Lu bơ̆n oei arih lăm teh đak mă bu bu kư̆m dai hơpơi wă kơ đei rơngei hơđơ̆ng. Lu bơ̆n răt hla bơ-ar wă ‘măn lê̆ jên ăn kơ tơdrong liĕm akâu bơ̆n, hơtol kơmăi camera wă lăng bơwei hnam, răt tơdrong ‘măn jên wă ‘măn ăn kơ tơdrong arih tơ anăp. Lu tơdrong noh ưh kơ glăi ôh. Mălei, tơdrong mă lu bơ̆n kăl kơ tơchĕng noh jơ̆ ưh kơ đei layơ kon bơngai mă arih lăm tơdrong tơtăm păng hli hlơt thoi ahrei ‘nâu. Tơdrong tơblah wang, jĭ jăn hơbuh, tơdrong truh gah ‘mi kial ưh kơ ‘lơ̆ng, tơdrong trăp trĭn lăm tơdrong arih oei rim năr pơhuach lê̆ tơdrong hơđơ̆ng lu bơ̆n. Lăm tŏk bŏk lu hơbŭt hơbang noh, anih ayơ mă “anih kơ’nơp” pĕng krôp gom ăn kơ bơhngol lu bơ̆n adrol kơ lu tơdrong gleh truh?

Năr ‘nâu, năr 07/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Joy Brunson kơ̆l ‘bai ANIH HLƠP KRĂ YANG MĂ TIH HLOH

“Bơngai bu oei lăm anih hlơp Kră Yang mă Tih Hloh. Gô oei lăm yơ̆p Tơ’ngla mơsêh mơyang.” (Hơriso 91:1)

Bơyan hngach sơnăm 2005, hnam dơnŏ pôk đơ̆ng pơlei Mississipi năm oei tơ New Orleans wă chă tơdrong arih ‘nao. Hăm tơdrong hơpơi wă pơjing hnam dơnŏ iŏk tơdrong lui pơm hơnă, mĕ ‘bă inh đei krao khan pơyơ̆r hnam ‘nao noh kơ Kră Yang păng drơ̆ng iŏk Nơ̆r Kră yang chông anhăk kơ hnam dơnŏ.

Jơ̆ lu bơngai oei arih đunh sơnăm tơ pơlei ‘nâu, mĕ ‘bă inh ưh kơ hlĭch ôh kơ bơyan ‘mi kial hơbŭt. Khei 8 sơnăm 2005, tơdrong ră roi gah ‘mi kial hơbŭt đe anăn Katrina đei pơtruh jơ̆p jang. Tơdrong khan lê̆ adrol tơbăt khan ‘nâu jơ̆ hơbŭt tih truh tơ kơnao mă pơđăm păng krao wơ̆n đĭ đăng kon pơlei pơla tĕnh jah weh đơ̆ng anih noh. ‘Măng blŭng-a, lơ bơngai lăm pơlei noh oei ưh kơ bơ-bĕng. Mălei, lăng ‘bôh băt tơdrong truh tih noh păng Kră Yang đei pơtrŭt jơhngơ̆m, mĕ inh athei đĭ đăng hnam dơnŏ nhon tĕnh jah weh đơ̆ng noh.

‘Mi kial hơbŭt sơnăm noh pơm ăn kơ inh ‘blŏk kơ Nơ̆r Kră yang lăm Hơriso 91: “Bơngai bu oei lăm anih hlơp Kră Yang mă Tih Hloh. Gô oei lăm yơ̆p Tơ’ngla mơsêh mơyang. Inh gô khan gah Kră Yang: “Sư bơih anih mă inh kơ’nơp păng kơđông kơjăp mă inh hơđơ̆ng. Sư bơih Kră Yang ‘Bok Kei-Dei mă inh gơnang.” Sư gô pơklaih ih đơ̆ng hơđong kap sem. Păng đơ̆ng lôch hơbuh. Sư gô pĕng bơwei ih hăm sŏk pơnăr sư. Ih gô kơ’nơp tơ ala pơnăr sư. Tơdrong tơpăt Sư jing khêl păng kơđông kơjăp pĕng ih”

Nơ̆r Kră yang lăm chăl ‘nâu tơ’blŏk kơ lu bơ̆n khan “anih hlơp” dah “kơđông” tơpă lu bơngai lui ưh kơ lu anih hnam tih kơjăp dah mă lu tơdrong kơjăp pơgia lăm ala teh âu, sơmă jơ̆ tơm đơ̆ng tơdrong tơ’bưh kơdih bơ̆n, oei jê̆ ‘Bok Kei-Dei. Đei gơh “oei lăm yơ̆p Tơ’ngla mă Tih Hloh” wă khan bơhngol lu bơ̆n lăm Kră Yang, đei Sư pĕng gom păng bơwei đơ̆ng tơdrong tơtăm păng hli hlơt ‘bơt anăp tơdrong gleh hrat truh. Sư jơ̆ “kơđông” lu bơ̆n, jơ̆ tơdrong lui păng tơdrong hơmĕng lu bơ̆n. Lăm tơdrong arih kiơ̆ Kră Yang, lu bơ̆n ưh kơ gơh weh đơ̆ng tơdrong gleh, mălei lăm tơdrong gleh noh, Sư đei pơkă wei lăng bơhngol lu bơ̆n.

Đơ̆ng rŏng kơ mĭnh ‘bar giĕng weh đơ̆ng pơlei, lu nhôn wih brŏk tơ hnam mă ưh kơ băt tơdrong kiơ oei răp gô tơ anăp. Lu nhôn ưh kơ băt hnam lu nhôn hăm oei đei mơ̆n dah ưh, buăl juăt lu nhôn hăm liĕm akâu mơ̆n ưh, tơdah lu bơngai oei kơtă tơnoh hăm oei arih mơ̆n ưh. Yua kơ dôm lu tơdrong truh lu nhôn ‘bôh lăm tơdrong đe ră roi noh trăp tơpă.

Păng, kơplah lu nhôn truh, lu nhôn ‘bôh hnam oei đêl ‘bơ̆t doh. Mă khan tơ lăm dai pơchah pơchek bơih, mălei gah ‘nguaih hnam noh oei huay kơ păk răm. Lu nhôn dar deh hơmet ming hnam noh păng tơdrong arih, hăm tơdrong tơgŭm ‘bĕnh kơ ‘mêm mơnat đơ̆ng tơpôl kon pơlei păng lu khŭl Bơngai Lui.

Wơ̆ ‘lŏ đơ̆ng tơdrong truh noh păng pơwao lăm Hơriso 91, inh rai hlôh hloh tơdrong wei lăng hlĭch chrơp đơ̆ng ‘Bok Kei-Dei. Lăm tŏk bŏk teh đak ‘bĕnh tơdrong gleh truh, tơblah wang hăm dôm kơ hli hlơt, dôm lu ‘mi kial hơbŭt noh gô iŏk đĭ dôm lu tơmam tơ ala teh, mălei ưh kơ đei tơdrong kiơ pơm ăn ngĭl ngŭl dah tơ-tông iŏk tơdrong hơđơ̆ng bơngai bu mă lui kơ Kră Yang. Bơhngol păng đon lui ih hăm inh ling lang đei pơdơh lăm anih hlơp kơjăp lăm Tơ’ngla mă Tih Hloh.

Apĭnh đĭ đăng krao khan hơdai: Kơkuh kơ Kră Yang mă anih kơ’nơp kơjăp lăm chăl arih inh. Bơnê kơ Ih yua kơ lăm tŏk bŏk đei dôm tơdrong gleh glăn, hiong hiach păng tơplih lăm chăl arih, kon oei đei krôp gom ala pơnăr Ih păng kơ’nơp lăm anih ‘lơ̆ng tơpăt Ih. Ơ Kră Yang, apinh bơwei jơhngơ̆m păng đon tơchĕng kon lăm tơdrong hơđơ̆ng Ih păng tơgŭm kon lui ngeh lăm nơ̆r pơkă Ih mă khan kon oei yak năm lăm ‘mi kial hơbŭt tih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơeng, hơbŭt hơbang lăm chăl arih âu đei iŏk đĭ dôm tơdrong đơ̆ng lu bơ̆n, mălei ưh kơ layơ gơh pơm hơlih mĭnh chăl arih mă đei pơjing kơpal tơmo kơjăp Yang Yêsu. Thoi noh, athei dan bĕ đĭ đon lui ih lăm tơdrong bơwei păng pơgơ̆r Sư. Athei chĕp răk bĕ Nơ̆r Kră Yang lăm Hơriso 91 păng apinh Yang Bơhngol ‘Lơ̆ng yua dôm Nơ̆r noh wă pơlung, tơiung ih mă khan đei tơdrong kiơ truh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.