Tej zaum peb ib txwm swm pehawm hauv ib lub tuam tsev zoo nkauj, qhov chaw uas txhua yam tshwmsim mus tau zoo. Tiamsis koj puas paub, kev pehawm yeej tsis muaj nrim rau thaj chaw thiab lub caijnyoog. Ntau zaug, kev pehawm tiag ho pib ntawm tej qhov chaw uas yooj yim, thaum peb puas tshuaj, qaug zog thiab cheem tsum Vajtswv ntau tshaj. Peb tus Vajtswv tsis nrhiav sab nraud kom zoo lossis tej lus zoo tiamsis qhov uas Vajtswv tshua tshaj yog lub siab txo hwjchim thiab nrhiav Vajtswv tiag.

Hnub no, yog hnub 11/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jessica Teed dhau ntawm Zaj kawm NTAWM KUA MUAG MUS RAU TXOJKEV KAJ SIAB

“Kuv qhia rau koj hais tias, qhov uas tus pojniam no muaj kev hlub loj npaum li no, qhia hais tias Vajtswv twb zam nws tej kev txhaum huv tibsi lawm. Tiamsis tus uas Vajtswv zam txim tsawg, tus ntawd yeej nco Vajtswv txiaj ntsig tsawg.” (Lukas 7:47)

Twb ib tag hmo dua lawm tiamsis kuv yeej pw tsis tsaug zog. Kuv lub siab puv npo kev txhawj thiab qaug zog. Thaum ntawd, kuv pom yam uas kuv cheem tsum tshaj yog Vajtswv txoj kev tshwm ntsej muag. Kuv pib pehawm thiab muab txhua yam tham rau Vajtswv. Kuv muab kuv lub nra nyhav tso rau Vajtswv hauv tej teev kua muag.

Kev pehawm tsis yog thaum twg twb tshwmsim rau tej lub caijnyoog zoo lossis ci ntsa iab, ntau zaug, kev pehawm ho tshwmsim nyob rau tej lub sijhawm uas tsis muaj dabtsi, thaum uas peb qaug zog, puas tshuaj thiab tsis tshuav dabtsi zais tau Vajtswv lub ntsej muag.

Lukas 7 tham txog ib tug neeg Falixais npe hu ua Ximoos caw Tswv Yexus los noj mov hauv Nws tsev. Thaum ntawd, ib tug pojniam raug suav tias yog neeg txhaum nyob hauv nroog hnov xov tias Tswv Yexus tab tom nyob hauv, nws thiaj nqa ib hwj tshuaj tsw qab. Pog sawv tom qab Tswv Yexus txhais ko taw quaj, txog qhov uas kua muag ntws los ntub Tswv Yexus txhais taw; tas nws muab nws cov plaub so, nwj Tswv Yexus kotaw thiab pleev tshuaj tsw qab rau. Thaum Ximoos pom li ntawd yawg xav:

“Yog tus no yog ib tug cev Vajtswv lus tiag, nws yeej yuav paub hais tias tus pojniam uas kov nws ntawd, yog ib tug neeg txhaum!” (nqe 39).

Tswv Yexus paub zoo tus pojniam ntawd. Pog zoo siab hlo mus cuag Tswv Yexus quaj thiab muab Nws lub siab nthuav tawm rau ntawm Vajtswv xub ntiag zoo li ib tes haujlwm pehawm thiab hlub Vajtswv. Pog tsis quav ntsej saib lwm tus yuav ntsia pog zoo li cas, zoo li tsuas muaj Tswv Yexus thiab pog nkawd xwb.

Tswv Yexus paub tej uas Ximoos xav tau hais rau yawg: “Yexus hais rau tus Falixais ntawd hais tias, “Ximoos, kuv muaj ib lo lus xav hais rau koj.” Ximoos teb hais tias, “Tau los mas xibhwb, koj cia li hais.” Yexus txawm hais tias, “Muaj ob tug txivneej tshuav ib tug yawg nqi. Ib tug tshuav tsib puas lub nyiaj , ib tug tshuav tsib caug lub nyiaj. Nkawd puavleej tsis muaj nyiaj them tus yawg ntawd, ces tus yawg ntawd txawm zam nqi rau nkawd huv tibsi. Yog li, ob tug ntawd, tus twg yuav nco tus yawg ntawd txiaj ntsig heev dua? ” Ximoos teb hais tias, “Kuv xav hais tias, yog tus uas tus yawg ntawd zam nqi ntau rau.” Yexus teb hais tias, “Yog li koj hais lawm.”… Kuv qhia rau koj hais tias, qhov uas tus pojniam no muaj kev hlub loj npaum li no, qhia hais tias Vajtswv twb zam nws tej kev txhaum huv tibsi lawm. Tiamsis tus uas Vajtswv zam txim tsawg, tus ntawd yeej nco Vajtswv txiaj ntsig tsawg.” (nqe 40-43, 47).

Vajtswv tej lus nthuav tawm ib qhov tseeb tias: qhov uas peb paub peb ua tsis tau dabtsi rau peb tej kev txhaum yuav kib teem rau qhov uas peb saj tau Vajtswv txoj kev hlub tob npaum cas. Tus pojniam no hlub Tswv Yexus heev vim pog paub tias nws tau zam txim ntau. Thaum pog mus cuag Tswv Yexus nrog nws teev kua muag thiab txo hwjchim, ntawd kuj yog lub sijhawm pog tau txav mus ze rau Vajtswv txoj kev hlub. Tshuav Ximoos, nws tsis pom nws qhov nqi ntawm sab ntsujplig, nws tsis paub tias nws cheem tsum Vajtswv txoj kev hlub npaum cas. Nws yim paub tias nws tau Vajtswv zam txim ntau npaum cas ces yuav tau hlub thiab pehawm Vajtswv npaum ntawd.

Ntau zaug peb xav tias yus yuav dhau los zoo dua thiaj kam mus nyob ze Vajtswv. Tiamsis Tswv Yexus tsis yuam kom peb zoo kawg nkaus mam mus ze Vajtswv. Nws xav kom peb mus cuag Nws zoo li peb tus neeg tiag, tsis ua xyem xyav, tsis zais, tsis ua txuj thiab tsis tuav ib yam dabtsi cia. Vajtswv yeej ib txwm paub zoo txhua yam txog peb, Nws yeej hlub thiab zoo siab hlo txais yuav peb txawm yog yuav nyob rau lub caijnyoog uas tsaus ntuj tshaj, los nws yeej tseem pab thiab hlub peb.

Tomqab thov Vajtswv tas, kuv hnov Vajtswv txoj kev kaj siab tiv thaiv kuv. Kuv paub tias Vajtswv yog tus hlub kuv, nkag siab kuv thiab zam rau kuv ntau tshaj lwm tus. Tej nra nyhav nyob hauv kuv cuag li sib zog. So tej kua muag ntawm nplhu, kuv hnov kuv lub siab puv npo lub siab nco tshav ntuj vim txhua yam uas Vajtswv tau ua rau kuv. Thiab thaum ntawd, kuv paub tias kuv muaj kev kaj siab. Yog kev kaj siab uas Tswv Yexus pub rau tus pojniam thaum ub thaum uas Tswv Yexus hais tias: “Koj txoj kev ntseeg twb cawm koj lawm; cia li mus kaj siab lug” (Lukas 7:50).

Thov caw nrog kuv peb thov Vajtswv ua ke: Tus Tswv, thov pab kom kuv ruaj siab mus nyob ze Vajtswv nyob rau txhua lub caijnyoog, kom kuv lub neej tau saj kev kaj siab puv npo hauv koj. Thov qhia kom kuv paub pehawm Koj tsis yog tej hnub zoo xwb, tiamsis nyob rau tej hnub qaug zog thiab puas tshuaj tib si. Thov kom kuv lub neej tau hlub thiab tau nyob ze koj, vim kuv paub tias kuv tau koj hlub thiab zaj txim loj tshaj. Kuv thov hauv Tswv Yexus Khetos lub npe, Amees.

Cov kwv tij txhua tus, kev pehawm tej zaum yuav tshwmsim nyob rau tej thaj chaw uas zoo zoo nkauj, tiamsis tej zaum kuj yuav tau pehawm nyob rau tej thaj chaw phem, tej lub sijhawm uas peb ua tsis tau dabtsi, thiab qaug zog tshaj. Puas tau muaj zaum twg koj txaj muag mus cuag Vajtswv vim hnov tias yus muaj kev txhaum ntau thiab tsis tsimnyog lawm tau? Zaj xwm hais txog tus pojniam ua txhaum ntuas kom peb yuav tau muaj lub siab tawv mus cuag Vajtswv nyob rau txhua lub caijnyoog, vim Vajtswv yeej tsis muaj zaum yuav tsis lees yuav tus uas muaj lub siab puas ntsoog. Txhob cia tej kev txhaum lossis kev txaj muag tav koj mus nrhiav Vajtswv. Yim paub yus cheem tsum Vajtswv txoj kev hlub ntau npaum cas peb yuav khiav mus ze Vajtswv npaum ntawd.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.