Puas tau muaj zaum twg koj nyuam qhuav sawv tsees, koj hnov zoo li muaj lub nra tsuam nyhav vim ib qhov teeb meem tseem tsis tau daws tas? Qhov kev tsis sib haum no nws nyob ntev ua rau peb qaug zog, iab siab thiab ua poob txoj kev kaj siab hauv siab. taig kis no, tsis paub tej kev iab siab kev sib tawm tsam ntawd puas txeeb txoj kev kaj siab hauv koj mus? Yuav ua li cas kom peb thiaj kawm tau txoj kev tawm hauv tej kev tsis sib haum thiab rov qab nrhiav tau lub sijhawm los so nyob hauv Vajtswv?

Hnub no, yog hnub 02/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Craig von Buseck dhau ntawm Zaj kawm QHOV CHAW DAV

“Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum” (Loos 12:18)

Teeb meem tsis tau muaj ib zaum twg yog yam uas tsis ua cas. Ntau zaug, nws tseem ua kom tej uas koj siv zog npaj tseg ntawd nres cia, lossis ua kom thaub qab. Ixaj, yog Aplaham tus tub, kuj ntsib dhau qhov no.

Ib yam li twb foom hmoov rau Aplaham, Vajtswv kuj foom hmoov nplua mias rau Ixaj. Vajluskub qhia paub xyoo ntawd, Ixaj tseb noob thiab sau tau tshaj puas npaug. Yawg muaj yaj, muaj tshis, muaj nyuj nrog rau ntau tus tub mab tub qhe txog qhov uas cov neeg Filitees pib khib yawg (Chivkeeb 26:12-14).

Vim khib, cov neeg Filitees thiaj muab pob zeb txhaws tas nrho Ixaj cov qhov dej – yog cov uas qhov dej uas Aplaham cov tub qhev twb xub khawb ua ntej lawm.
Kev tsis sib haum yim hnub yim huam loj txog qhov uas vajntxwv Filitees yuam kom Ixaj tawm qhov ntawd mus yawg hais: “Koj cia li khiav tawm hauv peb lub tebchaws no mus. Rau qhov koj muaj hwjchim tshaj peb lawm” (Chivkeeb 26:16).
Yog li Ixaj thiaj txav chaw mus rau hauv lub tiaj nrag Nkelales, kom tsis muaj neeg ua teeb meem rau nws. Nyob hauv no, yawg thiaj rov qab khawb cov qhov dej uas cov neeg Filitees tau txhub yav dhau los. Ixaj cov qhev thiaj khawb dua ib cov qhov dej tshiab thiab nrhiav tau tus cag dej txhawv.

Tiamsis kev sib txeeb yeej tsis xaus. Cov neeg yug tsiaj nyo hauv Nkelales tuaj txeeb tus cag dej ntawd, yog li Ixaj thiaj tis npe hu ua Enpes, txhais tias “Sib txeeb”. Ixaj cov qhev thiaj khawb dua lwm lub qhov dej, tiamsis rov qab muaj neeg tuaj txeeb dua, yawg thiaj tis npe hu ua “Sib ntxub”.

Ixaj khiav tawm qhov ntawd thiab khawb dua ib lub qhov dej. “Lub no tsis sib txeeb lawm, yawg thiaj tis npe “qhov chaw dav” thiab hais tias: “Nimno tus Tswv pub peb muaj av dav nyob hauv lub tebchaws no, thiab peb yuav muaj kev vammeej nyob ntawm no mus li.” (Chivkeeb 26:24).

Thaum kawg, Ixaj thiab Nws tsev neeg kuj nrhiav tau ib qhov chaw tso siab los so thiab khwv noj.

Tus sau phau Henplais thiaj txhawb dua lwm lo lus txhawb cuag li muaj ntsis sib tawm tsam:

“Yog li, peb thiaj siv zog mus kom txog qhov chaw so ntawd…”(Henplais 4;11).

Cov lus txhawb no ua rau peb xav txog Ixaj txoj kev taug. Yawg nrog nws cov qhev pheej khawb qhov dej, siv zog mus txog thaum uas lawv tawm ntawm qhov chaw sib txeeb ntawd thiab nrhiav tau “qhov chaw so” rau ntawm thaj chaw hu ua av dav. Ntawm no, Ixaj thiaj muaj ib lub sijhawm ntsib Vajtswv ntawm nws tus kheej, thiab yawg lub neej tsis zoo li yav dhau los.

Thaum lub siab no pheej raug rub mus rau tej kev sib txeeb, peb yooj yim ua poob txoj kev kaj siab thiab yuav tsis muaj lub siab tus nyob ntawm Vajtswv xub ntiag. Koj puas tab tom nyob hauv ib txoj kev sib raug zoo twg muaj teeb meem? Yog tau, cia li nrhiav kom muaj kev sib haum xeeb. Cia li sib zam txim.

“Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum” (Loos 12:18).

Koj puas hnov tias teeb meem yim nyob ntev ua rau yus lub neej yim qaug zog thiab tws kev? Tej kev sib txeeb tsis tau raug daws kom tas zoo li tej pob zeb txhawm puv nkaus lub qhov dej nyob hauv koj lub neej, ntau zaug ua rau koj ua poob yam muaj nqis uas Vajtswv tab tom pub rau koj. Nco ntsoov Paulus tej lus ntuas:

“Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm.” (Kaulauxais 3:13).

Thov caw nrog kuv peb thov Vajtswv ua ke: Tswv Yexus, kuv ua Koj tsaug vim Koj yog kuv lub hauv paus kev kaj siab tiag. Nyob hauv tej teeb meem thiab kev tu siab, thov tuav kuv lub siab kom txhob muaj kev iab siab, txhob muaj kev npau taws thiab txhob muaj tej kev sib txeeb uas tsis cheem tsum. Thov pub kom kuv paub txo hwjchim zam txim, pab kom kuv paub nrhiav kev hais kom sib haum thiab ua lub neej sib haum nrog sawv daws. Thov coj kuv mus rau ntawm txoj kev ttau so tso siab, kom txhua hnub kuv ua neej nyob hauv txoj kev kaj siab thiab nyob ze Vajtswv. Kuv thov hauv Tswv Yexus Khetos lub npe, Amees.

Cov kwv tij txhua tus, yog koj tab tom qaug zog vim tej kev sib txeeb ntev los, txhob pheej nyob hauv tej niag teeb meem ntawd. Xaiv zam txim, xub nrhiav kev hais kom sib haum, thiab cia Vajtswv coj koj mus rau ntawm thaj av dav – qhov chaw dav rau yus tus kheej – yog qhov chaw uas koj lub siab tau so hauv Vajtswv. Nyob ntawd, tej qhov dej koob hmoov cuag li twb txhawm puv ntawd thiaj yuav rov qab tau muab qhib, thiab koj yuav tau nyob ze Vajtswv, hnov Vajtswv lub suab thiab saj tau Vajtswv txoj kev tshwm ntsej muag raws li txoj kev tshiab, tob dua.
Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.