Tej zaum peb twb hnov lo lus uas hais tias “tseb ib qhov kev xav, yuav sau ib qhov haujlwm. Tseb ib qhov haujlwm, yuav sau ib tug cwjpwm. Tseb ib tug cwjpwm, yuav sau ib txoj hmoov.” Nyob hauv lub neej txhua hnub, ib qhov kev xav thiab nqes tes ua los ntawm txoj kev ntseeg nyob saum Vajtswv tej lus ua tus cag yuav coj peb mus txog rau txoj kev tau koob hmoov uas Vajtswv twb npaj tseg rau peb txhua tus lawm.

Hnub no, yog hnub 04/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm TXOJKEV NTSEEG HLOOV TAU TAGNRHO LUB NEEJ

“Twb yog vim tus niamntiav uas hu ua Lahaj ntseeg nws thiaj dim. Nws tsis nrog cov neeg uas tsis mloog Vajtswv lus raug kev puastsuaj, rau qhov nws hu ob tug soj tebchaws los hauv nws tsev thiab pab nkawd.” (Henplais 11:31).

Zoo siab luag ntxhi, Trà Mi rub kuv tes, muab phau ntawv muaj ntau hom xim cev rau kuv. Ob tug zaum kiag hauv pem teb, nyo hau ntxis nyeem ib plooj ntawv zuj zus taw rau daim duab tus tub rog tuav rab hmuv ntev ntev, tus mentxhais yau no hais: “tomqab no nws muab hmuv nkaug Tswv Yexus sab tav ua rau tshav tawm los.” Nws ntsia pom txoj kev txhawj hauv kuv lub qhov muag, Trà Mi cia li nthuav kiag mus rau nplooj tom qab, taw rau daim duab muaj cov tim tswv thiab lub qhov ntxa khoob lug, hais ntxiv: “tsis txhob txhawj, tus Tswv tsis tuag, Nws twb sawv lawm, thaum no Nws tab tom nyob saum ntuj, mloog peb tej lus taij thov.”
Kuv txog ib zag siav zoo siab, tiamsis rov qab nyob twj ywm, xwb tim kuv cia li xav. Thaum no, Trà Mi hais ntxiv: “tseeb tiag os, txhua hnub Trà Mi yeej thov Vajtswv.” Kuv maj nroos nug: “Ua li… Vajtswv puas mloog tiag mas”. Nyob hauv kuv lub siab xwb tim cia li nco txog tej kev ntshai uas hmo phomsij ntau hli dhau los.

Tus ntxhais nws saib kuv, hais khov kho: “teb os, Vajtswv yeej hnov tiag. Yus hais li cas rau Vajtswv, Vajtswv hnov tas nrho.”

Txog thaum no kuv txog ib zag siav tob tob, mam nug: “Ua li wb thov Vajtswv puas tau?” Lo lus no cuag li poob rau ib nta, ua rau kuv lub siab ntswj lees. Kuv paub tias yus lub tsev twb tsis ntseeg, Vajtswv twb tsis yog yus li yuav ua li cas teb yus. Saib Trà Mi cuag li nres kiag, kuv khuv xim, txaj muag vim tau qhib ncauj thov ib yam uas cuag li tsis tseg rau yus. Kuv thiaj npaj yuav hais rau lwm zaj, tiamsis xav tsis thoob, nws sawv tsees thiab hais tias:

– “Tau os, wb thov Vajtswv ov”

– “Nyob qhov twg?” Kuv xav tsis thoob nug.

– “Ntawm no tiag.” Hais tas, Trà Mi cia li txhos caug saum tag, nws lub qhov muag saib ntsoov kuv cuag li tab tom txhib kuv: “Koj nrog kuv txhos caug ua ke.”

Kuv txaj muag tsawv, hauv lub siab tseem ua xyem xyav, ua li no txaj muag dhau, tsis muaj rooj fij xyab, tsis muaj xyab hlawv… yuav ua cas thov tau Vajtswv? Tiamsis Trà Mi tus yamntxwv txhos caug, qi muag, ob txhais tes khawm ua ke ua rau kuv hnov txaj muag rau kuv tus cwjpwm coj, yog li kuv thiaj cia li ua raws nws qab. Qi qhov muag, pob ntseg mloog Trà Mi cov lus taij thov tas…

– “Amees!”

Kuv cia li muaj kev ua xyem xyav. Qhib qhov muag kuv saib Trà Mi cov ntiv ntes qhib nplooj ntawv kawg ntawm phau ntawv, taw rau cov ntawv dub dub thiab hais tias: “wb koom nyeem feem thov Vajtswv no ua ke.”

Maj nroos, wb ua raws li zaj lus thov Vajtswv ua ke tas “Amees” nrov nrov raws. Cev tes rub kuv sawv, Trà Mi zoo siab hais tias: “kuv muab phau ntawv no rau koj. Txhua hnub koj nco thov Vajtswv raws li tej lus thov hauv phau ntawv no.” Tes tuav rawv phau ntawv, tso zog khiav, kuv khiav los tsev nrog txoj kev zoo siab. tas nrho lub caij ntuj sov ntawd, txhua hnub kuv ua raws li zaj lus thov, kuv rub pom txog caj pas, kaj siab lug pw tsaug zog. Tas muaj ib hnub, kuv pib pom kuv txoj kev ntshai thaum tsaug zog txaus ntshai ntawd twb ploj thaum twg tsis paub.

Yog li ntawd, tej hnub thaum pib ntsib Vajtswv yeej tseem cim ntsoov hauv kuv lub hlwb thiab yog lub zog rau kuv khawb kom tob, nrhiav, kawm txog ib tug Vajtswv, tus uas “vim, leej twg thov txog ces yuav tau cawm.” (Loos 10:13).

Lahaj zaj xwm kuj yog qhov pov thawj tseg rau qhov tseeb no, ib yam li kuv tau Vajtswv cawm thaum ntawd. Xaiv ntseeg tus Vajtswv uas tsis yog yus haiv neeg tus vajtswv, Lahaj thiaj cawm tau pog tsev neeg tsis tuag thiab cawm tau pog lub neej ua rau muaj kev hloov pauv loj.

Vajluskub nyob hauv Yausuas tshooj 2 coj peb mus txog rau ntawm lub nroog Yelikaus tab tom yoj yees, vim hnov xov muaj ib pab tug rog muaj zog heev yog Yixalayees tab tom txav los ze zuj zus. Thiab xov xwm cov tub txib tuaj soj tebchaws thiaj nrov mus txog vaj ntxwv Yelikaus pob ntseg. Thaum uas vajntxwv thiab tas nrho lub nroog lawv tso siab rau sab phab ntsa, Lahaj tau xaiv ntseeg Vajtswv pab tub rog muaj zog, coj cov tub soj tebchaws mus rau saum ru tsev, muab nkawd npog cia. (Yausuas 2:3-6).

Lahaj tes haujlwm tawm tsam vajntxwv cov lus no yog tej hnub nws ua neej nyas nrhw cov neeg Yixalayees (Yausuas 2:10).  Qhov uas pog ua li no yog los ntawm pog paub Vajtswv lub homphiaj tseg rau cov neeg Yixalayees, yog haiv neeg uas pog hnov npe lawm ntev nyob rau hauv txhua ntsus tsov rog lawv tau ua rog dhau los (Yausuas 2:9).

Lahaj hais meej meej rau ntawm ob tug tub xa xov: “Thaum peb hnov tej xwm no, peb txhawj thiab ntshai kawg li; peb txhua tus qaug zog tas vim tej uas nej ua ntawd. Tus Tswv uas yog nej tus Vajtswv yog tus uas kav saum ntuj thiab hauv ntiajteb no” (Yausuas 2:11). Cov lus puv npo kev ntseeg rau cov neeg Yixalayees tus Vajtswv thiab Lahaj qhov haujlwm ua nrog kev ntseeg cawm ob tug tub xa xov ntawd tau cawm pog thiab pog tsev neeg dim ntawm cov tub rog Yixalayees.

Lahaj qhov kev txiav txim ntseeg siab rau Vajtswv tau hloov pauv tag nrho pog lub neej. Ntawm qhov uas yog ib tug ua niam ntiav, raug ntiajteb saib tsis taus, raug txhua txojcai tamsim ntawd  khi saib tsis taus, Lahaj lub neej tau hloov pauv tas nrho. “Vim tus niamntiav Lahaj tau zais ob tug uas Yausuas tso mus soj lub nroog Yelikaus, Yausuas thiaj tsis tua nws, nws niam nws txiv, thiab nws cov kwvtij. (Lahaj cov xeebntxwv tseem nyob hauv tebchaws Yixalayees los txog niaj hnub no” (Yausuas 6:25).

Tsis yog nres qhov no xwb, pog txoj kev ntseeg tau qhib dua ib qhov keeb kwm tshiab rau pog caj ces, tau koom rau hauv Tswv Yexus caj ces, tus uas yog Vajtswv tus tub, neeg ntiajteb tus cawm seej (Mathais 1:5). Thiab tau hais txog nyob hauv cov “neeg uas muaj kev ntseeg” ntawm Henplais 11.

Tsau tsawv rau hauv Lahaj zaj xwm, kuv lub siab no kub lug rau ntawm ib tug Vajtswv siab ntev. Nco txog thaum uas kuv lub ncauj lees sai sai lub sijhawm uas lub siab no ntseeg rau ib tug ciaj sia tab tom mloog yus, hla dhau tej kev coj noj coj ua thiab kev ntseeg thaum ntawd, nws yog ib qhov kev txiav txim siab uas kuv nco ntsoov Vajtswv tshav ntuj. Nws ua siab ntev rau kuv mloog kuv thiab teb kuv tej lus thov, tau coj kuv mus saj tau ib tug Vajtswv muaj hwjchim tso kuv dim ntawm txoj kev vij puas ncig hauv qhov tsaus ntuj ntawm tus mob kuv raug thaum tseem hluas tau coj kuv tawm mus rau ib txoj kev tshiab thaum tau ua Vajtswv menyuam thiab tau Vajtswv tus muaj kev hlub tu kuv txog tamsim no.

Thov caw nrog kuv peb thov Vajtswv ua ke: Tus Tswv, kuv ua Koj tsaug tau hlub, tau mloog kuv, thiab zoo siab hlo pub txoj kev cawmdim rau tus uas ntseeg siab rau Nws. Kuv ua Vajtswv tsaug vim Koj tau los nrhiav thiab cawm tus puas tshuaj. Thov Vaj Ntsujplig pub lub zog rau kuv, kom kuv xav ua raws li koj lub siab nyiam rau kuv lub neej, ncaj ncees nrog koj mus. Kuv thov hauv Tswv Yexus Khetos lub npe, Amees. 

Cov kwv tij, Lahaj txiav txim ntseeg Vajtswv thiab nqes tes ua nrog kev ntseeg. Twb yog qhov kev txiav txim no tau hloov pauv pog lub neej thiab pog tsev neeg. Hnub no, Vajtswv tej lus kuj caw peb tso siab rau Vajtswv thiab ua lub neej raws li Vajtswv tej lus. Txhob cia lub caijnyoog, lub neej yav dhau los lossis tej uas tab tom tshwmsim ib ncig peb txiav txim rau txoj kev peb ua neej. 

Cia li pib ntawm ib qhov kev xav, ib qhov kev xaiv thiab ib tes haujlwm ntawm txoj kev ntseeg nyob hauv Vajtswv tej lus. Hnub no, cim civ nug: kuv tab tom ntseeg Vajtswv rau yam dabtsi? thiab kuv yuav ua li cas kom nthuav tawm txoj kev ntseeg ntawd? Thov txhob tuav rawv lo lus teb rau hauv siab, tiamsis ua siab tawv mus nrog kev ntseeg, vim ib txoj kev txiav txim me nyob hauv txoj kev ntseeg hnub no tej zaum yuav qhib ib lub qhov rooj tshiab tseg rau peb lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.