Lu hơ’lơ̆p juăt kơ chă trong wer weh đơ̆ng dôm tơmam mă lu sư ưh kơ lăp đon. Lu bơngai kră kư̆m ưh kơ phara ôh, lu bơ̆n juăt kơ chă trong wer weh đơ̆ng tơchĕng, gleh lap. Mă-lei tơdrong arih ưh kơ ling-lang ăn kơ lu bơ̆n rơih iŏk dôm lu tơdrong ‘bônh đĕch, hiôk-hian kơ akâu bơ̆n kơdih ôh. Păng đei jơ phŭt, na đơ̆ng dôm lu tơdrong mă “ưh kơ ‘bônh” noh, oei hrĕp hreh lăm jơhngơ̆m bơ̆n đei kăl yua hloh.

Năr ‘nâu, năr 10/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jennifer E. Jones kơ̆l ‘bai PŬN HIÔK ĐƠ̆NG RŎNG KƠ PƠMAT-TAT

“Mă bơ̆n đei tơdrong gleh truh pơmat-tat dang ei, mă-lei inh băt tơpă ning-mônh bơ̆n gô oei hơdai hăm ‘Bok Kei-Dei hiôk dêh; na mă bơ̆n pơmat-tat, bơ̆n kư̆m pơm hiôk thoi lĕ kơ năr jơhngơ̆m bơ̆n hiôk, yua kơ ning-mônh bơ̆n gô hiôk tơpă.” (Rôm 8:18)

Rŏ lăng tơdrong hiôk hloh kơplah lu bơ̆n jing bơngai kră, jơ̆ lu bơ̆n gơh rơih iŏk đơ̆ng akâu bơ̆n kơdih lơ tơdrong lăm tơdrong arih. Ưh kơ đei bu nai athei ih hơmet trong, hơpuih anih cham, dah ôp hơnă hnam dơ̆ng bơih. Kơplah đei truh tơ ‘bar-jĭt mônh sơnăm, minh lăm dôm tơdrong rơih iŏk blŭng-a đơ̆ng inh kơplah năm tơ lăm tơdrong arih bơngai kră jơ̆: Đơ̆ng âu tơ anăp, inh ưh pă hơtŭt ‘bơm plei tơh Hà Lan dơ̆ng.

Inh areh kơ plei tơh Hà Lan, đơ̆ng sơ̆ truh tơ dang ei oei thoi noh đĕch. Kơplah inh oei hơ’lơ̆p, rim wơ̆t tơoei tơ anih sŏng sa, inh juăt kơ kơkă ‘măn lê̆ tơ ala hơpiĕt đang kơ noh lă lê̆ tơ kơthŭng. Dang ei inh jing bơngai ‘lŏ kră boih, lu buăl jang hơdai inh lăng pơnhen tơ inh kơplah inh adrin chă rơih iŏk lê̆ găr tơh noh tơ ‘ngoaih đơ̆ng pơnhan mi dah pơnhan sŭp. Inh iŏk lê̆ đĭ dôm găr tơh noh, ưh kơ ăn klep minh găr ayơ, na inh hơđơ̆ng kơ sŏng sa.

Tơdrong noh yua kơ inh ưh kơ lăp đon kơ bâu đơ̆ng plei tơh Hà Lan đĕch. Thoi noh, kơplah inh kră boih păng gơh rơih iŏk đơ̆ng akâu inh kơdih, inh rơih iŏk ưh pă sa tơmam noh dơ̆ng.

Dah lăm tơdrong arih, đĭ-đăng dôm tơdrong mă inh ưh kơ lăp đon, inh kư̆m gơh rơih iŏk thoi noh, lei hiôk dêh! Tơdah inh gơh rơih iŏk, inh kư̆m đei lơ tơdrong mă inh ‘maih tŭk lê̆ đơ̆ng tơdrong arih rim năr. Păng inh lui kơ ih kư̆m đei dôm tơdrong thoi noh mơ̆n. Mă khan dôm tơdrong pŭ trăp, tơdrong gleh pơmat, dah tơdrong hli ling-lang oei hrĕp druh kiơ̆ lăm jơhngơ̆m, đei dôm jơ phŭt tơdrong arih oei dan ‘bơ̆t anăp lu bơ̆n minh “anih sŏng sa” ‘bĕnh kơ dôm tơdrong mă lu bơ̆n ưh kơ lăp đon.

Ih hăm ‘maih băt kơ tơdrong ‘lơ̆ng gah plei tơh Hà Lan ưh? Kiơ̆ thoi lu bơngai băt gah tơdrong tơmam sa đei ‘lơ̆ng kơ akâu akar, plei tơh Hà Lan jơ̆ tơmam đei yua tih kơ jơhngơ̆m akâu akar. Lăm lu găr tơh noh đei lơ vitamin A, vitamin C, săt, păng dôm tơdrong tơmam đei yua nai dơ̆ng. Plei tơh Hà Lan kư̆m đei protein mă akâu akar bơ̆n kăl lơ mơ̆n. Bu băt, dôm lu găr tơh noh đei lơ tơdrong ‘lơ̆ng kơ akâu akar ih truh tơ thoi noh?

Dôm tơdrong pơlong lăng gleh pơmat kư̆m thoi plei tơh Hà Lan noh mơ̆n. Mă khan ưh kơ lăp đon, mă-lei dôm tơdrong noh đei lơ tơdrong yua tơpă kơ bơhngol lu bơ̆n. Dôm tơdrong pơm kơ jơhngơ̆m lu bơ̆n trăp trĭn, đei pơhrăm iŏk kơ lu bơ̆n đei jơhngơ̆m chơ̆n. Dôm tơdrong ưh kơ kiơ̆ thoi jơhngơ̆m đon lu bơ̆n, gơh pơm kơ lu bơ̆n lăng tơ dôm tơdrong mă lu bơ̆n oei chang gô, păng pơhrăm lăng tơdrong arih hăm minh tơdrong tơchĕng jrŭ să hloh dơ̆ng. Dôm tơdrong đêl đei hơdai ‘lơ̆ng jơ ‘nâu hiong răm, dah dôm tơdrong hơpơi wă ưh tam mă jing đei, gô jing tơdrong ‘lơ̆ng hloh đơ̆ng rŏng kơ noh. Đĭ-đăng dôm tơdrong, đơ̆ng tơdrong ‘lơ̆ng, tơdrong kơnê̆, truh tơ dôm tơdrong gleh pơmat tih hloh, Kră Yang gơh iŏk dôm tơdrong noh wă ăn kơ lu bơ̆n đei tơdrong ‘lơ̆ng, wă kơ tơdrong arih lu bơ̆n jing ‘lơ̆ng hloh dơ̆ng. Kiơ̆ thoi tơdrong Kră Yang pơkă lăm Rôm 8:28:

“Bơ̆n ‘bôh bơngai bu mă ‘mêm kơ ‘Bok Kei-Dei, bơngai noh ‘Bok Kei-Dei rơih iŏk lui kơ Sư, lu bơngai thoi noh boih, mă sư tơ’bơ̆p tơdrong kiơ, bơ̆n băt kơ ‘Bok Kei-Dei ăn kơ sư hiôk ngăl.”

Đei jơ phŭt, tơ “anih sŏng sa” lăm tơdrong arih ih dang ei, đei minh pơnhan plei tơh Hà Lan lơ mă ih ưh kơ ‘maih sa. Păng tơdah ih ưh kơ lăp đon kơ dôm tơdrong noh, noh kư̆m ưh kơ tơdrong phara ôh.

Mă-lei băt kơ kiơ, jơ̆ dôm tơdrong pơlong lăng âu jing dôm lu tơdrong tơmam đei yua tih kơ bơhngol ih mơ̆n. Athei ăn kơ tơdrong pơang akâu ih kơdih athei “ơ̆t kơ sŏng sa”, păng ăn kơ Kră Yang wei rong pơang bơhngol ih hăm dôm tơdrong mă Sư băt kơ ih kăl, wă gơh dơ̆ng kơjăp ‘bơ̆t anăp đĭ-đăng dôm tơdrong gleh pơmat.

Yua kơ dôm tơdrong lu bơ̆n oei hlôi đei tơ’bơ̆p lăm năr ‘nâu, tam mă tơdrong ‘blep tôm ôh. Kiơ̆ thoi Pôl đei pơlung lu bơ̆n lăm Rôm 8:18:

“Mă bơ̆n đei tơdrong gleh truh pơmat-tat dang ei, mă-lei inh băt tơpă ning-mônh bơ̆n gô oei hơdai hăm ‘Bok Kei-Dei hiôk dêh; na mă bơ̆n pơmat-tat, bơ̆n kư̆m pơm hiôk thoi lĕ kơ năr jơhngơ̆m bơ̆n hiôk, yua kơ ning-mônh bơ̆n gô hiôk tơpă.”

Apĭnh đĭ đăng krao khan hơdai: Kơkuh kơ ‘Bă Kră Yang mă kon ‘mêm! Kon bơnê kơ Ih yua kơ Ih băt rơđah đĭ-đăng tôm tơdrong gleh lap đơ̆ng kon, păng dôm tơdrong gleh pơmat, dôm tơdrong pơlong lăng mă kon juăt kơ wer weh. Apinh Ih huay kơ jô̆ yo kơ kon lăm dôm jơ phŭt kon pơma tơdrong tơtok tơtăm, jơhngơ̆m kon jing rơdu, kơplah ‘bơ̆t anăp kon đei tôm tơdrong ưh kơ kiơ̆ thoi jơhngơ̆m đon kon. Apinh Ih iŏk dôm tơdrong pơlong lăng mă truh tơ kon, wă ‘bơ̆ hơmet jơhngơ̆m kon, bơtho kon băt kơ chơ̆n jơhngơ̆m, păng lui gơnang kơ Ih lơ hloh dơ̆ng. Apinh Ih chông ba kon yak năm tơ anăp lăm đon lui kơjăp, mă khan kon tam mă băt tôm tơdrong Ih oei bơ̆jang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng truh jơ phŭt lu bơ̆n athei tŭk lê̆ tơdrong juăt kơ weh wer đơ̆ng dôm lu tơdrong mă lu bơ̆n ưh kơ ‘maih wă tơ’bơ̆p. Tơplih kơ tơdrong sơ’ngon yua kơ dôm tơdrong lăm tơdrong arih tam mă tơplih, athei pơhrăm pơjao đĭ-đăng tôm tơdrong noh kơ Kră Yang, păng lui gơnang kơ Sư. Dôm tơdrong pơlong lăng mă lu bơ̆n hlôi đei tơ’bơ̆p đei pơm kơ lu bơ̆n gleh pơmat, ưh kơ lăp đon. Mă-lei Kră Yang oei gơh iŏk tôm tơdrong noh wă pơhrăm ăn kơ lu bơ̆n đon lui kơjăp hloh dơ̆ng, pơjing jơhngơ̆m lu bơ̆n, păng tơgŭm lu bơ̆n jing bơngai kră lăm đon lui kơ Sư. Athei pơjao tôm tơdrong noh kơ Kră Yang, păng lui kơ Sư oei bơ̆jang lăm tơdrong arih ih, păng iŏk ih wă bơ̆jang tơdrong Sư, mă lăm dôm lu tơdrong ih ưh kơ ‘maih wă tơ’bơ̆p.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.