Tus ntseeg Tswv Yexus tau hu los ua ib lub neej txo hwjchim thiab ua haujlwm rau lwm tus, tshwj xeeb yog cov neeg uas tsis muaj zog. Thaum ntawd, lub ntiajteb niaj hnub nim no puv npo txoj kev pe hwjchim thiab meej mom ntawm tus kheej. Kuv yooj yim raug cab mus rau hauv txoj kev ua neej uas tsuas xav txog tus kheej, pauv qhov uas tshua thiab rub lwm tus. Nyob hauv lub ntiajteb zoo li ntawd, Vajtswv xav kom peb muaj lub siab zoo li cas?

Hnub no, yog hnub 4/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Paul J. Palma dhau ntawm Zaj kawm TUS TUB QHE NPLOOJ SIAB

“Kuv  qhia tseeb rau nej hais tias, thaum uas nej tau pab kuv cov kwvtij no ib tug, txawm yog tus ntawd muaj hwjchim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag”  (Mathais 25:40).

Puas muaj zaum twg koj tau tshoov siab kom nthuav tawm lub siab hlub tshua rau ib tug neeg uas tab tom tshaib nqhis, txomnyem muaj mob, raug cais tawm, lossis raug kaw lawm tau? Ob peb xyoos dhau los, kuv mus rau hauv ib lub tsev rau txim ntsib ib tug phooj ywg thaum me tab tom raug kaw. Kuv tus phooj ywg tsis nkag siab tias vim li cas ib tug neeg uas nws twb tsis nrog sib tham ntau xyoo dhau los ho tuaj saib nws hauv tsev rau txim. Nws lees tias nws muaj txim thiab paub tias vim li cas nws ho poob rau lub sijhawm zoo li no. Thaum nco txog lub sijhawm ntawd, kuv ntseeg tias Vajtswv tso rau hauv kuv lub siab ntawm ib tug tub qhe, kom kuv mus cuag tus phooj ywg no. Txoj kev mus saib ntawd rov qab txuas wb kev phooj ywg thiab qhib lub sijhawm rau kuv ua tim khawv txog Vajtswv rau Nws.

Tswv Yexus qhia pom lub siab hlub tshua thiab lub siab ua Vajtswv haujlwm yog lub cim qhia meej meej ntawm ib tug ntseeg Vajtswv lub neej. Ua ntej raug ntsia saum Ntoo Khaub Lig, Tswv Yexus twb nrog cov thwjtim zaum ua ke thiab qhia rau lawv paub txog hnub Nws yuav rov qab los. Nws hais tias: “Thaum ntawd Vajntxwv yuav hais rau cov neeg uas nyob ntawm nws sab xis hais tias, ‘Nej cov uas tau kuv Txiv txoj koob hmoov, nej cia li los kav lub tebchaws uas twb npaj rau nej thaum tsim lub ntiajteb los lawm. Thaum kuv tshaib plab, nej pub mov rau kuv noj, thaum kuv nqhis dej; nej pub dej rau kuv haus; thaum kuv tuaj ua qhua, nej hu kuv los hauv nej tsev. Thaum kuv tsis muaj ris tsho hnav; nej muab rau kuv hnav Thaum kuv muaj mob, nej tuaj tu kuv. Thaum kuv raug kaw rau hauv tsev lojcuj, nej tuaj saib kuv” (Mathais 25:34-36).

Ntiajteb suav tias tus tub qhe yog hom neeg poob qis, tiamsis Tswv Yexus ho qhia txawv. Nws hais tias tus neeg muaj lub siab zoo li tus tub qhe yog cov neeg uas yuav txais tau ntuj ceebtsheej. Nws tshua txog qhov uas peb yuav ua pub rau “cov neeg me” li cas. Tus twg pub rau tus ntshaib plab no, rau tus nqhis dej haus, txais qhua, muab tsho rau tus liab qab hnav, saib xyuas tus tsis muaj zog thiab saib tus raug kaw yog tab tom ua Vajtswv haujlwm ntag: “Kuv qhia tseeb rau nej hais tias, thaum uas nej tau pab kuv cov kwvtij no ib tug, txawm yog tus ntawd muaj hwjchim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag” (Mathais 25:40).

Tib neeg nyiam pub zaub mov rau noj, dej rau haus, chaw rau nyob, ris tsho rau hnav, lossis nrhiav kev tu thiab ua phooj ywg nrog cov neeg muaj hwjchim dua kom lawv txais tau ib yam dabtsi twg. Tiamsis Tswv Yexus qhuas cov neeg uas zoo siab hlo muaj lub siab ua haujlwm pab tus neeg me thiab txomnyem tshaj ntawd.
Tswv Yexus tau ua lub neej ntawm ib tug tub qhe txo hwjchim. Txawm yog Vajntxwv ntawm txhua tus vajntxwv, los Nws tes haujlwm tsis raug ntaus nqi los ntawm txoj kev qhuas lossis lwm tus ua haujlwm rau Nws, tiamsis dhau ntawm txoj haujlwm Nws nyho hau thiab txais yuav lawv tej kev cheem tsum uas nyob tob tob: “lb yam li ntawd Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (Mathais 20:28). Tswv Yexus twb muag ntag nrho rau peb, tseem tuag saum tus ntoo khaub lig thiab Vajtswv coj Nws mus rau ntawm qhov chaw siab thiab pub lub npe ntawm txhua lub npe rau Nws (Filipis 2:9-11).

Yog li, txoj kev ua haujlwm uas Vajtswv nyiam yog pib ntawm lub siab muab mus thiab tsis tos kom tau ua pauj rov qab. Ntawd yog thaum peb zoo siab hlo fij lub sijhawm, dag zog, nyiaj txiag los mus pab cov neeg me thiab tsis muaj zog, txawm puas yuav tau pauj rov qab lossis tsis tau.

Thov caw nrog kuv peb thov Vajtswv ua ke: Tus Tswv muaj kev hlub, thov qhia rau kuv paub tshua txog cov neeg uas tab tom ntsib teeb meem, paub txo hwjchim thiab zoo siab hlo muab yam uas yus muaj pub mus los ntawm lub siab dav fo. Thov pab kom kuv tsis xav txog kuv tus kheej xwb, tiamsis pub rau kuv muaj Vajtswv lub qhov muag thiab Vajtswv lub siab kom ntsia pom lwm tus ib ncig tej kev cheem tsum thiab nthuav tawm lub siab hlub tshua rau lawv. Kuv thov hauv Tswv Yexus Khetos lub npe. Amees.

Cov kwv tij txhua tus, lub neej ntseeg Vajtswv tsis yog tsuas nyob hauv lub zej zos muaj kev ntseeg ntawm Pawg Ntseeg uas peb nyob xwb, tiamsis peb yuav tau tawm mus chwv kom txog cov neeg muaj lub neej txomyem thiab lwm hom neeg nyob hauv ntiajteb. Cia li nthuav tawm koj lub siab hlub tshua rau lwm tus los ntawm qhov uas koom tes nrog Pawg Ntseeg, lossis tej kev cob qhia txog lub zej zos uas koj yuav koom tes tau.

Koj kuj muaj cuab kav faib yus pluas noj rau ib tug neeg twg uas muaj kev txomnyem uas koj ntsib ntawm kev, puag lawv, lossis ib lo lus nug moo, thiab ib lo lus thov Vajtswv. Kuj mus saib cov neeg muaj mob, tsis muaj zog ntawm sab nqaij tawv thiab sab ntsujplig. nrhiav lub sijhawm zoo los sib pub, thiab nco ntsoov Tswv Yexus tej lus qhia.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj