Koj yuav coj zoo li cas yog tias muaj ib hnub muaj tus nws rhuav tshem koj txoj kev npau suav uas koj twb siv sijhawm ntau, dag zog thiab kua muag los txhim kho? Lo lus teb tej zaum tsis yog tsuas yooj yim li ntawd thaum uas peb yog tus neeg poob rau lub caijnyoog ntawd. Kuv twb ntsib dhau ib qhov teeb meem iab siab zoo li ntawd, thiab ntawd yog ib qhov kev sim siab loj rau kuv lub neej ntseeg.

Hnub no, yog hnub 06/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gary Roberts dhau ntawm Zaj kawm THAUM RAUG UA TSIS NCAJ, PUAS TSIM NYOG UA PAUJ?

“Kuv yog tus yuav ua pauj thiab kuv yog tus yuav rau txim, tus Tswv hais li ntawd.” (Loos 12:19)

Thaum raug lwm tus ua rau muaj kev tu siab loj, peb yuav coj zoo li cas? Ua npau taws vog, iab siab thiab cim civ taij kom muaj kev ncaj ncees rau tus kheej, ntau zaug xav ua pauj tus neeg ua rau yus muaj kev tu siab ntawd? Lossis yuav vam khom Vajtswv txoj kev hlub tswj peb tej kev tshoov siab ntawd, xaiv zam txim thiab hlub, txo hwjchim thiab tso siab plhuav rau Vajtswv – Tus tiv thaiv thiab hais daws peb zaj, tus uas yuav siv lwm tus lub tswv yim rhuav peb los ua kom tiav yam zoo rau Vajtswv cov menyuam (Chivkeeb 50:20)?

Tsis paub peb puas muaj txaus kev ntseeg kav liam tsis nrhiav kev ua pauj, tiamsis paub “nyob twj ywm thiab paub tias” Vajtswv yog tus Tswv (Ntawv Nkauj 46:10). Ntseeg tias Vajtswv yeej tswj ib puas tsav yam, thiab Vajtswv muaj cuab kav yuav siv tej yam uas mob tshaj rau Vajtswv lub homphiaj zoo?

Kuv twb sib mos nrog tej kev xav no, thiab yuav tau txiav txim tsis yooj yim li: xaiv kav liam thiab ntseeg siab rau Vajtswv tej lus cog tseg nyob hauv Loos 8:28, tias Vajtswv muaj cuab kav ua rau txhua yam uas tshwmsim ntawd dhau los kom muaj nqis rau tus uas hlub Vajtswv, txawm yog nyob rau lub sijhawm uas mob tshaj. Tej lub sijhawm zoo li no, peb yuav tau thov Vajtswv pab tav, vim txoj kev txawj ntse, txoj kev faib cais, Vajtswv lub hwjchim thiab Vajtswv txoj kev ncaj ncees nws siab tshaj qhov uas peb pom tias zoo li cas thiaj yog ncaj ncees. Rau qhov peb tib neeg yooj yim poob rau qhov kev tsis sib haum no: xav kom Vajtswv ua siab ntev rau yus qhov yuam kev, tiamsis ho xav kom Vajtswv ua nruj rau txim rau lwm tus qhov yuam kev.

Thaum uas ntsib tej kev tawm tsam thiab muaj kev tu siab loj tshaj yus lub zog yuav tiv taus, peb yuav tau xyaum raws li Tswv Yexus tus qauv uas yav dhau los lawv raug tsim txom: fij cov lus taij thov rau Vajtswv thiab muab txhua yam tso rau hauv Vajtswv txhais tes. Tshwmsim 8:3 sau: “Muaj dua ib tug timtswv ceebtsheej nqa lub tais kub uas rau hmoov tshuaj tsw qab. Nws los sawv ntawm lub thaj uas luag cia tej khoom uas yuav muab fij rau Vajtswv, thiab Vajtswv muab ib cov hmoov tshuaj tsw qab ntau ntau rau tus timtswv ntawd coj mus ntxiv rau tej lus uas cov ntseeg thov Vajtswv thiab nqa mus rau saum lub thaj kub uas nyob ntawm hauv ntej lub zwmtxwv” Vajtswv hnov cov thwjtim lub suab taij thov, thiab Vajtswv yog tus yuav txiav txim ncaj ncees, tsis yog lawv cim civ ua pauj. Nyob hauv tej kev sim siab hauv yus lub neej, peb yuav tau muaj txoj kev ntseeg siab ntawd: muab txhua yam tso rau hauv Vajtswv txhais tes thiab nco ntsoov tias Vajtswv thiaj yog tus ua pauj.

Peb txhob muaj ib zaum twg cim civ ua pauj, tiamsis muab tso plhuav rau hauv Vajtswv txhais tes. Vim Vajluskub sau: “Muaj lus sau cia: “Kuv yog tus yuav ua pauj thiab kuv yog tus yuav rau txim, tus Tswv hais li ntawd.” (Loos 12:19). Dhau ntawm lub qhov cub nplaim taws sim siab ntawd, Vajtswv thiaj coj yam zoo pub rau kuv lub neej. Nws pab kuv pom thiab tso tus cwjpwm vam khom tus kheej lub zog tseg, kuj ib yam li uas yus cim civ daws yus zaj, kawm paub tso siab plhuav rau Vajtswv. Cia kom txhua lub koob meej yog Vajtswv tug!

Thaum no, txhua zaus hauv kuv lub siab muaj kev tshoov siab xav ua pauj thiab suav tias ntawd yog “lub suab ncaj ncees”, ces kuv yuav tau cim civ ntuas tus kheej tias yuav tau ua peb yam no. Ntawm no yog tej uas kuv kawm tau thaum kuv ntsib dhau, thiab cia siab tias kuj yuav muaj nqis pab rau koj.

Ib, saib yus tus kheej ua ntej. Nyob hauv qhov teeb meem no, puas muaj yam dabtsi yus tau hais lossis ua tsis yog? Muab ua lwm lo lus hais, muab “qhov hmoov av” hauv yus lub qhov muag ua ntej. Txawm yog qhov yuam kev cuaj feem yog lwm tus li ua tshuav yus li yog ib feem xwb los, yuav tau txo hwjchim lees txais thiab ris lub nra uas yog yus feem xyuam.

Ob, tswj tus kheej lub siab xav ua pauj, lossis maj nroos cim civ hais daws yus zaj. Pauv rau qhov ua li no, cia li mus cuag Vajtswv hauv txoj kev thov Vajtswv, thov Vajtswv ntxiv zog, pub kev txawj ntse thiab kev plig siab.

Peb, thov Vajtswv rau cov neeg uas ua rau koj muaj kev tu siab thiab xaiv zam txim rau lawv. Thov Vajtswv ua haujlwm hauv lawv lub neej thiab pub kev kaj siab rau lawv, tib txhij ntawd ua Vajtswv tsaug vim nyob rau lub caijnyoog zoo li no, koj yeej tseem muaj sijhawm kawm tau txoj kev txo hwjchim.

Thaum lees txais tso tus kheej thiab txoj kev khav theeb tseg, peb yuav tau muab txhua yam tso rau Vajtswv, cia Vajtswv ua haujlwm hauv peb lub neej. Nws yog tus muaj hwjchim pab tau tej uas tau poob lawm thiab ua kom muaj kev cia siab nyob rau tej kev puas tshuaj (Yau-ees 2:25)!

Thov caw nrog kuv peb thov Vajtswv ua ke: Tswv Yexus, muaj tej lub sijhawm kuv iab siab heev vim pom tias tsis muaj kev ncaj ncees, vim tej uas kuv tau siv zog txhawb ho raug lwm tus muab rhuav pov tseg. Kuv kuj npau taws, iab siab thiab xav cim civ taij kev ncaj ncees rau tus kheej, ho hnov qab tias Koj thiaj yog tus tswj txhua yam. Thov pab kom kuv paub tig ntsia kuv tus kheej, txo hwjchim thiab zam txim rau cov neeg uas ua rau kuv muaj kev tu siab. kuv thov muab tej kev mob siab, tej kev tsis ncaj ncees thiab tag nrho kuv lub neej tso rau hauv Vajtswv txhais tes. Thov pub kom kuv muaj kev kaj siab, kho zoo kuv tej qhov txhab thiab pab kom kuv ntseeg koj lub homphiaj zoo. Kuv thov hauv Tswv Yexus Khetos lub npe, Amees.

Cov kwv tij, yog tias hnub no koj tab tom muaj qhov txhab nyob hauv koj lub siab vim tej uas tsis ncaj ncees cia li tso tseg, muab tej ntawd fij rau Vajtswv. Xaiv zam txim kuj yog txoj kev tso siab rau Vajtswv, ntseeg tias Vajtswv ntsia pom, Vajtswv paub thiab Vajtswv yuav tuaj koj tog raws li Vajtswv txoj kev ncaj ncees. Cia Vajtswv kho zoo koj lub siab, tshem tej kev iab siab thiab qhia kom mus ntxiv hauv txoj kev kaj siab, txo hwjchim thiab ntseeg siab rau Vajtswv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.