Peb ua neej nyob, peb yeej swm txoj kev uas “muaj pub – muaj pauj”. Yog xav tau ib qhov khoom noj qab, peb yuav tsum tau them nyiaj; yog xav tau ib tes haujlwm zoo, koj yuav tsum poob dag zog; Yog xav kom tau lwm tug hwm thiab saib taug, koj yuav tsum siv zog ntau heev. Txhua yam hauv lub neej no yog xav tau ib yam dabtsi ces cuag li koj yuav tsum tau ua ib yam dabtsi rau thiaj tau. Yog ib tug ntseeg, muaj ntau zaug peb cia li coj txoj kev cai no mus rau hauv txoj kev nrog Vajtswv sib txuas lus. Peb xav tias ntshe yog yus tsis tau zoo txaus, tsis tau ua txaus tej haujlwm zoo, ces Vajtswv yuav tsis hlub thiab txais yuav peb. Tiamsis, Vajtswv txoj lus qhia tawm ib qhov tseeb uas nws txawv dua tej kev xav ntawd. Peb tau cawmdim tsis yog los ntawm tej uas peb ua, tiamsis yog los ntawm Vajtswv txoj kev hlub pub dawb thiab dhau ntawm txoj kev ntseeg rau Vajtswv Tib Leej Tub.

Hnub no yog hnub 31/10/2026. Kev thov Vajtswv txhua hnub thov caw peb sawvdaws los kawm Vajtswv txoj lus ua ke txog zaj kawm: VIM KEV HLUB LOS NTAWM KEV NTSEEG

Vajtswv tus uas hlub nej, nws cawm nej dim twb yog vim nej ntseeg. Qhov uas nej dim ntawd, tsis yog vim nej ua haujlwm zoo, tiamsis yog Vajtswv cia li pub dawb rau nej xwb. (Efexus 2:8)

Nyob rau tiam tebchaws thời Trung Cổ muaj ib tug tub hluas qhia moo zoo hu ua Martin Luther. Nws pheej ntxhov siab thiab xav tsis thoob tias tib neeg uas muaj kev txhaum puv npo yuav ua li cas thiaj sawv tau ntawm Vajtswv tus uas dawb huv xub ntiag. Vim nws xav nrhiav kev kaj siab rau nws tus kheej, nws thiaj rau siab ua kevcai yoo mov, nyob hmo ntuj tsis pw thov Vajtswv, siv ntau teev los lees nws tej kev txhaum, thiab siv zog ua txhua yam haujlwm zoo. Nws tseem txhos caug nce ib theem zuj zus raws cov ntaiv pob zeb ntawm Scala Sancta hauv lub nroog Loos, vam tias nws tej kev txhaum yuav raug ntxuav mus. Txawm nws siv zog ua txhua yam li ntawd los, nws lub siab tseem tsis kaj thiab nws tseem ntshai Vajtswv txoj kev npau taws.

Tsuas yog thaum Vajtswv Txojlus qhib Luther lub siab lawm, nws thiaj paub tias txoj kev dim thiab qhov uas Vajtswv suav tias nws yog tus ncaj ncees tsis yog los ntawm tej kev txhos caug nce cov ntaiv pob zeb lossis los ntawm nws tus kheej txoj kev siv zog ua ib yam dabtsi, tiamsis yog ib yam khoom pub dawb ntawm Vajtswv.

Vim li ntawd, hnub tim 31 lub Kaum Hli Ntuj xyoo 1517, Martin Luther thiaj muab nws 95 nqe lus ntsia rau ntawm lub tuamtsev Wittenberg lub qhov rooj, pib txoj kev kho tshiab hauv pawgntseeg. Los ntawm txoj kev kho tshiab no, cov ntseeg Yexus Khetos thiaj maj mam paub ib qhov tseeb uas yog lub hauv paus ntawm txoj kev ntseeg, tiam sis twb tau raug muab npog cia ntev los lawm. Qhov tseeb ntawd yog tias tib neeg tau txais txoj kev dim vim Vajtswv txoj kev hlub uas pub dawb, dhau los ntawm txoj kev ntseeg.

Nyob hauv tsab ntawv sau rau cov ntseeg Efexus, Timthawj Paulus twb sau li no: “Vajtswv tus uas hlub nej, nws cawm nej dim twb yog vim nej ntseeg. Qhov uas nej dim ntawd, tsis yog vim nej ua haujlwm zoo, tiamsis yog Vajtswv cia li pub dawb rau nej xwb. 9Qhov uas nej dim tsis yog nej lub dag lub zog ua mas nej thiaj tsis muaj lus khav tau. 10Peb yog cov uas Vajtswv txhais tes puab. Vajtswv tsim peb los nrog Yexus Khetos koom ib txojsia kom peb ua tau tej haujlwm zoo uas Vajtswv twb xub npaj tseg cia rau peb ua lawm. (Efexus 2:8-10)

Raws li lub ntsiab lus hauv thawj hom lus uas sau nqe Vajlugkub no, lo lus “txoj kev hlub” yog hais txog qhov uas pub los ntawm lub siab txaus siab, tsis muaj tej yam uas tus txais yuav tsum ua kom tsim nyog tau txais, thiab tsis yog pub vim tus txais tau ua ib yam zoo dabtsi. Timthawj Paulus qhia meej tias, ua ntej tib neeg los paub tus Tswv, lawv sab ntsuj plig twb “tuag lawm” hauv tej kev txhaum (nqe 1). Tus uas tuag lawm yeej ua tsis tau ib yam dabtsi thiab cawm tsis tau nws tus kheej li. Yog li ntawd, txoj kev dim thiaj yog Vajtswv “qhov khoom pub dawb” nkaus xwb. Nws pub qhov ntawd vim nws txoj kev khuvleej, thiab tus Tswv Yexus tau them tus nqi ntawd los ntawm nws cov ntshav uas los saum tus ntoo khaublig. Txawm yog txoj kev ntseeg uas peb muaj los, kuj tsis yog los ntawm peb tej haujlwm zoo lossis peb tus kheej txoj kev siv zog ua ib yam dabtsi. Peb tsuas muaj ob txhais tes khoob uas cev tuaj txais qhov khoom pub dawb uas muaj nqis tshaj plaws ntawd xwb. Txoj kev dim yog Vajtswv ua kom tiav huv tibsi.

Thaum peb rov saib Martin Luther lub neej, peb pom tias nws tau siv zog ua tej haujlwm zoo kom “yuav” tau Vajtswv txoj kev khuvleej. Txawm yog tej kev txhos caug nce cov ntaiv pob zeb hauv lub nroog Loos lossis kev siv ntau teev sijhawm los lees nws tej kev txhaum txog thaum sab sab los, tej ntawd yeej muab tsis tau kev kaj siab rau nws, rau qhov tej ntawd tsuas yog vam khom tib neeg lub zog uas muaj nrim thiab muaj kev txhaum.

Tsuas yog thaum Luther totaub qhov tseeb hauv Vajlugkub lawm, nws thiaj paub tias nws tsis tas yuav txhos caug nce cov ntaiv kom mus cuag tau Vajtswv ntxiv lawm. Rau qhov hauv tus Cawmseej Yexus, Vajtswv twb tsa nws tawm hauv qhov chaw qias vuab tsuab ntawm kev txhaum los lawm, kom nws tau saj paub Vajtswv txoj kev cawm dim thiab kev zam txim. Qhov uas Luther paub txog Vajtswv txoj kev hlub uas pub dawb thiab txoj kev ntseeg tau hloov nws ntawm ib tug tub kawm Vajluskub uas ntshai thiab tag kev cia siab los ua ib tug neeg muaj lub siab tawv, ua timkhawv txog qhov tseeb tsis ntshai li. Nws kuj dhau los ua ib tug uas tau Vajtswv siv coj Pawgntseeg rov qab los ze Vajtswv Txojlus.

Peb tsis yog tsuas nco txog hnub Pawgntseeg tau kho dua tshiab rau ib hnub lossis rau ib lub sijhawm ua kevcai nco txog xwb, tiamsis lub siab ntawd yuav tsum nyob ruaj nraim hauv txhua tus ntseeg Yexus Khetos lub neej mus tas li. Nyob rau hnub uas peb nco txog Hnub Pawgntseeg tau Kho Tshiab uas yog hnub no, peb txhua tus yuav tsum rov tshuaj xyuas lub hauv paus ntawm peb tus kheej txoj kev ntseeg.

Thib ib, peb puas tabtom poob rau hauv lub ntxiab cuab ntawm kev vam khom peb tus kheej lub zog thiab kev khav theeb? Koj puas tabtom ntsuas Vajtswv txoj kev hlub uas nws muaj rau koj dhau ntawm qhov uas koj nyeem Vajlugkub, cov nyiaj uas koj muab fij, lossis tej haujlwm uas koj ua hauv pawg ntseeg? Peb puas khav rau peb tus kheej vim tej uas peb ua tau hauv sab ntsuj plig, thiab cia siab rau peb tus kheej lub zog? Thiab Vajtswv txoj kev hlub uas pub dawb puas tseem ua rau peb muaj kev zoo siab thiab kev kaj siab txhua hnub, lossis peb twb tsis nco ceev faj tias peb twb muab peb lub neej uas nrog tus Tswv mus ua ib lub neej sab thiab qaug zog heev.

Thib ob, txhua zaus peb ua tsis tiav, pheej poob tob zuj zus rau hauv kev txhaum, lossis pom peb tus kheej txoj kev qaug zog, peb puas xav tias peb tsis “tsim nyog” los cuag tus Tswv lawm? Peb pheej hnov qab tias nws twb cawm peb thaum peb tseem yog neeg txhaum, tsis yog thaum peb zoo tiav log lawm. Yog li ntawd, koj puas muaj lub siab tawv los ze nws lub zwm txwv uas muaj txoj kev hlub uas pub dawb txhua lub sijhawm, txhua qhov chaw, txhua yam xwm txheej, thiab txawm koj lub siab yuav zoo li cas los xij?

Thib peb, peb puas paub tias peb yog “Vajtswv tes haujlwm,” tau tsim los ua tej haujlwm zoo uas nws twb npaj tseg ua ntej lawm? Vajtswv Txojlus yeej tsis qhia kom peb tso tej haujlwm zoo tseg. Tiamsis thaum peb paub tias peb twb tau txais txoj kev dim lawm, tej haujlwm zoo yeej yog tej txiv uas txi los ntawm lub neej tshiab hauv sab ntsuj plig. Ib tsob ntoo tsis yog txi txiv kom thiaj dhau los ua ib tsob ntoo, tiamsis nws txi txiv vim nws twb yog ib tsob ntoo uas muaj sia nyob lawm. Tej haujlwm zoo tsis yog yam uas peb yuav tsum ua kom tau txais txoj kev dim, tiamsis yog tej txiv uas txi los ntawm lub neej uas twb tau saj paub Vajtswv txoj kev hlub uas pub dawb lawm.

Thov caw nrog kuv peb thov Vajtswv ua ke: Au tus Tswv, koj yog tus uas tau hlub kuv thiab niaj hnub pub koj txoj kev hlub uas pub dawb nplua mias rau kuv lub neej. Thov zam txim rau kuv, rau qhov muaj tej lub sijhawm kuv tsis ras txog tias kuv cia siab rau kuv tus kheej lub zog los cuag koj; thiab muaj tej lub sijhawm kuv xav tias kuv yuav tsum ua ntau dua, koj thiaj txais yuav kuv. Thov cawm kuv dim ntawm txhua yam kev khav theeb thiab pab kuv tsa qhov muag ntsia tus ntoo khaublig, kom kuv nco ntsoov tias koj txoj kev hlub uas pub dawb yeej txaus rau kuv lawm. Thov kom kuv lub siab niaj hnub ua koj tsaug rau txoj kev dim uas koj pub, thiab kom txoj kev ris koj txiaj nris txhawb kuv lub siab kom hlub koj, ua lub neej dawb huv, thiab ua tej haujlwm zoo uas koj twb npaj tseg ua ntej lawm.
Kuv thov txhua los lus los ntawm TSwv Yexus Khetos lub npe, Amees.

Ib tsoom kwvtij phoojywg, tseeb tiag peb tau txais txoj kev dim vim Vajtswv txoj kev hlub uas pub dawb, dhau los ntawm txoj kev ntseeg. Tsis yog vim tej haujlwm zoo uas peb tau ua, tiamsis yog Vajtswv qhov khoom pub dawb nkaus xwb. Yog li ntawd, hnub no, cia peb muab lub nra uas peb ris vim pheej siv zog ua kom tsim nyog tau Vajtswv txais yuav tso tseg, thiab los so hauv nws txoj kev hlub uas zoo tiav log.

Hauv nws txoj kev hlub uas pub dawb ntawd, txhua zaus nej ntog rau hauv kev txhaum, cia li khiav los cuag tus Tswv, tsis txhob cia txoj kev xav tias nej muaj txim kav nej lub neej. Cia li ua tej haujlwm zoo tawm hauv lub siab uas paub ris Vajtswv txiaj nris. Vim nej twb tau txais kev zam txim thiab txoj kev dim lawm, hnub no cia li ua neej nyob ywj pheej thiab muaj kev zoo siab hauv nws txoj kev hlub uas pub dawb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.