Lu bơ̆n oei arih lăm chăl arih mă juăt kơ lăng tơdrong jang thoi ‘long pơtŏ tơdrong gĭt kăl: Ih rai jang lơ tơdrong hrăt hrot, rŏ lăng ih rai keh đang! Truh tơ, tơdrong gleh lap kư̆m đei lăng sĭt kơ đơ̆ng adrin đĭ jơhngơ̆m bơ̆jang. Mă-lei tơdah lu bơ̆n adrin truh tơ dang yơ hĭ, gô đei jơ phŭt akâu akar păng bơhngol lu bơ̆n kư̆m pơma tơbăt kơ lu bơ̆n băt kơ đei tơdrong ưh kơ trŏ. Tơdah ih ‘bich pơdơh mă ih oei tơchĕng hiơ̆k bơngơ̆t, rŏ lăng tơdrong ih tam mă tôm mah noh tơdrong ih pơdơh. Ăn kơ akâu akar pơdơh jơ̆ ‘bônh ưh kơ gleh, mă-lei wă kơ bơhngol đei pơdơh hiôk tơpă, noh jơ̆ minh tơdrong phara. Yua kơ tơdrong lu bơ̆n oei kơ’bah tơpă jơ̆ minh anih gơnang kơjăp, mă gơh ăn kơ lu bơ̆n hut lê̆ dôm tơdrong pŭ trăp mă lu bơ̆n đei chĕp ba đunh boih.

Năr ‘nâu, năr 05/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Marissa Nordlum kơ̆l ‘bai CHĂ ‘BÔH ANIH PƠDƠH TƠPĂ

“Yua kơ Inh bơngai dim, băt ‘mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk.’Yua kơ Inh, na iĕm rơhơi jơhngơ̆m păng pŭ hơiơch.” (Mathiơ 11:29-30)

“’Nĕ kơ adrin jang lơ tơdrong hloh bĕ!” – ‘Bă inh juăt kơ pơlung inh thoi noh, rim wơ̆t sư ‘bôh inh oei hrăt hrot hăm lơ tơdrong jang kơplah inh oei pơhrăm tơ hnam trưng. Lăm dôm sơnăm noh, rim wơ̆t đei tơdrong jang plơ̆ng ‘nao truh kơ inh, inh drơ̆ng iŏk jang, ưh kơ đei pơma khan “ưh” ôh. Inh oei ‘blŏk rơđah dôm năr jang hrăt hrot, truh kơ gleh lap: hlôi kơ jơ pơhrăm, inh hăt hot kơ năm jang thim, hlôi kơ jang na kơdâu năm tơ Hnam Akŭm, đơ̆ng noh năm sŏng sa hơdai hăm lu buăl, klaih kơ noh kral kơmăng pơhrăm hơmet lê̆ adrol wă jê̆ truh tơ năr pơthi, tep lăp pêng jơ đĕch, truh tơ pơge năr đơ̆ng rŏng inh kư̆m pơm dơ̆ng kiơ̆ thoi noh. Ôi! Đŏk truh tơ âu đĕch, ih hăm băt gleh lap thoi inh ưh? Tuch luch, inh gleh lap, jơhngơ̆m ling-lang oei trăp trĭn, dui jơhngơ̆m gleh lap, yua kơ dôm tơdrong jang lơ mă đơ̆ng kơ kơdih inh pŭ iŏk.

Na truh tơ minh jơ phŭt inh kư̆m pơdơh dôm tơdrong jang hrăt hrot păng dôm năr adrin jang ưh kơ băt pơdơh noh. Lăm sơnăm tuch luch wă keh đang kơ pơhrăm tơ hnam trưng, inh jĭ bơlŏ păng truh tơ lơ khei ‘mơ̆i na klaih. Tơdrong jang lơ thoi ki sơ̆, inh athei hut lê̆ đĭ-đăng. Tơdrong mă inh kăl kơ pơm noh jơ̆ pơdơh đĕch. Mă-lei lăm khei blŭng-a lăm jơ “ pơdơh” noh, inh rai gleh lap hloh dơ̆ng, yua kơ tơdrong jĭ jăn păng dôm tơdrong tơchĕng oei wang jum dăr kơ inh. Inh ‘bôh krưp kơplah inh băt, tơdah tơdrong arih inh đei tơplih phara boih, mă-lei jơhngơ̆m inh ưh kơ đei rơhơi ‘biơ̆ hloi. Yua kơ lăm jơhngơ̆m, inh oei adrin chĕp ba đĭ-đăng dôm tơdrong đơ̆ng jơhngơ̆m inh kơdih. Truh tơ kơplah inh krao apinh Kră Yang Yêsu mơ̆t oei hơdai inh lăm jơ pơdơh noh, dôm tơdrong pŭ trăp mă inh oei chĕp ba kư̆m rai hơiơch hloh dơ̆ng.

Pơhrăm lăm tơdrong pơdơh jơ̆ tơdrong kăl yua. Mă-lei tơdah lu bơ̆n pơdơh akâu akar đĕch, noh tam mă jing tơdrong pơdơh hiôk tơpă kơ bơhngol ôh. Tơ-oei minh anih đĕch tam mă tôm ôh. Lu bơ̆n athei pơhrăm tơdrong pơdơh hiôk, poih jơhngơ̆m lu bơ̆n oei jê̆ păng gơnang kơ Yêsu Krist, Sư jơ̆ Tơ’ngla mă lu bơ̆n lui gơnang.

Lăm Mathiơ chăl 11, Kră Yang Yêsu đei khan kơ đĭ-đăng lu bơngai mă đei tơ’bơ̆p tơdrong gleh lap păng pŭ trăp noh: “Ơ lu bơngai mă oei pŭ trăp, năm tơ Inh bĕ, lê̆ Inh tơgŭm iĕm pŭ hơiơch. Yua kơ Inh bơngai dim, băt ‘mêm mơnat, na apinh iĕm pŭ iŏk bĕ, pơhrăm iŏk bĕ tơdrong Inh âu, wă kơ iĕm pơdơh hiôk. Yua kơ Inh, na iĕm rơhơi jơhngơ̆m păng pŭ hơiơch.” (Mathiơ 11:28–30)

Kiơ̆ thoi nơ̆r tơblang lăm sơ̆p hla bơar tơblang nơ̆r pơma tơbăt khan, tơmam tôi tơ’băk mă Kră Yang Yêsu pơma jơ̆ tơmam pơm hăm ‘long, đe tah tơ hơko rơmo, wă kơ rơmo gơh dui hor tơmam trăp. Kơplah ‘bar tŏ rơmo năm hơdai hơdai minh pôm ‘long ăt bre sư klah asong tơdrong pŭ trăp, na tơdrong dui tơmam jang rai hơiơch hloh.

Thoi noh, kơplah Kră Yang Yêsu khan: “Apinh iĕm pŭ iŏk bĕ”, Sư oei krao lu bơ̆n năm hơdai hăm Sư, wă kơ Sư pŭ iŏk dôm tơdrong trăp trĭn mă lu bơ̆n ưh kơ kĕ pŭ. Lu bơ̆n ưh pă adrin dui tơmam choh jang lăm tơdrong arih lu bơ̆n hăm jơhngơ̆m bơ̆n kơdih bơih, yua kơ đơ̆ng Kră Yang jơ̆ tơm jơhngơ̆m pran, Sư dŏng păng tơgŭm lu bơ̆n.

Kră Yang ưh kơ pơkă khan tơdrong arih lu bơ̆n huay kơ đei tơdrong anat anot, dah huay kơ đei dôm lu tơdrong pŭ trăp ôh. Mă-lei Sư pơkă oei hơdai hăm lu bơ̆n, păng pŭ iŏk đĭ-đăng tơdrong noh. Kră Yang Yêsu đei khan thoi âu: “Tơ ala teh âu iĕm gô đei tơdrong anat anot. Mă-lei iĕm ‘nĕ kơ sơ’ngon hŏ yua kơ tôm tơdrong ala teh âu thuơ kơ Inh ngăl boih.” (Yôhan 16:33). Yua kơ thoi noh, lu bơ̆n athei lui ngeh tôm tơdrong, lê̆ pă adrin chĕp ba jơhngơ̆m bơ̆n kơdih, păng pơhrăm trong gơnang kơ tơdrong pran đơ̆ng Kră Yang, na dôm tơdrong pŭ trăp noh gô rai hơiơch hloh dơ̆ng.

Ưh kơ đei minh trong ayơ đơ̆ng kon bơngai gơh pơm kơ dôm tơdrong pŭ trăp oei hrĕp lăm jơhngơ̆m lu bơ̆n rai hơiơch ôh. Minh ‘Nu Kră Yang Yêsu đĕch gơh pơm tơdrong noh. Sư đei, oei pơm, păng gô ling-lang jơ̆ Tơ’ngla mă iŏk lê̆ dôm tơdrong pŭ trăp đơ̆ng lu bơ̆n, păng ăn kơ lu bơ̆n tơdrong pơdơh hiôk tơpă.

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, kon năm tơ ‘bơ̆t anăp Ih lăm jơ phŭt âu, pơjao kơ Ih jơhngơ̆m kon oei gleh lap. Kon băt kơ đunh tơpă boih kon đei adrin tôi lơ tơdrong pŭ trăp hăm jơhngơ̆m kon kơdih. Apinh Ih huay kơ jô̆ yo kơ kon yua kơ kon hiơt gơnang kơ Ih. Apinh Ih tơgŭm kon băt pơjao kơ Ih đĭ-đăng dôm lu tơdrong tơtăm păng dôm tơdrong pŭ trăp oei hrĕp lăm jơhngơ̆m kon. Apinh Ih jing tu kơ jơhngơ̆m pran kon, păng chông ba kon năm kiơ̆ tơdrong hiôk-hian đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăm năr ‘nâu, ih hăm oei gleh lap yua kơ ih oei adrin tôi ba đĭ-đăng dôm tơdrong pŭ trăp hăm jơhngơ̆m kơdih ưh? Athei hrĕnh tĕnh năm tơ Kră Yang Yêsu dang ei bĕ, achăng lê̆ tơdrong adrin gơnang kơ jơhngơ̆m pran đơ̆ng akâu ih kơdih, păng pŭ iŏk tơdrong pŭ trăp đơ̆ng Sư. Minh lăm Yêsu Krist, Sư jơ̆ Tơ’ngla mă lu bơ̆n lui gơnang, na lu bơ̆n gơh ‘bôh tơdrong pơdơh hiôk tơpă mă bơhngol lu bơ̆n oei hưch hanh chă ling-lang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.