaj niaj hnub nim no thiab txoj kev nco txog nyob hauv Vajluskub tau tsim muaj los pab kom tib neeg tsis hnov qab tej yam uas Vajtswv ua rau yus.

Kevcai Hla Dhau yog ntuas kom cov neeg Yixalayees lawv nco txog qhov vij sub vij sw thaum kawg tau muab tso los raug rau cov neeg Iziv. Qhov kev vij sub no tau ua rau cov neeg Iziv thawj tug tub hlob tuag lawm, vim lawv tsis pleev ntshav rau ntawm lawv tus tab qhov rooj. Tiamsis, txoj kev nco txog hnub ua Kevcai Hla Dhau tsis yog nco txog txoj kev ploj kev tuag, tiamsis yog hais txog txojsia thiab lub siab hlub tshua. Vajtswv pub rau cov neeg Yixalayees muaj txojsia thaum uas kev tuag tab tom vij puas ncig. Vajtswv nthuav tawm Vajtswv lub siab hlub tshua rau cov neeg uas ntseeg thiab mloog Vajtswv lus. (Khiavdim 12:14).

Dhau ntawm Kevcai Hla Dhau, Vajluskub tseem sau txog ntau lub koob tsheej nco txog tau tsim muaj. Pivtxwv, Vajtswv qhia rau cov pejxeem kom lawv nco txog tej Manas uas Vajtswv pub rau lawv thaum lawv noj nyob tom moj sab qhua (Khiavdim 16:23).

Thaum Vajtswv qhia kom Mauxes ua lub tsho efaus rau cov pov thawj hlob, Vajtswv kuj qhia kom yawg yuav tau txaug cov Yixalayees tej npe rau saum ob lub qe hlaws ntawd, kom Aloos muab coj ntawm nws xub pwg zoo li ib txoj kev nco txog ntawm Vajtswv xub ntiag (Khiavdim 28:12).

Ib yam li ntawd, Yausuas yog Vajtswv haiv neeg coj lawv mus rau tebchaws cog lus tseg, kuj teem muaj lub caij ua kev nco txog Vajtswv. Nyob rau ntawm Xikhas yawg thiaj muaj ib txoj kev cog lus nrog Vajtswv ua ke, muab kevcai rau lawv. Tas yawg muab ib lub pob zeb los txhos rau qhov ntawd, los ua kev nco txog Vajtswv tej lus: “Yausuas hais rau lawv hais tias, “Lub pobzeb no yuav ua timkhawv rau peb. Lub pobzeb no hnov txhua lo Ius uas tus Tswv hais rau peb, nws yuav ua timkhawv tawmtsam nej, kom nej tsis txhob ntxeev siab rau nej tus Vajtswv.” (Yausuas 24:27).

Tiamsis nyob rau hauv tag nrho txhua lub koob tsheej tau tsim muaj, muaj ib lub koob tsheej zoo tshaj txhua yam yog, kevcai nco txog tus Tswv rooj mov. Lukas sau li no:

“Thaum lub sijhawm noj mov lawm, Yexus thiab Yexus cov timthawj los zaum ntawm rooj mov. Yexus hais rau lawv hais tias, “Kuv xav nrog nej noj pluas mov ua Kevcai Hla Dhau no, ua ntej uas kuv raug tsimtxom! Kuv qhia rau nej hais tias, txij no mus kuv yuav tsis noj li no mus txog hnub uas pluas mov ua Kevcai Hla Dhau tiav nyob hauv Vajtswv lub Tebchaws.”Yexus muab khob cawv txiv hmab los ua Vajtswv tsaug, thiab hais tias, “Nej cia li txais lub khob no mus haus. Kuv qhia rau nej hais tias, txij no mus kuv yuav tsis haus cov cawv txiv hmab no mus txog hnub uas Vajtswv lub Tebchaws los.”Yexus muab ib lub ncuav los ua Vajtswv tsaug, nws muab ntais faib rau lawv, thiab hais tias, “Ntawm no yog kuv lub cev uas kuv muab pub rau nej. Nej ua li no, nej thiaj yuav nco ntsoov kuv.” Thaum lawv noj mov tas, Yexus muab ib khob cawv txiv hmab los ua ib yam nkaus li ntawd, nws hais tias, “Lub khob no yog Vajtswv Txojlus cog tseg tshiab uas muaj kuv cov ntshav ntws los ua lub homthawj nias rau lawm (Lukas 22:14-20).

Txawm yog thaum ntawv cov thwjtim lawv tsis tau nkag siab txog tag nrho tej uas Tswv Yexus tab tom ua los, tus Tswv rooj mov dhau los ua ib lub koob tsheej nco txog Tswv Yexus tej lus samhwm tseg:

Paulus rov qab ntuas cov ntseeg nyob hauv Kauleethaus kom nco txog qhov kevcai tseem ceeb no nyob hauv thawj tsab ntawv xa rau lawv thiab qhia rau lawv tuav rawv koom tus Tswv rooj mov zoo li ib lo lus ntuas lawv nco txog Vajtswv txoj kev hlub tshua txog lawv. Paulus sau: “Tej lus uas kuv twb qhia rau nej lawm yeej yog tus Tswv tej lus: Hmo uas luag ntxeev siab rau tus Tswv Yexus, nws muab ib lub ncuav los, nws ua Vajtswv tsaug, nws muab lub ncuav ntawd ntais thiab nws hais tias, “Lub ncuav no yog kuv lub cev uas kuv muab rau nej. Nej ua li no nej thiaj yuav nco ntsoov kuv.” Thaum noj hmo tas nws muab ib lub khob los ua ib yam nkaus li ntawd, thiab nws hais tias, “Lub khob no yog Vajtswv tej Ius cog tseg tshiab uas muaj kuv cov ntshav ua lub cim nias rau. Thaum nej haus lub khob no, nej thiaj yuav nco ntsoov kuv (I Kauleethaus 11:23-25).

Dhau ntawm Vaj Ntsujplig, Paulus qhia rau cov ntseeg paub txog yam tseem ceeb ntawm txoj kev nco xog Tswv Yexus thiab Nws txoj kev tuag.

Txhua zaug uas ua kevcai nco txog, yuav muaj ib yam dabtsi twg tau tsim los kom ntuas cov ntseeg nco txog tej xwm txheej uas tseem ceeb. Nyob hauv txoj kevcai nco txog Tswv Yexus rooj mov, lub ncuav thiab lub khob yeej tsis muaj lub hwjchim dabtsi raws li tej uas qhov muag pom. Tiamsis, vim sawv cev rau Tswv Yexus lub cev thiab cov ntshav, yog li ncuav thiab lub khob thiaj muaj nqis tseem ceeb rau peb txhua tus ntseeg. Lub ncuav piv txog txoj kev kho zoo lub cev sab nraud. Tswv Yexus hais tias: “nws raug nplawm twb yog kho kom peb tej kev mob kev nkeeg zoo (Yaxayas 53:5).

Ib yam li ntawd, lub khob piv txog rau Vajtswv txoj kev zam txim rau tus neeg sab hauv. “Ib yam li ntawd, tom qab noj hmo tas, Tswv Yexus muab lub khob los thiab hais tias: “Lub khob no yog kuv tej lus cog tseg tshiab.”

Thaum uas mus kawm txog tej lub koob tsheej ua kev nco txog kom tau cawm lossis Vajtswv tau pab lawv, peb pom tias yeej tsis muaj lub sijhawm teem tseg meej meej rau tej lub sijhawm zoo li no. Tej kev nco txog ntawd puav leej muaj nws kevcai txawv. Piv txwv, Kevcai Hla Dhau tau npaj ib xyoos ib zaug, tshuav nco txog Vajtswv tej lus tsuas yog ib lub pob zeb tau muab tso ntawm qab tsob ntoo loj xwb, kom txhua tus mus dhau kuj yuav ntsia pom, dhau los ua ib lo lus ntuas rau xyoo ntawd tsis yog tsuas yog ib hnub xwb. Ib yam li ntawd, Tus Tswv rooj mov kuj muaj sijhawm teem tseg. Paulus sau: “Rau qhov txhua zaus uas nej noj lub ncuav no thiab haus lub khob no, yog nej qhia tus Tswv txojkev tuag mus txog hnub uas tus Tswv rov qab los (I Kauleethaus 11:26).

Lo lus yuav tau ceev faj ntawm no yog “txhua zaug”. Muab ua lwm txoj kev hais, Paulus tsis hais txog lub sijhawm meej meej rau ib hnub, ib xyoo, ib hli lossis ib thiv twg yuav tsum tau ua. Paulus xav hais tias thaum twg nej noj lub ncuav thiab haus lub khob ces nco ntsoov nws muaj “ib lub homphiaj”. Tus Tswv rooj mov tsis yog tsuas yog txoj kevcai uas Pawg Ntseeg ua, tiamsis Paulus tseem tshoov txhua tus ntseeg yuav tau “qhia Tswv Yexus txoj kev tuag mus txog hnub Nws rov qab los” – ntawm no thiaj yog lub homphiaj ntawm koom tus Tswv rooj mov.

Tswv Yexus twb ceeb toom peb txog qhov uas cia tej kab lig kevcai ua poob Vajtswv lub hwjchim thiab Vajtswv tejlus. Ib qhov piv txwv meej meej tau sau cia nyob hauv Malakaus tshooj 7. Cov neeg Falixais txiav txim rau cov thwjtim thaum lawv tsis tau ntxuav tes twb noj mov lawm. “Raws li cov Falixais thiab cov Yudais cov yawgkoob tau qhia rau lawv lawm, yog lawv tsis tau ntxuav tes, lawv yeej tsis noj mov (nqe 3). Tswv Yexus hais meej meej rau lawv: “Nej ua li ntawd twb yog nej ua saib tsis taus Vajtswv Txojlus, rau qhov nej qhia raws li nej cov yawgkoob qhia rau nej xwb. Thiab nej tseem ua ntau yam zoo li no.” (nqe 13).

Muaj ntau zaug peb kuj tau ua ib yam li ntawd rau tus Tswv rooj mov. Pauv qhov uas paub txog lub homphiaj ntawm tus Tswv rooj mov no, peb tsuas lam mus koom zoo li ib txoj kevcai tau ua mus ua los. Yog li nyob hauv Paulus lub siab, txhua zaug uas tuav lub ncuav thiab lub khob, peb yuav tau nug peb tus kheej tias: “Vim li cas kuv thiaj noj lub ncuav thiab haus lub khob no?” tsis yog tsuas yog lub ncuav piv txog Tswv Yexus lub cev, lub khob piv txog Tswv Yexus cov ntshav xwb, tiamsis tseem yog nco txog vim li cas lub ncuav thiab lub kho ntawd ho tau muab pub. Ncuav thiab khob puav leej ntuas kom peb nco txog txojsia uas peb tab tom muaj nyob hauv Tswv Yexus.

Nyob ntawm Vajtswv cov menyuam, Tus Tswv rooj mov yog lub sijhawm muaj nqis. Vim dhau ntawd, peb tsis yog tsuas nco txog Tswv Yexus txoj kev tuag thiab sawv hauv qhov tuag rov qab los xwb, tiamsis tseem yog lub sijhawm rau peb lees txim thiab ntsib peb tus kheej tiag tiag, kom peb ua lub neej tshiab mus ntxiv nyob hauv tus neeg uas twb hloov pauv lawm.

Thov caw nrog kuv peb thov Vajtswv ua ke
Leej Txiv, kuv ua Koj tsaug rau Koj txoj kev hlub, kev tshua thiab Koj txoj kev cawm kuv dim. Koj tsis xav kom kuv hnov qab, tiamsis xav ntuas kom kuv nco ntsoov tej kev nco txog ntawd, kom kuv lub siab yuav nco ntsoov Koj tshav ntuj. Tus Tswv, txhua zaug uas kuv los koom Koj rooj mov, thov pub kom kuv tsis suav tias yog ib txoj kev cai sab nraud, tiamsis yog lub sijhawm zoo rau kuv tshuaj kuv tus kheej, lees txim ntawm koj xub ntiag, qhia Koj txoj kev tuag rau sawv daws ib yam li Vajtswv tej lus qhia. Kuv thov hauv Tswv Yexus Khetos lub npe. Amees.

Cov kwv tij txhua tus, hnub no peb muaj ntau tus yuav npaj koom tus Tswv rooj mov. Thaum paub tias Tswv Yexus yog tus tsim muaj kom peb nco txog Nws txoj kev txomnyem, koj puas saib taus lub sijhawm uas yus tseem muaj caij tau koom tus Tswv rooj mov? Ntau xyoo nrog tus Tswv mus, tej zaug peb twb muaj ntau zaug ua txhaum rau Vajtswv lub cev thiab cov ntshav. Tsis yog tsuas yog tsis quav ntsej xwb, tiamsis tseem yog vim peb ntsiag to ntawm lub ntsiab lus ntawm tus ntoo khaub lig, tsis kam qhia Txojmoo Zoo rau lwm tus. Hnub no, cia li los cuag Vajtswv los ntawm lub siab lees txim, lees yus txoj kev qaug zog. tas, ua Vajtswv tsaug thiab pib xyaum ua tim khawv txog Vajtswv, tej zaug yuav yog ib tug phooj ywg cia li ntsib, ib tug txheeb ze uas koj txaj muag tsis kam qhia, lossis tej txheeb ze hauv tsev neeg xws li, phauj, niam ntxawm, txiv ntxawm…

Nco ntsoov tias: Yog twb koom tus Tswv rooj mov los ntawm lub siab ncaj ncees, ces peb yuav tsis ua lub neej qub thiab tsis muaj kev cog lus nrog Vajtswv. Txhob cia koj lub siab ua tug tsis paub Vajtswv txoj kev hlub, kuj tsis txhob cia txhua zaug uas koom tus Tswv rooj mov dhau los tsis muaj qab hau. Cia tej ntawd yog lub sijhawm rau koj muab fij rau Vajtswv kom muaj kev sib cog lus tshiab nrog Vajtswv: cog lus ua ib lub neej tau hloov pauv, ib lub neej npaj txhij thiab ua tim khawv rau Vajtswv txog hnub Nws rov qab los.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.