Lu bơ̆n đei ‘măn minh puăt chăl arih bơ̆n wă gô minh “jơ năr trŏ hloh ”: chang gô đei jên păng mŭk tơmam rơkah rơkai ‘mơ̆i, na bơ̆n pơyơ̆r kơ Kră Yang, kơplah bơ̆n arih đei mŭk tơmam lơ ‘mơ̆i na pơ̆n pơjao akâu bơ̆n, chu kiơ̆ nơ̆r Kră Yang krao bơ̆jang tơdrong Sư. Mă-lei ih đei layơ tơchĕng khan, Kră Yang tam mă đei layơ chang gô lu bơ̆n jing bơngai “’lơ̆ng trŏ tôm” ‘mơ̆i? Gô thoi yơ tơdah tơdrong Kră Yang wă yua ưh kơ tơmam rơkah đơ̆ng bơ̆n, kơplah bơ̆n đei tôm mah, mă đơ̆ng tơmam tŏ sĕt đĕch kơplah bơ̆n oei kơ’bah?

Năr ‘nâu, năr 28/10/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Eddie Jones kơ̆l ‘bai JÊN KĂK YĂ ADRO

“Kơlih kơ lu bôl nai pơyơ̆r tơmam rơkah sư đĕch; yă adro âu dơnuh tơpă mă-lei sư pơyơ̆r đĭ hloi jên sa sư.” (Markôs 12:44)

“Yêsu oei jê̆ kơthŭng tah jên pơyơ̆r lăm hnam akŭm ‘Bok Kei-Dei tơm. Sư lăng đe tah jên lăm noh. Đei lơ bơngai mơdrŏng tah jên lơ. Đei minh ‘nu yă adro dơnuh năm tơ noh tah lăp ‘bar hlak jên ngang. Na Yêsu krao lu bơngai pơhrăm păng Sư khan: ‘Inh khan kơ iĕm tơpă, yă adro dơnuh âu tah lơ hloh kơ đĭ-đăng lu bôl nai, kơlih kơ lu bôl nai pơyơ̆r tơmam rơkah sư đĕch; yă adro âu dơnuh tơpă mă-lei sư pơyơ̆r đĭ hloi jên sa sư.’” (Markôs 12:41-44)

Sơ̆p Hla Bơar Nơ̆r ‘Bok Kei-Dei lơ wơ̆t đei tơbăt ăn kơ lu bơ̆n băt tơdrong Kră Yang lăng, phara kơ trong kon bơngai juăt kơ lăng păng sek tơlang. Lăm tơdrong pơtih gia gah lu bơngai jang lăm mir hơmu, lu bơngai mă truh jang đơ̆ng rŏng kư̆m oei đei tơmam apah rơkah đơ̆ng ‘bok tơ’ngla mir. ‘Bar hlak jên đơ̆ng yă adro dơnuh jing tơmam kăl hloh kơ jên lơ mă lu bơngai mơdrŏng pơyơ̆r. Kư̆m đei dôm lu tơdrong kon bơngai lăng thoi kơ tơdrong a-lah dah ưh kơ đei yua, Kră Yang Yêsu lăng ‘bôh tơdrong phara. Kơplah Mari tơ oei ‘bơ̆t jơ̆ng Kră Yang Yêsu, mơ̆ng Nơ̆r Sư bơtho hăm đĭ jơhngơ̆m, Sư khan thoi âu: “Đei minh tơdrong mơ̆ng nơ̆r ‘Bok Kei-Dei đĕch kăl. Mari sư wă kơ mơ̆ng tơdrong ‘Bok Kei-Dei na Inh ưh kơ wă achăng sư ôh.” (Luka 10:42)

Kơplah ‘blŏk tơ tơdrong pơtih gia gah dôm lu hlak jên yŏng pơjao ăn kơ lu bơngai jang, Kră Yang Yêsu đei khan: “Kon bơngai bơ̆n mưh jang pơnam, sư đei tơmam lơ, Kră Yang mơnat ăn pơthim tơmam kơ sư rai lơ rơkah rơkai. Bơngai mă alah, tơmam ưh kơ đei lơ, rai hiong huach đơ̆ng sư tăm.” (Mathiơ 25:29)

Kơplah mơ̆ng Nơ̆r noh, lu bơ̆n ‘bônh kơ tơchĕng khan: “Dah Kră Yang wă kơ inh pơyơ̆r lơ hloh, lei Sư athei ăn kơ inh jên rai lơ, jơ năr rai lơ păng jơhngơ̆m pran kơtang rai lơ.” Mă-lei đei lơ wơ̆t, tơdrong tơchĕng thoi noh đơ̆ng minh ‘nu bơngai đei lơ tơdrong jang pơmat-tat, jơhngơ̆m sơ’ngon jơ̆l, truh kơ ưh kơ băt rơđah tơdrong Kră Yang oei wei-lăng păng tơgŭm sư thoi yơ.

Rŏ lăng lu bơ̆n juăt kơ tơchĕng khan bơ̆n athei đei “rai lơ” na bơ̆n wă gơh pơm rai lơ tơdrong ‘lơ̆ng. Mă-lei Sơ̆p Hla Bơar Nơ̆r ‘Bok Kei-Dei tơbăt minh trong lăng phara. Tơdrong arih păng tơdrong bơ̆jang đơ̆ng ‘bok Pôl tơbăt ăn kơ bơ̆n băt Kră Yang ưh kơ bơ̆jang tơdrong jang Sư kơplah kon bơngai đei tôm tơdrong păng oei lăm tơdrong hiôk jơnap. ‘Bok Pôl chih lăm II Kôrintô 4:8-9 thoi âu:

“Đĭ dôm tơdrong đe wă kơtĭt pơglơ̆k nhôn, mă-lei nhôn pơm huay huăi kơ glơ̆k; đĭ sơleng kơ đon boih, mă-lei nhôn khŏm adrin adrăi. Đe pơm kơnê̆ pơmat nhôn, mă-lei ‘Bok Kei-Dei ưh kơ lê̆ nhôn; đe teh tơpơ̆k nhôn, nhôn kư̆m huay kơ răm.”
Tơdrong arih ‘bok Pôl tơbăt ăn kơ lu bơ̆n ‘bôh, sư ưh kơ chang gô tơ̆p truh kơ đĭ-đăng tôm lu tơdrong jing ‘lơ̆ng rŏ ‘mơ̆i, na sư wă bơ̆jang ‘lơ̆ng tơpăt kiơ̆ tơdrong Kră Yang đei pơjao ăn kơ sư jang ôh. Na gah lu bơ̆n, đei lơ wơ̆t bơ̆n juăt kơ pơma kơ akâu bơ̆n kơdih khan: “Kơplah Kră Yang wă kơ inh jang tơdrong âu, Sư gô ăn kơ inh tơdrong nai thâu.” Mơ̆ng tơdrong thoi noh rŏ kơ trŏ thoi tơdrong bơ̆n tơchĕng, mă-lei đơ̆ng rŏng kơ tơchĕng noh, đei tơdrong ưh kơ lăp đon hrĕp lăm jơhngơ̆m: dôm tơdrong Kră Yang đei ăn kơ bơ̆n tam mă tôm, tơdrong Sư asong ăn tam mă đei mah, păng tơdrong Sư ‘mêm mơnat kơ bơ̆n tam mă đei tôm. Dah lu bơ̆n nŏng tơchĕng thoi noh, lei dang lĕ bơ̆n oei pơma khan, tơdrong lôch tang đơ̆ng Kră Yang Yêsu, tam mă đei tôm ‘mơ̆i wă kơ bơ̆n lăp đon pơjao akâu bơ̆n chu kiơ̆ Nơ̆r Sư.

Lu bơngai nai iŏk jên rơkah đơ̆ng mŭk tơmam sư đei pơyơ̆r tah tơ lăm kơthŭng jên pơyơ̆r. Mă-lei yă adro dơnuh noh đei pơyơ̆r đĭ hloi tơmam sư đei. Thoi noh, lei gah lu bơ̆n thoi yơ? Lu bơ̆n đei pơjao đĭ jơhngơ̆m lu bơ̆n kơ tơdrong jang mă Kră Yang đei pơjao ăn kơ bơ̆n boih ưh? Lu bơ̆n đei yua jơ năr, pran kơtang păng jơhngơ̆m ‘mêm mơnat, wă ba tơdrong chang hơmĕng păng tơdrong arih truh tơ lu bơngai nai boih ưh? Dah lu bơ̆n oei gô nơ̆r krao rơđah đơ̆ng Kră Yang, dah lu bơ̆n gô đei tơdrong truh tih na đei đon nuih pơjao akâu bơ̆n wă bơ̆jang kơ Sư?
Kră Yang bơ̆n juăt kơ pơtơm tơdrong jang Sư đơ̆ng dôm tơdrong lăng iĕ đĕch: minh tơdrong jang iĕ, jên pơyơ̆r tŏ sĕt, dah tơdrong hrĕp hreh mă ưh kơ đei bu băt. Na đơ̆ng dôm lu tơdrong mă lu bơ̆n lăng thoi tơdrong iĕ noh, Kră Yang yua wă pơjing tơdrong jang kơ Dêh Char Sư rai tŏk păng kơjăp hloh dơ̆ng. Kră Yang đei ăn kơ lu bơ̆n dôm lu tơdrong kăl wă bơ̆jang kơ Sư. Gah lu bơ̆n athei pơjao ăn kơ Sư tôm tơdrong mă lu bơ̆n đei dang ei.

Apĭnh đĭ đăng krao khan hơdai: Kơkuh kơ Kră Yang Yêsu, kon bơnê kơ Ih, yua kơ Ih jơ̆ Tơ’ngla băt hlôh tôm tơdrong lăm jơhngơ̆m kon. Đei lơ wơ̆t kon tơchĕng khan kon athei đei rai lơ jơ năr, jơhngơ̆m pran kơtang rai lơ păng hơgei, dah đei jên păng mŭk tơmam rơkah rơkai hloh dơ̆ng, na kon gô bơ̆jang kơ Ih. Apinh Ih huay kơ jô̆ yo kơ kon păng bơtho kon, ăn kơ kon đei jơhngơ̆m thoi yă adro dơnuh, băt lui gơnang kơ Ih păng đei đon nuih pơyơ̆r trŏ tôm tơdrong mă kon oei đei dang ei. Apinh Ih yua tơmam tŏ set đơ̆ng kon, kiơ̆ thoi Ih wă, păng tơgŭm kon đei ‘lơ̆ng tơpăt, bơ̆jang kơjăp hăm đĭ-đăng dôm lu tơdrong Ih đei pơjao ăn kơ kon jang lăm năr ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng lu bơ̆n ưh kơ kăl chang gô tơ̆p truh kơ bơ̆n đei jên păng mŭk tơmam rơkah rơkai ‘mơ̆i, na bơ̆n wă pơtơm. Athei lăng kơ dôm tơdrong Kră Yang đei pơjao tơ lăm tơpang ti bơ̆n lăm năr ‘nâu, mă khan jơ năr tŏ sĕt đĕch, dah đei tơdrong pŭn hiôk mă Kră Yang đei ăn kơ bơ̆n. Rŏ lăng dôm tơdrong noh ưh kơ đei kăl kiơ tih ‘bơ̆t măt lu bơ̆n, mă-lei Kră Yang oei gơh yua dôm tơdrong lăng iĕ đĕch noh wă pơm dôm tơdrong mơsêh mơyang, tih hloh kơ tơdrong lu bơ̆n tơchĕng. Dôm tơdrong lu bơ̆n oei đei dang ei, ưh kơ layơ jing tơdrong kăl hloh. Tơdrong kăl hloh noh thoi âu: lu bơ̆n hăm wă pơjao tôm tơdrong mă lu bơ̆n đei dang ei kơ Kră Yang dah ưh?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.