Peb tab tom ua neej nyob rau hauv tiam uas txoj kev tsis khoom raug suav zoo li tus tshim ntsuas yam muaj nqis: koj yim tsis khoom cuag li koj yim muaj neej ua! Ntau zaug, qhov uas yus tas zog tseem tau suav tias yog qhov pov thawj qhia tias koj twb siv tas koj lub zog. Txawm yuav siv zog npaum twg, yuav muaj ib lub sijhawm twg koj sab nqaij tawv thiab lub siab kuj yuav ceeb toom. Yog tias twb pw so lawm tiamsis lub hlwb yeej tseem txhawj, tej zaum yam koj tseem tshuav yog ob peb teev los so. Tseg rau koj lub cev so, cia kom koj tus ntsujplig tau so ces ho yog lwm yam. Vim yam uas peb tab tom tsis muaj tiag nws yog ib qhov chaw pheeb ruaj khov, tseg rau peb muab lub nra nyhav uas yus twb nris ntev ntev ntawd txo nqes.

Hnub no, yog hnub 05/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marissa Nordlum dhau ntawm Zaj kawm NRHIAV TAU TXOJKEV SO TIAG TIAG

“Nej cia li los kwv kuv tus quab thiab kawm tej uas kuv qhia, nej thiaj yuav tau so. Tus quab uas kuv muab rau nej kwv yoojyim kwv, thiab lub nra uas kuv muab rau nej ris, lub ntawd tsis hnyav” (Mathais 11:29-30)

“Txhob ntshaw haujlwm dhau!” – Kuv txiv yeej ib txwm hais li ntawd txhua zaug uas pom kuv siv zog ua txhua yam thaum tseem kawm ntawv qib siab. thaum ntawd, tsuav yog muaj haujlwm xwb kuv twb txais, kuv yeej tsis tshua hais tias “tsis ua” ib zaug li. Kuv yeej tseem nco ntsoov hnub uas kuv maj nroos tsis so: nyuam qhuav kawm ntawv tas kuv maj nroos mus ua haujlwm, ua tas kuv khiav kiag rau tom tuam tsev, noj hmo nrog tej phooj ywg, tas nyob txog tag hmo kawm ntawv, pw peb teev xwb twb kaj ntug sawv tsees rau tej haujlwm ntawd dua. Oh! Tsuas nyeem txog qhov no xwb, koj twb hnov nkees lawm thiab puas yog? Thaum kawg, kuv tas zog, thaum kuv tsis pom kev tawm hauv kuv lub sijhawm uas twb puv tas cim civ muab ris rau saum xub pwg.

Tas kuj txog lub sijhawm kuv yuav tau nres kuv lub sijhawm maj nroos ntawd nrog tej hnub uas siv zog tsis so. Xyoo kawg kuv kawm ntawv, kuv raug mob nyhav thiab poob tsheej hli los so kom mam zoo mob. Tej sijhawm uas teem tseg puv tas yav dhau los yuav tau theem, thiab tib yam uas kuv yuav ua thaum no yog so. Tiamsis, thawj hli nyob rau lub sijhawm uas “so” no ho ua rau kuv qaug zog zis, vim kab mob, vim tej kev txhawj pheej vij puas ncig kuv. Kuv thiaj pom tias, txawm yog kev ua neej hloov pauv lawm los, kuv yeej tsis hnov lub nra li. Vim nyob tob tob hauv kuv, kuv yeej tseem siv zog ris txhua yam los ntawm kuv tus kheej lub zog. Txog thaum uas kuv caw Tswv Yexus nkag los rau hauv ntu so ntawd, tej nra nyhav hauv kuv thiaj ploj zuj zus, thiab lub nra thiaj pib dhau los sib dua.

Kawm txoj kev tau so yog yam uas cheem tsum, tiamsis yog tsuas so ntawm lub cev xwb tsis tau tab pov tias yuav ua rau muaj kev tau so ntawm sab ntsujplig. Zaum twj ywm ib qhov chaw xwb tsis tau txaus, peb yuav tau kawm txoj kev tau so thiab kub siab lug pheeb rau ntawm Yexus Khetos.

Nyob hauv Mathais tshooj 11, Tswv Yexus hais meej meej rau tag nrho txhua tus uas ntsib dhau qhov no: “Nej cov uas sab sab vim ris nra hnyav, nej cia li los cuag kuv, kuv yuav cia nej so. Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so. Tus quab uas kuv muab rau nej kwv yoojyim kwv, thiab lub nra uas kuv muab rau nej ris, lub ntawd tsis hnyav” (nqe 28-30).

Raws li phau ntxhais ntsiab, tus quab uas Tswv Yexus hais txog yog ib yam cuab yeej siv ntoo los ua muab dhos rau saum tus tsiaj lub xub pwg kom nws cab ib yam khoom dabtsi twg nyhav. Thaum kwv tus quab, tag nrho ob qhov no yuav koom txheem qhov nra nyhav, dhau ntawd yuav sib dua. Yog li, thaum Tswv Yexus hais: “Cia li kwv kuv tus quab”, yog Tswv Yexus caw kom peb nrog Nws mus ua ke, cia Nws ris feem nyhav uas peb ris tsis taus. Peb tsis cab tus quab uas yog peb lub neej ib leeg lawm, vim Nws yog lub zog rub peb.

Tswv Yexus tsis cog lus tias peb lub neej yuav tsis muaj teeb meem lossis nra nyhav, tiamsis nws cog lus yuav nrog peb ris txhua yam ntawd. Tswv Yexus tau hais tias: “Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm.” (Yauhas 16:33). Yog li, peb thiaj ntseeg tau tias thaum uas peb tsis kwv ntawm peb lub zog thiab kawm vam khom Vajtswv lub zog, tej nra nyhav ntawd yuav dhau los sib. Tsis muaj ib txoj kev twg uas tib neeg yuav siv los txo tau kom lub nra hauv peb lub siab sib mus. tsuas yog Tswv Yexus tib leeg xwb thiaj ua tau qhov no. Nws twb ua, tab tom ua thiab yuav yog tus tshem peb tej nra nyhav ntawd mus thiab pub kom peb tau so tiag.

Thov caw nrog kuv peb thov Vajtswv ua ke: Tswv Yexus, kuv los ntawm koj lub xub ntiag lub sijhawm no, fij tag nrho kuv lub siab qaug zog zis rau koj. Kuv pom tias ntev loo no kuv tau siv zog ris ntau txoj haujlwm ntawm kuv lub zog. Thov zam txim rau kuv vim kuv hnov qab vam khom koj. Thov pab kom kuv paub muab kuv lub neej fij rau koj nrog tej kev txhawj thiab lub nra nyhav tab tom tsuam hauv kuv lub siab. thov kom koj dhau los ua kuv lub zog thiab coj kuv kev mus rau hauv koj txoj kev kaj siab. Kuv thov hauv Tswv Yexus Khetos lub npe, Amees.

Cov kwv tij txhua tus, hnub no koj puas tab tom qaug zog zis vim yuav tau cim civ ris txhua yam tau? Cia li khiav mus rau ntawm Tswv Yexus tamsim no, tso txoj kev siv zog ntawm tus kheej lub zog tseg thiab txais yuav Vajtswv tus quab. Tsuas yog nyob hauv Yexus Khetos xwb, peb thiaj nrhiav tau txoj kev tau so tiag ntawm yus tus ntsujplig uas yus yeej ib txwm nrhiav.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.