31.10 Amăn Jơ Krao Khan Rim Năr: ĐƠ̆NG ‘BOK KEI-DEI ‘MÊM MƠNAT YUA KƠ ĐƠ̆NG BƠ̆N LUI

Lăm tơdrong arih lu bơ̆n rim năr, lu bơ̆n juăt dêh bơih kơ tơdrong juăt “đei asong – đei apah”. ‘Maih kơ đei tơmam ‘lơ̆ng, ih khŏm ăn jên; ‘maih kơ đei anih ‘lơ̆ng, ih khŏm tuh jơhngơ̆m hŭl hang; ‘maih đei tơdrong pơyom đơ̆ng đe nai, ih athei adrin mă loi. Dôm tơdrong lăm chăl arih âu dang lĕ đei chĕp ba mĭnh tơdrong tơ’mong ăn. Jơ̆ Bơngai Lui, mơ‘nah lu bơ̆n chĕp ba tơdrong tơchĕng thoi noh lăm tơdrong tơ’bưh hăm Kră Yang. Lu bơ̆n tơchĕng khan lu bơ̆n ưh tam mă ‘lơ̆ng, tơdah ưh tam mă pơm tôm lu tơdrong ‘lơ̆ng, na Kră Yang gô ưh kơ ‘mêm păng sơng iŏk bơ̆n. Mălei, Nơ̆r Kră Yang tơ’bôh mĭnh tơdrong tơpă phara hloh. Lu bơ̆n klaih ưh kơ sĭ yua kơ dôm tơdrong lu bơ̆n pơm, sơmă đơ̆ng tơdrong ‘mêm ‘Bok Kei-Dei hlôi kơ đon lui ngeh kơ Kon Pôm Sư.

Năr ‘nâu, năr 31/10/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai ĐƠ̆NG ‘BOK KEI-DEI ‘MÊM MƠNAT YUA KƠ ĐƠ̆NG BƠ̆N LUI

“’Bơ̆n klaih đơ̆ng tơdrong yoch oei hiôk hăm ‘Bok Kei-Dei, yua kơ ‘Bok Kei-Dei ‘mêm mơnat kơ bơ̆n na Sư pơklaih, yua kơ bơ̆n lui păng gơnang kơ Yêsu tơpă na Sư mơnat. Ưh kơ sĭ bơ̆n gơh klaih kơdih ôh, mă-lei tơdrong noh Sư ăn đĕch.” (Êphêsô 2:8)

Lăm chăl so sơ̆, đei mĭnh ‘nu bơngai chă năm bơtho anăn sư Martin Luther ling lang tơchĕng ưh kơ hiôk yua kơ tơdrong pơm thoi yơ mĭnh ‘nu bơngai ‘bĕnh kơ tơdrong yoch gơh dơ̆ng ‘bơ̆t anăp ‘Bok Kei-Dei ‘lơ̆ng rơgoh. Wă chơchă tơdrong chơ̆n hơđơ̆ng lăm jơhngơ̆m, sư ơ̆t kơ sŏng sa, kral kơmăng wă krao khan, ‘măn jơ wă tơbral tơdrong yoch păng adrin pơm dôm tơdrong ‘lơ̆ng. Sư mah sơtơ̆p kŭl tăng mơ-mŏ tŏk rim kơnao kung tơmo lăm hnam akŭm Scala Sancta tơ dêh char Rôm hăm hơmĕng dôm tơdrong yoch sư gơh rơgoh. Mălei, đơ̆ng rŏng kơ dôm tơdrong sư pơm noh, jơhngơ̆m sư oei tơtăm păng hli hlơt ‘bơ̆t anăp tơdrong blĕk đơ̆ng ‘Bok Kei-Dei.

Truh kơ kơplah Luther đei pơdah Nơ̆r ‘Bok Kei-Dei, sư kơnăl bơih tơdrong dŏng pơklaih păng sơng iŏk ưh kơ sĭ đơ̆ng dôm kơnao kung tơmo tơdah mă tơdrong sư adrin kơdih, sơmă jơ̆ tơmam ăn đĕch đơ̆ng ‘Bok Kei-Dei.

Thoi noh, lăm năr 31 khei10 sơnăm1517, Martin Luther đei pơ̆ng 95 sơ̆p hlak tơdă tơ ‘măng hnam akŭm Wittenberg, pơtơm tơdrong Tơplih lăm Khŭl lui. Đơ̆ng tơdrong tơplih âu, Bơngai Lui gơh băt dôm tơdrong ‘lơ̆ng tơpăt mă đe ôn lê̆ đơ̆ng ki sơ̆, noh jơ̆ tơdrong dŏng pơklaih yua kơ tơdrong ‘mêm mơnat, yua kơ đon lui.

Lăm kơthơ ată ăn kơ bơngai lui tơ Êphêsô, ‘bok Pôl đei chih: “Bơ̆n klaih đơ̆ng tơdrong yoch oei hiôk hăm ‘Bok Kei-Dei, yua kơ ‘Bok Kei-Dei ‘mêm mơnat kơ bơ̆n na Sư pơklaih, yua kơ bơ̆n lui păng gơnang kơ Yêsu tơpă na Sư mơnat. Ưh kơ sĭ bơ̆n gơh klaih kơdih ôh, mă-lei tơdrong noh Sư ăn đĕch. Yua kơ thoi noh na bơ̆n ‘nĕ kơ pơang kơ đe khan bơ̆n kĕ kiơ̆ tôm tơdrong juăt na bơ̆n klaih. Tơdrong ‘Bok Kei-Dei ăn kơ bơ̆n jing bơngai ‘nao, yua kơ bơ̆n pôm đon hăm Yêsu Krist. Tơdrong bơ̆n jing bơngai ‘nao noh Sư wă kơ bơ̆n pơm tôm tơdrong ‘lơ̆ng tơpăt ngăl, na blŭng-a sơ̆ ‘Bok Kei-Dei wă kơ bơ̆n pơm ‘lơ̆ng ling-lang thoi noh” (Êphêsô 2:8-10)
Kiơ̆ nơ̆r tơm, nơ̆r “ ‘mêm mơnat” jơ̆ khan tơdrong ăn đĕch păng ưh kơ đei pơgŏ, ưh kơ kăl đei apah păng ưh kơ kiơ̆ kơ tơdrong mă bơngai sơng iŏk đei pơm. ‘Bok Pôl đei pơma kơjăp khan bơhngol kon bơngai kơplah tơ’bơ̆p Kră yang noh “đĭ lôch bơih” lăm tơdrong yoch (trong 1), mĭnh ‘nu bơngai lôch bơih ưh pă gơh pơm mĭnh tơdrong kiơ dơ̆ng, ưh kơ gơh dŏng kơdih ôh. Thoi noh, tơdrong dŏng pơklaih noh jơ̆ “tơmam ăn đĕch” đơ̆ng ‘Bok Kei-Dei, đei pơjao hlôi kơ tơdrong ‘mêm mơnat Sư, păng tuh hăm pham Yang Yêsu tơ kơpal ‘long pơglang. Mă tơdrong lui lu bơ̆n oei chĕp noh kư̆m ưh kơ sĭ đơ̆ng tơdrong lu bơ̆n adrin kơdih ôh. Đĭ đăng dôm lu bơ̆n đei noh jơ̆ tơpang ti hoh wă sơng iŏk tơmam ăn đĕch mă gĭt kăl noh. Tơdrong dŏng pơklaih đơ̆ng ‘Bok Kei-Dei ăn đĕch.

Lăng alơ̆k tơ tơdrong arih Martin Luther, lu bơ̆n ‘bôh sư adrin tôch ai wă “răt” iŏk tơdrong ‘mêm mơnat đơ̆ng ‘Bok Kei-Dei. Dôm lu kơnao kung tơmo tơ Rôm tơdah mă dôm lu jơ sư tơbral dĭng mă pă kĕ ưh kơ gơh ăn kơ sư tơdrong hơđơ̆ng, yua kơ lu noh đơ̆ng jơhngơ̆m păng tơdrong yoch kon bơngai đĕch.

Lăp mĭnh tơdrong lơ̆ng tơpăt đơ̆ng Sơ̆p Hla Bơ-ar Nơ̆r ‘Bok Kei-Dei đĕch, Luther đei băt kơdih sư ưh kơ kăl mơ-mŏ tŏk dôm kơnao kung wă chro ti tơ Kră Yang bơih. Yua lăm Yang Yêsu, ‘Bok Kei-Dei tơ-iung sư hlôi đơ̆ng anih yoch wă mơn iŏk tơdrong dŏng pơklaih păng mơnat đơ̆ng Sư. Tơdrong ‘bôh băt gah tơdrong ‘mêm mơnat păng đon lui pơm ăn kơ Luther đơ̆ng mĭnh ‘nu bơngai hli hlơt, ưh pă băt hơmĕng jing mĭnh ‘nu bơngai nuih kơtang, pơ̆n nuih pơm kơdranh gah tơdrong ‘lơ̆ng tơpăt, păng jơ̆ tơmam yua mă Kră Yang rơih wă chông anhăk Khŭl lui wih brŏk tơ Nơ̆r ‘Bok Kei-Dei.

Lu bơ̆n ưh kơ tơ’blŏk tơdrong tơplih lăm mĭnh năr phĕt ayơ ôh, mălei tơdrong noh khŏm oei oei ling-lang lăm tơdrong arih rim ‘nu Bơngai Lui. Lăm năr ‘blŏk hơdơ̆r kơ tơdrong tơplih lăm Khŭl lui năr âu, rim ‘nu lu bơ̆n kăl kơ lăng bĕ gah tơnơm đon lui lu bơ̆n.

Mă mĭnh, lu bơ̆n hăm oei huŏng lăm tơdrong pơhlŭ gah tơdrong gơnang kơdih păng pơang ưh? Ih hăm oei hơtŏ tơdrong ‘mêm Kră Yang ‘măn ăn kơ bơ̆n kiơ̆ kơ tơdrong ih đŏk lăng Sơ̆p Hla Bơ-ar Nơ̆r ‘Bok Kei-Dei, kơsô̆ jên mă ih pơyơ̆r, tơdah mă lu tơdrong jang mă ih bơ̆jang lăm Hnam Akŭm? Lu bơ̆n hăm oei lăp đon kơdih gah tơdrong lu bơ̆n đei gah bơhngol păng gơnang kơ kơdih kâu ưh? Păng rŏ lăng tơdrong ‘mêm mơnat hăm pă trŏ jơ̆ tơdrong chơt hiôk păng hơđơ̆ng lu bơ̆n lăm rim năr, tơdah lu bơ̆n hơch kơ pơm tơdrong arih kiơ̆ Kră Yang jing mĭnh trong năm gleh lap dêh?

Mă ‘bar, rĭm wơ̆t lu bơ̆n răm, pơ̆k huŏng lăm tơdrong yoch tơdah tơ’bưh hăm tơdrong rơdu rơmơ̆n, lu bơ̆n hăm mơn ưh pă “trŏ” wă năm tơ Kră Yang ưh? Lu bơ̆n juăt kơ hiơt bơih Sư dŏng pơklaih lu bơ̆n đơ̆ng kơplah lu bơ̆n jơ̆ bơngai yoch, ưh kơ sĭ kơplah lu bơ̆n ‘lơ̆ng rơgoh. Lei ih hăm pơ̆n nuih wă năm jê̆ tơdrong ‘mêm mơnat Sư rim jơ rim phŭt, rim anih, rim tơdra ưh?

Mă pêng, lu bơ̆n hăm ‘bôh băt kơdih jơ̆ “tơmam pơjing đơ̆ng tơpang ti Sư”, đei pơjing wă pơm dôm tơdrong ‘lơ̆ng mă Sư dan ăn ưh? Nơ̆r Kră Yang ưh kơ layơ athei lu bơ̆n ‘nĕ kơ pơm tơdrong ‘lơ̆ng ôh. Mălei kơplah băt kơdih đei dŏng pơklaih bơih, lei pơm ‘lơ̆ng noh jơ̆ tơdrong arih ‘nao gah bơhngol. ‘Long ưh kơ plei wă jing tơnơm ‘long ôh, mălei ‘long plei yua kơ kơdih ‘long noh đei tơdrong arih. Tơdrong pơm ‘lơ̆ng ưh kơ kơ gơh đei tơdrong dŏng pơklaih ôh, sơmă noh jơ̆ apah kơ tơdrong arih mă đei mơn tơdrong ‘mêm mơnat.

Apĭnh đĭ đăng krao khan hơdai: Kơkuh kơ Kră Yang mă Tơ’ngla ‘mêm mơnat păng ling lang tuh ăn tơdrong ‘mêm mơnat lăm chăl arih kon. Apinh ih mơnat yua kơ kư̆m đei kon gơnang kơ kơdih akâu jăn kon wă năm tơ Ih; kư̆m đei kon tơchĕng kăl kơ pơm mă lơ hloh wă kơ Ih sơng iŏk. Apinh dŏng kon đơ̆ng dôm tơdrong pơang păng tơgŭm kon ngơk lăng tơ ‘long pơglang wă kơ kon ‘blŏk khan tơdrong ‘mêm Ih noh tôm mah ăn kơ kon bơih. Hơpơi kơ jơhngơ̆m kon ling lang băt bơnê kơ tơdrong dŏng pơklaih Ih păng pơtrŭt jơhngơ̆m kon băt ‘mêm kơ Ih, arih ‘lơ̆ng rơgoh păng pơm dôm tơdrong ‘lơ̆ng mă Ih đei dan ăn bơih.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, tơpă, yua kơ tơdrong ‘mêm mơnat, yua đơ̆ng đon lui na lu bơ̆n gơh klaih, ưh kơ sĭ đơ̆ng jơhngơ̆m kơdih lu bơ̆n, sơmă jơ̆ đơ̆ng ăn đĕch đơ̆ng ‘Bok Kei-Dei. Thoi noh, năr ‘nâu, lu bơ̆n athei achăng bĕ dôm tơdrong pŭ trăp đơ̆ng tơdrong adrin wă pơdơh lăm tơdrong ‘mêm tôm mah Sư. Lăm tơdrong ‘mêm mơnat noh, athei kơdâu năm tơ Sư kơplah pơ̆k huŏng, tơplih kơ tơdrong arih lăm mơlâu. Kư̆m athei pơdah tơdrong ‘lơ̆ng đơ̆ng lăm jơhngơ̆m băt bơnê. Yua kơ ih gơh đei mơnat păng pơklaih bơih, na ih athei arih lăm tơdrong rơngei păng ‘nă hal lăm tơdrong ‘mêm mơnat Sư lăm năr âu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.