Peb tab tom ua neej nyob rau hauv lub ntiajteb uas tus twg twb xav kom yus nyob tso siab lug. Peb yuav kev tiv thaiv rau tus kheej lub dag zog, dhos camera ncig vaj ncig tsev, khaws nyiaj tseg rau lub neej tom ntej. Tej ntawd yeej tsis muaj dabtsi yuam kev. Tiamsis, yam uas yuav tau xav yog tsis tau muaj ib zaum twg uas tib neeg ho ua neej nyob rau hauv txoj kev poob siab thiab ntshai npaum li tamsim no. Kev tsov rog, kab mob, toj pob, dej nyab lossis lub nra nyhav hauv lub neej yeej tseem tshuav peb txoj kev kaj siab. Nyob hauv tej nthwv cua ntawd, qhov twg thiaj yog “lub yeej” tiv thaiv rau peb tus ntsujplig ua ntej txhua qhov teeb meem tshwmsim tuaj?

Hnub no, yog hnub 07/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Joy Brunson dhau ntawm Zaj kawm QHOV CHAW NRAIM NTAWM VAJTSWV TUS UAS SIAB TSHAJPLAWS

“Tus uas mus cawm siav ntawm tus Tswv thiab tus uas nyob hauv tus uas muaj Hwjchim Loj kawg nkaus txojkev tiv thaiv,  mas tus ntawd thiaj hais tau rau tus Tswv hais tias, ‘Koj yog tus tiv thaiv thiab tsomkwm kuv.’” (Ntawv Nkauj 91:1)

Lub caij ntuj sov xyoo 2005, kuv tsev neeg txav chaw ntawm Mississipi mus rau New Orleans pib ib lub neej tshiab. Cia siab tias yuav txhim kho tsev neeg rau saum tus cag kev ntseeg, kuv niam kuv txiv tau koom siab fij lub tsev tshiab rau Vajtswv thiab txiav txim muab Vajtswv tej lus los ua tus tshim ntsuas rau tag nrho tsev neeg.

Yog cov neeg twb muaj ntau xyoo nyob rau thaj chaw no, kuv niam lawv yeej tsis muaj dabtsi yuav xav tsis thoob rau tej nthwv cua ntawd. Hli 8 xyoo 2005, xov xwm tshaj xo txog nthwv cua Katrina yuav ntsawj dhau. Xov xwm tshaj xo tias ntawm no yog ib nthwv cua loj txog qib 5 thiab nqua hu kom cov pej xeem yuav tau maj nroos nrhiav chaw khiav. Thaum pib, muaj ntau tus hauv cheeb tsam no yeej tseem tsis quav ntsej. Tiamsis, pom txog qhov phomsij no thiab Vajtswv tshoov hauv siab, kuv niam thiaj hais kom tsev neeg yuav tau maj nroos khiav tawm.

Kob cua xyoo ntawd ua rau kuv nco txog Vajtswv tej lus nyob hauv Ntawv Nkauj 91: “Tus uas mus cawm siav ntawm tus Tswv thiab tus uas nyob hauv tus uas muaj Hwjchim Loj kawg nkaus txojkev tiv thaiv, mas tus ntawd thiaj hais tau rau tus Tswv hais tias, “Koj yog tus tiv thaiv thiab tsomkwm kuv. Koj yog kuv tus Vajtswv; kuv cia siab ntsoov rau koj.” Nws yuav tsis pub koj mag luag lub vojhlua, thiab nws yuav pab kom koj dim ntawm tej kab mob kev tuag. Nws yuav nthuav hlo nws ob phabtis los roos ko j, nws yuav tsomkwm koj, koj yuav nyob tso siab plhuav; nws txojkev ncaj ncees yuav tsomkwm thiab tiv thaiv koj” (Ntawv Nkauj 91:1-4).

Ntu Vajluskub no ntuas peb tias “qhov chaw nraim nkoos” lossis “qhov chaw tso siab” tiag ntawm tus ntseeg Vajtswv tsis yog nyob hauv tej vaj tsev lossis tej qhov chaw ua qhua nyob hauv ntiajteb no, tiamsis yog txoj kev sib raug zoo ua ke ntawm peb thiab Vajtswv. Tau nyob “hauv Vajtswv tus hwjchim loj kawg nkaus phob tis” txhais tias peb tus ntsujplig yog Vajtswv tug, tau Vajtswv tiv thaiv peb lub hlwb dim ntawm tej kev txhawj thiab cov nyom tshaj. Nws yog peb lub chaw nkaum, yog peb txoj kev ntseeg thiab yog peb qhov kev cia siab. nyob hauv lub neej ntseeg Vajtswv, peb yeej yuav zam tsis dhau tej teeb meem, txawm yog nyob hauv tej teeb meem los, Vajtswv yeej cog lus tiv thaiv peb tus ntsujplig.

Tomqab ob peb thiv sawv daws khiav tas, peb rov qab los tsev tsis paub dabtsi tos peb tom hauv ntej. Peb tsis paub yus lub tsev puas tseem nyob, tej phooj ywg zoo li cas, lossis cov neeg puas tseem ciaj. Vim txhua yam uas peb pom saum fuab cua yog txoj kev puas tshuaj ntau heev.

Tas thaum rov qab los, peb pom peb lub tsev yeej tseem nyob. Txawm yog sab hauv pob puas tas, los tej ncej txheem lub tsev yeej tsis vau. Peb thiaj rov qab maj mam kho tsev thiab kho lub neej, nrog tej kev pab sib hlub ntawm sawv daws thiab cov koom huam ntseeg Vajtswv.

Loj hlob dhau ntawm tej teeb meem ntawd thiab rov qab xav txog Ntawv Nkauj 91, kuv nkag siab ntau dua txog Vajtswv txoj kev tiv thaiv. Nyob hauv lub ntiajteb puv npo kev hloov pauv toj pob dej nyab, kab mob kev nkeeg, kev tsov rog nrog rau ntau yam kev txhawj ntshai, tej nthwv cua ntawd tej zaum yuav ua rau ntau yam khoom ib vuag puas tsuaj tag mus, tiamsis yeej tsis muaj ib yam dabtsi yuav txeeb tau txoj kev kaj siab ntawm tus neeg uas tso siab rau Vajtswv. Koj thiab kuv tus ntsujplig thiab kev ntseeg tau so ruaj khov nyob hauv tus muaj hwjchim loj kawg nkaus qhov chaw nraim nkoos.

Thov caw nrog kuv peb thov Vajtswv ua ke: Tus Tswv yog kuv lub chaw nkaum ruaj khov hauv kuv lub neej. Ua Vajtswv tsaug vim nyob hauv tej kev khwv, kev puas tshuaj thiab kev hloov pauv hauv lub neej, kuv yeej tseem tau tiv thaiv nyob hauv Vajtswv txhais tes thiab pheeb rau ntawm Vajtswv txoj kev ncaj ncees. Tus Tswv, thov tiv thaiv kuv lub siab thiab lub hlwb huav koj txoj kev kaj siab thiab pab kom kuv ntseeg siab rau Koj tej lus cog tseg txawm yuav kuv yuav mus dhau tej nthwv cua uas phomsij tshaj. Kuv thov hauv Tswv Yexus Khetos lub npe, Amees.

Cov kwv tij txhua tus, cua daj cua dub hauv lub neej no tej zaum yuav ntsaw ntau yam ntawm peb tus kheej mus, tiamsis yuav txeeb tsis tau ib lub neej uas tau cog ruaj ruaj rau saub lub pob zeb ruaj khov uas yog Tswv Yexus. Yog li, tso siab rau Vajtswv txoj kev tiv thaiv. Nco ntsoov Vajtswv tej lus tau sau nyob hauv Ntawv Nkauj 91 thiab thov Vaj Ntsujplig siv tej lus ntawd los txhawb, los pab koj nyob rau txhua lub caijnyoog.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.