Kơplah lu ŭnh kơđeng pơm nhen thoi plei puăl ‘bôh tơ jơ̆p jang dôm lu hnam mơdro sa, păng lăm facebook đei ‘bĕnh ‘bang kơ rup yang kơnê̆, ih mơn kơ jơhngơ̆m thoi yơ? Ih hiôk chơt, dah đei tŏsĕt tơtăm lăm jơhngơ̆m? Hrei ‘nâu, năr Halloween lơ bơngai lăng nhen thoi minh năr hrŭk ao pơm rup păng hiôk chơt. Mă-lei gah lu bơ̆n bơngai lui kiơ̆ Kră Yang Yêsu, ‘nâu jơ̆ jơ năr lu bơ̆n athei tơchĕng pơ‘lơ̆ng, mă hloh loi lu kon hơ’lơ̆p kư̆m đei hơdai lăm dôm tơdrong pơm noh, mă lu sư tam mă hlôh wao tôm tơdrong lu sư pơm, păng tam mă băt kơ dôm tơdrong kơnê̆ gô truh. Thoi noh, lu bơ̆n athei pơm thoi yơ wă kơ jơhngơ̆m bơ̆n oei lăm tơdrong hiôk-hian, păng kư̆m gơh wei-lăng, krao khan apinh Kră Yang wei-lăng lu kon hơ’lơ̆p?

Năr ‘nâu, năr 29/10/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Cathy Irvin kơ̆l ‘bai RƠIH IŎK

“Gơnang bĕ kơ Kră Yang hăm đĭ jơhngơ̆m, ‘Nĕ kơ gơnang kơ đon hlôh wao ih.” (Tơdrong Pơđơ̆k 3:5)

Minh bơyan Halloween đei truh dơ̆ng. Lăm hnam anih mơdro tơmam lolang lơlap kơ hơbĕn ao pơm rup păng dôm lu rup măt brêm krưp dêh: kơ̆l kon bơngai lôch đei đao ‘bet klĕch, dôm lu ti đei pham klep, kơne lôch, hăm lu rup bơngai pơm pơjâu, yang kơnê̆ păng dôm lu rup pơm ăn kơ kon bơngai hli krưp.

Lu kon sâu inh kư̆m wă jê̆ năm chă ngôi lăm năr Halloween, hơdai pơ chơt tơdrong “asong ‘bĕng kĕo na tôt bơhle”. Hnam dơnŏ nhôn ưh kơ lăp đon ăn kơ lu kon hrŭk lu hơbĕn ao hli krưp noh, thoi noh na inh năm chă lăng rơih lu hơbĕn ao pơm rup mă ‘lơ̆ng ‘biơ̆.

Sơnăm Adrol sơ̆, kon sâu inh sư tơpuăn sơnăm, inh tơ hrŭk ăn hơbĕn ao drŏ-kăn pơtao. Sư wă ‘bot chơkhŏ kơnơl kơjung, mă-lei lu nhôn băt kơ sư ưh kơ gơh yak năm ataih hăm chơkhŏ noh ôh. Tuch luch sư chu ‘bot chơkhŏ đă ‘bŏng lŏng, Mă-lei sư yak năm tŏsĕt đĕch, sư đei tơtok khan jơ̆ng sư jĭ păng sư gleh lap bơih. Dah sư ‘bŏt chơkhŏ kơnơl kơjung tơpă, lei sư ưh kơ gơh yak năm ataih ôh.

Lăm kơ măng noh đei lơ tơdrong phara dêh, ưh kơ thoi lu năr nai. Sâu inh ưh kơ chu năm tơ dôm lu hnam đei pơgong rup hli krưp, sư ôn akâu sư đơ̆ng rŏng inh, rim wơ̆t yak năm tơ lu anih noh. Inh khan kơ sư ưh kơ kăl năm truh tơ ‘măng hnam ôh, păng inh pơma ăn kơ sư đei jơhngơ̆m nuih, khan dôm lu tơmam noh, ưh kơ tơmam tơpă ôh.

Kơplah inh lăng sâu inh lăm jơ năr noh, inh tơchĕng khan, minh ‘nu kon hơ’lơ̆p gô tơchĕng thoi yơ, kơplah jum dăr kơ sư ‘bĕnh-‘bang lu rup hli krưp thoi noh? Rŏ lăng sư tam mă hlôh ayơ mă tơdrong pơm ngôi đĕch, ayơ mă tơdrong hli krê. Păng kơplah sư hli krưp, sư chă minh ‘nu bơngai kră wă ôn akâu sư tơrŏng.

Tơdrong tơchĕng noh pơm ăn kơ jơhngơ̆m inh phôch hloi. Lu kon hơ’lơ̆p kăl kơ đei lu bơngai kră tơgŭm lu sư rai lơ hloh kơ lu bơ̆n tơchĕng. Lu sư kăl kơ đei bơngai kră ba trong, wei-lăng sư. Păng tơdrong kăl hloh đơ̆ng tôm tơdrong noh, lu sư kăl kơ đei bơngai kră băt kơ krao khan, păng pơjao lu sư lăm tơpang ti Kră Yang.

Yua kơ thoi noh, na lăm kơ măng noh, inh yak năm jơ̆p kơ pơlei păng krao khan apinh Kră Yang ăn kơ lu kon hơ’lơ̆p mă oei pơchơt tơ rok trong, apinh Kră Yang wei-lăng lu sư. Adrol ki sơ̆, inh ưh kơ đei năm tơ dôm lu năr thoi noh ôh, na noh jơ̆ năr blŭng-a inh năm hơdai lu kon sâu inh păng hăm lu bơngai nai, tơ lăm pơlei.
Rim sơnăm, tơdrong jet âu oei đei tơ lăm jơhngơ̆m inh: “Lu bơ̆n athei năm hơdai lu kon hơ’lơ̆p dah oei tơ hnam? Lu bơ̆n athei tang ‘măng hnam dah pơih ‘măng, wă kơ đei jơ năr pơm kơdranh tơdrong Kră Yang kơ lu bơngai nai?”

Inh tơchĕng rim hnam dơnŏ gô đei tơdrong rơih iŏk kơdih ‘bơ̆t anăp Kră Yang. Sơ̆p Hla Bơar Nơ̆r ‘Bok Kei-Dei ưh kơ đei bơtho rơđah tơdrong thoi âu. Mă-lei tơdah lu bơ̆n rơih iŏk trong ayơ noh, đei minh tơdrong lu bơ̆n ‘nĕ kơ hiơt: athei krao khan kơ lu kon hơ’lơ̆p.

Inh oei ‘blŏk kơ minh tơdrong truh kơ inh sơ̆, lăm năr inh ‘nao lui kơ Kră Yang.
Minh măng ei, đei minh ‘nu kon drŏ-nglo hơ’lơ̆p năm truh tơ anăp ‘măng hnam nhôn, apinh ‘bĕng kĕo. Kơplah inh lăng rup trô̆ tơ măt sư , inh khan kơ sư:

“Inh ưh kơ gơh ăn ‘bĕng kĕo kơ yang kơnê̆ ôh.”

Kon drŏ-nglo noh sư tưk măt rŭp, sư pơma khan:

“Ơ yă, sâu pơm pơtih gia đĕch. Sâu jơ̆ kon drŏ-nglo tơpă âu. Apinh yă ăn kơ sâu ‘bĕng kĕo tŏ sĕt bĕ?”

Na inh hiĕk.

Mă-lei klaih kơ noh, inh ‘bôh sâu noh sư yak năm minh drô̆. Ưh kơ đei mĕ ‘bă dah bơngai kră ayơ oei gô sư ‘bơ̆t gah ‘ngoaih kơ hnam ôh. Lăm jơ noh, inh ưh kơ tơchĕng kơ măt rup sư trô̆ noh dơ̆ng bơih. ‘Bơ̆t anăp inh đei minh ‘nu kon hơ’lơ̆p, oei yak năm lăm măng mu, ưh kơ đei bu oei hơdai păng sư.

Inh khan: “Gơh thâu!” Na inh ăn kơ sư tŏ sĕt ‘bĕng kĕo, pơkă kơ sư athei kơchăng wei-lăng akâu sư, păng chă buăl năm hơdai.

Dôm lu rup kơting, rup bơngai pơm pơjâu păng dôm lu rup hli krưp noh, truh tơ năr Halloween tôch boih. Mă-lei tơ gah ‘ngoaih to, oei đei lơ tơdrong anat anot tơpă mă lu kon hơ’lơ̆p tam mă đei hlôh wao, păng tam mă gơh wei-lăng akâu lu sư kơdih.

Thoi noh, tơdrong kăl wă tơchĕng ưh kơ sĭ lu bơ̆n athei ăn kơ lu kon hơ’lơ̆p năm chă ngôi lăm năr Halloween dah ưh ôh. Lu bơ̆n kư̆m athei jet akâu bơ̆n kơdih: lu bơ̆n đei oei hơdai lu sư tơpă dah ưh? Lu bơ̆n đei mơ̆ng lu sư pơma, wei-lăng păng krao khan apinh Kră Yang kơ lu sư dah ưh?

Lăm Sơ̆p Hla Bơar Tơdrong Pơđơ̆k 3:5-6 chih thoi âu:

“Gơnang bĕ kơ Kră Yang hăm đĭ jơhngơ̆m. ‘Nĕ kơ gơnang kơ đon hlôh wao ih. ‘Blŏk băt bĕ kơ Kră Yang lăm rim trong ih pơm. Na sư gô pơm kơ trong ih tơpăt.”
Kơplah lu bơ̆n oei ‘bơ̆t anăp dôm tơdrong wă rơih iŏk, mă lu bơ̆n ưh kơ băt hơđăl noh thoi yơ, lu bơ̆n athei chă Kră Yang, ưh kơ gơnang kơ tơdrong hlôh wao đơ̆ng akâu bơ̆n kơdih ôh. Bĕ lu bơ̆n ăn kơ Nơ̆r Kră Yang pơchrang hơdah tơdrong tơchĕng lăm jơhngơ̆m bơ̆n, wă kơ tơdrong gơh hơgei đơ̆ng Sư ba trong lu bơ̆n rơih iŏk.

Lăm Sơ̆p Hla Bơar Kôlôsê 3:15a kư̆m bơtho thoi âu: “Yêsu Krist ăn kơ bơ̆n hiôk hơiă dih băl, na bơ̆n athei adrin kiơ̆ thoi noh.”

Thoi noh, ‘nĕ ăn tơdrong hli krưp pơgơ̆r tơdrong lu bơ̆n pơm. Lu bơ̆n athei chă tơdrong Kră Yang ba trong, wei răk jơhngơ̆m bơ̆n lăm tơdrong hiôk-hian, păng rơih iŏk dôm tơdrong gơh hơgei, ‘lơ̆ng trŏ hloh, wă wei-lăng lu kon hơ’lơ̆p.

Apĭnh đĭ đăng krao khan hơdai: Kơkuh kơ Kră Yang ‘Bă mă ‘mêm mơnat, kon bơnê kơ Ih, yua kơ Ih ling-lang wei-lăng tơdrong arih kon. Lăm năr ‘nâu, kon pơjao lu kon hơ’lơ̆p jum dăr kơ kon lăm tơpang ti Ih. Apinh Ih wei-lăng lu sư đơ̆ng dôm tơdrong pơm ăn kơ lu sư hli krưp, dôm tơdrong kơnê̆ mă pơm kơ lu sư hiong răm, păng dôm tơdrong anat anot mă lu sư tam mă hlôh wao păng wă kơ gơh wei-lăng akâu lu sư kơdih. Apinh Ih ăn kơ lu mĕ ‘bă, lu yă ‘bok tơdrong gơh hơgei, wă kơ lu sư băt ba trong păng wei-lăng lu kon hơ’lơ̆p. Apinh Ih bơtho kon băt chă tơdrong Ih ba trong, păng oei arih thoi tơdrong hơdah đơ̆ng Kră Yang Yêsu lăm teh đak âu. Apinh tơdrong hiôk-hian đơ̆ng Ih pơgơ̆r jơhngơ̆m kon, păng ba trong kon yak kiơ̆ thoi tơdrong Ih wă rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah ih rơih iŏk oei tơ hnam, dah năm hơdai lu kon hơ’lơ̆p păng lu kon sâu ih pơm dôm tơdrong pơchơt lăm kơ măng Halloween, apinh ih ‘nĕ kơ hiơt minh tơdrong kăl hloh: athei oei hơdai lu sư, wei-lăng lu sư păng krao khan apinh Kră Yang oei hơdai lu sư. Yua kơ lu kon hơ’lơ̆p tam mă hlôh wao tôm tơdrong anat anot jum dăr kơ lu sư, na lu sư kăl kơ đei lu bơngai kră ba trong lu sư. Păng lu bơ̆n kư̆m athei pơhrăm lui gơnang kơ Kră Yang, rôp ti Sư hăm lui kơ Sư chông anhăk lăm rim trong mă bơ̆n yak năm.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.