Đơ̆ng lơ sơnăm đei adrin pơjao jơhngơ̆m pran ăn kơ hnam dơnŏ, ăn kơ kon pơlei pơla, dah lăm tơdrong bơ̆jang kơ Kră Yang, ih hăm đei jơ phŭt a-yơ gleh lap, păng kăl kơ chă minh anih hiôk-hian wă kơ “pơdơh đơ̆ng tơdrong bơ̆jang hrôih” ưh? Kư̆m đei jơ phŭt, tơdrong đe pơm kơ lu bơ̆n sơ’ngon, gleh lap, dah dôm tơdrong ưh kơ kiơ̆ thoi jơhngơ̆m đon lu bơ̆n, pơm kơ lu bơ̆n kơdŭn tơdrong wă kơ hiôk kơ kơdih. Mă-lei lăm kơnhăm đơ̆ng Kră Yang ‘Bok Kei-Dei, hăm đei layơ ŭnh đon lui athei pĭt lê̆ ưh?

Năr ‘nâu, năr 08/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm kơ̆l ‘bai KƠPLAH A-YƠ IH PƠDƠH KƠ BƠ̆JANG?

“Lăm puăn-jĭt sơnăm kơ ‘nâu, đơ̆ng Kră Yang khan kơ Môis nơ̆r ‘nâu kơplah Isơrael oei năm lăm char glă sơ̆, Kră Yang mă wei-lăng tơdrong arih inh truh tơ dang ei, na ‘nâu inh đĭ đei tơhngam-jĭt pơđăm sơnăm boih. Inh kư̆m oei đei jơhngơ̆m pran thoi kơplah Môis wơh inh năm sơ̆, inh oei đei jơhngơ̆m pran năm tơblah, thoi kơplah noh sơ̆.” (Jôsuê 14:10-11)

“Lăm puăn-jĭt sơnăm kơ ‘nâu, đơ̆ng Kră Yang khan kơ Môis nơ̆r ‘nâu kơplah Isơrael oei năm lăm char glă sơ̆, Kră Yang mă wei-lăng tơdrong arih inh truh tơ dang ei, na ‘nâu inh đĭ đei tơhngam-jĭt pơđăm sơnăm boih. Inh kư̆m oei đei jơhngơ̆m pran thoi kơplah Môis wơh inh năm sơ̆, inh oei đei jơhngơ̆m pran năm tơblah, thoi kơplah noh sơ̆. Hrei âu ăn bĕ kơ inh teh kông groi âu, mă Kră Yang pơkă boih wă ăn kơ inh lăm năr noh sơ̆, ih kư̆m kơtơ̆ng băt boih năr noh sơ̆ đei kon pơlei Anakim oei tơ noh păng đei pơlei tih să kơjăp, mă-lei đei Kră Yang tơgŭm inh, na inh gô pơpuh lu sư, kiơ̆ thoi Kră Yang khan boih.” (Jôsuê 14:10–12)
Lăm năr Tơpơh hlôi bơih âu, đơ̆ng rŏng kơ akŭm kơkuh boih, klo akăn nhi đei năm tơ anih mă nhi juăt kơ sŏng sa pơge, păng đei tơ’bơ̆p hnam dơnŏ lăm Hnam Akŭm. Kơplah nhôn oei pơma dơnuh, mŏ noh hiĕk păng roi kơ inh khan, bre sư đei krao anăn kon drŏ-kăn sư tơglĕ a-năn inh. Yua kơ bre sư oei ‘blŏk kơ inh, minh ‘nu oh mă juăt kơ bơ̆jang hăm đĭ jơhngơ̆m, đei adrin wei-lăng păng pơjing khŭl bơ̆jang lăm Hnam Akŭm lăm dôm sơnăm noh sơ̆.

Dôm nơ̆r sư pơma hăm đơ̆ng lăm jơhngơ̆m noh pơm kơ inh tơchĕng pă đei pơma nơ̆r kiơ. Tơpă, dôm lu adrĕch tơdrong ‘mêm mơnat mă inh đei rĕi oei hrĕp hreh bluh pơkao păng đei plei lăm tơdrong arih lu bơngai nai, mă khan inh kơdih ưh kơ băt kơ tơdrong noh ôh.

Nơ̆r pơlung noh, nhen thoi tu đak rơngơp truh tơ anih jrŭ lăm jơhngơ̆m inh. Pơma tơpă, đunh bơih inh đei drơ̆ng kơdih “pơdơh kơ bơ̆jang”. Dôm sơnăm inh đei adrin pơjao đĭ jơhngơ̆m, đĭ akâu jăn inh pŭ iŏk tơdrong jang tơpôl, hăm dôm tơdrong pơjah tơgar băl, tơdrong gleh lap kơplah tơ’bơ̆p dôm tơdrong ưh kơ kiơ̆ thoi jơhngơ̆m đon inh, dah hơpơi kơ đĭ đăng tơdrong tam mă ‘lơ̆ng tôm, đei pơm kơ jơhngơ̆m inh rai rơdu. Inh gleh lap, kăl kơ năm wih tơ minh anih hơđơ̆ng hiôk-hian, hrĕp hreh, păng ưh pă ‘maih năm tơ anăp wă bơ̆jang minh tơdrong kiơ dơ̆ng bơih. Mă-lei tơdrong arih Kalep lăm dêh char mă Kră Yang đei pơkă ăn kơ kon pơlei Isơrael lăm dôm sơnăm noh sơ̆, đei râu tơ-iung bơhngol inh.

Tơdrong lăm Sơ̆p Hla Bơar Nơ̆r ‘Bok Kei-Dei, Jôsuê 14:10-12, đei roi gah dôm nơ̆r Kalep pơma pơsĭt ‘bơ̆t anăp đĭ-đăng kon pơlei Isơrael. Athei tơchĕng lăng tơ tơdrong đei truh lăm dôm sơnăm noh. Kơplah tơdrong arih kon pơlei minh jơhnơ̆r lôch tơ char glă yua kơ lu sư ưh kơ đei đon lui kơjăp kơ Kră Yang, Kalep tơhngam-jĭt pơđăm sơnăm bơih mă sư oei đei jơhngơ̆m pran. Lăm jơ phŭt sơnăm kon bơngai chă tơdrong pơdơh hiôk-hian, jơ̆ sơnăm pơ dơh kơ bơ̆jang, na ŭnh đon lui kơjăp lăm jơhngơ̆m Kalep ưh kơ đei tôch ôh. Kalep dơ̆ng ‘bơ̆t anăp Jôsuê, bơngai mă wei-lăng kon pơlei Isơrael. Sư ưh kơ kăl kơ teh glă hiôk, đei lơ tơmam păng ưh kơ đei bơngai nai pơjah tơgar, dah apinh minh anih hiôk wă pơdơh sơnăm sư đĭ kră bơih ôh. Mă-lei sư pơma hăm nơ̆r kơtang thoi âu: “Hrei âu ăn bĕ kơ inh teh kông groi âu.”

Noh jơ̆ teh kông groi Hêbrôn, anih kông kŏ, hnam tih kơjung păng đei kon pơlei Anakim mă đei nuih pran kơtang păng akâu akar tih kơjung. Puăn-jĭt pơđăm sơnăm adrol, jơ̆ pơm kơ mơjĭt ‘nu bơngai mă năm chop lăng char Isơrael hli tơrơ. Tơdrong kiơ đei ăn kơ minh ‘nu bơngai kră tơhngam-jĭt pơđăm sơnăm, oei đei jơhngơ̆m pran kơtang păng ưh kơ hli thoi noh? Sơ̆p Hla Bơar Nơ̆r ‘Bok Kei-Dei đei khan lơ wơ̆t kơ Kalep, “sư chu păng pơm kiơ̆ Kră Yang ‘Bok Kei-Dei Isơrael đĭ jơhngơ̆m.” Jơhngơ̆m pran sư ưh kơ đơ̆ng sơnăm sư kră, dah gơnang kơ akâu akar kon bơngai ôh. Mă sư gơnang kơ Kră Yang ‘Bok Kei-Dei, Tơ’ngla mă đei wei-lăng tơdrong arih sư lăm puăn-jĭt pơđăm sơnăm lăm char glă sơ̆ hrĕng kro. Kơ Kalep, tơdah Kră Yang oei ăn kơ sư oei arih, păng tơdrong pơkă đơ̆ng Kră Yang tam mă jing tôm, na tơdrong tơblah gah đon lui oei đei đĕch.

Ơ lu bôl buăl mă ‘mêm kơ eng, lăm tơdrong arih năm kiơ̆ Kră Yang, ưh kơ đei pơma khan “pơdơh bơ̆jang lăm bơhngol” ôh. Đei jơ phŭt bơ̆jang kơ kon pơlei pơla, đei jơhngơ̆m pran gah akâu akar, dah tơdrong bơ̆jang lăm Hnam Akŭm lu bơ̆n rai tơplih kiơ̆ dôm kơ sơnăm arih. Mă-lei tơdrong pơkă wă kơ lu bơ̆n ‘mêm dih băl, pơjing tơdrong jang Yang Yêsu Krist, krao khan apinh Kră Yang tơgŭm bơngai nai, păng ră roi tơdrong ‘nao ‘lơ̆ng, ưh kơ đei pơdơh. Kư̆m đei jơ phŭt, hlôi kơ đei sơ’ngon dah tơdrong ưh kơ hlôh dih băl lu bơ̆n ‘bônh kơ kŏl păng rơih iŏk kơdŭn tơrŏng wă kơ hiôk-hian kơ akâu bơ̆n kơdih. Mă-lei Kră Yang ‘Bok Kei-Dei ưh kơ chă minh ‘nu bơngai ‘lơ̆ng tôm ôh, dah minh ‘nu bơngai mă gơnang kơ akâu sư kơdih, Sư chă minh ‘nu bơngai đei jơhngơ̆m đon lui kơjăp, chu yom kơ Sư, păng ling-lang hơdai hăm Sư păng pơjao kơ Sư bơ̆jang.

Mă khan tơdrong arih ih thoi yơ, ‘nĕ ăn kơ tơdrong gleh lap, tơdrong sơ’ngon yua kơ ưh kơ trŏ kiơ̆ jơhngơ̆m đon, dah tơdrong lăp đon kơ kơdih ih chô̆ lê̆. Kră Yang oei đei tơdă tơdrong pŭn hiôk păng dôm tơdrong bơ̆jang tih ăn kơ ih tơ anăp. Athei ăn kơ Yang Bơhngol ‘Lơ̆ng soh ŭnh lăm jơhngơ̆m ih jing ‘nă hal, hăm Sư yak năm tơ anăp păng chơ̆n jơhngơ̆m tŏk tơ “kông groi” plơ̆ng ư-ang kơ dêh char Sư.

Apĭnh đĭ đăng krao khan hơdai: Kơkuh kơ ‘Bă mă ‘mêm oei tơ plĕnh ti, kon bơnê kơ Ih yua kơ Ih ling-lang pơm kiơ̆ tơdrong Ih pơkă, păng đei wei-lăng tơdrong arih kon hlôi đơ̆ng dôm trong kon đei yak năm. Apinh Ih huay kơ jô̆ yo kơ kon, kơplah dôm tơdrong gleh lap păng dôm tơdrong sơ’ngon lăm tơdrong arih đei pơm kơ kon rơdu, păng maih wih brŏk tơ tơdrong hiôk-hian kơdih kon đĕch. Apinh Ih ăn kơ kon đei jơhngơ̆m chu yom păng đon lui kơjăp thoi kơ Kalep noh sơ̆, wă kơ kon ling-lang lui gơnang kơ tơdrong mơsêh mơyang đơ̆ng Ih, păng đei jơhngơ̆m ‘nă hal wă bơ̆jang kơ Ih ding đĭ chăl arih kon. Kon kŭp kơ̆l krao khan hăm anăn Yang Yêsu Krist, A-men.

Năr ‘nâu jơ̆ Năr Khŭl Kră Mơlôh Khŭl bơngai lui Hnam Akŭm Tơdrong ‘Nao Lơ̆ng lăm char Việt Nam. Tơdrong Tơdă ‘Măn Jơ Krao Khan Rim Năr hiôk chơt pơtruh nơ̆r hơkat pŭn hiôk kơ lu bơngai mơ̆ng mă oei lăm sơnăm kră mơlôh.

Nhôn hơpơi kơ lu bơ̆n huay kơ ăn dôm lu sơnăm đei bơ̆jang kơ Kră Yang, dôm tơdrong pơjah tơgar băl, dah dôm tơdrong gleh lap, pơm kơ lu bơ̆n rơdu, “pơdơh kơ bơ̆jang” lăm trong yak năm đon lui. Mă khan hlôi tơ’bơ̆p lơ sơnăm boih, mă khan sơnăm a-yơ, hơpơi kơ lu bơ̆n ling-lang lui gơnang kơ Kră Yang đĭ jơhngơ̆m. Hơpơi kơ rim ‘nu lu bơ̆n adrin chu kiơ̆ Kră Yang, bơ̆jang kơ Sư lăm Hnam Akŭm, lăm lu khŭl bơ̆jang kơ Kră Yang. Mă khan lăm anih bơ̆jang a-yơ, athei iŏk tơdrong đei hlôi tơ’bơ̆p, dôm tơdrong hơgei mă Kră Yang ăn, păng tơdrong ‘mêm mơnat đơ̆ng Sư, wă tơgŭm pơlung lu bơngai nai, pơjing đon lui kơjăp kơ lu ‘nhŏng oh lăm Hnam Akŭm, păng adrin rĕi đon lui kơ lu kon sâu lăm dôm lu chăl đơ̆ng rŏng.
Ơ lu bơngai mơ̆ng mă ‘mêm kơ eng, tơdah lăm năr ‘nâu ih oei lăm sơnăm hơmu hơmŏng đei jơhngơ̆m pran wă bơ̆jang, dah sơnăm ih kră bơih tơdrong Kră Yang krao ih lăm tơdrong arih ih, oei ling lang plơ̆ng ‘nao đĕch. ‘Nĕ ăn kơ dôm lu tơdrong đĭ hlôi đơ̆ng sơ̆ bơih, dah tơdrong gleh lap, pơm kơ ih rơdu păng ‘maih pơdơh. Lăm năr ‘nâu, a-yơ mă “teh kông groi” Kră Yang oei krao ih adrin krao khan tơgŭm bơngai nai, tơbăt tơdrong ‘mêm mơnat, dah tơgŭm minh ‘nu bơngai oei jê̆ ih? Athei đei pơ̆n nuih, yak năm lĕch hlôi đơ̆ng tơdrong arih hơdơ̆ng kơdih akâu wă kơ tơdrong arih ih đei lơ plei ‘lơ̆ng ư-ang kơ Kră Yang!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.