Rŏ lăng lu bơ̆n đei kơtơ̆ng nơ̆r pơma thoi âu: “ Rĕi tơdrong tơchĕng, kĕch yuă tơdrong pơm. Rĕi tơdrong pơm, kĕch yuă tơdrong juăt kơ pơm. Rĕi tơdrong juăt kơ pơm, kĕch yuă jơhngơ̆m đon tơchĕng. Rĕi jơhngơ̆m đon tơchĕng, kĕch yuă tơdrong arih.” Lăm tơdrong arih rim năr, rim tơdrong bơ̆n tơchĕng păng rim tơdrong bơ̆n pơm yua kơ đơ̆ng đon lui gơnang kơ Nơ̆r ‘Bok Kei-Dei, gô ba tơdrong arih lu bơ̆n năm tơ tơdrong đei pŭn hiôk mă ‘Bok Kei-Dei đei dan ăn kơ rim ‘nu bơngai.

Năr ‘nâu, năr 04/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai ĐON LUI TƠPLIH CHĂL ARIH

“Yă Rahap sơ̆ sư bơngai đi, đơ̆ng rŏng sư đei đon lui, na sư huay kơ lôch hơdai hăm lu bôl sư bơngai mă ưh kơ lui kơ ‘Bok Kei-Dei, yua kơ sư sơng iŏk lu bơngai Isơrael, lu mă năm lăng tông pơlei sư ki.” (Hêbơrơ 11:31)

Hăm jơhngơ̆m chơt hiôk, Trà Mi dui ti inh, klah asong rup đei lơ dreng brê, kok găm. Nhi ngôi tơoei tơ hơnă hnam, kŭp kơ̆l nhi rơih rim hlak hla bơar, bơngơi đŏk hăm jơhngơ̆m chơt hiôk. Trà Mi dơhlâu kơ rup minh ‘nu linh chĕp minh tŏ tơju kơjung, sư khan: “Đơ̆ng rŏng kơ noh, bơngai âu iŏk tơju bet rơhiĕo Kră Yang, đak păng pham lĕch đơ̆ng noh.”

Lăp Trà Mi tơ’bôh inh tơchĕng tơtăm, sư pơihh tĕnh hla bơar tơ anăp, dơhlâu tơ rup đei minh ‘nu linh jang ‘lơ̆ng păng hơgơp tơmo ưh kơ đei kiơ lăm noh. Sư khan dơ̆ng: “’Nĕ kơ hli, Kră Yang ưh kơ đei lôch ôh, Sư iung arih boih. Dang ei Sư oei tơ kơpal plĕnh ti, Sư mơ̆ng kơtơ̆ng bơ̆n krao khan.”

Inh tơhôih, jơhngơ̆m inh chơt hiôk, mă-lei đơ̆ng rŏng kơ noh inh oei tơchĕng lăm jơhngơ̆m, klĕng inh hơnhĕo yua kơ tơchĕng. Kơplah noh, Trà Mi khan dơ̆ng: “Tơpă mơ̆n, rim năr Trà Mi oei krao khan apinh Kră Yang.”

Inh hăt hot kơ jet sư: “Na… Kră Yang đei kơtơ̆ng tơpă ưh?” Lăm jơhngơ̆m inh, inh ‘blŏk kơ dôm măng đei apo hli krưp mă đei pơm kơ inh hli đunh khei bơih.
Trà Mi lăng tơ inh, pơma hăm nơ̆r kơjăp: “Đei tơpă, Kră Yang kơtơ̆ng tơpă. Bơ̆n pơma tơdrong kiơ hăm Sư, Sư kơtơ̆ng đĭ-đăng.”

Kơtơ̆ng sư pơma thoi noh, inh dui jơhngơ̆m tai minh wơ̆t dơ̆ng, đei jơhngơ̆m hơdơ̆ng păng jet sư: “ ba krao khan hăm Kră Yang hăm gơh ưh?” Nơ̆r inh pơma tơ lĕch nhen thoi pơma kiơ̆ kơ kial đĕch, na jơhngơ̆m inh trăp trĭn. Inh băt kơ hnam dơnŏ inh ưh kơ đei lui kơ Kră Yang, na Kră Yang ưh kơ Kră Yang inh, thoi yơ Sư gơh kơtơ̆ng inh krao khan?

Lăng tơ Trà Mi sư mơmrơ̆ng ưh kơ pơma, inh hmach, mơlâu yua kơ inh đei jet minh tơdrong mă rŏ lăng ưh kơ trŏ. Inh wă pơma tơdrong nai, nă blư, Trà Mi iung păng pơma khan:

– “Gơh , ba krao khan hơdai hŏ.”

– “Tơ yơ?” Inh jet.

– “Tơ âu.” Pơma đang bơih, Trà Mi sơtơ̆p kŭl tăng tơ hơnă hnam pơm hăm ‘long, lăng tơ inh păng khan: “Ih sơtơ̆p kŭl tăng hơdai hăm inh hŏ.”

Inh mơlâu, lăm jơhngơ̆m inh oei tơchĕng: Liơ gơh krao khan thoi âu? Ưh kơ đei chơnang soi kơkuh, ưh kơ đei tơmam soh ŭnh ‘nhui, na thoi yơ gơh krao khan? Mă-lei Trà Mi kŭp kơ̆l hăm jơhngơ̆m chu yom, sư tep ‘măt, ‘bar pah ti sư proh kơkuh krao khan tơpă. Lăng tơ sư, inh mơlâu yua kơ tơdrong inh tơchĕng. Na inh kư̆m kŭp kơ̆l kiơ̆ sư. Tep măt, kơtơ̆ng nơ̆r Trà Mi krao khan apinh Kră Yang, na truh tơ …

“A-men!”

Inh ‘bôh hlĭch,  tam mă băt thoi yơ.  ‘Măt inh lar, lăng kiơ̆ ti Trà Mi pơih hrĕnh tơ hla bơar tơ hlak tuch luch. Sư dơhlâu tơ chư chih kiĕr păng khan: “Ba đŏk hơdai tơdrong krao khan âu hŏ.”

Nhi đŏk hơdai tơdrong krao khan noh hăm jơhngơ̆m chu yom, pơma hơdai minh nơ̆r “A-men!” rơ̆n. Trà Mi dui inh iung hăm jơhngơ̆m chơt hiôk, păng khan: “Inh ăn kơ ih sơ̆p hla bơar rup âu. Rim năr ih krao khan kiơ̆ nơ̆r đei chih lăm sơ̆p hla bơar âu hŏ.” Inh chĕp sơ̆p hla bơar hơ’mon rup noh, kơdâu hrĕnh jơ̆ng pă truh tơ teh, jơhngơ̆m hiôk inh ưh pă băt pơma thoi yơ. Lăm đĭ kơ bơyan pơdơh,  rim năr inh krao khan apinh Kră Yang hăm jơhngơ̆m chu yom, kơ chôt jơ̆ng inh truh tơkang, hiôk-hian na tep. Păng đei minh năr, inh ‘bôh hlĭch huay pă hli păng dôm lu tơdrong apo ưh pă đei bơih.

Thoi noh, dôm năr blŭng-a mă inh tơ’bơ̆p Kră Yang oei chĕp kơjăp lăm tơdrong arih inh  truh tơ dang ei. Dôm tơdrong noh kư̆m jing tơdrong pơlung inh wă oei adrin chă, pơhrăm păng băt hloh dơ̆ng kơ Kră Yang ‘Bok Kei-Dei, yua kơ “Đĭ-đăng bơngai mă băt kơ krao khan apinh Sư, Kră Yang tơgŭm pơklaih lu sư lei-lăi đĕch.” (Rôm 10:13)

Tơdrong arih Rahap kư̆m pơsĭt tơdrong  noh, kư̆m thoi tơdrong Kră Yang đei pơklaih inh sơ̆. Rahap rơih iŏk lui gơnang kơ ‘Bok Kei-Dei, mă ưh kơ  Kră Yang kon pơlei sư kơdih ôh. Yua kơ tơdrong lui noh,  hnam dơnŏ sư đei pơklaih đơ̆ng tơdrong lôch, păng tơdrong arih sư tơplih tơpă.

Sơ̆p hla bơar Jôsuê 2 roi kơ lu bơ̆n tơdrong truh tơ pơlei Jêrikô, kơplah đĭ-đăng kon pơlei lăm noh hli tơrơ dêh, jơhngơ̆m lu sư hli krưp yua kơ lu sư kơtơ̆ng tơdrong khŭl linh Isơrael nuih pran năm jê̆. Nơ̆r roi gah bre bơngai mă đei wơh năm chop lăng char noh kư̆m truh tơ ‘bok pơtao Jêrikô. Kơplah ‘bok pơtao păng đĭ-đăng kon pơlei Jêrikô lui gơnang kơ dur pơlei sư kơjăp, Rahap rơih iŏk lui gơnang kơ tơdrong nuih pran đơ̆ng khŭl linh mă Kră Yang ‘Bok Kei-Dei oei hơdai. Sư ba bre ‘bar ‘nu bơngai chop lăng char noh tŏk tơ kơpal bơbŭng hnam, ôn lê̆ bre sư lăm bơmreh brang mă sư đei sơ̆k dan tơ noh. (Jôsuê 2:3–6)

Tơdrong Rahap pơm nuih tơpă, ưh kơ chu kiơ̆ nơ̆r pơtao, jơ̆ tơdrong lĕch đơ̆ng lơ năr sư đei kơtơ̆ng păng pơnhen dôm nơ̆r roi gah lu bơngai Isơrael. (Jôsuê 2:10) Sư pơm thoi noh yua kơ sư đei băt păng đei đon lui kơ tơdrong Kră Yang ‘Bok Kei-Dei đei pơkă wă pơm ăn kơ lu bơngai Isơrael, khŭl bơngai mă sư đei kơtơ̆ng anăn đơ̆ng dôm tơdrong lu sư blah iŏk lơ teh đak. (Jôsuê 2:9)

Rahap pơma hăm nơ̆r nuih pran kơjăp ‘bơ̆t anăp bre ‘bar ‘nu bơngai chop lăng char noh:

“Yua kơ Kră Yang ‘Bok Kei-Dei lu iĕm boih Kră Yang ‘Bok Kei-Dei tih hloh, mă oei tơ kơpal plĕnh ti păng ala teh âu.” (Jôsuê 2:11). Nơ̆r Rahap pơma tơbăt tơdrong đon lui kơjăp kơ Kră Yang ‘Bok Kei-Dei đei lu bơngai Isơrael, păng tơdrong sư pơm yua kơ đon lui noh, đei pơklaih sư hăm đĭ-đăng hnam dơnŏ sư, huay kơ lôch kơplah khŭl linh Isơrael blah iŏk pơlei Jêrikô.

Tơdrong Rahap rơih iŏk lui gơnang kơ ‘Bok Kei-Dei đei pơm kơ tơdrong arih sư tơplih. Đơ̆ng minh ‘nu bơngai drŏ-kăn đi, kiơ̆ kơ kon bơngai lăng đơ̆ng sơ̆ truh tơ dang ei tơdrong arih lŭch đĭ đăng, tơdrong arih Rahap đei tơplih ming ‘nao tom tơdrong. “Thoi noh Jôsuê wei-lăng tơdrong arih Rahap bơngai drŏ-kăn đi, hăm đĭ-đăng lu bơngai lăm hnam dơnŏ ‘bă sư, lu sư oei hơdai hăm lu bơngai Isơrael, truh tơ dang ei, yua kơ sư đei ôn bre bơngai chop lăng, mă Jôsuê wơh năm chop lăng pơlei Jêrikô.” (Jôsuê 6:25)

Ưh kơ sĭ dôm noh đĕch ôh, tơdrong Rahap pơm yua kơ đon lui đei pơih ăn kơ adrĕch adrŭng sư. Anăn sư đei chih lăm hla bơar anăn lu ‘bok kơdră Kră Yang Yêsu Krist, Kon ‘Bok Kei-Dei, Sư jơ̆ ‘Bok Dŏng Pơklaih đĭ-đăng kon bơngai. (Mathiơ 1:5),tơdrong arih sư kư̆m đei chih lăm Hêbơrơ 11, hơdai hăm dôm lu bơngai đei đon lui kơjăp, mă ‘Bok Kei-Dei lăp đon kơ lu sư.

Kơplah inh tơchĕng kơ tơdrong arih Rahap, jơhngơ̆m inh hiôk yua kơ tơdrong ‘mêm mơnat păng tơdrong tơgŭm đơ̆ng ‘Bok Kei-Dei. Inh ‘blŏk dơ̆ng kơ jơ phŭt inh đei tĕnh tơlĕch nơ̆r  jet Trà Mi, yua kơ jơhngơ̆m inh hưch hanh tơpă wă lui gơnang kơ Kră Yang, Sư oei kơtơ̆ng nơ̆r inh krao khan. Lăm jơ phŭt noh, inh đei yak hlôi kơ dôm tơdrong juăt kơ tơdrong kơkuh păng tơdrong lui gơnang kơ yang nai lăm hnam dơnŏ nhôn kơplah noh sơ̆, tơdrong inh tĕnh rơih iŏk lăm jơ phŭt noh jơ̆ minh tơdrong mă inh ling-lang bơnê kơ Kră Yang. Sư băt ‘mêm mơnat kơ inh tơpă, yua kơ Sư đei kơtơ̆ng păng tơl nơ̆r inh krao khan.

Kră Yang đei ăn kơ inh tơ’bơ̆p tơdrong mơsêh mơyang Sư, pơklaih inh đơ̆ng lăm măng mu păng dôm tơdrong gleh pơmat lăm đon tơchĕng, pơm kơ inh hli krưp kơplah inh oei hơ’lơ̆p. Sư đei chông ba inh wih kiơ̆ tơdrong arih đei pŭn hiôk, ăn kơ inh jing kon Sư, păng truh tơ dang ei, inh oei chơt hiôk yua kơ tơdrong Sư wei-lăng, tơgŭm păng ‘mêm mơnat kơ inh rim năr.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ Ih ‘mêm mơnat, kơtơ̆ng nơ̆r krao khan, păng dŏng pơklaih đĭ-đăng bơngai mă pơih jơhngơ̆m lui gơnang kơ Ih. Kon bơnê kơ Ih yua kơ Ih đei năm chă păng pơklaih dôm lu bơngai hiong răm. Apinh Yang Bơhngol ‘Lơ̆ng ăn kơ lu nhôn tơdrong nuih pran, tơgŭm lu nhôn đei jơhngơ̆m ‘maih wă păng pơm kiơ̆ tơdrong ‘lơ̆ng mă Ih wă ăn kơ tơdrong arih lu nhôn, chu yom păng năm kiơ̆ Ih hăm jơhngơ̆m tơpăt ling-lang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Rahap đei rơih iŏk lui gơnang kơ ‘Bok Kei-Dei păng pơm tơdrong jang yua kơ đon lui kơjăp. Đơ̆ng tơdrong sư rơih iŏk noh đei pơm kơ tơdrong arih sư păng đĭ-đăng hnam dơnŏ sư tơplih ming ‘nao. Lăm năr ‘nâu, Nơ̆r ‘Bok Kei-Dei kư̆m oei krao apinh lu bơ̆n adrin pơih jơhngơ̆m lui gơnang kơ Kră Yang păng arih kiơ̆ Nơ̆r Sư. ‘Nĕ kơ ăn dôm tơdrong arih gleh, dôm tơdrong đơ̆ng ki sơ̆ truh, pơgơ̆r tơdrong arih lu bơ̆n. Athei pơtơm đơ̆ng tơdrong tơchĕng, tơdrong rơih iŏk, păng tơdrong pơm yua kơ đon lui kơjăp, gơnang kơ Nơ̆r ‘Bok Kei-Dei. Lăm năr ‘nâu, athei jet akâu ih kơdih thoi âu: Inh kăl kơ lui gơnang kơ Kră Yang lăm tơdrong kiơ? Păng inh gô pơm tơdrong kiơ wă tơbăt đon lui noh? ‘Nĕ kơ bơwei nơ̆r tơl noh lăm jơhngơ̆m ih đĕch ôh. Athei pơ̆n nuih, rơih iŏk năm kiơ̆ đon lui kơjăp, yua kơ minh tơdrong rơih iŏk đơ̆ng đon lui gơnang kơ Kră Yang lăm năr ‘nâu gô pơih tơnang ‘măng ‘nao kơ tơdrong arih lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.