Peb tib neeg muaj ib qhov kev ntshaw muaj zog heev: ntshaw kom tau tswj. Peb tso siab thaum uas txhua yam tshwmsim yog raws li lub sijhawm, thiab pib xav tsis thoob thaum uas txhua yam pib mus yuam kev. Tiamsis puas muaj zaum twg koj pom tias, zaj kawm uas yus kawm tau hloov pauv lub neej ho pib ntawm tej uas peb tsis xam txog ua ntej? Tej zaum thaum muaj ib txua kev tu ncua tsis raws li lub siab xav ho yog qhov pib rau Vajtswv txoj kev npaj zoo kawg nkaus uas Vajtswv sau rau Vajtswv haiv neeg.

Hnub no, yog hnub 12/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dr. Paul J. Palma dhau ntawm Zaj kawm VAJTSWV TXOJKEV NPAJ UAS ZOO DUA

“Neeg xav ntau yam hauv lub siab yuav ua, tiamsis yuav yog haum tus Tswv siab thiaj ua tau.” (Pajlug 19:21)

Tig rov qab mus ntsia, tej zaum yuav muaj tsawg tus nyob hauv xav tias yus tau ua neej dhau ib qhov teeb meem loj li COVID-19 thiab thaum txwv kev rau xyoo 2020. Txhua yam tshwmsim sai heev. Tsuas ib lub sijhawm luv luv xwb, peb lub neej txhua hnub raug hloov pauv los ntawm txoj kev txwv nruj nruj, nrog rau tej hnub ntev ntev nyob hauv tsev. Thaum ntawd, cuag li yeej tsis muaj leej twg paub qhov no yuav ntev npaum cas lossis lub neej no yuav hloov pauv li cas.

Ib qhov kev hloov pauv meej tshaj nyob rau lub sijhawm muaj mob yog cov Pawg Ntseeg raug kaw qhov rooj. Pauv qhov uas txhua tsev neeg mus pehawm hauv Pawg Ntseeg li txhua taig kis hnub so, peb pib pehawm kiag ntawm peb qhov chaw txais qhua hauv yus tsev. Tas nrho tsev neeg los nyob ua ke, nyeem Vajluskub, thov Vajtswv, thiab pehawm Vajtswv. Tshab plaws xyoo 2020, peb kuj nrog tej menyuam saib ua ke tas nrho phau ntawv “Quyển Sách Thần Kỳ” tas kawm tej ntu Vajluskub hais txog tej zaj xwm ntawd.

Lub sijhawm ntawd tsev neeg muaj sijhawm nyob ua ke dhau los ua ib lub cim tseem ceeb hauv kuv cov menyuam txoj kev ntseeg.

Thaum koom kawm Vajtswv txoj kev ua ke tomqab ib zaj movies, wb ib niam txiv muaj sijhawm mloog thiab teb lawv tej kev khuab xeeb. Ob peb hlis pehawm hauv tsev, kuv cov menyuam tau cim civ kam thov Vajtswv txais yuav Tswv Yexus ua lawv tus Tswv cawm seej.

Tig rov qab mus saib, tej kev hloov pauv tshwmsim nyob rau xyoo 2020 dhau los ua ib kaujruam tshwj xeeb rau peb tsev neeg. Vajtswv siv lub sijhawm cuag li puv npo nrim quas li ntawd coj peb tsev neeg los nyob ze Vajtswv thiab pab kom peb txoj kev ntseeg khov kho.

Vajtswv txoj kev npaj nws tau nthuav tawm raws li txoj kev uas peb tsis xav tau ua ntej. Saib zaj xwm uas Paulus thiab cov neeg uas nrog Nws ua ke. Lawv npaj yuav mus qhia rau cheeb tsam Axias, tiamsis Vajtswv muaj dua lwm lub homphiaj tseg rau lawv. Phau Tes Haujlwm tshooj 16 ua rau peb pom Vajtswv tau tav, hloov Paulus thiab nws cov phooj ywg txoj kev. Vajluskub qhia paub, lub sijhawm ntawd Vaj Ntsujplig yog tus tav tsis pub lawv qhia moo zoo rau cheeb tsam Axias (Tes Haujlwm 16:6).

Lawv xav qhia Txojmoo Zoo rau thaj chaw no, tiamsis Vajtswv muaj dua lwm txoj kev npaj loj dua tseg rau lawv. Thaum lub qhov rooj no kaw, Vajtswv qhib dua lwm lub qhov rooj thiab coj lawv mus txog rau ntawm Maxedaunias, qhov chaw zoo sau tab tom tos lawv. Hauv Filipis, ib lub nroog loj yog Maxedaunias lawv ntsib Lidias yog ib tug pojniam xub ntseeg Tswv Yexus, thiab tag nrho Nws tsev neeg los ib yam. Thaum kawg nws ua kevcai raus dej (Tes Haujlwm 16:15). Lidias lub tsev dhau los ua qhov chaw rau cov ntseeg pehawm, ntaus ib lub cim tshiab nyob hauv cov ntseeg Vajtswv tau Vajluskub sau tseg nyob rau sab ntuj tsaus.
Hauv phau ntawv Pajlug, cov Yixalayees tus vajntxwv uas ntse tshaj yog Xalumoos tau sau: “Neeg xav ntau yam hauv lub siab yuav ua, tiamsis yuav yog haum tus Tswv siab thiaj ua tau.” (Pajlug 19:21).

Yog li, tso siab muab txhua lub homphiaj tso rau hauv Vajtswv txhais tes. Txawm yog lub qhov rooj uas koj npaj tos nws kaw lawm los, lossis txoj kev tom ntej nws lem mus rau lwm ceg lawm los, ntseeg siab rau Vajtswv txoj kev npaj thaum twg twb yog zoo kawg nkaus rau peb lub neej.

Thov caw nrog kuv peb thov Vajtswv ua ke: Tus Tswv, thov coj kuv mus raws li Koj lub siab nyiam kom kuv tau saj tej txoj kev tshiab hauv txoj kev ntseeg, thiab nkag rau lub caij sau tshiab tau paj txiv ncw. Thov pub kom kuv muaj siab tawv ntseeg tias, txawm yog ib lub qhov rooj tab tom kaw los, koj yeej yuav qhib dua lwm txoj kev zoo dua txhua yam uas kuv tau xav txog. Kuv thov hauv Tswv Yexus Khetos lub npe, Amees.

Cov kwv tij txhua tus, txawm yog peb yuav npaj zoo npaum cas los, Vajtswv lub homphiaj tseg rau peb nws zoo dua, loj dua txhua yam uas peb tau xam. Ntau zaug, twb yog tej txua kev nkhaus ntawd nws ho pab peb loj hlob hauv txoj kev ntseeg. Ib qhov teeb meem nyob sab nraum peb qhov kev xav tej zaum nws yuav qhib ib txoj kev tshiab rau peb uas peb tsis tau xav txog, thiab lub qhov rooj no kaw tej zaum yuav coj peb mus txog rau ib txoj kev tshiab uas nws puv npo koob hmoov. Kom thaum peb tig rov qab los saib, peb thiaj nkag siab tias nyob hauv txoj kev uas peb tsis tos ntawd, Vajtswv lub siab nyiam thaum twg twb kov yeej thiab zoo kawg nkaus hauv peb lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.