Sim rov qab nco txog zaum uas ze tshaj los no koj zaum saum tsheb tos teeb liab, lossis tab tom los nag koj tos tsheb los tsis txawj txog. Tsuas yog ob peb feeb luv luv xwb tej zaum kuj ntev heev tsis muaj chaw xaus. Tos yog ib qhov uas yooj yim ua rau peb txoj kev ua siab ntev yaig ntau tshaj. Thiab puas tau muaj zaum twg koj cim civ nug tias vim li cas Vajtswv ho cia peb tos ntev npaum ntawd? Vim li cas muaj tej lo lus thov Vajtswv ntev heev tseem tsis tau hnov Vajtswv teb, lossis peb tos nrog hnub nrog hmo?

Hnub no, yog hnub 27/10/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jennifer E. Jones dhau ntawm Zaj kawm ZAJ XWM TSEEM TSIS TAU XAUS

“Yog li ntawd kuv thiaj cia siab hais tias, Vajtswv tus uas pib ua haujlwm zoo rau hauv nej lub siab lawm, nws yeej yuav ua kom tes haujlwm ntawd tiav rau hnub uas Yexus Khetos los.” (Filipis 1:6)

Puas tau muaj zaum twg koj tos tej yam zoo dua yuav tshwm nyob hauv yus lub neej lawm tau? Tej zaum koj yeej muaj kev npau suav, cia siab tias muaj ib lub sijhawm twg txhua yam yuav hloov pauv raws li qhov uas koj xav. Txhob txaj muag lees txais. Tej zaum peb twb muaj zaum thov Vajtswv twj ywm zoo li ntawd, cia siab tias Vajtswv yuav teb thiab pub yam uas peb lub siab ntshaw rau peb.
Koj twb thov Vajtswv, twb tos, tej zaum kuj ua kevcai yoo mov. Tiamsis yam dabtsi tau tshwmsim tuaj. Tiamsis kuv yuav hais li no: Yog koj zaj xwm yeej tseem tsis tau xaus, ces tej zaum yeej tshuav tej yam uas nyob tom ntej uas koj tsis tau ntsia pom.

Cia kuv txhais ntxiv. Nyob hauv Vajluskub muaj ntau qhov xwm txheej tshwmsim sai heev, zoo li tsuas yog ib pliag xwb. Eliyas tau Vajtswv coj mus nrog fuab nrog cua (II Vajntxwv 2:11). Tomqab sawv rov qab los, Tswv Yexus kuj tshwm los rau cov thwjtim (Mathais 28:9). Txawm yog Vajtswv yog tus uas tsim ib puas tsav yam los, Vajtswv kuj ua tiav rau rau hnub (Chivkeeb 2:2).

Txhua yam nws tshwmsim sai heev, tiamsis raws li tej uas kuv pom, Vajtswv muaj ntau lo lus cog tseg tau ua tiav dhau ntawm ib txoj kev tos. Thaum qhib tej nplooj ntawv hauv Vajluskub Qub, kuv pib ntsib zaj xwm no tas txog lwm zaj xwm txog cov tib neeg ua siab ntev tos Vajtswv hais. Xav txog Aplaham lossis Daviv. Nkawd tos xyoo no tas lwm xyoo kom pom Vajtswv tej lus cog tseg tau ua tiav. Ib tug ces tos ib tug menyuam tsis muaj menyuam, tshuav ib tug yuav tau khiav nkaum hauv qab zeb, tsuas thov kom yeebncuab nrhiav tsis pom yus thiab tua tsis tau yus. Nkawd tau ntshai, ua ib ce tshee nyho, tiamsis nkawd yeej tsis tso kev ntseeg tseg.

Cia li xav txog Tswv Yexus txoj kev los yug ua neeg. Tus Mexiyas qhov kev tshwm los twb tau qhia paub ua ntej lawm. Ntau tus muaj kev ntseeg tau tag sim neej tiamsis yeej tseem tsis tau pom tej lus cog tseg rau lawv dhau los muaj tseeb.
Niaj hnub no, peb paub tias Yexus Khetos los lawm tiag. Tiamsis yog tias nug cov cev lus zoo li tus cev lus Yaxayas tias thaum ntawv tos ntev npaum cas, kuv xam tias tej zaum yawg kuj hais tias: “Yuav tau tos, ntev heev Yexus Khetos thiaj los.”
Vajtswv coj zaj xwm txog peb tus kheej dhau ntawm tej txua kev ntev, tsis yog tsuas xaus kiag tom qab ob peb feeb zoo li ib zaj movies luv. Vajtswv lub homphiaj yuam kom yuav tau tseg sijhawm ntau mam ua tiav. Nws tsis maj nroos xaus peb zaj xwm hauv peb lub neej los ntawm ib ob teev maj nroos. Nws tseg sijhawm rau peb tsim, cob qhia ib tug zuj zus dhau ntawm txhua txua kev maj mam qhib, txog rau thaum zaj xwm tiav mus raws li Vajtswv lub siab nyiam.

Tamsim no, kuv kuj tab tom sau ib zaj xwm, thiab kuv hais tias ntawm no yog ib txoj haujlwm cheem tsum sijhawm. Kuv yuav tau tsim lub caijnyoog rau zaj xwm, tsim muaj tej qhov pob daws, tas cia cov neeg ntawd lawv ntsib dhau txhua qhov xwm ua ntej uas yuav coj lawv mus rau qhov xaus uas kuv twb xav txog thaum pib. Muaj tej lub sijhawm kuv kuj qaug zog vim txhua yam nws tshwmsim qeeb heev, tiamsis kuv rov qab pib, vim nco ntsoov tias Vajtswv kuj yog tus tswv ntawm kuv zaj xwm hauv kuv lub neej. Nws sau kuv zaj xwm, thiab nws kuj tab tom sau koj zaj xwm. Tej zaum lub sijhawm no koj hnov txhua yam nws ntev, tiamsis ntseeg tias thaum zaj xwm ntawd mus rau qhov xaus, koj yuav pom tias tej uas koj tos yeej tsis yog tsis muaj nqis.

Thov caw nrog kuv peb thov Vajtswv ua ke: Tswv Yexus kuv ua Koj tsaug vim Koj yog tus Tswv hauv kuv lub neej. Muaj tej lub sijhawm kuv qaug zog vim yuav tau tos, thaum tej lus thov cuag li yeej tseem tsis tau xaus. Thov zam txim rau kuv vim muaj tej lub sijhawm kuv ua xyem xyav, tsis ua siab ntev thiab xav cim civ txiav txim txhua yam pauv qhov uas tso siab rau Vajtswv. Thov pub rau kuv muaj kev ntseeg mus ntxiv, txawm yog nyob rau lub sijhawm uas kuv tsis tau nkag siab yam uas Vajtswv tab tom ua. Thov pab kom kuv nco ntsoov tias Vajtswv tab tom ua haujlwm, yeej tseem ncaj ncees thiab tsis muaj ib yam dabtsi tshwmsim hauv kuv lub neej nyob sab nraum Vajtswv txoj kev tswjhwm. Thov pab kom kuv paub muab kuv lub neej tso rau Vajtswv txhais tes thiab ruaj siab tos Vajtswv lub siab nyiam rau kuv lub neej. Kuv thov hauv Tswv Yexus Khetos lub npe, Amees.

Cov kwv tij txhua tus, ib phau ntawv nws yuav poob ib qhov zoo yog tias ntawm tshooj pib, peb twb paub txhua yam yuav tshwmsim rau feem xaus. Peb lub neej kuj ib yam li ntawd. Muaj tej lub sijhawm Vajtswv cia peb mus dhau ib txua kev ntev, muaj tej txua sijhawm ntsiag to zoo li tsis muaj dabtsi hloov pauv, ua nttej yuav nthuav tawm rau peb nkag siab yam zoo uas Vajtswv tab tom ua. Yog li, yog tias hnub no koj tab tom thov Vajtswv rau yam dabtsi uas Vajtswv tsis tau teb, thov txhob maj tas kev cia siab lossis tso kev ntseeg. Ntseeg siab rau Vajtswv ntxiv thiab muab koj lub neej txhua nub fij rau Nws. Vim zaj xwm yeej tsis tau xaus, thiab tus uas tuav peb txhua tug lub neej rau tej tshooj txuas ntxiv ,nws yeej tseem ncaj ncees.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.

bình luận

Trở thành người đầu tiên bình luận cho bài viết này