Kon bơngai lu bơ̆n đei tơdrong rơhing pran truh kơ hlĭch tơpă: rơhing gơh pơgơ̆r. Lu bơ̆n hơđơ̆ng tơdah tôm tơdrong đei truh trŏ kơ jơnăr proh hơmet, păng đei hiơ̆k tơtăm hloi lăm kơplah tôm tơdrong năm ưh kơ trŏ đơ̆ng hơmet. Mă lei ih hăm đei layơ ‘bôh băt, dôm kơ tơdrong hŏk iŏk tơplih tơdrong arih dơ̆ng, truh đơ̆ng dôm mơn ‘bôh mă lu bơ̆n ưh tim mă băt adrol? Trŏ kơplah đơ̆ng minh tơdrong pơgăn ưh kơ trŏ thoi kơdih wă jơ̆ jơ pơih blŭng a kơ trong alơ̆ng hloh mă ‘Bok Kei-Dei đei hơmet ăn kơ kon pơlei Sư.

Năr ‘nâu, năr 12/11/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng hơdai pơwao Nơ̆r Kră Yang hăm bơngai chih Dr. Paul J. Palma hăm kơ̆l ‘bai TƠDRONG TƠDĂ ‘LƠ̆NG HLOH

“Jơhngơ̆m kon bơngai đei lơ tơdă wă pơm, Mă-lei đei tơdrong Kră Yang wă gô jing.” ( Tơdrong Pơđơ̆k 19:21)

Hue dơ̆ng, rŏ lăng ưh kơ đei bơngai bu lăm lu bơ̆n đơ̆ng đei tơchĕng kơdih gô đei yak hlôi kơ minh tơdrong truh thoi tơdrong jĭ COVID-19 păng dôm tơdrong chĭt găn đunh lăm sơnăm 2020. Tôm tơdrong truh ưh kơ tam băt. Lăp lăm tŏsĕt jơnăr kơđeh, tơdrong arih rim năr lu bơ̆n thar đei tơplih hloi yua kơ dôm tơdrong hơgăt gah pơgang kơjăp, hăm dôm kơ đunh khei năr athei oei kơtă lăm hnam. Kơplah noh, rim ‘nu ưh kơ đei bu băt tơdrong ‘nâu gô dui đunh dĭng dang yơ dah tơdrong arih gô tơplih dĭng dang yơ.

Mĭnh lăm dôm tơdrong tơplih rơđah hơđăl hloh lăm khei năr tơdrong jĭ jơ̆ rim kơ Anih Khŭl Bơngai Lui đei tang ‘măng. Tơplih kơ đĭ hnam dơnŏ hơdai năm akŭm tơ Anih Akŭm tơ pơlei lăm rim pơge Năr Tơpơh thoi adrol, lu nhôn pơtơm hơkŭm hơdai lăm anih hnam sơng tơmoi hnam kơdih. Đĭ hnam dơnŏ hơdai băl, đŏk Nơ̆r ‘Bok Kei-Dei, krao khan păng akŭm kơkuh kơ Kră Yang. Đĭ lăm sơnăm 2020, lu nhôn kŭm hơdai hăm lu kon hơ’lơ̆p lăng đĭ sơ̆p “Hla Bơar Tơdrong Mơsêh” na pơhrăm dôm kơ chăl lăm Sơ̆p Hla Bơar Nơ̆r ‘Bok Kei-Dei ‘bơm truh kơ rim hơ’mon.

Lăm jơ năr đĭ hnam dơnŏ hơdai băl thoi noh đei jing minh kơnao gĭt kăl lăm trong yak năm đon lui kơ kon hơ‘lơ̆p inh. Kơplah hơdai pơhrăm Nơ̆r Kră Yang đơ̆ng rim kơ chăl phim ‘noh, klo akăn nhi đei jơ năr mơ̆ng păng tơl dôm nơ̆r apinh, oei tơtăm đơ̆ng lu kon. Lăp đơ̆ng rŏng dôm khei năr hơkŭm hơdai tơhnam, lu kon hơ‘lơ̆p inh đei ‘maih kơdih krao khan sơng iŏk Yang Yêsu pơm ‘Bok Dŏng Pơklaih kơdih sư.

Lăng đêl, dôm tơdrong truh ưh kơ tam băt adrol đơ̆ng sơnăm 2020 tă jơ̆ minh kơnao tơplih gĭt kăl hăm hnam dơnŏ lu nhôn. Kră Yang đei yua lăm khei năr nhen thoi ‘bĕnh tơdrong đei hơgăt wă ba đĭ đăng hnam dơnŏ năm jê̆ Sư hloh păng tơgŭm đon lui lu nhôn rai kơjăp.

Tơdrong hơmet đơ̆ng Kră Yang ngăl đei tơ’bôh kiơ̆ thoi dôm trong mă lu bơ̆n ưh kơ gơh wă băt adrol. Athei lăng lăm hơ’mon đơ̆ng ‘bok Pôl păng dôm bơngai hơdai hăm sư. Lu sư pơtơm ră roi Nơ̆r Kră Yang tơ anih Asia, mă lei Kră Yang đei minh tơdrong tơdă nai ‘măn ăn kơ lu sư. Hla ar Tơdrong Jang chăl 16 tơ’bôh ‘Bok Kei-Dei đei hơmet, tơplih tơdrong proh hơmet năm bơtho đơ̆ng ‘bok Pôl hăm lu bơngai năm hơdai. Nơ̆r ‘Bok Kei-Dei tơbăt, lăm jơ noh, kơdih Yang Bơhngol ‘Lơ̆ng đei găn lu sư ră roi gah Kră Yang tơ pơlei Asia (Tơdrong Jang 16:6)

Lu sư đĭ jơhngơ̆m hơpơi wă ră roi Tơdrong ‘Nao ‘Lơ̆ng tơ anih ‘nâu, mă lei Kră Yang đei minh tơdrong proh hơmet tih hloh ‘măn ăn kơ lu sư. Kơplah minh pah ‘măng đei tang lê̆, Sư hrĕnh tĕnh pơih minh pah ‘măng nai păng chông anhăk lu sư truh tơ Masêđôn, anih minh bơyan yuă iŏk đei trem oei chang gô lu sư. Tơ Philip, minh pơlei tih tơ Masêđôn, lu sư tơ ‘bơ̆p yă Liđa. Sư đei lui sơng iŏk Yang Yêsu, păng đĭ hnam dơnŏ sư kŭm thoi noh. Đơ̆ng rŏng kơ sư hơdai hăm hnam dơnŏ iŏk ‘batem (Tơdrong Jang 16:15), hnam yă Liđa jing anih lu bơngai lui akŭm hơdai, tơ’bôh mĭnh lăm dôm bơngai tơpôl Bơngai Lu Bơngai Lui blŭng a Sơ̆p Hla Bơar Nơ̆r ‘Bok Kei-Dei chih răk tơ dêh châu Âu.

Lăm sơ̆p Tơdrong Pơđơ̆k, ‘bok pơtao gơh hơgei hloh đơ̆n Isơrael jơ̆ Sôlômơn đei chih: “’Jơhngơ̆m kon bơngai đei lơ tơdă wă pơm, Mă-lei đei tơdrong Kră Yang wă gô jing.” (Tơdrong Pơđơ̆k 19:21)

Thoi noh, athei hơđơ̆ng pơyơ̆r tôm tơdrong proh hơmet lăm ti Sư. Mă tơnang ‘măng ih chang gô rai đei tang lê̆, dah rok trong tơ anăp gô đei weh tơ trong nai, athei lui gơnang khan tơdrong đơ̆ng Kră Yang Yêhôwa wă ling lang tôm mah păng ‘lơ̆ng rŏ hloh kơ chăl arih lu bơ̆n.

Apĭnh đĭ đăng krao khan hơdai: Kơkuh kơ Kră Yang, apinh chông anhăk kon kiơ̆ thoi Ih wă ăn kơ kon hlôi đei mơn dôm kơ trong yak năm anao lăm đon lui, păng yak lăm dôm bơyan kĕch iŏk ‘bĕnh tơdrong đei yua. Apinh ăn kơ kon tơdrong kơjăp lăm jơhngơ̆m wă lui ngeh khan, mă đei minh jơ nhen thoi oei tang lê̆ ‘bơ̆p anăp măt kon, Ih oei gơh pơih ăn minh trong yak nai ‘lơ̆ng hloh tôm tơdrong kon đei tơchĕng truh. Kon kŭp kơ̆l krao khan hăm anăn Yang Yêsu Krist, Amen.

Ơ lu bơngai mơ̆ng mă ‘mêm kơ eng, mă lu bơ̆n đei proh hơmet tôm mah truh dang yơ, dôm tơdrong proh hơmet Kră Yang ‘măn ăn kơ lu bơ̆n oei ling ling tih hloh dơ̆ng, tih hloh kơ tôm tơdrong lu bơ̆n đei tơchĕng pơwao. Trŏ lăp, trŏ kơ dôm kơnao blư truh ưh kơ tam băt jơ̆ anih tơgŭm lu bơ̆n wơ̆ pran jrŭ să hloh lăm đon lui. Minh tơdrong truh ‘ngoaih kơ tơdrong tơchĕng hơmet kŭm trŏ pơih ăn jơ năr kơ lu bơ̆n ưh tim mă đei tơchĕng truh, păng minh tơnang ‘măng tang lê̆ kŭm đei chông trong ba truh mĭnh trong rok ‘nao ‘bĕnh ‘blai tơdrong pŭn hiôk. Na kơplah lăng đêl, lu bơ̆n ‘nao wă hlôh băt khan lăm trong yak năm ưh kơ thoi kơdih hơpơi wă ‘noh, tơdrong ‘Bok Kei-Dei wă ling lang kĕ jei păng pơkeh tôm mah lăm tơdrong arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.