Kư̆m đei lu bơ̆n juăt kơ akŭm kơkuh kơ Kră Yang tơ hnam akŭm alơ̆ng rŏ, anih mă dôm tơdrong đei hơmet kơdâu tơproh ‘lơ̆ng. Mă lei ih hăm băt ưh, tơdrong kơkuh ưh kơ khan mơ̆ng kơ anih dah jơ năr đĕch ôh. Tơdrong kơkuh tơpă lĕch đơ̆ng jơhngơ̆m bơ̆n mă tơ anih ayơ noh jơ̆ mă jơhngơ̆m bơ̆n wă pơchah, rơdu tơrăn păng băt chă Kră Yang noh kăl hloh. Kră Yang Bok Kei-Dei lu bơ̆n ưh kơ chă tơdrong ‘lơ̆ng gah ‘nguaih dah nơ̆r bơ̆r pơma hơgei lăm lu bơ̆n ôh, mă lei tơdrong Sư hiơ̆k wă noh jơ̆ minh jơhngơ̆m iơ̆m dim păng ‘maih chă Kră Yang tơpă.

Năr ‘nâu, năr 11/11/2026, tơdrong tơdă Amăn Jơ Krao Khan Rim Năr apinh wơ̆n lu bơngai mơ̆ng pơwao hơdai Nơ̆r Kră Yang hăm bơngai chih Jessica Teed kơ̆l ‘bai ĐƠ̆NG ĐAK MĂT TRUH TƠ HIÔK HIAN

“Thoi noh na Inh khan kơ ih tơpă, dôm tơdrong yoch sư lơ ră, mă-lei Inh mơnat ăn boih. Thoi noh na sư ‘mêm kơ Inh tơpă. Mă-lei bơngai bu ưh kơ gan wă apinh Inh pơklaih tơdrong yoch sư, bơngai noh ưh kơ gan ‘mêm kơ Inh dêh ôh.” (Luka 7:47)

Tŏk bŏk măng bơih mă lei inh oei tam mă gơh tep. Jơhngơ̆m inh bĕnh tơdrong tơchĕng păng gleh lap. Jơnoh, inh băt tơdrong inh kăl đĭ đăng noh jơ̆ đei Kră Yang oei hơdai. Inh kơkuh păng pơm dôm tơdrong bơ̆t anăp Kră Yang. Inh chĕp ba tơdrong pŭ trăp inh năm tơ Kră Yang

Tơdrong kơkuh kơ Kră Yang ưh kơ sĭ khan bơ̆n nŏng kơ chă anih ‘lơ̆ng ‘mơ̆i na bơ̆n kơkuh đĕch ôh. Mă lei tơdrong kơkuh lăm rim jơ phŭt rim anih, mă kơplah lu bơ̆n gleh lap, rơdu tơrăn păng ưh kơ đei kiơ gơh ôn bơ̆t anăp Kră Yang.

Luka 7 roi khan đei minh ‘nu bơngai Pharisi anăn sư Simôn krao wơ̆n Kră Yang Yêsu năm sŏng sa tơ hnam sư. Kơplah noh, minh ‘nu drŏ kăn mă đe jô̆ sư bơngai yoch lăm pơlei kơtơ̆ng Kră Yang oei tơ anih ‘noh na sư chĕp ba pơgang bâu phu. Bơngai drŏ kăn ei dơ̆ng tơ rŏng Kră Yang na nhơ̆m, sư nhơ̆m đak măt lĕch kơtoh bơ̆t jơ̆ng Kră Yang, sư iŏk sŏk sư kơdih sŭt, păng chŭm jơ̆ng Kră Yang đang kơnoh pik pơgang bâu phu. ‘Bok Simôn bôh thoi noh na sư tơchĕng lăm to khan: “Tơ̆ng bơngai âu bơngai pơtruh nơ̆r ‘Bok Kei-Dei tơpă, lei Sư băt kơ bơngai mă pel Sư ‘noh bơngai đi.” (trong 39)

Kră Yang Yêsu băt hơđăl bơngai drŏ kăn noh. Sư năm hloi tơ Kră Yang nhơ̆m păng roi dôm tơdrong ơh sơ’ngon oei đei lăm jơhngơ̆m kơ Kră Yang noh nhen thoi tơdrong kơkuh păng amêm kơ Kră Yang. Bơngai drŏ kăn ei ưh kơ hiơ̆k bơngơ̆t bơngai nai lăng sư thoi yơ, nhen tơ anih noh hơdrô̆ sư hăm Kră Yang đĕch.

Kră Yang Yêsu băt dôm tơdrong Simôn tơchĕng na khan hloi kơ sư: “Ơ Simôn, Inh wă khan kơ ih.” Na Simôn tơl: “Ơ ‘Bok Thây, Ih wă khan kiơ kơ inh?”Yêsu khan: “Sơ̆ đei minh ‘nu bơngai đei ‘bar ‘nu hre kơ sư jên. Minh ‘nu ei hre kơ sư kiơ̆ kơ jên so sơ̆ pơđăm-hrĕng, gah minh ‘nu dơ̆ng hre kơ sư pơđăm-jĭt đĕch. Mă-lei tôm kơ bre sư ưh kơ đei jên ‘mong ngăl. Yua kơ thoi noh na mă ‘bok tơm jên ei pơklaih kơ bre sư đĕch. Thoi noh na ‘bar ‘nu bre noh, ayơ mă hiôk hloh yua kơ tơ’ngla jên pơklaih hre?” Simôn khan: “Rŏ lăng bơngai mă hre lơ ‘biơ̆, sư hiôk hloh.” Yêsu khan: “Ih tơl trŏ boih.”

Thoi noh na Inh khan kơ ih tơpă, dôm tơdrong yoch sư lơ ră, mă-lei Inh mơnat ăn boih. Thoi noh na sư ‘mêm kơ Inh tơpă. Mă-lei bơngai bu ưh kơ gan wă apinh Inh pơklaih tơdrong yoch sư, bơngai noh ưh kơ gan ‘mêm kơ Inh dêh ôh. ( trong 40-43, 47)

Nơ̆r Bok Kei-Dei tơ’bôh kơ bơ̆n pơsĭt khan: tơdah lu bơ̆n băt kơdih bơ̆n ưh kơ gơh pơm minh tơdrong kiơ păng tơdrong yoch bơ̆n lei noh gô tơbăt kơ bơ̆n băt tơdrong ‘mêm mơnat Kră Yang jrŭ să ưh kơ băt dang yơ. Bơngai drŏ kăn ‘mêm kơ Kră Yang lơ dêh yua sư băt kơdih sư đơ̆ng Kră Yang mơnat ăn. Kơplah sư năm tơ Kră Yang hăm đak măt păng tơjur akâu, jơnoh bơih đei Kră Yang dui sư hăm tơdrong ‘mêm mơnat. Mă lei bok Simôn ưh kơ hlôh băt bơhngol sư oei hre kơ Kră Yang, na sư ưh kơ băt sư kư̆m kăl kơ đei tơdrong mơnat mơ̆n. Bơngai băt hơdăl kơdih sư đei Kră Yang mơnat ăn, lei bơngai noh rai ‘mêm păng kơkuh kơ Kră Yang rai hloh dơ̆ng.

Lơ wơ̆t lu bơ̆n tơchĕng khan gô pơm ‘lơ̆ng ‘mơ̆i na gơh năm jê̆ Kră Yang. Mă lei Kră Yang Yêsu ưh kơ kăl khan bơ̆n ‘lơ̆ng tôm mơ̆i na gơh năm jê̆ Sư. Sư wă kơ bơ̆n năm tơ Sư mă tơpă hăm đĭ jơhngơ̆m bơ̆n, ưh kơ pơ hiơ̆, ưh kơ đei ôn, ưh kơ pơm pơngiel păng ưh chĕp wei minh tơdrong kiơ. Kră Yang băt hơđăl dôm tơdrong lu bơ̆n pơm mă lei Sư oei ‘mêm kơ lu bơ̆n, sơng iŏk lu bơ̆n mă lu bơ̆n oei lăm măng mu hiong răm păng Sư gô pơdŏng lu bơ̆n.

Jơ ‘nâu ih hăm kăl kơ tơdrong hiôk hian hơđơ̆ng ưh? Đơ̆ng ki sơ̆ ih tam đei roi kơ Kră Yang tôm tơdrong na ưh kơ đei ôn minh tơdrong hloi? Kră Yang oei krao ih năm tơ Sư?

Đang kơ krao khan, inh băt tơdrong hiôk hian Kră Yang krôp gom inh. Inh băt Sư tơ’ngla ‘mêm kơ inh, hlôh băt păng mơnat kơ inh hloh kơ lu đe nai. Tơdrong pŭ trăp lăm inh kư̆m dai hơ iơch biơ̆ bơih. Sŭt đĭ đak măt, jơhngơ̆m inh bĕnh blai tơdrong bơnê yua kơ dôm tơdrong Kră Yang đei pơm kơ inh. Păng jơnoh, inh băt inh đei tơdrong hiôk hian. Tơdrong hiôk hian mă Kră Yang Yêsu ăn kơ bơngai drŏ kăn ei sơ̆ Sư đei khan thoi âu: “Đon lui ih dŏng pơklaih ih; yak năm mă ‘lơ̆ng bĕ.” (Luka 7:50)

Apĭnh đĭ đăng krao khan hơdai: Kơkuh kơ Kră Yang, apinh Ih tơgŭm kon pơ̆n nuih năm jê̆ Ih lăm rim jơ phŭt wă chăl arih băt hơđăl dôm tơdrong pŭn hiôk đơ̆ng Ih ăn. Apinh Ih bơtho kon băt kơkuh kơ Ih ưh kơ sĭ năr hiôk chơt đĕch ôh, mă năr gleh lap rơdu tơrăn kư̆m oei kơ kuh kơ ih mơ̆n. Chăl arih kon ling lang ‘mêm kơ Ih rai hloh dơ̆ng, yua kon băt Ih ‘mêm păng mơnat kơ inh tih jrŭ să. inh tih jrŭ să. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai ‘mơ̆ng mă ‘mêm kơ eng, kư̆m đei bơ̆n kơkuh tơ anih ‘lơ̆ng rŏ hloh, kư̆m đei kơkuh tơ anih kơnê̆ lŭch hloh, rơdu tơrăn hloh kơ đĭ đăng. Đơ̆ng ki sơ̆ buăl hăm tam đei ưh khan ưh kơ pơ̆n năm tơ Kră Yang yua buăl băt kơdih oei đei lơ dêh tơdrong yoch păng ưh kơ trŏ kơ Kră Yang mơnat? Tơdrong hơ’mon bơngai drŏ kăn pơm yoch tơbăt ăn kơ bơ̆n athei pơ̆n nuih năm jê̆ Kră Yang lăm rim jơ phŭt rim anih, yua kơ Kră Yang ưh kơ đei sơngah ôh kơ bu mă băt năm chă Sư. ‘Nĕ kơ ăn tơdrong yoch hăm mơlâu pơgăn ih chă Kră Yang. Rai băt kơdih kăl Kră Yang ‘mêm mơnat dang yơ, lei lu bơ̆n rai adrin đĭ jơhngơ̆m năm kơdâu tơ Sư dang noh mơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.