Lăm tơdrong arih kon pơlei pơla hrei ‘nâu, pôk pơư tơdrong kơdih, păng ‘bônh kơ đei tôm tơdrong thoi hrei ‘nâu, na tơdrong rơdu tơrăn dah tơdrong pơm ưh kơ trŏ, lăng hmă đĕch. Lu bơ̆n juăt kơ kơtơ̆ng dôm nơ̆r thoi âu: “Athei lui gơnang kơ akâu ih kơdih” dah “Ih gơh pơm tôm tơdrong.” Mă-lei lăm tơdrong arih tơpă, đei dôm kơ “kông groi” hloh kơ hlôh băt đơ̆ng lu bơ̆n. Jơhngơ̆m pran, tơdrong gơh hơgei đơ̆ng lu bơ̆n ưh kơ tôm ôh. Yua kơ thoi noh, kơplah lu bơ̆n dơ̆ng ‘bơ̆t anăp dôm tơdrong pơlong lăng, lu bơ̆n gô pơm thoi yơ wă kơ gơh ‘bôh tơdrong hiôk-hian păng jơhngơ̆m pran kơtang tơpă, kơplah akâu lu bơ̆n kơdih đei gleh lap dêh boih?

Năr ‘nâu, năr 09/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Bernadette Canepa kơ̆l ‘bai GƠNANG KƠ TƠDRONG ‘MÊM KRĂ YANG.

“Huay ôh, ih kư̆ kơ jang tơdrong Inh mă tơpă đĕch, tơdrong ih jang ưh kơ kĕ ưh kơ pran noh lê̆ kơ Inh tơgŭm ih, ih ‘nĕ hiơ̆k kơ tơdrong ih pơmat-tat noh, thoi noh na đe băt kơ tơdrong mơsêh mơyang Inh tih tơpă, ih pơmat-tat dang noh mă oei jang khŏm khŏm.” (II Kôrintô 12:9)

Kơplah inh đei puăn-jĭt sơnăm, inh rơih iŏk wih năm tơ hnam hŏk pơhrăm lăm tih, wă pơkeh tơdrong pơhrăm iŏk băng. Inh ‘maih năm hŏk pơhrăm, mă khan inh kră boih, yua kơ kơplah inh oei hơmuh hơmŏng sơ̆, inh ưh kơ băt kơnhăm kơ tơdrong hŏk pơhrăm noh. Inh rơih iŏk pơhrăm tơ internet, wă kơ gơh hŏk pơhrăm păng hăm rai bơ̆jang hloi. Mă-lei dôm lu khŭl hŏk pơhrăm hrĕnh tĕnh dêh. Pơkeh tơdrong hŏk pơhrăm lăp tơhngam giĕng đĕch.

Hơdrol sơ̆, đĭ-đăng dôm tơdrong oei năm tơproh ‘lơ̆ng, mă-lei kơplah inh pơtơm đơ̆ng blŭng a wă hŏk pơhrăm, inh ‘bôh inh nhen thoi inh oei dơ̆ng ‘bơ̆t anăp kông groi tih, ưh kơ băt pơm thoi yơ wă kơ yak năm hlôi. Tơdrong pơlong lăng tih hloh kơ inh jơ̆ hŏk pơhrăm tơchĕng pơwao gah kơsô̆. ‘Măng tuch luch hŏk pơhrăm tơdrong noh đei loi mơjĭt sơnăm hlôi boih, na dang ei inh đĭ hiơt kơdôm tơdrong inh hlôi hŏk pơhrăm gah kơsô̆ noh.

Inh băt hli, hli kơ inh ưh kơ gơh wei-lăng đei điêm ‘bơ̆t tŏk ‘bŏk mă inh đei adrin đơ̆ng dôm jơ hŏk pơhrăm noh. Ưh kơ đunh kơ noh, inh đei năm akŭm kơkuh tơ hnam akŭm lăm hnam hŏk pơhrăm. Kơplah bơngai pơma tơ noh bơtho khan athei pơjao đon lui gơnang tơpă kơ Kră Yang lăm đĭ-đăng dôm tơdrong gleh pơmat lăm tơdrong arih, đak măt inh lĕch. Dơ̆ng ‘bơ̆t anăp tơdrong pơlong lăng tih hloh kơ jơhngơ̆m đon inh, inh băt kơ akâu inh rơdu tơrăn tơpă, păng đon lui inh rơdu dêh.

Mă-lei, tơdah inh ưh kơ kĕ pơm tơdrong noh đơ̆ng akâu inh kơdih, Nơ̆r ‘Bok Kei-Dei oei tơ‘blŏk kơ inh thoi âu: “Huay ôh, ih kư̆ kơ jang tơdrong Inh mă tơpă đĕch, tơdrong ih jang ưh kơ kĕ ưh kơ pran noh lê̆ kơ Inh tơgŭm ih, ih ‘nĕ hiơ̆k kơ tơdrong ih pơmat-tat noh, thoi noh na đe băt kơ tơdrong mơsêh mơyang Inh tih tơpă, ih pơmat-tat dang noh mă oei jang khŏm khŏm.” (II Kôrin tô 12:9)

Lăm Sơ̆p Hla Bơar Nơ̆r ‘Bok Kei-Dei, nơ̆r “tôm” đei khan kơ tơdrong tôm mah tơpă, ưh kơ đei dơnuh kơ mŭk tơmam ôh. Lăm tơdrong arih lu bơ̆n, Kră Yang ‘Bok Kei-Dei ưh kơ iŏk lê̆ đĭ-đăng dôm tơdrong gleh pơmat dah dôm lu tơdrong pơlong lăng đơ̆ng lu bơ̆n ôh. Mă-lei Sư bơ̆jang lăm dôm tơdrong lu bơ̆n oei rudu tơrăn noh. Sư đei pơkă kơ tơdrong ‘mêm mơnat păng mơsêh mơyang đơ̆ng Sư gô dŏng, tơgŭm lu bơ̆n rim năr, tơdah lu bơ̆n oei đei tơ’bơ̆p dôm tơdrong tơblah a-yơ noh. Gah lu bơ̆n kơdih, lu bơ̆n kư̆m athei băt tơdrong jang mă lu bơ̆n athei pơm, adrin bơ̆jang kiơ̆ tơdrong Kră Yang jao kơ lu bơ̆n, wă kơ đei plei ‘lơ̆ng đơ̆ng Sư ăn.

Yua kơ thoi noh, inh đei năm chih măt tơ khŭl pơhrăm thim, ‘ngoaih kơ jơ hŏk pơhrăm tơm. Inh kư̆m chă lăng dôm tơdrong bơtho tơ internet, păng apinh lu bơngai oei jum dăr tơgŭm inh mơ̆n. Kră Yang đei ăn kơ inh tơdrong ‘mêm mơnat đơ̆ng Sư, hăm tơdrong inh adrin hŏk pơhrăm, păng hăm dôm trong tơgŭm nai dơ̆ng, wă kơ inh gơh pơhrăm iŏk. Đơ̆ng rŏng kơ tơhngam giĕng pơhrăm hrăt hrot noh, inh đei iŏk điêm A, minh tơdrong pơm ăn kơ jơhngơ̆m inh hiôk lăp đon dêh.
Đei tơdrong noh yua kơ Kră Yang đei ba trong păng ăn pŭn hiôk kơ inh. Kiơ̆ thoi Nơ̆r ‘Bok Kei-Dei bơtho, kơplah lu bơ̆n băt rơđah tơpă kơ tơdrong rơdu tơrăn akâu bơ̆n kơdih, jơ̆ lăm jơ phŭt noh lu bơ̆n hlôi đei mơn tơ’bơ̆p tơdrong mơsêh mơyang, tơdrong ‘mêm mơnat păng tơdrong Kră Yang ling-lang pơm kiơ̆ kơ tơdrong pơkă Sư lơ hloh dơ̆ng.

Thoi noh, tơdah dang ei ih oei dơ̆ng ‘bơ̆t anăp dôm kơ “kông groi” a-yơ, dah dôm tơdrong pơlong lăng mă pơm kơ ih ưh kơ băt pơm thoi yơ, păng jơhngơ̆m ih jing rơdu, athei tơ‘blŏk kơ akâu ih kơdih, tơdrong ih rodu tơrăn jơ̆ anih mă tơdrong ‘mêm mơnat đơ̆ng Kră Yang gô tơ’bôh ăn. ‘Nĕ gơnang kơ tơdrong hlôh wao đơ̆ng akâu ih kơdih, athei gơnang kơ tơdrong ‘mêm mơnat păng mơsêh mơyang đơ̆ng Sư. Kơplah lu bơ̆n adrin chu kiơ̆ tơdrong jang mă Kră Yang jao kơ lu bơ̆n, păng pơjao tơdrong bơ̆n đei lăm tơpang ti Sư, lu bơ̆n gô ‘bôh tơdrong mơsêh mơyang đơ̆ng Sư, tơgŭm lu bơ̆n gô ‘bôh tơdrong tơgŭm bơ̆n yak hlôi đơ̆ng “kông groi” lăm tơdrong arih, păng wă kơ hlôi đơ̆ng “kông groi” noh, hơpơi kơ tôm tơdrong gô ư-ang kơ Kră Yang!

Apĭnh đĭ đăng krao khan hơdai: Kơkuh kơ Kră Yang mă ‘mêm, rim wơ̆t jơhngơ̆m kon rơdu păng kon gleh lap lăm trong arih yak năm tơ anăp, apinh Ih tơgŭm kon băt gơnang kơ tơdrong ‘mêm mơnat păng mơsêh mơyang đơ̆ng Ih. Ơ Kră Yang, kon băt kơ akâu kon rơdu tơrăn dêh, na kon ưh kơ kĕ bơ̆jang minh tơdrong kiơ kiơ ôh, tơdah ưh kơ đei Ih tơgŭm kon. Hơpơi kơplah kon hlôi tơ’bơ̆p dôm tơdrong gleh pơmat păng pơlong lăng, kon rai băt hloh dơ̆ng, tơdrong ‘mêm mơnat păng mơsêh mơyang đơ̆ng Ih tih kơjung lăm tơdrong arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lăm giĕng ‘nâu, ih oei dơ̆ng ‘bơ̆t anăp “kông groi” kiơ? Tơdrong jang dah tơdrong pơjao kơ ih tơdrong kiơ mă hloh kơ tơdrong hlôh wao kơdih ih? Athei ăn kơ Nơ̆r ‘Bok Kei-Dei lăm năr ‘nâu tơ‘blŏk kơ ih băt kơ tơdrong ‘mêm mơnat păng mơsêh mơyang đơ̆ng Sư ling-lang tôm mah kơ ih. Athei gơnang kơ tơdrong ‘mêm mơnat đơ̆ng Sư, wă kơ ih adrin chu kiơ̆ Kră Yang, păng bơ̆jang hăm đĭ jơhngơ̆m dôm tơdrong Sư đei jao kơ ih. Yua kơ Kră Yang ‘Bok Kei-Dei ưh kơ đei lê̆ lu bơngai mă lui gơnang kơ Sư đĭ jơhngơ̆m păng ling-lang chu kiơ̆ Sư, lăm rim tơdrong jang mă khan iĕ ioch lăm tơdrong arih rim năr mơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.