Ih gô pơm thoi yơ tơdah đei minh năr, minh ‘nu bơngai mă ưh kơ đei jơhngơ̆m ‘mêm mơnat, pơrăm tơdrong “hơpơi wă” mă ih đei adrin jang lĕch bơuh, đak măt păng tơdrong gleh lap, wă kơ pơjing ‘net ‘net? Nơ̆r tơl kơ tơdrong noh ưh kơ ‘bônh ôh, kơplah lu bơ̆n oei lăm tơdrong gleh pơmat noh. Inh đei hlôi tơ’bơ̆p tơdrong sơ’ngon thoi noh boih, păng tơdrong noh jơ̆ minh tơdrong pơlong lăng tih kơ tơdrong arih đon lui gơnang inh.

Năr ‘nâu, năr 06/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Gary Roberts kơ̆l ‘bai HĂM WĂ PƠM TƠWIH TƠDAH ĐEI BƠNGAI PƠM KƠNÊ̆?

“Lê̆ kơ Inh pơm tơwih kơ bơngai pơm kơnê̆ noh; Inh gô phak sư yua kơ sư pơm kơnê̆.” (Rôm 12:19)

Kơplah đe pơm kơ lu bơ̆n chhŭr nuih, lu bơ̆n gô pơm tơwih thoi yơ? Lu bơ̆n gô hil, kơnam, păng chă tơdrong wă kơ dang-ăi, truh tơ pơm tơwih kơ bơngai mă đei pơm kơ lu bơ̆n chhŭr nuih noh ưh? Dah lu bơ̆n gô gơnang kơ tơdrong ‘mêm mơnat đơ̆ng Kră Yang, wă kơ lu bơ̆n gơh pơgơ̆t dôm tơdrong noh, rơih iŏk huay kơ jô̆ yo păng ‘mêm mơnat kơ lu sư, tơjur jơhngơ̆m tơ a-la na lui gơnang kơ Kră Yang? Sư jơ̆ Tơ’ngla wei-lăng, păng dŏng iŏk lu bơ̆n, Sư iŏk dôm tơdrong mă bơngai nai wă pơrăm lu bơ̆n, pơm jing tơdrong ‘lơ̆ng ăn kơ lu bơngai lui kơ Sư (Blŭng a 50:20).

Lu bơ̆n hăm đei đon lui kơjăp tơpă, wă huay kơ chă tơdrong pơm tơwih, mă “hreh păng băt khan” Sư boih Kră Yang ‘Bok Kei-Dei” (Hơriso 46:10). Lu bơ̆n athei lui kơ Sư oei pơgơ̆r đĭ-đăng dôm tơdrong, păng Sư yua iŏk tôm tơdrong mă pơm kơ lu bơ̆n chhŭr nuih, wă kơ kơnhăm kiơ̆ tơdrong Sư wă.

Inh kư̆m đei hlôi tơ’bơ̆p, dôm tơdrong chhŭr nuih noh, păng rơih iŏk minh tơdrong mă ưh kơ ‘bônh ôh: rơih iŏk tơdrong huay kơ jô̆ yo kơ bơngai đei pơm kơnê̆ kơ inh, păng lui gơnang kơ tơdrong pơkă đơ̆ng Nơ̆r ‘Bok Kei-Dei lăm Rôm 8:28, mă khan Kră Yang gơh ăn đĭ-đăng dôm lu tơdrong ‘lơ̆ng kơ lu bơngai mă ‘mêm kơ Sư, mă khan lăm dôm tơdrong arih chhŭr nuih. Lăm jơ phŭt thoi noh, lu bơ̆n athei krao khan apinh Kră Yang tơgŭm, hăm tơdrong gơh hơgei, tơdrong rơih iŏk, tơdrong mơsêh mơyang păng tơdrong ‘lơ̆ng tơpăt đơ̆ng Sư tih hloh kơ tơdrong lu bơ̆n tơchĕng thoi yơ noh mă tơdrong dang-ăi. Yua kơ lu bơ̆n kon bơngai ‘bônh kơ đei jơhngơ̆m tơhil dih băl: lu bơ̆n kăl kơ Kră Yang mơnat huay kơ jô̆ yo kơ dôm tơdrong yoch lu bơ̆n, mă-lei lu bơ̆n wă kơ Sư phak lu bơngai nai pơm yoch hăm bơ̆n.

Kơplah lu bơ̆n tơ’bơ̆p dôm tơdrong bơngai nai pơm kơnê̆, păng dôm tơdrong chhŭr nuih mă lu bơ̆n ưh kơ kĕ pŭ bơih, lu bơ̆n pơhrăm kiơ̆ thoi lu bơngai lui kơ Kră Yang sơ̆ mă đei tơ’bơ̆p tơdrong đe pơm kơnê̆ kơ lu sư: krao khan apinh Kră Yang păng pơjao đĭ-đăng tôm tơdrong noh lăm tơpăng ti Kră Yang. Lăm Tơdrong Tơ’bôh 8:3 đei chih thoi âu: “Đei minh ‘nu linh jang nai dơ̆ng, sư dơ̆ng ‘bơ̆t anăp chơnang soi, sư chĕp minh pôm kơlăm maih păng đe ăn kơ sư minh achô̆ ŭnh nhang wă soh kơplah đĭ-đăng bơngai lui oei krao khan, wă kơ ‘bâu phu. Na sư pơyơ̆r ŭnh nhang noh kơ ‘Bok Kei-Dei ‘măn ‘bơ̆t chơnang soi tơklă tang-dŏ ‘Bok Kei-Dei.” Kră Yang kơtơ̆ng dôm nơ̆r krao khan apinh đơ̆ng lu bơngai lui kơ Sư. Sư jơ̆ Tơ’ngla mă gô sek tơlang kiơ̆ tơdrong ‘lơ̆ng tơpăt, ưh kơ đơ̆ng bơngai noh pơm tơwih ôh. Lăm dôm tơdrong pơlong lăng lăm tơdrong arih lu bơ̆n, lu bơ̆n kư̆m athei đei đon lui kơjăp thoi noh: pơjao đĭ-đăng tôm tơdrong lăm ti Kră Yang, păng ‘blŏk kơ tơdrong pơm tơwih gô mơ̆ng kơ Sư.

Lu bơ̆n ‘nĕ pă chă trong wă pơm tơwih hăm akâu bơ̆n kơdih, sơmă athei pơjao đĭ-đăng tôm tơdrong lăm ti Kră Yang. Yua kơ lăm Nơ̆r ‘Bok Kei-Dei đei chih thoi âu: “Lê̆ kơ Inh pơm tơwih kơ bơngai pơm kơnê̆ noh; Inh gô phak sư yua kơ sư pơm kơnê̆.” (Rôm 12:19). Hlôi đơ̆ng tơdrong pơlong hăm ŭnh noh, Kră Yang đei ăn kơ tơdrong arih inh đei dôm tơdrong ‘lơ̆ng. Sư tơgŭm inh băt kơ achăng lê̆ tơdrong juăt gơnang kơ akâu inh kơdih, păng huay pă chă tơdrong trŏ đơ̆ng kơdih inh, wă kơ inh pơhrăm đon lui gơnang kơ Sư hloh dơ̆ng. Hơpơi tơdrong ư-ang kơ Kră Yang!

Dang ei, rim wơ̆t jơhngơ̆m inh đei tơdrong kăl pơm tơwih, păng inh khan tơdrong noh jơ̆ “tơdrong hil trŏ”, inh juăt kơ tơ‘blŏk akâu inh kơdih wă pơm pêng tơdrong âu. Dôm tơdrong âu jơ̆ dôm tơdrong inh đei pơhrăm đơ̆ng tơdrong inh kơdih đei hlôi tơ’bơ̆p, păng inh kư̆m hơmĕng sư gô tơgŭm ăn kơ ih mơ̆n.

Tơdrong blŭng-a, athei lăng tơ akâu bơ̆n kơdih adrol. Lăm tơdrong âu, bơ̆n đei pơma dah pơm tơdrong kiơ mă ưh kơ trŏ ưh? Pơma thoi âu dai, athei iŏk lê̆ “bruih” đơ̆ng lăm măt bơ̆n kơdih adrol. Mă khan dôm tơdrong yoch tơsĭn lăm mơjĭt noh gah bơngai nai, mă minh pah đĕch đơ̆ng ih, ih kư̆m athei tơjur jơhngơ̆m đon tơ a-la pŭ iŏk tơdrong noh kơ ih.

Tơdrong mă ‘bar, athei chơ̆n kơ pơm tơwih, dah tĕnh kơ pơma blĕk tơbăt khan bơ̆n trŏ. Tơplih kơ noh, athei năm tơ Kră Yang, krao khan apinh Sư ăn kơ ih jơhngơ̆m pran, đei tơdrong gơh hơgei păng tơdrong mơnat pơlung jơhngơ̆m ih.
Tơdrong mă pêng, athei krao khan apinh Kră Yang kơ lu bơngai mă đei pơm kơ ih chhŭr nuih, păng rơih iŏk huay kơ jô̆ yo kơ lu sư. Apinh Kră Yang bơ̆jang lăm tơdrong arih lu sư, păng ăn kơ lu sư tơdrong hiôk-hian. Hơdai hăm tơdrong noh, athei bơnê kơ Kră Yang, yua kơ lăm jơ phŭt gleh pơmat âu, ih kư̆m oei đei tơdrong pơhrăm iŏk gah tơdrong iơ̆m dim.

Kơplah lu bơ̆n tŭk lê̆ lu tơdrong pơang akâu bơ̆n kơdih păng pôk pơư akâu bơ̆n, lu bơ̆n athei pơjao đĭ-đăng dôm tơdrong kơ Kră Yang, wă kơ Sư bơ̆jang lăm tơdrong arih lu bơ̆n. Sư jơ̆ Tơ’ngla mơsêh mơyang, ‘mong ăn dôm tơdrong đêl hiong răm păng tuh ăn tơdrong chang hơmĕng đêl pơchah pơchek (Jôel 2:25)!

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, kư̆m đei jơ phŭt kon chhŭr nuih yua kơ tơdrong ưh kơ dang-ăi, yua kơ dôm tơdrong mă kon đei adrin jang hăm jơhngơ̆m pran kon, mă-lei đe pơrăm lê̆. Kon kư̆m hlôi đei tơ’bơ̆p tơdrong blĕk hil, sơ’ngon, păng wă kơ đơ̆ng kơdih chă tơdrong dang-ăi, mă kon hiơt kơ Ih jơ̆ Tơ’ngla mă oei pơgơ̆r tôm tơdrong. Apinh Ih tơgŭm kon băt lăng tơ akâu kơdih,ăn kơ kon đei iơ̆m dim, păng huay kơ jô̆ yo kơ lu bơngai mă đei pơm kơ kon chhŭr nuih. Kon pơjao đĭ-đăng tôm tơdrong chhŭr nuih, tôm tơdrong ưh kơ dang-ăi, păng tôm tơdrong arih tơ anăp lăm tơpang ti Ih. Apinh Ih ăn kơ kon đei tơdrong hiôk-hian, pơklaih dôm tơdrong chhŭr nuih kon, păng tơgŭm kon kơnhăm lui gơnang kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah lăm năr ‘nâu ih oei chĕp ba lăm jơhngơ̆m dôm tơdrong chhŭr nuih, dah dôm tơdrong ưh kơ dang-ăi mă ih tam mă kĕ tŭk lê̆, athei pơjao đĭ-đăng dôm tơdrong noh kơ Kră Yang bĕ. Rơih iŏk huay kơ jô̆ yo păng rơih iŏk lui gơnang kơ Kră Yang băt, Sư ‘bôh tôm tơdrong, păng Sư gô wei-lăng ih kiơ̆ tơdrong ‘lơ̆ng tơpăt đơ̆ng Sư. Athei ăn kơ Kră Yang pơklaih dôm tơdrong chhŭr nuih lăm ih, iŏk lê̆ tơdrong sơ’ngon, păng bơtho ih yak năm tơ anăp lăm tơdrong hiôk-hian, hăm jơhngơ̆m iơ̆m dim, păng lui gơnang kơ Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.