Puas muaj zaum twg koj hnov cuag li yus tau mus yuam kev deb heev lawm, txog qhov uas tsis muaj sijhawm tig rov qab? Ib yam li siv zog npaum twg los, koj yeej nrhiav tsis tau kev rov qab, txoj kev tig rov qab los rau ntawm qhov chaw kaj siab, txoj kev los rau qhov chaw kaj siab tiag. Vajluskub piv peb zoo li cov yaj: tsis muaj zog, pheej mus yuam kev, thiab vam khom rau tus tswv yug yaj. Tiamsis Txoj xov zoo nyob ntawm no lawm! muaj ib tug Tswv Yug Yaj loj zoo siab hlo tso ntuj ceebtsheej tseg los nrhiav thiab cawm peb rov qab los tsev.

Hnub no, yog hnub 30/09/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Santiago dhau ntawm Zaj kawm KAJ SIAB LUG HAUV TUS TSWV YUG YAJ LOJ TXHAIS TES.

“Nws yog peb tus Vajtswv; peb yog cov neeg uas nws tsomkwm, peb yog pab yaj uas nws pub zaub rau noj. Hnub no cia li mloog tej lus uas nws hais” (Ntawv Nkauj 95:7)

“Nws kav tagnrho tej hiavtxwv uas nws tsim; thiab nws kav thooj av uas nws txhais tes puab. Cia li los thiab peb khoov ntshis pehawm nws; peb cia li txhos caug ntawm tus Tswv lub xubntiag, nws yog tus uas tsim peb!” (Ntawv Nkauj 95:6-7).

Plaub yaj yog ib hom plaub uas tau siv ntau tshaj nyob hauv ntiajteb. Nws ruaj thiab sov nrog rau zoo rau tej fuab cua tshaj lwm yam plaub. Tib neeg siv plaub yaj los xaws ris tsho, ua pam vov, pam pua, ua cov cuab yeej tiv kub lossis ua rooj zaum. Ua Vajtswv tsaug vim Vajtswv tau tsim tau ib hom yaj muaj nqis li ntawd!
Txawm yog yaj muaj nqis thiab tau ntau tus menyuam yaus nyiam los, yaj kuj yog ib hom tsiaj uas ua neej vam khom lwm tus. Yaj lub qhov muag tsis pom kev zoo, tshwj xeeb thaum hmo ntuj, tej qhov muaj qhov pob khem, lawv tsis tshua kam mus. Lawv ntshai thiab cuag li tsis muaj peev xwm tiv thaiv thaum ntsib cov tsiaj phem muab lawv tom. Yaj txojsia feem ntau nyob ntawm tus yug. Yog tsis muaj tus tswv yug zoo tiv thaiv, yaj yooj yim mus yuam kev… phem dua thiab dhau los ua ib tug tsiaj pub rau cov tsiaj nyaum.

Tus sau Ntawv Nkauj piv Vajtswv cov menyuam zoo li cov yaj. Tus uas muab txoj kev ntseeg pheeb rau ntawm Vajtswv puav leej yuav mus txog hav zaub mos nyoos. Nyob ntawm lawv tau noj tsau npo, tau tiv thaiv los ntawm tus Tsim Ib Puas Tsav Yam. Ua ntej uas yuav yog Vajtswv pab yaj, peb kuj yog cov yaj “uas mus yuam kev”, ntsib ntau qhov kev phomsij nyob hauv lub ntiajteb no (Yaxayas 53:6).

Tiamsis, raws li Tswv Yexus tej lus nyob hauv zaj lus piv txwv txog tus yaj mus yuam kev lawm, Tus Tswv Yug Yaj Loj yeej tsis xyeej qhov uas nws tso nws qhov chaw nyob los nrhiav thiab cawm peb, txiav txim siab tsis “pub kom ib tug twg hauv cov menyuam no raug kev puas tshuaj” (Mathais 18:14). Tseeb tiag, Cawm Seej Tswv Yexus zoo siab hlo vim peb mus txog thaum kawg, ntau zaug “vim pab yaj muab nws txojsia tuag theej” (Yauhas 10:11).

Peb yav dhau los kuj yog cov yaj uas mus yuam kev, tiamsis Tswv Yexus zoo siab tso ntuj ceebtsheej tseg, nkag los rau hauv lub ntiajteb nrhiav ib tug neeg zuj zus. Nws yog tus Tswv Yug Yaj zoo tsis muaj ib zaum twg qaug zog. Nws nrhiav peb, xyab nws txhais tes thiab coj peb rov qab los tsev. Txawm yog peb qaug zog, ua tsis tau dabtsi, los Vajtswv yeej ntsia pom yam muaj nqis Vajtswv muab tso rau hauv peb txhua tus. Thiab Vajtswv kub siab lug xav pab, coj peb rov qab los rau ntawm thaj zaub koob hmoov ib txhis nyob hauv Nws.

Yog tias hnub no koj pom tias yus tau txav deb hauv Leej Txiv lub tsev ntev heev lawm, nco ntsoov tias tus Tswv Yug Yaj loj yeej tab tom nrhiav koj. Nws tsis tau muaj zaum twg tso koj tseg, nws kuj tsis muaj zaum twg hnov qab koj. Txawm yog koj tab tom nyob qhov twg los, nws yeej tab tom hu koj lub npe los ntawm tag nrho lub siab mos muag. Nws tsis khuv xim Nws txojsia los cawm koj thiab kuv.
Teb Vajtswv lub suab hu ntawd. Cia Nws puag koj rau hauv Nws txhais tes, kho zoo koj tej qhov txhab thiab coj koj rov qab los rau qhov chaw tso siab. Ntawd thiaj yog thaj chaw muaj zaub mos nyoos thiab qhov dej tso siab hauv Nws, qhov chaw tsis muaj kev txhawj ntshai, tsuas yog kev kaj siab nplua mias thiab kev hlub mus ib txhis xwb.

Thov caw nrog kuv peb thov Vajtswv ua ke: Tus Tswv muaj kev hlub! Kuv ua Koj tsaug vim Koj niaj hnub hlub kuv, txog qhov uas pub koj tib leeg tub yog tus Tswv Yug Yaj Loj los nrhiav thiab cawm kuv. Kuv ua Leej Txiv tsaug vim Koj nrhiav, tos, thiab xyab tes txais tos kuv rov qab los rau ntawm thaj zaub nplua mias kev hlub thiab pub kuv muaj txojsia ib txhis. Thov kom cov yaj uas tab tom mus yuam kev sab tod yuav hnov Leej Txiv lub suab thiab tig rov qab los rau ntawm Vajtswv txhais tes. Kuv thov hauv Tswv Yexus Khetos lub npe. Amees.

Cov kwv tij txhua tus, txawm yog koj twb mus yuam kev deb npaum cas los, Vajtswv yeej tab tom saib ntsoov Koj, xyab tes, luag ntxhi thiab hu koj yog “Vajtswv cov yaj” Cia li tig rov qab los cuag Vajtswv, vim ntawm Vajtswv muaj tag nrho txhua yam uas koj tab tom nrhiav: kev kaj siab, tau kho zoo- thiab tshaj txhua yam, qhov chaw ntawd, muaj ib txoj kev hlub uas tsis muaj hnub hloov pauv. Hnub no, koj puas zoo siab hlo hnov Vajtswv lub suab hu thiab khiav rov qab los rau ntawm Vajtswv txhais tes?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.