Đei layơ kơplah ih iung đơ̆ng tep, ih đei mơn kơ jơhngơ̆m ih trăp trĭn yua kơ minh tơdrong ưh kơ lăp đon dih băl, tam mă đei pơkeh đang? Dôm tơdrong pơjah tơgar băl đunh bơih oei đei lăm jơhngơ̆m, pơm kơ lu bơ̆n gleh lap, chhŭr nuih, păng rai tơ hiong lê̆ tơdrong hiôk-hian lăm jơhngơ̆m bơ̆n. Lăm pơge năr ‘nâu, rŏ lăng dôm tơdrong pơm ăn kơ jơhngơ̆m sơ’ngon păng dôm tơdrong pơjah tơgar băl oei iŏk lê̆ tơdrong hiôk hian lăm tơdrong arih ih? Lu bơ̆n athei pơhrăm thoi yơ wă lĕch đơ̆ng dôm tơdrong pơjah tơgar băl noh, păng chă tơdrong pơdơh hiôk hian lăm Kră Yang?

Năr ‘nâu, năr 02/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Craig von Buseck kơ̆l ‘bai ANIH SĂ RƠHƠI

“Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ-đăng bơngai.” (Rôm 12:18)

Tơdrong pơjah tơgar băl ưh kơ layơ khan tơdrong hiôk chơt ôh. Kư̆m đei, tơdrong noh pơm kơ lu tơdrong ih đei adrin pơjing gô hiơ̆ hyĭn, truh tơ rai kơdŭn tơ rŏng. Isăk, kon drŏ-nglo Abraham, kư̆m đêl đei tơ’bơ̆p tơdrong thoi noh mơ̆n.
Thoi Kră Yang đei ăn kơ Abraham tơdrong pŭn hiôk, Sư kư̆m ăn kơ Isăk tơdrong pŭn hiôk rơkah rơkai. Sơ̆p Hla Bơar Nơ̆r ‘Bok Kei-Dei bơtho khan, lăm sơnăm noh, Isăk choh jang lăm tơring, na sư đei kĕch yuă iŏk lơ hloh kơ adrol hrĕng wơ̆t. Sư đei lơ triu, rơmo păng đĭch drŏ-nglo đam drŏ-kăn, truh kơ kon pơlei Philistin đei ‘ngeng klai kơ sư. (Blŭng-a 26:12–14)

Yua kơ tơdrong ‘ngeng klai noh, lu kon pơlei Philistin ‘bŭ đĭ đăng sơlŭng đak mă lu đĭch đam Abraham, ‘bă Isăk đei sir sơ̆.

Tơdrong pơjah tơgar băl rai gleh hloh dơ̆ng, truh kơ pơtao Philistin athei khan kơ Isăk weh đơ̆ng dêh char noh. Sư khan:

“Weh bĕ đơ̆ng anih inh âu: Yua kơ ih mơdrŏng jơnap hloh kơ lu nhôn pă băt dang yơ.” (Blŭng-a 26:16)

Thoi noh Isăk lê̆ anih noh, năm tơ thŭng Gêrar hăm hơmĕng kơ sư oei hiôk-hian. Tơ noh, sư ăn kơ lu đĭch đam sir ming sơlŭng đak mă lu kon pơlei Philistin đei ‘bŭ sơ̆ noh. Lu đĭch đam Isăk kư̆m sir thim minh pôm sơlŭng đak plơ̆ng păng ‘bôh đak lĕch đơ̆ng noh.

Mă-lei tơdrong pơjah tơgar băl tam mă tôch ôh. Lu bơngai wei triu tơ Gêrar truh pơjah tơgar hăm lu bơngai wei triu Isăk yua kơ sơlŭng đak noh. Na Isăk krao anăn sơlŭng noh Êset, wă khan “tơdrong pơjah tơgar băl”. Lu đĭch đam sư sir dơ̆ng minh pôm sơlŭng đak nai, mă lu đe nai kư̆m pơjah tơgar băl dơ̆ng. Na sư krao anăn sơlŭng noh Sêtna, wă khan “tơdrong areh dih băl”.

Isăk lê̆ anih noh păng năm sir minh pôm sơlŭng đak nai dơ̆ng. Gah sơlŭng âu, lu sư ưh pă pơjah băl boih, na Isăk krao anăn Rêhôbôt, wă khan “anih să rơhơi”. Sư khan: “Dang ei Kră Yang ăn kơ lu bơ̆n să rơhơi păng lu bơ̆n gô đei mơdrŏng lăm char ‘nâu.” (Blŭng-a 26:22)

Isăk păng lu đĭch đam sư oei adrin sir dôm lu sơlŭng đak, truh kơ lu sư ưh pă đei bu pơjah tơgar hăm lu sư tơ Rêhôbôt. Đơ̆ng rŏng kơ noh, kơplah Isăk năm tơ Bêrsêba, Kră Yang jur tơ sư păng pơkă dơ̆ng hăm sư, ăn kơ sư băt kơ nơ̆r Sư đei pơkă păng tơdrong Kră Yang oei hơdai hăm sư. Kră Yang khan: “Inh boih Kră Yang ‘Bok Kei-Dei Abraham, ‘bă ih, ‘nĕ kơ hli, Inh oei hơdai ih. Inh gô ăn thim pŭn hiôk kơ ih păng ăn adrĕch adrung ih jing lơlap, yua kơ Abraham đĭch đam Inh” (Blŭng-a 26:24)

Truh tơ tuch luch, Isăk păng hnam dơnŏ sư kư̆m đei minh anih pơdơh hiôk kơjăp tơ noh.

Bơngai chih lăm Sơ̆p hla bơar Hêbơrơ kư̆m ăn kơ lu bơ̆n nơ̆r pơlung mă mơ̆ng toplơ̆ ‘biơ̆:

“Kơlih kơ thoi noh na bơ̆n athei adrin lui mă tơpă wă kơ gơh mơ̆t pơdơh tơ ‘Bok Kei-Dei…” (Hêbơrơ 4:11)

Nơ̆r pơlung noh pơm kơ lu bơ̆n ‘blŏk tơ tơdrong arih mă Isăk đei yak năm. Sư păng lu đĭch đam oei adrin sir dôm lu sơlŭng đak, ưh kơ lê̆ tơdrong jang, truh kơ lu sư achăng lê̆ anih pơjah tơgar băl, na chă ‘bôh đei “ tơdrong pơdơh” tơ Rêhôbôt. Tơ anih noh, Isăk đei tơ’bơ̆p Kră Yang, păng đơ̆ng noh tơdrong arih sư ưh pă thoi sơ̆ dơ̆ng bơih.

Kơplah jơhngơ̆m lu bơ̆n druh kiơ̆ lăm dôm tơdrong pơjah tơgar băl, lu bơ̆n tơnăt kơ oei lăm Kră Yang. Ih hăm đei tơ’bơ̆p tơdrong pơjah tơgar băl ưh? Dah gơh, athei chă bơngai sơlam păng hiôk hơiă hăm đe. Athei huay kơ jô̆ yo kơ đe.
“Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ-đăng bơngai.” (Rôm 12:18)

Ih hăm băt kơ dôm tơdrong pơjah tơgar băl đunh pơm kơ tơdrong arih ih rai gleh lap, păng ưh pă đei trong lĕch đơ̆ng tơdrong noh ưh? Dôm tơdrong pơjah tơgar băl mă tam mă pơtruh nhen thoi lĕ kơ teh păng tơmo ‘bŭ pơđĭ dôm lu “sơlŭng đak” lăm tơdrong arih ih, pơm ăn kơ ih tơhiong lê̆ dôm lu tơmam kăl mă Kră Yang đei ăn kơ ih.

‘Blŏk bĕ kơ nơ̆r pơlung đơ̆ng ‘bok Pôl: “Mă tơduă buăl bơ̆n bơngai lui pơm ưh kơ lăp hăm bơ̆n, bơ̆n hơhrĕng đĕch ‘nĕ kơ jô̆ yo. Kră Yang Yêsu ưh pă jô̆ yo kơ bơ̆n boih, na bơ̆n kư̆m lei-lăi ‘nĕ kơ jô̆ yo kơ buăl bơ̆n.” (Kôlôssê 3:13)

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, kon bơnê kơ Ih yua kơ Ih jơ̆ tu tơdrong hiôk-hian tơpă kơ kon. Lăm dôm tơdrong pơjah tơgar băl păng sơ’ngon apinh Ih wei-lăng jơhngơ̆m kon huay kơ chhŭr nuih, hil areh păng dôm tơdrong pơjah tơgar băl mă ưh kơ kăl yua. Apinh Ih ăn kơ kon jơhngơ̆m pơyom wă băt huay kơ jô̆ yo kơ đe, tơgŭm kon băt kơdâu chă tơdrong sơlam păng adrin oei hiôk hơiă hăm đĭ-đăng bơngai. Apinh Ih ba trong kon truh tơ anih mơ̆t pơdơh hiôk-hian lăm Ih, wă kơ rim năr kon gơh arih lăm tơdrong hiôk-hian păng oei jê̆ Ih rai lơ hloh dơ̆ng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah ih oei gleh lap yua kơ dôm tơdrong pơjah tơgar băl đunh bơih, ‘nĕ kơ oei lăm tơdrong trăp trĭn pơmat-tat noh dơ̆ng. Athei rơih iŏk huay kơ jô̆ yo, băt kơdâu chă tơdrong sơlam păng hiôk hơ iă hăm đe, păng ăn kơ Kră Yang ba ih truh tơ “Rêhôbôt” – anih să rơhơi kơ ih – jơ̆ anih mă jơhngơ̆m ih gơh mơ̆t pơdơh hiôk-hian hăm Sư. Tơ anih noh, dôm lu sơlŭng đak pŭn hiôk mă ih tơchĕng khan đei ‘bŭ pơđĭ boih, gô đei sir pơih dơ̆ng păng đak gô lĕch dơ̆ng. Păng ih gô đei oei jê̆ Kră Yang rai lơ hloh, mơ̆ng nơ̆r Sư rai rơđah hloh, păng tơ’bơ̆p tơdrong Sư oei hơdai hăm ih ‘nao hloh, jrŭ hloh dơ̆ng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.