Năm tơ anăp năm tơ rŏng, hơtĕch rim phŭt, rim jơ hăt hot – rŏ lăng noh jơ̆ tơdrong arih juăt kơ đei hăm lơ bơngai hrĕi ‘nâu! Đei lu năr, tơdrong arih rŏ lăng ưh kơ ăn kơ lu bơ̆n đei minh jơ phŭt wă pơdơh. Đơ̆ng tơdrong jang âu truh tơ tơdrong jang to, druh kiơ̆ dih băl lăm kơ̆l ling lang đei pơtrŭt khan: “Ơ, mă tĕnh bĕ, mă tĕnh hloh dơ̆ng bĕ, năm bĕ!” Đei bơngai kư̆m đei pơma khan thoi âu: “Lu bơ̆n jơ̆ kon bơngai, ưh kơ kơmăi mă băt jang tơdrong jang đĕch ôh.” Lăm lơ tơdrong jang mă lu bơ̆n gô pơm, lei lu bơ̆n hiơt kơ tơdrong arih tơpă bơih – athei arih hăm jơhngơ̆m hiôk chơt đơ̆ng Kră Yang ăn kơ lu bơ̆n?

Năr ‘nâu, năr 01/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Gene Markland kơ̆l ‘bai ĐEI PƠJING WĂ KƠ ‘LƠ̆NG TÔM TƠDRONG

“Thoi noh na iĕm athei ‘mêm kơ đĭ-đăng bơngai kư̆m thoi ‘Bă bơ̆n tơ plĕnh ti ‘mêm kơ đĭ-đăng bơngai thoi noh mơ̆n.” (Mathiơ 5:48)

Lăm tơdrong arih hrăt hrot hrei ‘nâu, lu bơ̆n ‘bônh kơ druh kiơ̆ lăm dôm tơdrong gleh lap yua kơ tơmam sŏng sa, hơbĕn ao hrŭk păng jên. Lăm jơhngơ̆m bơ̆n ling-lang tơchĕng khan: “Bơ̆n athei pơm tơdrong âu, bơ̆n athei pơm tơdrong nai.” Na lăm tôm tơdrong jang hrăt hrot noh, lu bơ̆n ‘bônh kơ hiơt minh tơdrong kăl: Kră Yang đei pơjing rim ‘nu bơngai phara dih băl, ưh kơ đei lei lăi băl ôh. Sư ưh kơ pơjing lu bơ̆n wă kơ bơ̆n năm kiơ̆ tơdrong jang âu, na wih kiơ̆ tơdrong jang nai rim năr đĕch ôh, sơmă Sư pơjing lu bơ̆n wă kơ lu bơ̆n arih tôm tơdrong arih mă Sư đei ăn kơ lu bơ̆n. Lu bơ̆n đei pơjing wă kơ arih, ưh kơ sĭ wă bơ̆jang đĕch ôh.
Ưh kơ sĭ bơ̆n pơm lơ tơdrong jang na jing ‘lơ̆ng ôh. Kră Yang wă kơ ‘bôh tơdrong arih lu bơ̆n rai đei tơplih ming ‘nao lăm Sư rim năr. Kră Yang Yêsu khan: “Thoi noh na iĕm athei ‘mêm kơ đĭ-đăng bơngai kư̆m thoi ‘Bă bơ̆n tơ plĕnh ti ‘mêm kơ đĭ-đăng bơngai thoi noh mơ̆n.” (Mathiơ 5:48)

Lu bơ̆n oei tơchĕng, adrin pơm dôm tơdrong phara dih băl wă kơ gơh đei dôm tơdrong mă lu bơ̆n hưch hanh lăm tơdrong arih. Lu bơ̆n kư̆m adrin đĭ jơhngơ̆m, pơm tơdrong jang âu na truh tơ tơdrong jang nai, hơmĕng kơ lu bơ̆n gô pơm trŏ thoi Kră Yang wă. Mă-lei tơdrong Sư wă tơpă ưh kơ tơdrong lu bơ̆n pơm ăn kơ Sư ôh, mă jơ̆ tơdrong lu bơ̆n oei pơgơ̆p hơdai hăm Sư. Inh rai băt hơdrol kơ inh tơchĕng gah dôm tơdrong inh gơh pơm ăn kơ Kră Yang, inh kăl kơ pơhrăm oei lăm Sư, pơdơh akâu păng oei hiôk lăm tơdrong Sư oei hơdai hăm inh.

Inh krao khan apinh Kră Yang yua pham Sư ôp rơgoh, rơih iŏk inh jing bơngai lăm Sư, pơnhen đĭ-đăng dôm anih hrĕp lăm jơhngơ̆m inh, păng ôp rơgoh dôm tơdrongkơnê̆ oei lăm tơdrong arih inh, đơ̆ng lăm bơhngol, đon tơchĕng truh tơ akâu akar inh. Tơdah inh băt kơ inh jơ̆ kon Kră Yang păng đei iŏk tơdrong dŏng pơklaih boih, inh kư̆m băt kơ Sư oei pơnhen păng ôp rơgoh dôm tơdrong kơnê̆ oei hrĕp lăm jơhngơ̆m inh. Noh thoi hnam mă đe đei ôp rơgoh, tơ mum bơbŭng hnam mă oei đei wai dŭng. Yang Bơhngol ‘Lơ̆ng, Sư băt đĭ-đăng dôm lu tơdrong hrĕp lăm jơhngơ̆m, đei pơchrang tơdrong hơdah Sư truh tơ anih hrĕp noh, păng tơbăt kơ inh dôm tơdrong mă oei kăl kơ ôp rơgoh. Yua kơ Yang Bơhngol ‘Lơ̆ng tơplih, dôm tơdrong kơnê̆ noh rai hiong, wă kơ inh jing thoi bô̆i ‘lơ̆ng rơgoh, ăn kơ Kră Yang yua lăm tơdrong jang Sư.

Inh đei pơhrăm wă kơ kơchăng lăm tơdrong arih inh, wă kơ jing thoi minh pôm bô̆i ‘lơ̆ng rơgoh, na gô đơ̆ng Kră Yang gô yua inh bơ̆jang tơdrong jang sư. Gah inh jơ̆ arih lăm Sư, na Sư gô bơ̆jang lăm inh. Tơplih kơ inh adrin bơ̆jang hăm đon hlôh wao kơdih, inh pơhrăm oei arih lăm Kră Yang, păng ăn kơ Sư bơ̆jang lăm tơdrong arih inh.

Inh đei băt minh ‘nu bơngai layơ kư̆m adrin pơm tơ’bôh wă kơ lu bơngai jum dăr lăng tơ sư. Sư wă kơ lu drŏ-kăn lăp đon kơ sư. Lăm đon sư tơchĕng kơ akâu sư ‘lơ̆ng ‘bơ̆t anăp đe, tơplih kơ sư tơchĕng wă kơ đei jơhngơ̆m ‘lơ̆ng. Klaih kơ noh, sư rai adrin pơm wă kơ đe lăp đon kơ sư, na pơm kơ bơngai nai rai weh ataih đơ̆ng sư. Tơdrong sư kăl kơ băt jơ̆ thoi âu: athei arih ‘lơ̆ng tôm tơdrong lăm Kră Yang, na lu bơngai nai gô ‘bôh tơdrong noh đơ̆ng tơdrong arih, ưh kơ kăl kơ ih adrin tơ’bôh akâu wă kơ đe lăp đon ôh.

Tơpă, đei kơnhăm lăm tơdrong arih jơ̆ tơdrong ‘lơ̆ng. Mă-lei ‘nĕ kơ hăt kơ lăng tơ anăp, na hiơt kơ tơdrong gĭt kăl akâu ih kơdih, păng chơt hiôk hăm dôm tơdrong ih đei lăm năr ‘nâu. Tơdrong arih ih lăm jơ phŭt âu, tơ anih âu, jơ̆ tơdrong kăl tih tơpă! ‘Nĕ ăn kơ jơhngơ̆m ih tơchĕng kơ năr dơning lơ hloh. Sơ̆p Hla Bơar Nơ̆r ‘Bok Kei-Dei khan: “Thoi noh na đơ̆ng âu tơ anăp, iĕm ‘nĕ pă tơchĕng minh tơdrong kiơ kiơ. Năr dơning măk ai kơ năr dơning, năr âu măk ai kơ năr âu, yua kơ tơdrong kơ’bah bơ̆n rim năr đĕch” (Mathiơ 6:34). Athei tơchĕng kơ dôm tơdrong Kră Yang oei bơ̆jang lăm năr ‘nâu, tơplih kơ jơhngơ̆m ih tơtăm kơ năr dơning mă ih tam mă băt gô truh thoi yơ!

‘Bok Pôl pơtruh nơ̆r ‘Bok Kei-Dei khan sư đei pơhrăm oei hiôk lăm tôm tơdrong truh kơ sư. Sư chih thoi âu:

“Inh pơma kơ iĕm thoi noh ưh kơ sĭ inh jơ̆l kơ tơmam ưh kơ mah wă kơ iĕm tơgŭm inh ôh. Inh tơ’bơ̆p tơdrong thoi yơ kư̆m bưh jơhngơ̆m inh oei hiôk lei-lăi. Tơdrong noh ‘Bok Kei-Dei bơtho inh băt tôm boih. Mă arih pơmat-tat, mă arih hiôk jơnap inh băt tôm boih. Mă oei tơ yơ, mă tơdrong kiơ truh kơ inh, inh kư̆m juăt juăi boih, mă phĭ-phăt, mă pơngot rơwĕt, mă rơkah rơkai, dah ưh kơ mah. Inh kĕ iŏk dôm tơdrong ‘noh yua kơ inh gơnang kơ Yêsu Krist na Sư ăn kơ inh kĕ iŏk dôm tơdrong ‘noh. Tơ̆ng ưh, inh ưh kơ kĕ ôh.” (Philip 4:11–13)

Athei lăng gĭt kăl bĕ kơ tơmam ăn đĕch mă đei anăn “năr ‘nâu”. Kră Yang đei pơjing ih hăm tơdrong mơsêh hlĭch tơpă. Sơ̆p Hla Bơar Nơ̆r ‘Bok Kei-Dei bơtho kơ bơ̆n băt kơ Kră Yang hlôh tôm tơdrong Sư đei tơdă ăn kơ ih. Noh jơ̆ dôm tơdrong hiôk, ưh kơ tơdrong pơmat-tat ôh. Sư kư̆m băt đĭ-đăng dôm tơdrong ih hưch hanh lăm jơhngơ̆m, păng dôm tơdrong Sư đei ăn oei lăm tơdrong arih ih.

Tơdrong jang ‘lơ̆ng mă Kră Yang đei bơ̆jang lăm tơdrong arih ih, Sư oei pơm ling-lang truh kơ tơdrong noh ‘blep tôm. Rŏ lăng năr âu ih tam mă ‘bôh tơdrong noh, mă-lei nơ̆r Sư đei pơkă ưh kơ đei tơplih ôh. Athei kĕ chơ̆n păng lui kơjăp. Na klaih kơ noh, ih gô ‘bôh tơdrong Kră Yang pơklaih ih.

Rŏ lăng dang ei ih oei kăl kơ Kră Yang dŏng pơklaih ih đơ̆ng tơdrong arih gleh, dah ih oei hơmĕng kơ tơdrong arih đei hiôk chơt hloh dơ̆ng truh kơ ih. Mă khan thoi yơ, athei ‘blŏk ling-lang kơ Kră Yang đei pơjing tôm tơdrong lăm plĕnh teh, păng Sư kư̆m pơjing ih mơ̆n. Sư hlôh tôm tơdrong ‘lơ̆ng mă Sư đei pơkă ăn kơ tơdrong arih ih, păng Sư gô pơm ‘blep tôm tơdrong Sư đei pơkă noh. Yua kơ thoi noh, tơdah tơdrong arih ih lăm năr ‘nâu tam mă truh thoi ih chang hơmĕng, ih kư̆ kơ oei hiôk, lui gơnang kơ Kră Yang oei chông ba tơdrong arih ih kiơ̆ thoi tơdrong ‘lơ̆ng mă Sư đei wă ăn kơ ih.

Apĭnh đĭ đăng krao khan hơdai: Bơnê kơ Kră Yang yua kơ Ih ăn kơ kon minh năr plơ̆ng đei arih lăm tơdrong ‘mêm mơnat đơ̆ng Ih. Lăm tơdrong arih ‘bĕnh kơ tơdrong jang hrăt hrot, apinh ‘Bă bơtho kon băt pơdơh akâu, oei hrĕp hiôk lăm Ih, păng lăng gĭt kăl rim jơ phŭt lăm năr ‘nâu mă Ih đei ăn kơ kon. Apinh Ih wei-lăng jơhngơ̆m kon huay kơ đei tơdrong tơchĕng kơ năr dơning, wă kơ kon băt lui gơnang kơ dôm tơdrong ‘lơ̆ng mă Ih đei pơkă ăn kơ tơdrong arih kon, arih tôm lăm năr ‘nâu păng ăn kơ Ih chông ba tơdrong arih kon kiơ̆ thoi Ih wă. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kơplah lu bơ̆n băt sơng iŏk dôm tơdrong Kră Yang đei dan lăm jơhngơ̆m bơ̆n, păng băt kơ dan tơdrong hơpơi lăm tơdrong Kră Yang wă, lu bơ̆n gô hlôi mơn đei hiôk thoi ‘bok Pôl đei pơma khan sơ̆, hăm tơdrong hiôk đơ̆ng Kră Yang, mă hloh kơ đon bơ̆n hlôh wao. Athei dan jơhngơ̆m lui gơnang kơ Kră Yang, yua kơ ih jơ̆ tơmam đơ̆ng Sư pơjing păng Sư đei ăn kơ ih pŭn hiôk rơkah rơkai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.