Muaj ib hmo ntsiag to, tomqab ib hnub ua ntau txoj haujlwm, koj rov qab los tsev ntawm tus kheej – tsis yog thawj coj, tsis yog tus neeg ntaus thawj, thaum twg twb npaj txhij txhua lo lus yuav teb ntawm txhua qhov teeb meem. Nyob hauv chav ntsiag to ntawd, qhov chaw ntsiag to ntawd cia li tsuam nyhav nyhav rau lub hlwb. Koj pom tias yus twb thov Vajtswv rau ntau tus tib neeg, ris ntau lub nra rau ntau tus, tiamsis tsis tau muaj ib zaum twg tsa suab rau ib tug twg hais tias “Thov nej thov Vajtswv rau kuv!” puas yog ntev loo no, peb yuam kev tias twb ywj pheej, lawm ces txhais tias yus yuav tau cim civ tiv txhua yam?

Hnub no, yog hnub 14/11/2026, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dayna Lovelady dhau ntawm Zaj kawm THOV – THOV VAJTSWV PAB KUV

“Cov kwvtij, nej yuav tsum thov Vajtswv pab peb thiab” (I Thexalaunikes 5:25)

Ntau xyoo dhau los, thaum mus rau tebchaws Yixalayees kawm thiab mus ncig, kuv thov cov neeg uas nrog kuv ua haujlwm ua ke txheeb txheeb thov Vajtswv rau kuv. Lawv yog cov neeg uas tau nrog kuv ua ke thiab rub kuv tes hauv txoj haujlwm ntau xyoo. Yim ris ntau lub nra ua thawj coj, kuv yim pom tias yus cheem tsum ntau lo lus thov ntawm tej kwv tij viv ncaus nyob hauv Vajtswv npaum cas. Ntau zaug peb xav tias: twb yog tus coj hauv tsev neeg, hauv ntiajteb, kev lag luam lossis Pawg Ntseeg ces yus yuav tsum coj kom khov, thiab tsis txhob vam khom rau lwm tus tej lus thov Vajtswv pab. Puas tau muaj zaum twg koj hnov zoo li ntawd lawm tau?

Dhau ntawm tsab ntawv xa rau Pawg Ntseeg Thexalaunikes, Paulus qhia rau peb pom txog daim duab ntawm ib tug thawj coj nws tsis txaj muag thov kom lwm tus thov Vajtswv pab rau Nws. Yawg tsa suab hu: “Cov kwvtij, thov nej niaj hnub thov Vajtswv pab peb kom peb muab siab rau qhia Vajtswv Txojlus. Vajtswv Txojlus thiaj yuav nrov ncha mus thoob plaws txhua qhov chaw, thiab muaj nqis rau sawvdaws ib yam li twb muaj nqis rau hauv nej lawm. Thiab thov Vajtswv pab kom peb dim ntawm cov neeg siab phem thiab limhiam txhais tes, rau qhov yeej yuav muaj ibtxhia tsis ntseeg Vajtswv Txojlus.” (2 Thexalaunikes 3:1-2).

Paulus thov kom lawv thov Vajtswv kom Vajtswv tej lus tau qhia tawm thiab Vajtswv lub npe tau txhawb nqa. Tib txhij ntawd, yawg kuj thov kom lawv thov Vajtswv pab rau yus thaum muaj kev tawm tsam thiab tav txoj kev qhia Txojmoo Zoo.

Txawm yog nyob hauv tes haujlwm CBN thiab Operation Blessing los thaum uas siv zog qhia txog Tswv Yexus txoj kev cawmdim mus ntau qhov hauv ntiajteb no los, yeej muaj tej lub sijhawm peb ntsib kev tawm tsam. Nyob rau tej lub sijhawm txomnyem li ntawd, peb yim pom tias yus cheem tsum kev thov Vajtswv pab ntawm coob tug. Kuj ib yam li peb tau thov Vajtswv pab ntau tus nyob hauv ntiajteb no, kuv tus kheej los kuj cheem tsum lwm tus thov Vajtswv pab thiab.
Thov kom lwm tus thov Vajtswv rau yus tsis yog lub cim qhia paub tias yus qaug zog, tiamsis qhov no qhia rau peb paub vam khom Vajtswv. Paulus kuj ua qhov no ib yam li nyob hauv I Thexalaunikes 5:25: “Cov kwvtij, nej yuav tsum thov Vajtswv pab peb thiab”

Dhau ntawm cov lus thov no, Paulus ntuas Pawg Ntseeg thiab peb txhua tus niaj hnub nim no tias thov Vajtswv yog ib yam tseem ceeb heev hauv peb lub neej thiab tes haujlwm. Paulus tsis yog tsuas thov Vajtswv pab kom yawg tau tiv thaiv thaum muaj cov tawm tsam xwb, tiamsis tseem xav kom Vajtswv tej lus tau qhia tawm sai thiab Vajtswv lub npe tau txhawb nqa. Paulus nkag siab tias yawg yuav vam khom tsis tau rau yawg lub zog, tiamsis cheem tsum tej kwv tij thov Vajtswv pab kom sawv khov kho qhia Txojmoo Zoo.

Txawm yuav ntsib tej kev sim siab thiab teeb meem twg los, peb yeej muaj txaus kev ntseeg sawv khov khov tias Vajtswv yuav yuav hnov peb tej lus taij thov. Nws yog tus ncaj ncees yuav tiv thaiv, yuav pab thiab pub kev muaj yeej rau peb. Hnub no, cia siab tias peb yuav tas siab thov Vajtswv rau peb tej kwv tij, kom ntau tus tau hloov pauv hauv Txojmoo Zoo, kom Vajtswv tej lus tau qhia tawm thiab Vajtswv haiv neeg tau tiv thaiv nyob hauv tej kev sim siab ntawd.

Thov caw nrog kuv peb thov Vajtswv ua ke: Leej Txiv saum ntuj, kuv ua Koj tsaug vim lub hwjchim hauv tej lus thov nrog Vajtswv tej lus ntuas kuv tias kuv yeej tsis nyob ib leeg hauv txua kev no. thov Vajtswv pab kom kuv ncaj ncees fij lo lus thov Vajtswv no, kom Vajtswv tej lus tau qhia rau txhua qhov, thiab Vajtswv haiv neeg tau tiv thaiv. Thov ntxiv zog rau kuv kom sawv khov kho hauv txoj kev ntseeg, txawm yog thaum kuv ntsib tej kev tab kaum, tawm tsam. Thov kom Vajtswv tej lus tau qhia tawm thiab Vajtswv lub npe tau thawb nqa rau txhua qhov. Kuv thov hauv Tswv Yexus Khetos lub npe, Amees.

Cov kwv tij txhua tus, peb txhua tus puav leej cheem tsum lwm tus thov Vajtswv rau yus, thiab kuj tau nqua hu kom thov Vajtswv pab rau tej kwv tij ib ncig. Hnub no, txhob txaj muag qhia yus tej kev cheem tsum rau cov neeg uas yus ntseeg siab. tib txhij ntawd, kuj yuav tau nug lawv moo thov Vajtswv rau ib tug neeg uas Vajtswv tso rau hauv koj lub siab. thaum sib pab hauv txoj kev thov Vajtswv, peb yuav kawm paub vam khom Vajtswv ntau thiab koom sawv khov kho hauv tej kev sim siab hauv lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.