03.11 Amăn Jơ Krao Khan Rim Năr: DÔM LU TƠDRONG PƠGĂN BLƯ TRUH

Lăm minh năr tôm tơdrong oei kiơ̆ thoi tơdrong tơdă na blư truh đei bơngai krao điê̆n thoăi, minh tơdrong chih roi kăl kơ tơl tơwih, dah đei bơngai bu chă kơplah buăl oei hrăt hrŏt. Buăl hăm đei blĕk ưh? Nơ̆r blŭng a bơ̆n juăt kơ pơma: “Yua kơ liơ dang ei?”. Lu bơ̆n lăng tơdrong tơdă lu bơ̆n đei pơjuăl, na ưh kơ lăng đơ̆ng rŏng đei bơngai kăl kơ mơ̆ng, bơngơ̆t păng pơlung. Dah năr ‘nâu đei tơdrong kiơ pơjuăl tơdrong tơdă buăl, noh jơ̆ pơm kơ buăl gleh lap, dah noh minh tơdrong Kră Yang poih ăn ‘bơ̆t anăp buăl?

Năr ‘nâu, năr 03/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Adam Howard kơ̆l ‘bai DÔM LU TƠDRONG PƠGĂN BLƯ TRUH

“Yêsu ‘bôh lu bơngai tơpôl noh Sư mơnat dêh, lu sư oei hli sơ’ngon đon ưh kơ băt pơm thoi yơ, dang lĕ kơ triu ưh kơ đei tơ’ngla wei-lăng.” (Mathiơ 9:36)

Lăm chăl sơ̆p hla bơar nơ̆r ‘Bok Kei Dei ‘nâu, lu bơ̆n đei ‘bôh tơdrong mơsêh pơtrơp băl. Kră Yang Yêsu pơma dơnuh păng tơl tơwih nơ̆r jet jơ̆ng ‘bang Yôhan (trong 14). Mălei truh tơ trong 18, kơplah Kră Yang đei pơma khan, tơdrong pơma dơnuh blư truh đei pơgăn…

‘Nâu blŭng a đei bơngai pơgăn tơdrong pơma dơnuh Kră Yang Yêsu. Đơ̆ng trong 18 truh tơ trong 35, hla bơ ar Mathiơ roi pơlơ̆k đơ̆ng bơngai ‘nâu truh tơ bơngai ‘nai chă Kră Yang hăm tơdrong kăl wă phara. Lăm 17 trong nơ̆r ‘Bok Kei Dei, Kră Yang tơ’bơ̆p lơ bơngai jĭ jăn, măt tol, yang kơnê̆ mơ̆t, kŭm đei bơngai lôch.

Tơdrong ‘nâu keh bơih tơdrong nai đei truh. Mălei tŏk bŏk tôm tơdrong pơtrơp truh, Kră Yang Yêsu oei ‘măn jơ ăn kơ rim ‘nu bơngai. Kră Yang ưh kơ sĭ pơkeh tơdrong kăl wă ‘bơ̆t anăp, na Sư kŭm ‘bôh păng bơngơ̆t kơ lu bơngai oei ‘bơ̆t anăp sư. Đơ̆ng rŏng kơ tôm tơdrong tơ’bơ̆p, păng tôm tơdrong mơsêh, Kră Yang Yêsu ‘bĕnh kơ tơdrong ‘mêm mơnat. (trong 36)

“Yêsu ‘bôh lu bơngai tơpôl noh Sư mơnat dêh, lu sư oei hli sơ’ngon đon ưh kơ băt pơm thoi yơ, dang lĕ kơ triu ưh kơ đei tơ’ngla wei-lăng.” (Mathiơ 9:36)

Inh jet kơdih, dah tôm tơdrong noh truh pơtrơp băl kơ lu bơ̆n, lu bơ̆n hăm kĕ chơ̆n dah ưh? Đei minh ‘bar ‘nu krao dah tơdrong pơđâu hiơ̆ tơ anih jang kŭm pơm kơ inh gleh lap, tam mă roi đei truh đơ̆ng bơngai ‘nâu bơngai nai chă bơ̆n kăl wă tơgŭm. Bơ̆n ‘bônh kơ gleh lap kơ plah đei lơ bơngai jum dăr kơ bơ̆n kăl kơ tơgŭm – đơ̆ng tơdrong răroi, tơ trong, dah lăm hnam dơnŏ. Mălei, tŏk bŏk lơ tơdrong kăl truh hăm tôm tơdrong pơgăn tơdrong oei jang, Kră Yang Yêsu oei lăng khŭl tơpôl hăm jơhngơ̆m ‘mêm mơnat.

Rŏ lăng bơ̆n khan yua kơ Kră Yang Yêsu jơ̆ ‘Bok Kei Dei liơ kơ Sư gơh pơm tôm tơdrong noh hmă đĕch, na lu bơ̆n jơ̆ kon bơngai đĕch. Mălei apinh nĕ kơ hiơt, Yang Bơhngol ‘Lơ̆ng oei oei lăm bơ̆n. Yang Bơhngol ‘Lơ̆ng tơplih jơhngơ̆m bơ̆n, păng ăn kơ bơ̆n gơh ‘mêm kơ bơngai nai kiơ̆ thoi Sư lăp đon. Sư bơtho bơ̆n ‘mêm mơnat păng huay kơ jô̆ yo bơngai nai, lăm kơplah tơdrong tơchĕng, jơhngơ̆m pran păng jơnăr bơ̆n nhen thoi ưh kơ đei rơhơi.

Athei pơwao lăng, tơdah Kră Yang Yêsu achăng lê̆ lu bơngai blư chă Sư lei liơ?
Wă khan kon drŏkăn bơngai kră wei lăng hnam akŭm oei ‘bĭch ‘bơ̆t doh wă jê̆ lôch, wă khan bơngai drŏ kăn tuh pham oei jĭ jăn. Wă khan ‘bar ‘nu bơngai măt tol oei arih lăm măng mu păng bơngai yang kơnê̆ mơ̆t oei đei tơdrong yoch chô̆ pơkơ̆ng. Tôm tơdrong mơsêh noh, dôm tơdrong arih đei tơplih noh, đei nhen thoi blư tơ’bơ̆p, yua kơ Kră Yang Yêsu dơ̆ng ‘bơ̆t anăp rim ‘nu bơngai kăl kơ Sư.

Rŏlăng năr ‘nâu, tơdrong blư pơgăn tơdrong tơdă buăl poih ăn wă tơplih tơdrong arih minh ‘nu bơngai bu noh. Bơ̆n hăm wă adrin tŭk lê̆ tơdrong tơdă kơdih, wă lăng lăng tơdrong kăl bơngai nai păng lăng lăng Kră Yang gô pơm kiơ đơ̆ng tơdrong bơ̆n chu yom păng ‘mêm mơnat kơ bơngai nai?

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, tŏk bŏk tôm tơdrong hrăt hrot rim năr, kon hơpơi wă kơ tôm tơdrong kiơ̆ thoi kon proh hơmet. Apinh Ih huay kơ jô̆ yo kơplah kon kơnhăm dêh kơ tơdrong jang kơdih na hiơt lê̆ kơ lu bơngai oei kăl kơ tơdrong ‘mêm mơnat păng pơlung tưk tơiung. Apinh ăn kơ kon đei jơhngơ̆m mơn băt kơ tơdrong ih pơih ăn, băt dơ̆ng ‘mơ̆i, băt ‘mơ̆ng păng tơ’bôh tơdrong ‘mêm mơnat. Apinh yua tôm tơdrong ‘lơ̆ng iĕ ioch kon rim năr, wă kơ tơdrong ‘mêm tih Ih atŭt ‘bơm bơngai nai đơ̆ng tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, năr ‘nâu, kơplah đei bơngai bu blư kăl kơ buăl, athei dơ̆ng lăng tŏsĕt adrol kơ lăng noh jơ̆ tơdrong anat dah pơgăn tơdrong tơdă bơ̆n. Apinh Kră Yang ăn kơ buăl băt mơn kơ bơngai kăl kơ pơgling đon, pơlung dah ‘mêm mơnat adrol. Đơ̆ng buăl adrin dơ̆ng lăng păng ‘măn jơ ăn kơ bơngai kăl kơ buăl, Kră Yang yua tơdrong iĕ noh wă tơplih tơdrong tih lăm tơdrong arih lu sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.